Ninga omalongekidho ngashingeyi opo wu ka tamunune mo uukalele woye
1. Pethimbo lyoomwedhi dhEdhimbuluko ohatu kala tu na ompito yini nongiini tatu vulu oku yi ilongekidhila?
1 Pethimbo lyoomwedhi dhEdhimbuluko ohatu kala tu na ompito ‘yokupandula OMUWA noku mu hambelela.’ (Eps. 109:30) Mbela ito ka tamununa mo uukalele woye muMaalitsa opo wu ulike kutya owa pandula Kalunga ngoka e li Omugandji gwekulilo? Tameka okuninga omalongekidho ngashingeyi. — Omayel. 21:5.
2. Ngoye nosho wo yalwe omwa li mwa ningi po shike sho mu uvu kutya otamu vulu okukutha uukwathelikokolindjila muApilili tamu longo oowili oonshona?
2 Uukwathelikokolindjila: Omvula ya zi ko aauvithi momagongalo oya li ya nyanyukwa shili sho yu uvu kutya otaya vulu okulonga oowili oonshona sho taya kutha uukwathelikokolindjila muApilili. Omumwatate gumwe okwa nyola a ti: “Ondi li natango mosikola yongula, noinandi mona ompito yokuninga omukokolindjila gwondjigilile. Ihe otandi ka udhitha ofooloma yuukwathelikokolindjila ndi longe oowili 30 momwedhi gwaApilili, ihe otandi ka kambadhala ndi longe oowili 50.” Omumwameme ngoka ha longo ethimbo lyu udha okwa ti: “Oowili 30 ashike, otandi vulu lela oku dhi gwanitha po ndho!” Sho etseyitho ndika lya ningwa, omumwameme gumwe e na omimvo 80 nasha, ngoka a li omukokolindjila, okwa ti: “Ompito ndjino oyo naanaa nda kala nda tegelela! Jehova okwa kala e shi kutya otandi ka nyanyukilwa uukwathelikokolindjila molwaashoka oku shi shi kutya onda li handi nyanyukilwa nale uukokolindjila.” Yalwe mboka ya li inaaya vula okukutha uukwathelikokolindjila oya li yi itulile po omalalakano gokulonga oshindji muukalele shi vulithe nale.
3. Omolwomatompelo geni tashi ka kala oshiwanawa okukutha uukwathelikokolindjila momwedhi gwaMaalitsa, Apilili naMei?
3 Omwedhi gwaMaalitsa otagu ka kala omwedhi gu li nawa lela nokukutha uukwathelikokolindjila molwaashoka aauvithi otaya ka vula okulonga oowili 30 nenge 50. Oshikwawo, okuza mOlyomakaya, 17 Maalitsa, otatu ka kala tu na oshikonga shi ikalekelwa shokuhiya aantu kEdhimbuluko mu 5 Apilili. Oyendji otaya ka nyanyukilwa noonkondo uukalele wawo e taya ka kala ya hala okukutha uukwathelikokolindjila muApilili nosho wo muMei, taya longo oowili 50.
4. Ongiini tatu vulu okutamununa mo uukalele wetu, noshizemo otashi ka kala shini?
4 Pelongelokalunga lyeni lyuukwanegumbo ta li landula, kundathaneni nkene kehe gumwe gwomune ta vulu okutamununa mo uukalele we poomwedhi dhEdhimbuluko? (Omayel. 15:22) Galikana kuJehova a yambeke oonkambadhala dhoye. (1 Joh. 3:22) Sho to tamununa mo uukalele woye, ito ka gwedha ko owala kokuhambelela kwoye Jehova ihe oto ka gwedhela ko wo kenyanyu lyoye. — 2 Kor. 9:6.