Jehova oha yandje ‘omhepo iyapuki kuava tave mu indile’
‘Nye ovai, ngenge omu shii okupa ovana veni oipewa iwa, unene Xo yeni yomeulu ta yandje omhepo iyapuki kwaava tave mu indile.’ — LUKAS 11:13.
1. Onaini hatu kala twa pumbwa unene ekwafo lomhepo iyapuki?
‘ITANDI dulu okupondola eyeleko eli kwaame mwene, ndele ohandi dulu ashike oku li lididimikila kekwafo lomhepo iyapuki.’ Mbela ope na efimbo limwe wa li u udite ngaho? Ovakriste vahapu ohava kala ve udite ngaho omafimbo amwe. Otashi dulika wa li u udite ngaho eshi wa shiiva kutya ou na omukifi wa kwata moiti, ile tashi dulika eshi wa li wa filwa kaume koye kopahombo oo mwa kala mwa hombola naye oule wefimbo, ile tashi dulika eshi wa li wa kanifa ehafo loye omolwepolimano. Vamwe ovo va pita meenghalo da tya ngaho ova li ve udite kutya ova li ashike va dula okulididimika kekwafo lomhepo iyapuki yaJehova oyo ya li ye va pa ‘eenghono di dule dopaushitwe.’ — 2 Ovakorinto 4:7-9, NW; Epsalme 40:2, 3.
2. (a) Ovakriste vashili ova taalela omashongo elipi? (b) Omapulo elipi hatu ka kundafana moshitukulwa eshi?
2 Tu li Ovakriste vashili, otu na okulididimikila omafininiko nosho yo omahepeko oo taa hapupala mounyuni ou wouhenakalunga. (1 Johannes 5:19) Kakele komafininiko nosho yo omahepeko oo hatu shakeneke kunena, ohatu ponokelwa kuSatana Ondiaboli, oo ta lwifa nonyanya ovo “hava diinine oipango yaKalunga ndee ve na ehepaululo laJesus.” (Ehololo 12:12, 17) Nomolwaasho twa pumbwa ekwafo lomhepo yaKalunga paife shi dulife nale. Ndele mbela oshike tu na okuninga opo Kalunga e tu pe ekwafo lomhepo yaye iyapuki pauyadi? Nomolwashike tu na oushili kutya Jehova okwa halelela oku tu pa eenghono odo twa pumbwa ngeenge tu li momayeleko? Ohatu ka mona omanyamukulo omapulo oo momafaneko aJesus avali oo hatu ka kundafana moshitukulwa eshi.
Natu diinineni okwiilikana
3, 4. Jesus okwa li a hokololela ovahongwa vaye efaneko lilipi, nokwa li a ulika ngahelipi kutya efaneko olo oli na sha nonghedi yokwiilikana?
3 Umwe womovahongwa vaJesus okwa li e mu pula a ti: “Omwene, tu longa okwiilikana.” (Lukas 11:1) Jesus okwa li a pa ovahongwa vaye omafaneko opavali a pambafana, opo e va honge nghee ve na okwiilikana. Efaneko lotete oli na sha nomulumenhu wonhumba oo a li a talelwa po komweenda, netivali oli na sha naxe oo ta yandje osho omonamati waye e mu pula. Natu konakoneni omafaneko oo avali koolimwe.
4 Jesus okwa ti: “Olyelye womunye e na kaume kaye te uya kuye mokati koufiku ndele ta ti: Kaume kange, pe nge omingome nhatu, osheshi kaume kange a dja kondjila e uya kuame nondi he na eshi handi mu pakele po; ndele winya womeumbo te mu nyamukula ndee ta ti: Ino ningila nge oupyakadi, omuvelo owa patwa, nounona vange va nangala puame momutala, itandi dulu okupenduka ndi di ku pe. Ohandi mu lombwele, ngenge ita penduka e mu pe omolwoukaume, ota penduka [omolwoudiinini waye wokwiindila, OB-1986], ndele ote mu pe shi fike peemhumbwe daye.” Opo nee Jesus okwa yelifa kutya efaneko olo oli na sha nonghedi yokwiilikana, a ti: “Ndelenee handi mu lombwele: [kaleni nokwiindila, ndele tamu pewa, kaleni nokukonga, ndele tamu mono, kaleni nokukonghola,] ndee tamu yeululwa. Osheshi keshe tuu ou ta indile, ota pewa, nakeshe tuu ou ta kongo, ota mono, naau ta konghola, ota yeululwa.” — Lukas 11:5-10, yelekanifa NW.
5. Efaneko li na sha nomulumenhu womeyele laJesus oo a li a indila noudiinini otali tu hongo okukala tu na oikala ilipi ngeenge hatu ilikana?
5 Efaneko olo la twa li na sha nomulumenhu oo a li a indila noudiinini otali ulike kutya otu na okukala noikala ya tya ngahelipi ngeenge hatu ilikana. Didilika kutya Jesus okwa ti kutya omulumenhu oo okwa li a pewa osho a li a pumbwa ‘omolwoudiinini waye wokwiindila.’ (Lukas 11:8, OB-1986) Outumbulilo oo ‘okwiindila noudiinini’ owa holoka mo ashike lumwe mOmbibeli. Owa dja koshitya shOshigreka osho tashi ti lelalela “okuhafyohoni.” Luhapu okuhafyohoni okwa talika ko ku li oukwatya mwii. Ndelenee ngeenge omunhu ina fya ohoni ile omudiinini omolwetomheno liwa, omunhu oo oku na oukwatya muwa. Omulumenhu womefaneko laJesus okwa li e na omaukwatya oo. Kali a fya ohoni okwiindila noudiinini osho a li a pumbwa. Molwaashi Jesus okwa hokolola efaneko lomulumenhu oo kwa li a yakula omweenda li li oshihopaenenwa kufye, otu na okukala hatu ilikana noudiinini. Jehova okwa hala tu ‘kale hatu indile, tu kale hatu kongo nosho yo tu kale hatu konghola,’ opo nee ota ka ‘yandja omhepo iyapuki kwaava tave mu indile.’
6. Pefimbo laJesus, ovanhu ova li va tala ko ngahelipi onghedindjikilile yokuyakula ovaenda?
6 Jesus ine tu honga ashike nghee tu na okwiilikana noudiinini, ndele okwe tu honga yo kutya omolwashike tu na okuninga ngaho. Opo tu ude ko nawa oshilihongomwa osho, otwa pumbwa okukonakona kutya ovo va li va pwilikina kefaneko laJesus ova li va tala ko ngahelipi onghedindjikilile yokuyakula ovaenda. Omahokololo mahapu Ombibeli otaa ulike kutya momafimbo Ombibeli, okuyakula ovaenda okwa li onghedindjikilile oyo ya li ya fimanekwa neenghono, unene tuu kovapiya vaKalunga. (Genesis 18:2-5; Ovaheberi 13:2) Ngeenge omunhu okwa anye okuyakula ovaenda osha li oshinima shififa ohoni. (Lukas 7:36-38, 44-46) Paife eshi twa mona ouyelele shi na sha nanghee ovanhu va li va tala ko okuyakula ovaenda pefimbo olo, natu ka taleni vali kehokololo laJesus.
7. Omolwashike omulumenhu womefaneko laJesus a li e na ouladi wokupendula kaume kaye?
7 Omulumenhu womefaneko laJesus okwa li a talelwa po komweenda mokati koufiku. Okwa li a hala okupa omweenda waye oikulya, ndele kali ‘e na eshi te mu pakele po.’ Ka li tuu e na omhumbwe shili! Omulumenhu oo okwa li e na okukonga omingome, kashi na nee mbudi kutya osha li tashi pula shike. Nomolwaasho okwa li a ya kukaume kaye e na ouladi ndele te mu pendula, a ingida ta ti: “Kaume kange, pe nge omingome nhatu.” Okwa kala ta indile noudiinini fiyo osheshi a pewa osho a li a pumbwa. Okwa li e udite kutya ota dulu ashike okuyakula omweenda waye nawa, ngeenge oku na omingome.
Natu kale hatu indile kuKalunga omhepo yaye iyapuki efimbo keshe tu udite twe i pumbwa
8. Oshike tashi ke tu linyengifa tu ilikane kuKalunga noudiinini e tu pe omhepo iyapuki?
8 Efaneko laJesus otali tu kwafele tu mone kutya omolwashike tu na okudiinina okwiilikana. Omulumenhu womefaneko laJesus okwa li a indila noudiinini molwaashi okwa li e wete kutya osha fimana filufilu okukala nomingome opo a dule okuyakula nawa omweenda waye. (Jesaja 58:5-7) Sha faafana, ohatu indile Kalunga e tu pe omhepo yaye molwaashi otu shii kutya otwe i pumbwa filufilu opo tu dule okuwanifa po oukalele wetu tu li Ovakriste vashili. (Sakaria 4:6) Ohatu ka pondola ashike kekwafo lomhepo iyapuki. (Mateus 26:41) Mbela owa didilika oshilihongomwa sha fimana mefaneko olo? Ngeenge otwa kala tu wete kutya otwa pumbwa neenghono omhepo yaKalunga, ohatu ka ilikana noudiinini opo e tu pe omhepo yaye.
9, 10. (a) Yelifa kutya omolwashike twa pumbwa okwiilikana noudiinini kuKalunga e tu pe omhepo yaye. (b) Epulo lilipi tu na okulipula, nomolwashike?
9 Opo tu mone osho hatu lihongo mefaneko laJesus kunena, natu tye nee ngeno oshilyo shimwe shomoukwaneumbo weni osha hakukilwa komukifi mokati koufiku. Mbela oto ka pendula ndokotola e uye e shi kwafele? Ito ke mu ifana ngeenge omunhu ita vele sha kwata moiti. Ndele ngeenge okwa hakukilwa koudu womutima, oto ka ifana ndokotola. Omolwashike mbela? Omolwaashi owa pumbwa ekwafo lopaulumomhumbwe. Ou wete kutya owa pumbwa ekwafo neenghono lomunhu oo e na owino. Ngeenge ino ka konga ekwafo, omunaudu otashi dulika a fye. Sha faafana, Ovakriste vashili ove li monghalo yopaulumomhumbwe, oku shi popya pafaneko. Satana ohe tu dingilile ngaashi ‘onghoshi tai kumbu,’ ta kendabala oku tu xwaka po. (1 Petrus 5:8) Onghee hano, opo tu kale oupafi pamhepo otwa pumbwa filufilu ekwafo lomhepo yaKalunga. Otashi dulu okukala sha nyika oshiponga ngeenge itatu pula Kalunga e tu pe omhepo iyapuki. Nomolwaasho hatu ilikana kuKalunga noudiinini opo e tu pe omhepo iyapuki. (Ovaefeso 3:14-16) Mokuninga ngaho, ohatu ka kala tu na eenghono odo twa pumbwa opo tu ‘lididimike fiyo exulilo.’ — Mateus 10:22; 24:13.
10 Onghee hano, osha fimanenena okulipula efimbo nefimbo kutya, ‘Mbela ohandi ilikana ngoo noudiinini?’ Dimbuluka kutya, ngeenge otwa kala tu udite kutya otwa pumbwa ekwafo laKalunga, otashi ke tu linyengifa tu kale hatu ilikana kuye noudiinini opo e tu pe omhepo iyapuki.
Oshike hashi tu linyengifa tu kale tu na elineekelo ngeenge hatu ilikana?
11. Jesus okwa ulika ngahelipi kutya efaneko laxe nomonamati oli na sha neilikano?
11 Efaneko laJesus li na sha nomulumenhu oo a li a indila noudiinini otali divilike oikala oyo omwiitaveli e na okukala e na ngeenge ta ilikana. Ndele efaneko eli hatu ka kundafana paife otali divilike oikala yomuudi womailikano, Jehova Kalunga. Jesus okwa pula a ti: “Olyelye womunye xe ou, omona waye ngenge te mu indile oshi, te mu pe eyoka ponhele yoshi, ile [e] mu indile ei, te mu pe ngeno ondye?” Opo nee okwa yelifa eityo lefaneko olo a ti: “Hano nye [ovai], ngenge omu shii okupa ovana veni oipewa iwa, unene Xo yeni yomeulu ta yandje Omhepo Iyapuki kuava tave mu indile.” — Lukas 11:11-13.
12. Ongahelipi efaneko li na sha naxe oo ta pe omona osho a indila tali ulike kutya Jehova okwa hala okunyamukula omailikano etu?
12 Jesus okwa yelifa nghee Jehova ha kala e udite ngeenge pe na ovo tava pula ekwafo kuye okupitila meilikano, mokulongifa oshihopaenenwa shi na sha naxe oo ta pe omonamati osho a indila. (Lukas 10:22) Paife natu taleni komayooloko oo e li pokati komafaneko avali aJesus. Mepingafano nomulumenhu womefaneko laJesus lotete, oo a li ta ongaonga okuyandja ekwafo kukaume kaye, Jehova okwa fa omudali omunahole, oo a hala okupa okaana kaye osho taka pula. (Epsalme 50:15) Jesus okwa holola vali natango ehalo laJehova loku tu pa osho hatu mu indile mokuyelekanifa xe wopanhu naJehova. Jesus okwa ti ngeenge xe oo ‘mwii’ omolwoufyuululwalunde, oha pe omona oipewa iwa, mbela Tate yetu womeulu, oo ha yandje nehalo liwa, ita ka yandja omhepo yaye iyapuki kovalongeli vaye? — Jakob 1:17.
13. Otu na okukala tu na elineekelo lashike ngeenge hatu ilikana kuJehova?
13 Oshike hatu lihongo mefaneko olo li na sha naxe nomona? Otu na okukala tu na elineekelo kutya Tate yetu womeulu okwa halelela oku tu pa omhepo iyapuki ngeenge hatu mu indile. (1 Johannes 5:14) Ngeenge ohatu ilikana kuJehova noudiinini, ke na fiku a ka tye: “Ino ningila nge oupyakadi, omuvelo owa patwa.” (Lukas 11:7) Nomolwaasho Jesus okwa ti: “Indileni, ndee tamu pewa, kongeni, ndee tamu mono, kongholeni, ndee tamu yeululwa.” (Lukas 11:9, 10) Doshili, Jehova ‘ote ke tu uda ngeenge hatu mu ifana.’ — Epsalme 20:10; 145:18.
14. (a) Ovanhu vamwe ohava kala ve na ediladilo la puka lilipi ngeenge tava shakeneke omayeleko? (b) Omolwashike hatu dulu okwiilikana kuJehova tu na elineekelo ngeenge hatu yelekwa?
14 Efaneko laJesus li na sha naxe omunahole otali ulike yo kutya Jehova oha ningile ovanhu ouwa u dule oo ovadali hava ningile ovana vavo. Inatu diladila nande kutya omayeleko oo tashi dulika e tu hange otaa ulike kutya Kalunga ine tu hokwa. Satana, omutondi wetu munenenene, oye a hala tu kale hatu diladila ngaho. (Job 4:1, 7, 8; Johannes 8:44) Ombibeli inai popya nande kutya otu na okukala hatu litokola monghedi ya tya ngaho, molwaashi Jehova “iha shindi nande omunhu.” (Jakob 1:13) Ihe tu pe omayoka ile eendje, sha hala okutya, ihe tu etele oupyakadi washa nandenande. Tate yetu womeulu oha yandje oinima ‘iwa kwaava tave mu indile.’ (Mateus 7:11; Lukas 11:13) Heeno, ngeenge otu na eudeko lomoule li na sha nouwa waJehova nosho yo shi na sha nehalo laye lokukala a hala oku tu kwafela, otashi ke tu linyengifa tu kale tu na elineekelo filufilu ngeenge hatu mu ilikana. Mokuninga ngaho, nafye ohatu ka dula okupopya eendjovo da fa domupsalme oo a shanga a ti: “Kalunga okwa uda nge nokuli, okwa dimbulukwa eindilo lange.” — Epsalme 10:17; 66:19.
Nghee omhepo iyapuki hai tu kwafele
15. (a) Jesus okwa li a udaneka shike shi na sha nomhepo iyapuki? (b) Onghedi imwe ilipi omo omhepo iyapuki hai tu kwafele?
15 Okafimbo kanini fimbo Jesus ina fya, okwa li a endulula eshilipaleko olo a li a yandja momafaneko aye. Okwa li a lombwela ovayapostoli vaye shi na sha nomhepo iyapuki a ti: “Ohandi indile Tate, ndele Oye te mu pe Omupopili [“omukwafi,” NW] umwe, a kale punye alushelushe.” (Johannes 14:16) Kungaha, Jesus okwa li a udaneka kutya omukwafi, sha hala okutya, omhepo iyapuki, otai ka kala pamwe novashikuli vaye monakwiiwa, nafye twa kwatelwa mo kunena. Onghedi imwe ya tongomana ilipi omo omhepo iyapuki hai tu kwafele kunena? Ohai tu kwafele tu lididimikile omayeleko e lili noku lili. Ngahelipi mbela? Omuyapostoli Paulus oo a li a pita momayeleko mahapu, okwa hokolola monhumwafo oyo a li a shangela Ovakriste vomuKorinto shi na sha nanghee omhepo yaKalunga ya li ye mu kwafela. Natu ka kundafaneni pauxupi osho a li a shanga.
16. Ongahelipi tashi dulika tu kale monghalo ya fa Paulus?
16 Tete, Paulus okwa li a hokololela ovaitaveli vakwao kutya okwa li e na “ekiya mombelela,” sha hala okutya, eyeleko lonhumba. Opo nee okwa ti: “Onda ilikana Omwene [Jehova] lutatu, shi efe nge.” (2 Ovakorinto 12:7, 8) Nonande Paulus okwa li a ilikana Kalunga a kufe po oupyakadi waye, ka wa li wa dja po. Otashi dulika naave u li monghalo ya fa yaPaulus, tashi dulika ho ilikana noudiinini nonelineekelo, to indile Jehova a kufe po eyeleko lonhumba. Ndele nande owa indila lwoikando, oupyakadi oo opo u li natango. Mbela osho osha hala okutya Jehova ina pwilikina komailikano oye, nonokutya ku na ekwafo lomhepo yaye? Hasho nandenande! (Epsalme 10:1, 17) Natu ka tale kwaasho omuyapostoli Paulus a ka shikulifa ko.
17. Jehova okwa li a nyamukula ngahelipi omailikano aPaulus?
17 Kalunga okwa li a nyamukula eilikano laPaulus a ti: “Efilonghenda lange ole ku wanena, osheshi eenghono dange otadi wanenenene pombada omoungone.” Opo nee Paulus okwa popya a ti: “Osho hano ohandi litangele oungone wange nehafo, eenghono daKristus opo di kale [da uvika nge ngaashi otenda, NW].” (2 Ovakorinto 12:9; Epsalme 147:5) Kungaha, Paulus okwa li e wete kutya eameno olo Kalunga a li e mu pa okupitila muKristus ola li la fa otenda. Jehova oha nyamukula omailikano etu monghedi ya faafana kunena. Oha amene ovapiya vaye a fa e va uvika notenda.
18. Omolwashike hatu dulu okulididimikila omayeleko?
18 Odoshili kutya otenda ihai imbi odula i loke ile omhepo i pepe, ndele otai dulu okwaamena omunhu keenghalo da tya ngaho. Sha faafana, eameno olo hali yandjwa ‘keenghono daKristus’ ihali kelele omayeleko ile omaupyakadi oo hae tu hange. Ndele eenghono odo ohadi amene ovapiya vaJehova keenghalo da nyika oshiponga dounyuni ou nosho yo komaponokelo omupangeli wao, Satana. (Ehololo 7:9, 15, 16) Onghee hano, ngeenge oto kondjo neyeleko lonhumba olo itali ku ‘efa,’ kala u na elineekelo kutya Jehova oku wete onghalo yoye nonokutya okwa uda ‘eifano loye lekwafo.’ (Jesaja 30:19; 2 Ovakorinto 1:3, 4) Paulus okwa shanga a ti: “Kalunga Oye omudiinini, ite mu efa mu yelekwe nomayeleko e dule eenghono deni, ndele mumwe neyeleko ota longele yo omhito yokupita mo, opo mu dule oku li humbata.” — 1 Ovakorinto 10:13; Ovafilippi 4:6, 7.
19. Owa tokola toko okuninga shike, nomolwashike?
19 Nonande otu li ‘momafimbo madjuu momafiku aa axuuninwa’ ounyuni ou woukolokoshi, ohatu dulu okuungaunga neenghalo didjuu nomupondo. (2 Timoteus 3:1) Ngahelipi mbela? Omolwaashi otu na ekwafo neameno lomhepo iyapuki yaKalunga, oyo ha yandje pauyadi nonehalo liwa kwaaveshe ovo have mu indile noudiinini nonelineekelo. Onghee hano, natu kale twa tokola toko okwiilikana opo tu pewe omhepo iyapuki efiku keshe. — Epsalme 34:7; 1 Johannes 5:14, 15.
Oto nyamukula ngahelipi?
• Otwa pumbwa okuninga shike opo tu pewe omhepo iyapuki yaKalunga?
• Omolwashike tu na elineekelo kutya Jehova ote ke tu pa omhepo iyapuki ngeenge hatu mu indile?
• Omhepo iyapuki ohai tu kwafele ngahelipi tu lididimikile omayeleko?
[Efano pepandja 13]
Oshike hatu lihongo mefaneko laJesus li na sha nomulumenhu oo a li a indila kaume kaye noudiinini?
[Efano pepandja 15]
Mbela oho indile noudiinini kuKalunga opo e ku pe omhepo iyapuki?
[Efano pepandja 16]
Oshike hatu lihongo kombinga yaJehova mefaneko li na sha naxe omunahole?