Landula oshiholelwa shomupolofeti Amos
1. Omolwashike oshiholelwa shaAmos tashi tu tsu omukumo kunena?
1 Mbela owa li wu uvite inoo gwana okuuvitha esiku limwe, molwaashoka wu wete kutya ino mona elonga lyasha, nenge wu wete wu li pevi unene? Ngele osho, oto ka mona etsomukumo okuza moshiholelwa shaAmos. Amos okwa li omusita gwoonzi nokwa li he elufuna omathimbo gamwe miikunino, ihe nonando ongaaka, Jehova okwa li e mu nkondopaleke u uvithe etumwalaka lya simana. (Amos 1:1; 7:14, 15) Sha faathana, Jehova oha longitha aaifupipiki naamboka ya talika ko ye li pevi muuyuni kunena. (1 Kor. 1:27-29) Oshike tatu ilongo moshiholelwa shomomupolofeti Amos shoka tashi vulu oku tu kwathela muukalele kunena?
2. Omolwashike tatu vulu okukala tu na omukumo uuna tatu patanekwa?
2 Ino teka omukumo uuna to patanekwa: Amazja, omuyambi ngoka a li ha longele iikalunga momazimo omulongo guukwaniilwa waIsraeli gokuumbangalantu sho u uvu Amos ta hunganeke okwe mu lombwele a ti: ‘Shuna kegumbo. Ino uvithila we muka. Otu na elongelokalunga lyetu yene.’ (Amos 7:12, 13) Amazja okwa li a pilike oohapu dhomuhunganeki Amos, opo omukwaniilwa Jerobeam a vule okwiindika Amos kaa tsikile we niilonga ye yokuuvitha. (Amos 7:7-11) Ihe Amos ina shuna nando omutse miipeta. Kunena, aawiliki yomalongelokalunga ohayi imanga uukuni kumwe naawiliki yopapolitika, opo ya kambadhale okuhepeka aapiya yaJehova. Ihe Jehova ote tu shilipaleke kutya oshikondjitho kehe tashi hambulwa shi tu kondjithe, itashi tompola sha nenge tu tye itashi vulu oku tu dhima po thiluthilu. — Isa. 54:17.
3. Etumwalaka ndyoka tu na kunena olya kwatela mo iinima iyali yini?
3 Uvitha epangulo lyaKalunga, opo wu ka yambekwe monakuyiwa: Nonando etumwalaka lyaAmos olya li tali popi epangulo ndyoka tali ka adha omazimo omulongo guukwaniilwa wAaisraeli, okwa li a hulitha embo lye ndyoka lye mu lukilwa netumwalaka tali ti kutya Jehova ota ka tungulula Israeli noku shi yambeka. (Amos 9:13-15) Natse ohatu uvitha kombinga ‘yesiku lyaKalunga lyepangulo,’ ndyoka tali ya. Esiku ndyoka oli li owala ombinga yimwe “yonkundana ombwanawa yUukwaniilwa” ndjoka hatu popi. (2 Pet. 3:7; Mat. 24:14, NW) PuArmagedon Jehova ota ka hanagula po aakolokoshi, ihe aayuuki otaya ka kala moparadisa kombanda yevi. — Eps. 37:34.
4. Eshilipaleko lini tu na sho tatu longo ehalo lyaJehova?
4 Kashi shi oshipu okukala twa tokola toko okulonga ehalo lyaJehova nokukala metsokumwe neiyapulo lyetu nosho wo okuuvitha etumwalaka lyUukwaniilwa muuyuni mbuka mu na aantu oyendji mboka taye tu kondjitha. (Joh. 15:19) Kakele kaashono, Jehova ote tu shilipaleke kutya ota tsikile noku tu nkondopaleka tu pondole mokulonga ehalo lye, ngaashi naanaa a li e shi ningile Amos. — 2 Kor. 3:5.