Landula oshiholelwa shomupolofeti Hosea
1. Epulo lini tashi vulika wi ipula nale paumwene?
1 ‘Omayambo geni nda hala okuningila Jehova?’ Otashi vulika wi ipula nale epulo ndyoka sho wa li to tedhatedha kuuwanawa mboka e ku ningila nosho wo kohenda ye. (Eps. 103:2-4; 116:12) Hosea okwa li a hala okulonga shoka Jehova e mu lombwele a ninge, nonando osha li tashi pula eiyambo mwene. Ongiini tatu vulu okuholela omupolofeti Hosea?
2. Ongiini tatu vulu okulandula oshiholelwa oshiwanawa shokuuvitha nuudhiginini shaHosea?
2 Uvitha pomathimbo omadhigu: Etumwalaka lyaHosea olya li lya nuninwa unene uukwaniilwa womazimo omulongo gAaisraeli, molwaashoka elongelokalunga lyashili olya li konyala pokuhulithwapo mokati kawo. Omukwaniilwa Jerobeam omutiyali okwa li a longo uuwinayi momeho gaJehova nokwa li a tsikile okugalikana oshikalunga shontana shoka sha li sha totwa po kuJerobeam gwotango. (2 Aak. 14:23, 24) Aakwaniilwa mboka ya ka landulako mokulela omazimo omulongo oya tsikile nokukala ya nkundipala pambepo sigo omo 740 K.E.N., sho uukwaniilwa mboka wa hanagulwa po. Nonando okulongela iikalunga okwa li kwa lunda, Hosea okwa li a longo nuudhiginini e li omupolofeti mokati kaantu mboka oomvula 59. Mbela natse ohatu kala ngaa twa tokola toko okuuvitha omumvo nomumvo, nonando aantu kaye na ko nasha netumwalaka lyetu nenge taye tu pataneke? — 2 Tim. 4:2.
3. Onkalamwenyo yaHosea oya li yu ulike ngiini kutya Jehova omunahenda?
3 Gandja eitulomo kohenda yaJehova: Jehova okwa li a lombwele Hosea a hokane ‘omukulukadhi kee shi omwiinekelwa’ nenge tu tye ohonda. (Hos. 1:2) Nonando omukulukadhi gwe Gomer, okwe mu valele omumati, konima yethimbo Gomer okwa li a vala aanona yaali moluhondelo. Sho Hosea a dhimine po omukadhi nehalo ewanawa otashi ulike ohenda yaJehova onene ndjoka a li u ulukile oshigwana she oshitangalali, Israeli, uuna shi itedhulula. (Hos. 3:1; Rom. 9:22-26) Mbela natse ohatu ningi ngaa omaiyambo ga mana mo nehalo ewanawa, opo tu tseyithile aantu ayehe mpoka pu thike ohenda yaJehova? — 1 Kor. 9:19-23.
4. Otatu vulu okuningila Jehova omaiyambo geni?
4 Aapiya yaJehova oyendji ohaya ningi omaiyambo kunena. Yamwe oya thiga po omaithano ngoka ga halika koyendji, opo ya longe ethimbo olindji muukalele. Yalwe oya tokola okwaaha ya mondjokona nenge kaaya mone aanona, opo ya pitithe komeho iinima yUukwaniilwa. Uuna to dhiladhila shoka Hosea a li a ningi monkalamwenyo ye otashi vulika wu dhiladhile to ti: ‘Ngame itandi vulu nando okuninga ngaashi ye.’ Ihe ngele otu na olupandu omolwohenda yaKalunga nokukala twi inekela kutya ombepo ye ondjapuki otayi ke tu pa oonkondo, otashi vulika e ke tu longithe momukalo ngoka twa li inaatu tegelela, ngaashi owala Hosea. — Mat. 19:26; Fil. 2:13.