Enda pamwe naKalunga ndele to teya osho shiwa
“Otava kunu omhepo ndelenee otava ka teya oshikungulu.” — HOSEA 8:7.
1. Ongahelipi hatu dulu okweenda pamwe naJehova?
NATU tye nee ngeno oto tavakana moshitukulwa sha nyika oshiponga. Oto ka kala wa amenwa ngeenge oto ende pamwe naumwe oo e shii nawa oshitukulwa osho. Otashi ka kala shi li pandunge okweenda pamwe nomunhu oo, ponhele yokuya oove auke. Osho otashi dulu okufaafanifwa nonghalo omo tu li. Oku shi popya pafaneko, Jehova okwa hala oku tu wilika molweendo letu okupitila mombuwa inene younyuni ou woukolokoshi. Ohatu ningi nawa ngeenge ohatu ende pamwe naye, ponhele yokukendabala okuyukifa eenghatu detu kufye vene. Ongahelipi hatu dulu okweenda pamwe naKalunga? Omokulandula ewiliko olo ta yandje okupitila mEendjovo daye.
2. Oshike tashi ka kundafanwa moshitukulwa eshi?
2 Oshitukulwa sha tetekela osha li sha kundafana oiningwanima tai faneke sha, oyo ya hokololwa muHosea etukulwa lo-1 fiyo eti-5. Ngaashi twe shi mona, ope na oilihongomwa oyo hatu dulu okulihonga moiningwanima oyo, oyo tai dulu oku tu kwafela tu ende pamwe naKalunga. Paife natu ka kundafaneni omanenediladilo onhumba okudja metukulwa eti-6 fiyo eti-9. Otashi ka kala ekwafo okuhovela nekwatelokumwe lomatukulwa oo ane.
Ekwatelokumwe li li pauxupi
3. Hokolola pauxupi oshikalimo shaHosea etukulwa eti-6 fiyo eti-9.
3 Jehova okwa li a tuma Hosea a ka xunganekele unene tuu ouhamba womapata omulongo okolundume aIsrael. Ouhamba oo wa li yo wa shiivika nedina Efraim omolwonghandangala inene oyo epata olo la li tali dana mouhamba oo, owa li wa ekelashi Kalunga. Hosea etukulwa eti-6 fiyo eti-9 ota ulike kutya oshiwana osho osha li sha ulika okuhenoudiinini mokunyona ehangano laJehova nokulonga oilonga youkolokoshi. (Hosea 6:7) Osha li she lineekela oikaumelongo yomounyuni, ponhele yokulineekela Jehova. Molwaashi osha li tashi kunu osho shii, osha li tashi ka teya osho shii, sha hala okutya, osha li tashi ka hangika ketokolo lidjuu. Ndele exunganeko laHosea okwa li yo li na etumwalaka tali hafifa omutima. Oshiwana okwa li sha shilipalekwa kutya osha li tashi dulu okwaalukila kuJehova nokufilwa onghenda ngeenge osha ulike elivelombedi tali di komutima.
4. Oilihongomwa yomexunganeko laHosea ilipi hatu ka kundafaneni?
4 Momatukulwa oo ane aHosea, ohatu dulu okumona mo ewiliko la wedwa po olo tali tu kwafele tu ende pamwe naKalunga. Natu konakoneni oilihongomwa ine: (1) Elivelombedi lashili ohali ulikwa okupitila moilonga, ndele hameendjovo ashike; (2) Kalunga iha hafifwa ashike komayambo; (3) Jehova oha nyemata ngeenge ovalongeli vaye tave mu fiye po; nosho yo (4) opo tu teye osho shiwa otu na okukuna osho shiwa.
Nghee elivelombedi lashili hali ulikwa
5. Hosea 6:1-3 ota yelifa oshitwa sha fimana shilipi?
5 Exunganeko laHosea otali tu hongo shihapu shi na sha nelivelombedi nosho yo efilonghenda. MuHosea 6:1-3, ohatu lesha taku ti: “Ileni, tu shune kOmwene. Osheshi Ye e tu pombaula, ndele Oye te ke tu velula. Oye e tu denga, ndele Ye ote ke tu manga. Nge pa pita omafiku avali, Oye te ku nyumuna, mefiku etitatu Oye te tu pendula, opo fye tu kale nomwenyo koshipala shaye. Ndele natu shiiveni hano, heeno, natu lalakaneni okushiiva Omwene. Ye ote uya shili, ngaashi etendo leluwa, ndele ote ke uya kufye ngaashi odula, ngaashi odula yokulombo, ei tai tutike edu.”
6-8. Oshike sha li sha puka shi na sha nelivelombedi laIsrael?
6 Olyelye a popya eendjovo odo da shangwa meevelishe odo? Vamwe otava ti kutya eendjovo odo oda li da popiwa kOvaisrael vehe fi ovadiinini notava ti kutya oshiwana osho shihe fi shiduliki osha li tashi liningifa sha fa she livela ombedi, tashi diladila kutya Kalunga okwa li te ke shi fila onghenda. Ndelenee vamwe otava ti kutya omuprofeti Hosea oye a li a popya eendjovo odo, a li ta indile oshiwana shi alukile kuJehova. Kashi na nee mbudi kutya olyelye a li a popya eendjovo odo, epulo la fimanenena ololo kutya: Mbela oshiwana shaIsrael shouhamba womapata omulongo osha li sha alukila kuJehova ashishe, sha ulika elivelombedi lashili? Hasho nandenande. Jehova okwa popya okupitila muHosea a ti: “Akutu Efraim, ohandi ku ningi ngahelipi, akutu Juda, ohandi ku ningi shike, eshi ohole [“ouwanghenda,” NW] yeni i li ngaashi oshilemo shongula, nongaashi omume tai yaumuka diva?” (Hosea 6:4) Osho kasha li tuu tashi ulike kutya oshiwana shaKalunga osha li sha nyonauka pamhepo! Ouwanghenda ile ohole i na oudiinini hanga ya kana po — ngaashi oshihemime shongula osho hashi kana po diva ngeenge etango tali piti. Nonande osha yela kutya oshiwana osho osha li tashi liningifa sha fa she livela ombedi, Jehova ka li e na etomheno loku shi fila onghenda. Oupyakadi owa li peni mbela?
7 Elivelombedi laIsrael kala li shili tali di komutima. Hosea 7:14 ota popi shi na sha nokuhahokwa kwaJehova oshiwana shaye, ta ti: “Itava ifana nge komitima davo, ndelenee hava yayana momitala davo.” Ovelishe 16 otai weda ko tai ti: “Otava aluka, ndelenee hakuou wOpombada,”sha hala okutya, “hakelongelokalunga la tumbala.” (Eshangelo lopedu mo-NW.) Oshiwana kasha li sha hala okwaalukila kelongelokalunga laJehova la tumbala mokuninga omalunduluko oo a pumbiwa opo shi tungulule ekwatafano lasho naye. Osha yela kutya kava li va hala okweenda pamwe naKalunga.
8 Opa li yo pe na oupyakadi umwe vali u na sha nelivelombedi lOvaisrael. Oshiwana okwa li tashi twikile okunyona — omanyono mahapu e lili noku lili, mwa kwatelwa ekonda, okudipaa, okuvaka, okulongela oikalunga nosho yo okupanga oukaume uhe li pandunge noiwana imwe i lili. MuHosea 7:4, oshiwana osha faafanifwa ‘nediko,’ ile efiya lokuteleka eemboloto, molwaashi osha yela kutya osha li sha xwama mouhalu mwii. Molwaashi oshiwana osho osha li sha nyonauka pamhepo, mbela osha li sha wana okufilwa onghenda? Hasho nandenande! Hosea okwa li a lombwela oshiwana osho oshinashibofa kutya Jehova ota ka “dimbulukwa oulunde wavo” nota “ka handukila omatimba avo.” (Hosea 9:9) Kava li tava ka filwa onghenda!
9. Eendjovo daHosea otadi tu hongo shike shi na sha nelivelombedi nosho yo efilonghenda?
9 Eshi hatu lesha eendjovo daHosea, oshike hatu lihongo shi na sha nelivelombedi nosho yo efilonghenda? Oshihopaenenwa tashi londwele shOvaisrael vehe fi ovadiinini otashi tu hongo kutya opo tu mone ouwa mefilonghenda laJehova, otu na okuulika elivelombedi tali di komutima. Elivelombedi la tya ngaho ohali ulikwa ngahelipi? Jehova iha pukifwa komahodi ile keendjovo dongaho. Elivelombedi lashili ohali ulikwa okupitila moilonga. Opo omunyoni a filwe onghenda, oku na okweefa po filufilu eendjila daye doulunde nokukaleka okukalamwenyo kwaye metwokumwe nomifikamhango daJehova dopombada delongelokalunga laYe la tumbala.
Jehova iha hafifwa ashike komayambo
10, 11. Ngaashi sha ulikwa moshihopaenenwa shOvaisrael, omolwashike Jehova iha hafifwa ashike komayambo?
10 Paife natu kundafaneni oshilihongomwa oshitivali osho tashi dulu oku tu kwafela tu ende pamwe naJehova. Osho kutya: Kalunga iha hafifwa ashike komayambo. Hosea 6:6 ota popi shi na sha naJehova ta ti: “Efilonghenda [“ouwanghenda,” NW] nda hala, hayambo. Okushiiva Kalunga nda hala, osheshi ku dule omaxwikiloyambo.” Didilika kutya Jehova okwa hala ouwanghenda ile ohole i na oudiinini — oo u li oukwatya womomutima — nosho yo eshiivo loku mu shiiva. Ndele otashi dulika u lipule kutya: ‘Mbela omolwashike ovelishe oyo tai ti kutya Jehova ina hala ‘eyambo’ nosho yo “omaxwikiloyambo”? Mbela kaa li oshiteelelwa shOmhango yaMoses?’
11 Omayambo nomaxwikiloyambo okwa li oshiteelelwa shOmhango, ndele ovanhu vopefimbo laHosea ova li ve na oupyakadi wa kwata moiti. Osha yela kutya opa li Ovaisrael ovo va li hava yandje omayambo pandjikilile omolwokulimonikifa kutya ohava tila Kalunga. Ndele pefimbo opo tuu opo, ova li tava nyono. Mokunyona kwavo ova li va ulika kutya omitima davo kada li di na ohole i na oudiinini. Ova li yo va ulika kutya ova ekelashi eshiivo lokushiiva Kalunga, molwaashi kava li ve li metwokumwe nalo. Ngeenge oshiwana kasha li shi na oikala yomutima ya yuka nokasha li tashi lalakanene onghedi yokukalamwenyo ya yuka, omayambo asho okwa li e na ongushu ya shike? Omayambo asho okwa li matondifa kuJehova Kalunga.
12. Hosea 6:6 ota londwele ngahelipi ovanhu vokunena?
12 Eendjovo daHosea otadi londwele aveshe ovo hava i keengeleka kunena. Ohava yambele Kalunga omayambo mokulonga oilonga yelongelokalunga, ndele elongelokalunga lavo ihali nwefa mo lela elihumbato lavo lakeshe efiku. Mbela ovanhu va tya ngaho ova hokiwa ngoo shili kuKalunga ngeenge omitima davo ihadi ve linyengifa va mone eshiivo lashili loku mu shiiva nosho yo okutula moilonga eshiivo olo mokuhenuka oilonga youlunde? Inapa kala nande oo ta diladila kutya oilonga yopalongelokalunga oyo aike tai hafifa Kalunga. Jehova iha hokwa ovanhu ovo hava kendabala okuhokiwa kuye mokukala nemoniko longaho letilokalunga, ndele kave li shili metwokumwe nEendjovo daye. — 2 Timoteus 3:5.
13. Omayambo oludi lilipi hatu yambe, ndele oshike osho tu na okukaleka momadiladilo shi na sha nongushu yao?
13 Tu li Ovakriste vashili, ohatu kaleke momadiladilo kutya Kalunga iha hafifwa ashike komayambo. Oshoshili kutya ihatu yambele Kalunga omayambo oinamwenyo. Ndele nande ongaho, ohatu ‘etele Kalunga omahambeleloyambo nokutya, oshiimati shomilungu odo tadi pandula edina laye.’ (Ovaheberi 13:15) Osha fimanenena okuhakala ngaashi Ovaisrael ovalunde vopefimbo laHosea, hatu diladila kutya ohatu dulu okudiminwa po enyono mokuyambela Kalunga omayambo opamhepo a tya ngaho. Konakona oshihopaenenwa shomunyasha umwe oo a kala tai moluhaelo te shi ningi meholeko. Okwa ka popya a ti: “Onda li nda tamununa mo oukalele wange, handi diladila kutya ohai diminwa po enyono lange.” Osho osha faafana naasho Israel oshitangalali sha li sha kendabala okuninga. Ndele omayambo etu otaa kala ashike a hokiwa kuJehova ngeenge otaa yambwa nomalinyengotomheno omutima a yuka nosho yo ngeenge ohatu lihumbata monghedi yopakalunga.
Jehova oha nyemata ngeenge ovalongeli vaye tave mu fiye po
14. Exunganeko laHosea otali holola shike shi na sha nomaliudo aKalunga?
14 Oshilihongomwa oshititatu osho hatu lihongo metukulwa eti-6 fiyo eti-9 oshi na sha nanghee Jehova ha kala e udite ngeenge ovalongeli vaye tave mu fiye po. Kalunga oku na omaliudo a kola nosho yo opalukeno. Oha hafele nokufila onghenda ovo tave livele ombedi omolwomanyono avo. Ndele ngeenge oshiwana shaye inashi livela ombedi, oha katuka eenghatu da kwata moiti. Molwaashi Kalunga oku na ko nasha shili nonghalonawa yetu, oha kala a hafa ngeenge hatu diinine okweenda pamwe naye. Epsalme 149:4 otali ti: “Omwene okwa hokwa oshiwana shaye.” Ndele mbela Kalunga oha kala e udite ngahelipi ngeenge ovapiya vaye kave fi ovadiinini?
15. PaHosea 6:7, Ovaisrael vamwe ova li have lihumbata ngahelipi?
15 Shi na sha nOvaisrael vehe fi ovadiinini, Jehova okwa ti: “Ndelenee ova nyona ehangano ngaashi Adam; opo tuu va efa nge [“ve liteeka nge,” OB-1954].” (Hosea 6:7) Oshitya shOshiheberi sha tolokwa ‘okuliteeka’ otashi ti yo “okukala nekonda, okuhakala noudiinini.” MuMalakia 2:10-16, oshitya osho shOshiheberi osha longifwa okuhokolola elihumbato lokuhenoudiinini lOvaisrael ovo va li vehe fi ovadiinini kookaume kavo kopahombo. Shi na sha noshitya ‘okuliteeka’ osho sha longifwa muHosea 6:7, embo limwe lomauyelele ola ti kutya otashi ulike “kefaneko li na sha nohombo olo tali ulike komaukwatya opaumwene e na sha nekwatafano . . . Otashi hokolola onghalo yopaumwene omo ohole ya nyonwa po.”
16, 17. Israel osha li sha katuka ngahelipi shi na sha nehangano olo Kalunga a li a ninga nasho? (b) Oshike tu na okudimbulukwa shi na sha neenghatu detu?
16 Jehova okwa li a tala ko Israel e li omukainhu waye wopafaneko, omolwehangano olo a li a ninga noshiwana osho. Onghee hano, eshi oshiwana shaye sha li sha nyona ehangano olo, osha li sha fa sha ya moluhaelo. Kalunga okwa li a fa omulumenhu omudiinini, ndele oshiwana shaye osha li she mu fiya po.
17 Ongahelipi shi na sha nafye? Kalunga ita kala e tu hafela ngeenge itatu ende pamwe naye. Natu dimbulukwe kutya “Kalunga Oye ohole” nonokutya eenghatu detu ohadi mu kumu. (1 Johannes 4:16) Ngeenge otwa lalakanene onghatu yapuka, otashi dulika tu ehameke Jehova nohatu ke mu handukifa. Okukaleka oshinima osho momadiladilo otashi ke tu kwafela tuhe liyandje ngeenge hatu yelekwa.
Nghee hatu dulu okuteya osho shiwa
18, 19. Efinamhango lilipi hatu hange muHosea 8:7, nola li la wanifilwa ngahelipi Ovaisrael?
18 Natu ka kundafaneni oshilihongomwa oshitine osho hatu lihongo mexunganeko laHosea — nghee hatu dulu okukuna nokuteya osho shiwa. Shi na sha nOvaisrael nosho yo okukatuka kwavo onghatu yokuheneitavelo ya nyika oulai noyongaho elela, Hosea okwa shanga a ti: “Osheshi otava kunu omhepo ndelenee otava ka teya oshikungulu.” (Hosea 8:7) Omo ohatu hange mo efinamhango olo tu na okudimbulukwa, kutya: Ope na ekwatafano pokati kaasho hatu ningi paife noilanduliko yetu yomonakwiiwa. Efinamhango olo ola li la wanifilwa ngahelipi Israel osho sha li shihe fi oshidiinini?
19 Mokulonga oulunde, Ovaisrael ovo okwa li tava kunu osho sha puka. Mbela okwa li tava ka twikila okuninga ngaho nopehe na okuteya oilanduliko ii? Osha yela kutya kava li tava ka ya onhapo etokolo lidjuu. Hosea 8:13 ota ti: “[Jehova] ota ka dimbulukwa owii wavo, ndele ta handukile omatimba avo.” MuHosea 9:17, ohatu lesha taku ti: “Kalunga kange ote ke va ekelashi, osheshi inave mu uda. Otava ka ninga ovaendaaendi mokati koiwana.” Jehova okwa li ta ka handukila Israel omolwoulunde waye. Molwaashi okwa li va kuna osho shii, okwa li tava ka teya osho shii. Etokolo laKalunga okwa li le va wanifilwa mo 740 K.O.P., eshi Ovaassiria va umba ouhamba womapata omulongo aIsrael koshipundi nokutwala ovakalimo vasho moukwatwa.
20. Oshimoniwa shOvaisrael otashi tu hongo shike?
20 Oshimoniwa shOvaisrael ovo otashi tu hongo oshili ya fimana, oyo kutya: Ohatu teya osho hatu kunu. Eendjovo daKalunga otadi tu londwele tadi ti: “Inamu lifufya, Kalunga iha shekwa; osheshi eshi omunhu te shi kunu, osho tuu te shi teya yo.” (Ovagalati 6:7) Ngeenge otwa kunu osho shii, ohatu ka teya osho shii. Pashihopaenenwa, ovo hava i moluhaelo otava ka mona oilanduliko inyikifa oluhodi. Komunyoni oo ine livela ombedi, oilanduliko otai ka kala inyikifa oluhodi.
21. Ongahelipi hatu dulu okukuna osho shiwa?
21 Ongahelipi hatu dulu okuteya osho shiwa? Epulo olo otali dulu okunyamukulwa nefaneko li li paunafangwa. Ngeenge omunepya okwa hala okuteya oilya yomahangu, mbela ota ka kuna omakunde? Hasho nandenande! Oku na okukuna osho a hala okuteya. Sha faafana, ngeenge otwa hala okuteya osho shiwa, otu na okukuna osho shiwa. Mbela owa hala okutwikila okuteya osho shiwa, sha hala okutya, okukala nonghalamwenyo tai ti sha paife nosho yo etimaumbwile lomwenyo waalushe mounyuni mupe waKalunga? Ngeenge osho ngaho, ou na okutwikila okukuna osho shiwa mokweenda pamwe naKalunga nokukala metwokumwe nomifikamhango daye douyuki.
22. Oilihongomwa ilipi twe lihonga muHosea etukulwa eti-6 fiyo eti-9?
22 Metukulwa eti-6 fiyo eti-9 laHosea, otwe lihonga oilihongomwa ine oyo tai dulu oku tu kwafela tu ende pamwe naKalunga: (1) Elivelombedi lashili ohali ulikwa okupitila moilonga; (2) Kalunga iha hafifwa ashike komayambo; (3) Jehova oha nyemata ngeenge ovalongeli vaye tave mu fiye po; nosho yo (4) opo tu teye osho shiwa otu na okukuna osho shiwa. Ongahelipi omatukulwa atano axuuninwa embo olo lOmbibeli taa dulu oku tu kwafela tu ende pamwe naKalunga?
Oto nyamukula ngahelipi?
• Elivelombedi lashili ohali ulikwa ngahelipi?
• Omolwashike Tate yetu womeulu iha hafifwa ashike komayambo?
• Kalunga oha kala e udite ngahelipi ngeenge ovalongeli vaye tave mu fiye po?
• Otu na okukuna shike ngeenge otwa hala okuteya osho shiwa?
[Efano pepandja 15]
Omolwashike Jehova a li a anya omayambo oshiwana shaye?
[Efano pepandja 16]
Opo tu teye osho shiwa, otu na okukuna osho shiwa