Okuhwepopaleka uunkulungu wetu muukalele — Dheula aakonakoni ya kale nondjigilile yokukonakona paumwene

Omolwashike sha simana?: Opo aakonakonimbiimbeli yetu ya hume komeho pambepo, oye na okukala hayi ipalutha nomalongo gomuule gomOohapu dhaKalunga. (Heb. 5:12–6:1) Shono otashi pula oonkambadhala. Osha kwatela mo wo okuyelekanitha uuyelele uupe naamboka tu shi nale nokutala kutya otawu tu kwathele ngiini. (Omayel. 2:1-6) Ngele aakonakoni yetu oyi ilongo okuninga omapekapeko, otashi ke ya kwathela ya yamukule omapulo gopaMbiimbeli taya longitha iileshomwa yetu. Oonkambadhala ndhoka haya ningi, opo ya tule miilonga shoka yi ilonga, otadhi ke ya kwathela ya vule okwiidhidhimikila omashongo ngoka taya ka tsakaneka. — Luk. 6:47, 48.

Nkene tatu vulu oku shi ninga:

Mu lombwela kutya manga inaa tameka nekonakono lye osha simana a galikane kuJehova. — Joh. 14:26; 1 Kor. 2:10.
Petameko, ladhipika omukonakoni a kale hi ilongekidhile ekonakono lye kuyele. Mu ulukila nkene ho konakona, mu longa wo nkene e na okutenda iitya nomautumbulilo ngoka ga simana.
Omukonakoni na yamukule omapulo niitya ye mwene. Yanda okukala to mu pula omapulo ngoka tage mu ningitha a kale owala ta lesha omayamukulo.
Mu ladhipika a kale ha lesha Ombiimbeli esiku kehe. Mu ulukila nkene elandulathano lyokulesha Ombiimbeli ndyoka li li kepandja lyetu lyokointaneta, jw.org hali longithwa. Okukala ha lesha Ombiimbeli esiku kehe otaku pula oonkambadhala, ihe otaku mu etele uuwanawa. — Eps. 1:2, 3.
Mu ulukila nkene e na okumona omayamukulo komapulo gopaMbiimbeli ta longitha o-Watchtower Library nenge ONGULUMAMBO MOINTANETA. Mu kwathela a mone omafupipiko giileshomwa, unene tuu mbyoka hayi longithwa pokugongala kwetu kehe.

Kambadhala wu shi ninge momwedhi ngu:

Pehulilo lyokapalanyolo nenge lyontopolwa, pula omukonakoni a popye paufupi kutya okwi ilongo po shike. Ngele ku na omukonakonimbiimbeli, kala ho idheula mokungonga ehokololo lyontumba okuza mOmbiimbeli nenge okatendo mOshungolangelo paufupi wu hwepopaleke okulesha kwoye.