Ombiimbeli otayi ti ngiini kombinga yokuyonagulwa kwevi?

Amushangandjayi gwIigwana ya Hangana, António Guterres, okwa popi mo 4 Apilili 2022 pomutumba gwaaleli yomapangelo, sho taya kundathana kombinga yelunduluko lyonkalo yombepo, a ti: ‘Aantu otaya ningi iinima oyindji mbyoka tayi eta elunduluko lyonkalo yombepo. Onkee otwa tegelela iilando oyindji yi ka ningine kohi yomeya, tu ki iyadhe muupyu wa matutu, iikungulu ya fa iihuna, enota lya ileni mutale nosho wo iimeno niinamwenyo oyindji tayi hulu po. Shino kashi shi omitotolombo nenge oongano. Aanongononi otaya ti kutya ngele omapangelo itaga lundulula omikalo dhago nkene taga longitha oonzo dhoonkondo dhomeshito, onkalo oko ya uka hoka.’

Oshitopolwa shi na oshipalanyolo: “Flooding Chaos in Yellowstone, a Sign of Crises to Come,” shi li moshifokundaneki shedhina The New York Times, sho 15 Juni 2022, osha ti: ‘Aanongononi oya popya kutya masiku omahala konyala ge li 423 moka mu na iinima oyindji yomeshito moAmerika otaga ka gumwa nayi kelunduluko lyonkalo yombepo. Iinima iiwinayi mbyoka tayi ka ningilwa omahala ngoka oya faathana niiponga yopaunshitwe mbyoka ya popiwa mOmbiimbeli, ngaashi omililo nomafundja, omeya giikangwa taga hengumuka po, omeya gomomafuta taga ende taga indjipala nomaluteni.’

Mbela omaupyakadhi ngoka twa zi nokupopya onaga ka kandulwe po ngaa siku limwe? Ngele osho, olye te ke ga kandula po? Tala shoka Ombiimbeli tayi ti.

Okuyonagulwa kweshito okwa popiwa mOmbiimbeli

Ombiimbeli otayi ti kutya Kalunga ota ka ‘hanagula po mboka taa yonagula po evi.’ (Ehololo 11:18) Ovelise ndjika otayi tu longo iinima itatu tayi landula:

1. Sho-1. Iinima mbyoka aantu haya ningi otayi yonagula po nayi evi.

2. Oshi-2. Mboka taya yonagula po evi otaya ka hanagulwa po.

3. Oshi-3. Aantu hayo taya ka kandula po omaupyakadhi ngoka taga yono po eshito, ihe oKalunga mwene.

Evi otali ka kala monkalo ombwanawa monakuyiwa

Ombiimbeli otayi ti kutya “evi otali kala sigo aluhe.” (Omuuvithi 1:4) Oku na okukala aantu sigo aluhe.

• Ombiimbeli otayi ti: “Aayuuki otaa ka thigulula evi e taa kala mo sigo aluhe.” — Episalomi 37:29.

Kehe shimwe shoka kaashi li we nawa meshito, otashi ka kala shi li nawa.

• Ombiimbeli otayi ti: “Ombuga nomalondo otaga ka nyanyukwa, ontale otayi ka tundulukwa nokutemuna oongala.” — Jesaja 35:1.