Jesus okwa ti ehulilo otali ya uunake?

NATU TALE OMANYOLO GAALI MOKA JESUS A POPYA KOMBINGA YEHULILO LYUUYUNI:

MATEUS 25:13 OTA TI: “Kaleni ano mwa tonata, oshoka inamu tseya esiku notundi.”

MARKUS 13:33 OTA TI: “Kotokeni ano, ne mu tonate, oshoka inamu tseya kutya ethimbo otali thiki uunake.”

Ombiimbeli otayi tu kwathele tu uve ko kutya, kapu na omuntu kombanda yevi e shi esiku ehulilo tali ya. Ihe Kalunga okwa tula po “ethimbo lyokondandalunde,” sha hala okutya, “esiku notundi” moka ehulilo tali ya. (Mateus 24:36) Mbela shono otashi ti kutya itatu vulu okudhimbulula kutya ehulilo oli li popepi? Otatu vulu, oshoka Jesus okwa lombwela aalongwa ye iinima yontumba kondandalunde mbyoka tayi ya kwathele ya mone kutya ehulilo oli li popepi.

OMANDHINDHILIKO GEHULILO

Aalongwa oya li ya pula Jesus e ya pe endhindhiliko ‘uuna te ya nehulilo lyuuyuni.’ Jesus okwa ti: “ligwana otayi ka thikama okukondjithathana, iilongo otayi ka matukilathana. Otaku ke ya oondjala nomakakamo gevi okoombinga noombinga.” (Mateus 24:3, 7) Okwa ti wo kutya otaku ke ya “nomalega,” sha hala okutya, omikithi dhomikwawu. (Lukas 21:11) Mbela iinima mbyono Jesus a kala a hunganeka owu yi wete tayi ningwa pethimbo lyetu? Iinima mbyono ngawo oyi li oshitopolwa shendhindhiliko lyehulilo lyuuyuni.

Sho tatu popi ngeyi aantu oyendji kombanda yevi otaya mono iihuna kiita, kondjala, komakakamo gevi nosho wo komikithi. Pashiholelwa, mo 2004, ekakamo lyevi enene olya li lya tukuka mefuta lyaIndia nolye etitha ekuthikuthi enenenene lya zi mefuta nolya dhipaga aantu 225 000. Muule womimvo ndatu, aantu ye thike poomiliyona 6,9 oya si kombuto yo-Corona muuyuni awuhe. Jesus okwa ti kutya iiningwanima yoludhi ndono otayi ulike kutya ehulilo lyuuyuni oli li popepi.

‘OMASIKU GOPEHULILO’

Ombiimbeli oya popya kutya onkalo otayi ka kala ya tya ngiini “pomasiku gopehulilo.” (2 Petrus 3:3, 4) Timoteus omutiyali 3:1-5 okwa popya kutya aantu momasiku gahugunina otaya ka kala ye na iikala iiwinayi. (Tala oshimpungu: “Shoka tashi ka ningwa sho ehulilo lyuuyuni li li pokuya.”) Mbela kunena oho mono aantu mboka yi ihole, aanalwiho, aakwanyanya yo kaye holathane? Iikala mbyono nayo otayi ulike kutya ehulilo lyuuyuni oli li popepi.

Mbela omasiku gahugunina otaga ka kala ethimbo li thike peni? Ombiimbeli otayi ti kutya “okathimbo okafupi kowala.” Konima yaashono, Kalunga ota ka hanagula po mboka taya “yonagula po evi!” — Ehololo 11:15-18; 12:12.

OPARADISA OYI LI POPEPI

Kalunga okwa tula po nale esiku nowili sho ta ka hulitha po uuyuni mbuka wa kolokosha. (Mateus 24:36) Ihe Ombiimbeli otayi ti kutya Kalunga “ina hala, ku kale nando ogumwe ta geelwa.” (2 Petrus 3:9) Mbela ndjono kayi shi tuu onkundana ombwanawa? Kalunga okwa pa omuntu kehe ompito i ilonge kombinga yehalo lye nokukale ha vulika kuye. Elalakano lye, okwa hala wu ka hupe pehulilo lyuuyuni nowu ka kale nomwenyo sigo aluhe sho evi tali ka ninga oparadisa.

Kalunga okwa tula po elongekidho, opo aantu muuyuni awuhe ya kwathelwe yi ilonge nkene taya vulu oku ka kala muuyuni uupe. Jesus okwa ti kutya onkundana ombwanawa yUukwaniilwa waKalunga otayi “ka uvithilwa aantu ayehe.” (Mateus 24:14) Oonzapo dhaJehova muuyuni awuhe odha li dha longo oowili dha konda poobiliyona odhindji miilonga yokuuvitha noyokulonga aantu Ombiimbeli. Jesus okwa ti kutya iilonga yokuuvitha oyi na okulongwa kombanda yevi manga ehulilo inaali ya.

Omapangelo gopantu kage na siku inaaga hulithwa po. Ihe onkundana ombwanawa oyo kutya oto vulu oku ka hupa pehulilo lyuuyuni, wu ka kale mOparadisa ndjoka Kalunga u uvaneka. Oshitopolwa tashi landula otashi popi shoka wu na okuninga, opo wu ka kale muuyuni uupe.