Uupyakadhi mboka hawu etithwa kuuwike, onkee ngaa tawu tsikile — Shoka Ombiimbeli tayi ti

Shi ikolelela kolopota yomuuyuni awuhe ndjoka opo ya piti,a otayi ti kutya omuntu gumwe gwomaantu yane, oha kala e uvite uuwike.

• Omunashipundi gwehangano World Health Organization’s Commission on Social Connection, Chido Mpemba, okwa ti: “Okwiiyoolola ko kuyalwe, ohaku vulu okuguma omuntu nayi, kashi na nduno mbudhi kutya ogwomimvo dhini noha zi peni.”

Mepingathano naashoka aantu oyendji haya dhiladhila, uuwike ihawu adha owala aakuluntu nenge mboka ye hole okwiikalela, ihe naamboka wo ye na uukolele, haya pondola, aagundjuka nosho wo mboka ye li mondjokana. Okwiitongola ko kuyalwe nosho wo okukala wu uvite uuwike, ohayi vulu lela okuguma omuntu nayi palutu nopamaiyuvo.

• Omutandindohotola gwokoAmerika, Vivek Murthy, okwa ti: “Uuwike kawu shi owala omaiyuvo omawinayi, ihe owu vulithe po.” Okwa gwedha ko a ti: “Okusa, omolwokwiiyoolola ko kuyalwe, okwa faathana neso ndyoka hali etithwa kokuhila uusekeleta 15 mesiku.”

Shoka Ombiimbeli tayi ti

Omushiti gwetu ina hala tu itete ko kuyalwe. Elalakano lyaKalunga olyo aantu ya nyanyukilwe eendathano ewanawa notali tungu.

• Ekotampango lyOmbiimbeli: “Omuwa Kalunga okwa popi e ta ti: ‘Inashi opala, omuntu i ikalele oye awike.’” — Genesis 2:18.

Kalunga okwa hala tu kale tu na ekwatathano ewanawa naye. Okwa uvaneka okuhedha popepi natse, ngele otwa ningi oonkambadhala tu hedhe popepi naye. — Jakob 4:8.

• Ekotampango lyOmbiimbeli: “Mboka ye shi kutya oya pumbwa ewiliko lyaKalunga oya nyanyukwa, oshoka Uukwaniilwa womegulu owawo.” — Mateus 5:3.

Kalunga okwa hala tu mu longele pamwe nayalwe. Uuna tatu shi ningi, ohashi tu kwathele pamaiyuvo.

• Ekotampango lyOmbiimbeli: “Tu silathaneni oshimpwiyu, tu kwathathaneni mokuholathana nomokulongelathana uuwanawa. Inatu etha po okugongala pamwe, . . . ihe natu kumagidhathaneni.” — Aahebeli 10:24, 25.

Opo wu mone uuyelele owundji kutya omolwashike sha simana okukondjitha uuwike, lesha oshitopolwa “Loneliness in a World of Mass Connection.”