Tsikila okuuvitha omolwohole

1. Oshike twa ilonga pokugongala kwokomumvo kwomo 2023?

POKUGONGALA kwokomumvo,a kwomo 2023 otwa li twa mono omauvoko ga pupalekwa kombinga yeitaalo lyetu. Opwa li pwa ningwa omatseyitho gatuntula kombinga yiilonga yetu yokuuvitha. Pashiholelwa, otwa li twa ilongo kutya yamwe otashi vulika ya ka kale ye na ompito yokugama kombinga yoshigwana shaJehova, nokuli nokonima sho Babilon oshinene sha hanagulwa po. Otwa li wo twa tseyithilwa kutya okuza muNovomba 2023, aauvithi itaya ka pulwa we ya lopote shoka ya longa muukalele. Mbela shino osha hala okutya iilonga yetu yokuuvitha inayi simana, yo inayi endelela ngaashi nale? Hasho nando.

2. Omolwashike iilonga yokuuvitha ya pumbwa okulongwa neendelelo esiku kehe? (Markus 13:10)

² Esiku kehe iilonga yetu yokuuvitha ohayi ende tayi ningi ya simana noya endelela unene. Omolwashike tatu tile ngawo? Omolwaashoka ethimbo otali endelele noonkondo. Natu ka taleni kwaashoka Jesus a popi kombinga yiilonga yokuuvitha momasiku gahugunina. (Lesha Markus 13:10.) Sha ikolelela kehokololo ndyoka li li muMateus, Jesus okwa ti kutya onkundana ombwanawa otayi ka uvithwa kombanda yevi alihe, manga “ehulilo” inaali ya. (Mat. 24:14) Uutumbulilo mboka “ehulilo”otawu ulike kutya onkalelo yuuyuni waSatana otayi ka hulithwa po thiluthilu. Jehova okwa tula po nale esiku notundi yiiningwanima mbyoka yi li poku ka ningwa ngashingeyi. (Mat. 24:36; 25:13; Iil. 1:7) Esiku kehe ohali tu hedhitha popepi nesiku ndyoka. (Rom. 13:11) Momukokomoko gwethimbo ndyoka, otu na okutsikila okuuvitha sigo ehulilo tali ya.

3. Oshike hashi tu inyengitha tu uvithe?

³ Sho tatu dhiladhila kiilonga yetu yokuuvitha, oshi li nawa tu ipule epulo ndyoka lya simana kutya omolwashike hatu uvitha onkundana ombwanawa? Oku shi popya paunathangwa, ohole oyo hayi tu inyengitha tu uvithe. Sho hatu kutha ombinga miilonga yokuuvitha ohatu ulike kutya otu hole onkundana ombwanawa, otu hole aantu ooyakwetu, naashoka sha dhenga mbanda, otu hole Jehova nosho wo edhina lye. Ngashingeyi natu ka kundathaneni iinima mbyoka kooshimwe.

OHATU UVITHA MOLWAASHOKA OTU HOLE ONKUNDANA OMBWANAWA

4. Ohatu inyenge ngiini, uuna twa lombwelwa onkundana ombwanawa?

⁴ Mbela oto dhimbulukwa kutya owa li wu uvite ngiini sho wa li wa uvu oonkundana oombwanawa? Tashi vulika gumwe gwaandjeni a mona okanona nenge wa mona iilonga iiwanawa mbyoka wa li wa hala. Kapu na omalimbililo, oho kala wa halelela okulombwela yaandjeni nosho wo ookuume koye onkundana ndjoka ombwanawa. Mbela oshinima sha tya ngawo osha li she ku ningilwa, sho wa uvu onkundana ombwanawa yUukwaniilwa waKalunga ndjoka ya dhenga mbanda?

5. Owa li wu uvite ngiini oshikando shotango sho wa ilongo oshili okuza mOohapu dhaKalunga? (Tala wo omathano.)

⁵ Dhiladhila nkene wa li wu uvite sho wa ilongo oshikando shotango oshili okuza mOohapu dhaKalunga. Owa ilongo kutya Tate yetu gwomegulu oku ku hole nokwa hala wu kale oshitopolwa shaamboka haye mu longele. Okwa uvaneka kutya itaku ka kala we uuwehame, okumona iihuna nonokutya oto vulu okukala netegameno lyoku ka mona ookuume koye mboka ya sa, sho taya ka yumudhwa muuyuni uupe nosho wo iinima yilwe oyindji. (Mark. 10:29, 30; Joh. 5:28, 29; Rom. 8:38, 39; Eh. 21:3, 4) Shoka wa ilongo, oshe ku nyanyudha. (Luk. 24:32) Owa li wu hole shoka wa ilonga noino shi mwenena. — Yelekanitha Jeremia 20:9.

6. Owa ilonga shike moshimoniwa shaErnest naRusa?

⁶ Natu taleni koshimoniwa tashi landula. Omumwatate gwedhina Ernestb okwa li e na omimvo 10 sho tate gwe a si. Ernest okwa ti: “Onda li tandi ipula: ‘Mbela tate okwa ya megulu? Nenge okwa sa sigo aluhe?’ Onda li handi kala nda tsila ondumbo uunona mboka wu na oohe.” Ernest okwa li ha yi komawendo pandjigilile e ta tsu oongolo pombila yahe e ta galikana ta ti: “Kalunga alikana onda hala okutseya mpoka tate e li.” Konima yomimvo 17 lwaampono okuza sho he a si, Ernest okwa li a taamba ko ekonakonombiimbeli. Okwa li a tuntukwa sho a ilongo kutya oonakusa kaye shi sha, oya fa ye li moomposi oondhigu nonokutya Ombiimbeli oya uvaneka kutya otaya ka yumudhwa monakuyiwa. (Omuuv. 9:5, 10; Iil. 24:15) Lwahugunina, okwa mono omayamukulo komapulo ngono a kala ta ipula nago ethimbo ele. Okwa li a tuntukwa omolwoshili yOmbiimbeli ndjoka a ilongo. Omukulukadhi gwe, Rose, naye okwa tameke okukonakona nokwa kala e hole etumwalaka lyUukwaniilwa. Mo 1978 oya ninginithwa. Oshili ndjoka ya mono oya li ye yi lombwele yaandjawo, ookuume nayalwe mboka ya hala okupulakena. Oshizemo, oya kwathele aantu ye vulithe po 70 sigo ya ninginithwa.

7. Oshike hashi ningwa po, uuna ohole yokuhola oshili yOmbiimbeli ya mene omidhi momitima dhetu? (Lukas 6:45)

⁷ Osha yela kutya uuna oshili yOmbiimbeli ya mene omidhi momitima dhetu, itatu kala twe yi mwenena. (Lesha Lukas 6:45.) Ohatu kala tu uvite ngaashi aalongwa yaKristus yomethelemumvo lyotango mboka ya ti: “Itatu vulu okukala twa mwena tu kale ando itaatu hokolola shoka twe shi mono notwe shi uvu.” (Iil. 4:20) Otu hole oshili noonkondo, notwa hala oku yi tseyithila oyendji ngaashi tashi vulika.

OHATU UVITHA, MOLWAASHOKA OTU HOLE AANTU

8. Oshike hashi tu inyengitha tu uvithile aantu onkundana ombwanawa? (Tala oshimpungu “Kala wu hole aantu — ya ninga aalongwa.”) (Tala wo ethano.)

⁸ Ngaashi Jehova nOmwana, natse otu hole aantu. (Omayel. 8:31; Joh. 3:16) Ohatu etele ohenda mboka ‘kaaye na Kalunga nokaaye na wo etegameno.’ (Ef. 2:12) Otaya sile momaupyakadhi gonkalamwenyo, ihe tse otu na okandjatha kokuhupitha oomwenyo hoka ya pumbwa, ano onkundana ombwanawa yUukwaniilwa waKalunga. Ohole yetu nolukeno lwoku ya kenukila, ohayi tu inyengitha tu ninge oonkambadhala dhoku ya faalela onkundana ombwanawa. Etumwalaka ndyoka li na ongushu otali vulu okuningitha omitima dhawo dhi kale dhi na etegameno, notali ya kwathele ya kale nonkalamwenyo ombwanawa ngashingeyi notali ya pe etegameno ‘lyokukalamwenyo kwashili,’ ano omwenyo gwaaluhe muuyuni uupe waKalunga. — 1 Tim. 6:19.

9. Elondodho lini hatu gandja li na ko nasha nonakuyiwa, nomolwashike? (Hesekiel 33:7, 8)

⁹ Ohole yetu yokuhola aantu ohayi tu inyengitha wo tu ya londodhe kombinga yehulilo lyuuyuni mbuka wa kolokosha, ndyoka tali hedha popepi. (Lesha Hesekiel 33:7, 8.) Otu uvitile ohenda aantu ooyakwetu, mwa kwatelwa yaandjetu mboka ihaaya longele Jehova. Aantu oyendji kaye shi shoka tashi ka ningwa po monkalamwenyo yawo, ano “uudhigu uunene, inaawu kala ko nando onale, okuza keshito lyuuyuni sigo ongashingeyi, noitawu ka kala ko we.” (Mat. 24:21) Otwa hala ya tseye kutya oshike tashi ka ningwa po pethimbo ndyoka lyepangulo, ano sho omalongelokalunga giifundja taga ka kuthwa po, naasho uuyuni awuhe wa kolokosha tawu ka hanagulwa po puArmagedon. (Eh. 16:14, 16; 17:16, 17; 19:11, 19, 20) Ohatu galikana, opo aantu oyendji ya inyenge ketumwalaka lyelondodho ngaashi tashi vulika, noye tu wayimine melongelokalunga lya yogoka ngashingeyi. Ihe ongiini kombinga yaamboka ihaaya pulakene kelondodho ndyoka pethimbo ndika, mwa kwatelwa noyaandjetu?

10. Omolwashike sha simana okutsikila okulombwela aantu kombinga yaashoka tashi ka ningwa masiku?

¹⁰ Ngaashi sha yelithwa moshitopolwa sha tetekele, Jehova okwa hala aantu ayehe mboka taye ke mu itaala ngele ya mono Babiloni oshinene tashi hanagulwa po, ya hupithwe. Osha simana noonkondo tu tsikile okulombwela aantu ngashingeyi kombinga yoshinima shoka. Natu taleni kwaashika. Shoka tatu ya lombwele ngashingeyi otashi vulika shi ya dhimbulukithe oshinima shontumba. (Yelekanitha Hesekiel 33:33.) Otashi vulika taya ka dhimbulukwa elondodho ndyoka ya uva kutse, e tali ya inyengitha ye tu wayimine melongelokalunga lya yogoka manga kuyele. Omunandholongo gwomuFilippi, okwa li a lundulula omutima gwe konima owala sho ‘ekakamo lyevi enene lya ningwa,’ shoka tashi ulike kutya yamwe mboka inaaya inyenga ketumwalaka ngashingeyi otashi vulika nayo ya ka lundulule omitima dhawo, konima yehanagulo lya kwata miita lyaBabiloni oshinene. — Iil. 16:25-34.

OHATU UVITHA, MOLWAASHOKA OTU HOLE JEHOVA NEDHINA LYE

11. Omolwashike Jehova oye a gwana okupewa eadhimo, esimano noonkondo? (Ehololo 4:11) (Tala wo omathano.)

¹¹ Etompelo lya simanenena kutya omolwashike hatu uvitha onkundana ombwanawa, olyo kutya otu hole Jehova Kalunga nosho wo edhina lye eyapuki. Otwa tala ko uukalele wetu wu li omukalo gwokutanga Kalunga ngoka tu hole. (Lesha Ehololo 4:11.) Shono otatu tsu kumwe nasho kutya Jehova Kalunga okwa gwana okusimanekwa kaalongeli ye aadhiginini, omolweadhimo, esimano noonkondo. Ohatu mu simaneke omolweadhimo lye, uuna tatu gandja uunzapo kuyalwe mboka tawu ya tompo kutya oye a “shiti iinima ayihe,” notu li po tu na omwenyo, molwaashoka oye e gu tu pa. Ohatu longitha oonkondo dhetu, uuna tatu longitha ethimbo lyetu niiniwe yetu, opo tu vule okuuvitha ngaashi oonkalo dhetu tadhi shi pitike. (Mat. 6:33; Luk. 13:24; Kol. 3:23) Oku shi popya paufupi, otu hole okupopya kombinga yaKalunga ngoka tu hole. Ohatu inyengithwa wo tu lombwele yalwe kombinga yedhina lye nosho wo shoka tali ti. Omolwashike mbela?

12. Ohatu yapulitha ngiini edhina lyaJehova miilonga yokuuvitha?

¹² Ohole yetu yokuhola Jehova ohayi tu inyengitha tu yapulithe edhina lye. (Mat. 6:9) Otwa hala okulombwela aantu kutya iifundja iinyanyalithi mbyoka Satana a popya kombinga yalyo, kayi shi yoshili. (Gen. 3:1-5; Job 2:4; Joh. 8:44) Uuna tu li muukalele, ohatu kala twa halelela okupopila edhina lyaKalunga ketu nokulombwela oshili ayehe mboka ya hala okupulakena kombinga ye. Otwa hala kehe gumwe a tseye kutya uukwatya we wa simanenena owo ohole, kutya omukalo gwe gwokupangela ogu li pauyuuki nogu uka, nonokutya Uukwaniilwa we masiku otawu ka hulitha po okumona iihuna akuhe nokweetela aantu ombili nenyanyu. (Eps. 37:10, 11, 29; 1 Joh. 4:8) Uuna tatu lombwele aantu iinima mbika kombinga yaJehova, otatu yapulitha edhina lye. Ohatu li yapulitha wo mokukala tu shi kutya otu li metsokumwe nalyo. Ngiini mbela?

13. Omolwashike tu uvite uuntsa nuunambano sho hatu ithanwa Oonzapo dhaJehova? (Jesaja 43:10-12)

¹³ Jehova okwe tu ithana “oonzapo” dhe. (Lesha Jesaja 43:10-12.) Omimvo dhontumba dha ka pita, ontumwafo ya za kolutuwiliki oya tile: “Shoka sha simana unene kutse osho kutya kehe gumwe gwomutse ota vulu okukala a nyanyukwa, sho ha ithanwa Onzapo yaJehova.” Omolwashike tatu tile ngawo? Natu taleni kethaneko tali landula. Ngele owa pumbwa gumwe a kale omukalelipo gwoye mompangu, oto ka hogolola omuntu ngoka wu shi nowa inekela. Omuntu ngoka e na epopilo ewanawa nota ningitha uumbangi mboka ta gandja, wu kale wu shi okwiinekelwa. Sho Jehova e tu hogolola tu li Oonzapo dhe, oku ulike kutya oku tu shi nawa, okwe tu inekela kutya otatu vulu okulombwela yalwe kutya oye awike Kalunga kashili. Ohatu kala tu uvite twa simanekwa sho tu li Oonzapo dhe. Ohatu longitha ompito kehe tu tseyithile yalwe edhina lye nokukondjitha iifundja mbyoka ya popiwa kombinga ye. Kungawo, ohatu kala metsokumwe nedhina ndyoka tu uvite uuntsa molwalyo, ano, Oonzapo dhaJehova. — Eps. 83:18, NW; Rom. 10:13-15.

OTATU KA TSIKILA OKUUVITHA SIGO OKEHULILO

14. Iinima yini yituntula tashi vulika yi ka ningwe monakuyiwa yi li popepi?

¹⁴ Inatu nyanyukwa tuu sho tatu ka mona shoka tashi ka ningwa monakuyiwa yi li popepi! Omolwelalekonuuyamba lyaJehova, otu na etegameno lyokumona aantu oyendji taya taamba ko oshili manga uudhigu uunene inaawu tameka. Otwa nyanyukwa wo noonkondo sho puudhigu uunene, ano pethimbo edhigu ndyoka inaali monika nando onale, tatu ka mona aantu oyendji taya zi mo muuyuni waSatana wa kolokosha, noku tu wayimina mokutanga Jehova. — Iil. 13:48.

15-16. Otu na okutsikila okuninga shike, nosigo uunake?

¹⁵ Momukokomoko gwethimbo ndyoka, otatu ka kala tu na iilonga okulonga. Otu na uuthembahenda wokukutha ombinga miilonga ya simana yokuuvitha onkundana ombwanawa yUukwaniilwa waKalunga kombanda yevi alihe, mbyoka itaayi ka endululwa we nando. Pethimbo olyo tuu ndyoka, otwa pumbwa okutsikila okulondodha aantu kombinga yaashoka shi li poku ka ningwa. Aantu oya pumbwa okutseya kutya ehulilo lyuuyuni mbuka otali hedha popepi neendelelo. Opo nduno ngele ethimbo lyepangulo lya thiki, otaya ka tseya kutya etumwalaka ndyoka twe ya uvithila olya zi kuJehova Kalunga. — Hes. 38:23.

¹⁶ Oshike nduno twa tokola toko okuninga? Okwiinyengithwa kohole yokuhola onkundana ombwanawa naantu ooyakwetu, nokomeho gaayihe, okohole yokuhola Kalunga nedhina lye. Otatu ka tsikila okuuvitha nehalo, meendelelo nonuulaadhi sigo Jehova ta ti: “Sha gwana!”