Ino kala ihoo ningi omakonakonombiimbeli, molwaashoka wu wete wi ipyakidhila noonkondo
1. Mbela omolwashike aantu yamwe ihaaya kala ya hala naanaa okuninga omakonakonombiimbeli?
1 Yamwe ihaya kala naanaa ya hala okuninga omakonakonombiimbeli, molwaashoka oyi ipyakidhila noonkondo. Okukwathela omukonakonimbiimbeli ohashi pula ethimbo. Omuntu oho kala wa pumbwa ethimbo lyokwiilongekidhila ekonakono, lyoku li ninga nosho wo lyoku mu kwathela nkene e na okuungaunga nomaupyakadhi ge. Omuyapostoli Paulus okwa ti kutya okwa li a hupula omwenyo gwe a kwathele mboka yomuTessalonika ya tseye Jehova. (1 Tes. 2:7, 8) Mbela ongiini tatu vulu okuninga omakonakonombiimbeli nonando ohatu kala twi ipyakidhila noonkondo?
2. Mbela ongiini ohole yokuhola Jehova tayi tu inyengitha tu longithe ethimbo lyetu nawa?
2 Okulongela Jehova oshinima hashi pula ethimbo: Oshili oyo kutya okulongela Kalunga ohaku pula ethimbo. Pashiholelwa, ohatu longitha ethimbo okuya komakugongala, muukalele, okulesha Ombiimbeli nosho wo okugalikana. Aaihokani ohaya longitha ethimbo lyawo okunyanyukilwa pamwe. Itatu ka kala tuu twa nyanyukwa shi vulithe mpono ‘okulongitha nawa ethimbo’ lyetu tu longele Jehova, molwaashoka otu mu hole! (Ef. 5:15-17; 1 Joh. 5:3) Jesus okwa ti kutya iilonga yokuninga aantu aalongwa oya simana mokulongela Kalunga. (Mat. 28:19, 20) Okutedhatedha kwaashino otaku ke tu kwathela tu kale twa hala okuninga omakonakonombiimbeli.
3. Ongiini tatu vulu okukwathela omukonakoni ngele opu na sha hashi tu imbi muukalele?
3 Ihe ongiini ngele elandulathano lyetu ohali yiwa moshipala kiilonga, kuuvu woshinamenena nenge kiilonga yilwe yegongalo? Aauvithi yamwe mboka haya zaazaa po ohaya ningi omakonakonombiimbeli okupitila mongodhi nenge mokompiuta. Mboka elandulathano lyawo lya yiwa moshipala kuuvu woshinamenena, ohayi ithana aakonakoni yawo ye ye komagumbo gawo opo ya konakone. Yamwe ohaya pula aauvithi ooyakwawo mboka ye shi okwiinekelwa ye ya kwathele okuninga ko kekonakonombiimbeli lyawo uuna ya za po.
4. Omalaleko nuuyamba geni tatu ka mona ngele ohatu kutha ombinga mokuninga omakonakonombiimbeli?
4 Paulus okwa li ha kala a nyanyukwa okulongitha ethimbo lye noonkondo dhe mokukwathela yalwe yi ilonge oshili. (Iil. 20:35) Sho a li a dhiladhila kiiyimati yiilonga ye mbyoka a li a mono muTessalonika, okwa li i inyengithwa a pandule Jehova. (1 Tes. 1:2) Enyanyu ndyoka hatu mono muukalele otali ki indjipala ngele inatu etha omaipyakidhilo getu ge tu imbe okukutha ombinga mokuninga omakonakonombiimbeli.