Omwaalu gwiinamwenyo yomiihwa ogwa shuna pevi noopelesenda 73, momukokomoko gwomimvo 50 — Ombiimbeli otayi ti ngiini?

Momasiku 9 Kotoba 2024, ehangano lyokuyambidhidha pashimaliwa iinamwenyo yomiihwa muuyuni, olya gandja olopota tayi kumitha nkene aantu taya ungaunga nayi niinamwenyo. Ehangano olya ti kutya “omimvo 50 dha ka pita (1970-2020) omwaalu gwiinamwenyo ogwa shuna pevi noopelesenda 73.” Olopota oya londodha ya ti: “Otatu vulu okutya shoka tashi ka ningwa po momimvo ntano dhi li komeho, otashi ka utha kutya onakuyiwa yiinamwenyo otayi ka kala ya tya ngiini kevi.”

Aantu oyendji ohaya haluthwa koolopota ngaashi ndjoka. Otu hole opulaneta yetu ombwanawa nokatu hole okumona iinamwenyo tayi hepekwa. Ohatu kala tu uvite ngawo, molwaashoka Kalunga okwe tu shita, opo tu sile oshimpwiyu iinamwenyo. — Genesis 1:27, 28; Omayeletumbulo 12:10.

Otashi vulika wu ipule to ti: ‘Mbela otatu ka vula ngaa okugamena iinamwenyo ayihe kombanda yevi? Ombiimbeli otayi ti ngiini?’

Etegameno lyonakuyiwa

Nonando ohatu ningi oonkambadhala ngaashi tatu vulu tu gamene iinamwenyo, Kalunga oye owala ta vulu oku yi gamena. Ombiimbeli oya hunganeka mEhololo 11:18 kutya Kalunga ota ka ‘hanagula po mboka taa yonagula po evi!’ Ovelise ndjika otayi tu longo iinima iyali:

1. 1. Kalunga ota ka hulitha po thiluthilu aantu mboka haya yonagula evi nenge taye li hanagula po.

2. 2. Masiku Kalunga ota ka katuka onkatu. Shoka otu shi shi ngiini? Oshoka kunena aantu mondjokonona oye shi ulika kutya otaya vulu okuhulitha po iinamwenyo thiluthilu kombanda yevi, shi vulithe nale.

Mbela Kalunga ota ka ninga po shike a kandule po uupyakadhi mboka? Ota ka longitha epangelo lye lyomegulu nenge Uukwaniilwa we, a pangele evi alihe. (Mateus 6:10) Epangelo ndyoka otali ka longa aantu aavuliki noku ya dheula nkene ye na okusila oshimpwiyu nokugamena iinamwenyo. — Jesaja 11:9.