Uvithila aantu ‘ayehe’
1. Omomukalo guni aauvithi yevaangeli ya pyokoka ya fa omuntu onkulungu mokuhonga nenge mokuhambula?
1 Omuntu ngoka onkulungu mokuhonga nenge mokuhambula oha kala niilongitho oyindji. Oha kala e shi kutya uunake nopeni e na oku yi longitha. Tu li aauvithi yevaangeli, natse otu na iilongitho yi ili noyi ili tayi vulu oku tu kwathela miilonga yetu. Pashiholelwa, otu na uubroshure womaludhi ogendji mboka wa nyanyangidhwa wu tu kwathele tu uvithile aantu ‘ayehe.’ (1 Kor. 9:22) Uubroshure wumwepo mboka owa popiwa mokagwedhwa, noka yelitha kutya owa nuninwa aantu yeni nonokutya owu na okugandjwa ngiini.
2. Uunake tatu vulu okulongitha uubroshure muukalele?
2 Uuna tatu vulu okulongitha uubroshure: Omuntu ngoka ha hongo nenge ha hambula oha longitha owala oshilongitho shontumba uuna sha pumbiwa. Natse otu na wo okukala hatu gandja uubroshure uuna tu wete kutya otawu ka kwathela omuntu ngoka. Katu na owala oku wu gandja moomwedhi moka owo tawu gandjwa. Pashiholelwa, ngele omwedhi ngoka otatu gandja embo Omalongo gOmbiimbeli, ihe otatu uvithile moshitopolwa moka aantu kaaye na naanaa ohokwe yOmbiimbeli, otashi vulika shi li nawa tu gandje owala okabroshure. Ngele otu wete kutya otaye ende taya ulike ohokwe mOmbiimbeli, otatu vulu oku ya ulukila embo Omalongo gOmbiimbeli.
3. Omolwashike tu na okukala hatu longitha iilongitho yetu nuunyakwa?
3 Ombiimbeli otayi popile muuwanawa mboka oonkulungu miilonga yawo. (Omayel. 22:29) Kunena, kapu na iilonga ya simanenena yi vulithe okuuvitha ‘elaka etoye.’ (Rom. 15:16) Opo tu kale ‘ihaatu si ohoni iilonga yetu,’ otu na okukala tu shi okulongitha iilongitho yetu nuunyakwa. — 2 Tim. 2:15.