Uunake Uukwaniilwa waKalunga tawu ke ya?
“OMUWA, opethimbo tuu ndika to tungululile Israeli uukwaniilwa?” (Iilonga 1:6, KB) Aayapostoli oya li ya halelela okutseya kutya uunake Jesus ta ka dhika po Uukwaniilwa we. Kunena, sho pwa pita nale oomvula 2 000 lwaampono, aantu oya halelela natango okutseya kutya: Uunake Uukwaniilwa waKalunga tawu ke ya?
Molwaashoka Uukwaniilwa owo wa li enenedhiladhilo lyeuvitho lyaJesus, osha yela kutya epulo ndika okwa li e li kundathana. Okwa li a popi olundji kombinga yethimbo lyontumba ndyoka a li i ithana ‘okuya’ kwe nenge “okukala po” kwe. (Mateus 24:37, yelekanitha NW.) Okukala po hoka okwa li ku na ekwatathano nokudhika po Uukwaniilwa wopaMesiasa. Okukala po hoka oko shike? Natu konakoneni iinima ine yoshili mbyoka tayi popiwa mOmbiimbeli yi na ko nasha nokukala po kwaKristus.
1. Okukala po kwaKristus okwa li ku na okutameka ngele pwa piti ethimbo ele konima yeso lye. Jesus okwa li a ningi eudhi moka i iyelekanitha ye mwene nomulumentu ngoka a “yi koshilongo shokokule a ka ningwe omukwaniilwa.” (Lukas 19:12) Eudhi ndyoka lyopahunganeko olya li lya gwanithwa ngiini? Olya li lya gwanithwa sho Jesus a si nokwa yumuka, opo nduno okwa li a yi “koshilongo shokokule,” sha hala okutya, a yi megulu. Ngaashi Jesus a li e shi hunganeke meudhi lya fa ndyono, okwa li ta ka galuka owala moonkondo dhuukwaniilwa “konima yethimbo ele.”—Mateus 25:19.
Oomvula dhontumba konima yokulonda kwaJesus megulu, omuyapostoli Paulus okwa li a nyola a ti: “Kristus sho a yamba eyambo limwe lya gwanenena sigo aluhe, okwa kuutumba kolulyo lwaKalunga. Ngashingeyi Kristus okwa tegelela, Kalunga a tule aatondi ye kohi yoompadhi dhe. (Aahebeli 10:12, 13) Onkee ano Jesus okwa li e na okutegelela ethimbo ele konima sho a thiki megulu. Lwahugunina, okutegelela kwe okwa li kwa hulu sho Jehova Kalunga e mu ningi Omukwaniilwa gwUukwaniilwa wopaMesiasa mboka wa kala nale wu uvanekwa. Okukala po kwaKristus okwa li kwa tameke ethimbo ndyoka. Mbela aantu yokombanda yevi oya li taya ka mona oshiningwanima shoka sha simana?
2. Okukala po kwe itaku monika nomeho gopantu. Dhimbulukwa kutya Jesus okwa li a kundathana endhindhiliko lyokukala po kwe. (Mateus 24:3, yelekanitha NW.) Mbela ando okukala po kwe okwa li taku vulu okumonika nomeho gopantu, ando endhindhiliko olya pumbiwa we ngaa? Oku shi thaneka: Natu tye kutya oto yi wu ka tale efuta. Otashi vulika wu wete omandhindhiliko gomondjila tage ku ulukile ondjila, ihe ngele we ya komunkulofuta e to thikama kooha dhomeya ga yala ombanza gu uka ho, mbela oto ka kala wa tegelela wu mone endhindhiliko li na okakuti okanene taku ulike komeho ka nyolwa oshitya “efuta”? Hasho nando! Omolwashike wa pumbwa endhindhiliko li ku ulukile oshinima shoka to vulu okumona nuupu nomeho?
Jesus ka li a hokolola endhindhiliko lyokukala po kwe okuulika sha shoka aantu taya vulu okumona nomeho, ihe oku ya kwathela ya mone sha shoka sha li tashi ka ningwa megulu. Ano Jesus okwa li a ti: “[Uukwaniilwa waKalunga itawu ya wu na, KB] omandhindhiliko taga monika nomeho.” (Lukas 17:20) Ongiini ano endhindhiliko tali ulukile mboka ye li kombanda yevi kutya okukala po kwaKristus okwa tameka?
3. Okukala po kwaJesus otaku ndhindhilikilwa kethimbo lyomaupyakadhi ga kwata miiti kombanda yevi. Jesus okwa ti kutya okukala po kwe e li Omukwaniilwa megulu otaku ndhindhilikilwa kiita, ondjala, omakakamo gevi, omalega nokwaahenompango kombanda yevi. (Mateus 24:7-12; Lukas 21:10, 11) Oshike tashi etitha iinima ayihe mbika yinikitha oluhodhi? Ombiimbeli otayi yelitha kutya Satana, “omupangeli guuyuni mbuka,” okwa geya noonkondo molwaashoka oku shi shi kutya oku na ko ethimbo efupi noonkondo ngashingeyi oshoka okukala po kwaKristus e li Omukwaniilwa okwa tameka nale. (Johannes 12:31; Ehololo 12:9, 12) Methimbo lyetu opu na uunzapo owundji wa tya ngaaka wu wetike tawu ulike kutya Satana okwa geya nosho wo kutya okukala po kwaKristus okwa tameka. Uunzapo mboka owa li wa holoka muuyuni auhe momukalo inaagu monika nando onale, unene tuu okuza mo 1914, omumvo ngoka aanandjokonona ya zimina kutya ogu li omumvo omundhindhilikwedhi.
Iinima ayihe mbyoka otashi vulika yi kale ya fa oonkundana oombwiinayi, ihe hasho. Otashi ti kutya Uukwaniilwa wopaMesiasa otawu pangele ngashingeyi megulu. Masiku, epangelo ndyoka otali ka pangela ombanda yevi ayihe. Ihe aantu otaya ka tseya ngiini Uukwaniilwa mboka opo ya vule okutaamba epangelo lyawo nokuninga aapangelwa yawo?
4. Okukala po kwaJesus okwa ndhindhilikilwa kiilonga yeuvitho yomuuyuni auhe. Jesus okwa ti kutya okukala po kwe otaku ka kala ngaashi sha li “pethimbo lyaNoowa.”a (Mateus 24:37-39) Noowa ka li owala omutungi gwonguluwato, ihe okwa li wo “omuuvithi guuyuuki.” (2 Petrus 2:5) Okwa li a londodha aantu kutya epangulo lyaKalunga olya li pokuya. Jesus okwa ti kutya aalanduli ye kombanda yevi otaya ka ninga sha faathana pethimbo lyokukala po kwe. Okwa hunganeke a ti: “Elaka ndika etoye [lyUukwaniilwa, KB] otali ka uvithilwa aantu ayehe, li ningile iigwana ayihe onzapo; notaku ya ihe ehulilo.”—Mateus 24:14.
Ngaashi twe shi mona moshitopolwa sha tetekele, Uukwaniilwa waKalunga otawu ka hanagula po omapangelo agehe guuyuni mbuka. Okupitila miilonga yeuvitho aantu otaya tseyithilwa kutya epangelo ndyoka lyomegulu oli li pokukatuka onkatu notashi ya pe ompito yokuhupa mehanagulo ndyoka tali ya nokuninga aapangelwa yUukwaniilwa mboka. Onkee ano, epulo lya simana olyo kutya: Oto ki inyenga ngiini?
Mbela okuya kwUukwaniilwa waKalunga oku li onkundana ombwanawa kungoye?
Etumwalaka ndyoka Jesus a li u uvitha olya li tali gandja etegameno itaali vulu okuyelekwa nasha. Konima yoshipotha shomuEden oomvula omayovi dha piti, Jehova Kalunga okwa li e na elalakano okudhika po epangelo ndyoka tali ku ukitha iinima mokushunitha aantu aadhiginini monkalo ndjoka a li a hala ya kale mo okuza petameko, sha hala okutya, okukala sigo aluhe moparadisa huka kombanda yevi. Mbela itashi nyanyudha unene okutseya kutya epangelo ndyoka lyu uvanekwa nale otali pangele ngashingeyi megulu? Kali shi owala oshinima kaashi shiwike, ihe oli li oshinima sholelalela!
Ngashingeyi, Omukwaniilwa ngoka a langekwa po kuKalunga ota pangele mokati kaaniita naye. (Episalomi 110:2) Muuyuni mbuka wa yonuka nowi iteka Kalunga, Mesiasa okwa gwanitha ehalo lyaHe okukonga ayehe mboka ya hala okutseya Kalunga ngaashi e li shili noku mu galikana “mOmbepo nomoshili.” (Johannes 4:24) Etegameno lyokukala sigo aluhe kohi yepangelo lyUukwaniilwa waKalunga otali vulu okumonika kaantu yomomihoko adhihe, yomapipi agehe nosho wo yomaputuko agehe. (Iilonga 10:34, 35) Otatu ku ladhipike wu longithe ompito ndyoka ombwanawa. Ilonga ngashingeyi shi na ko nasha nUukwaniilwa waKalunga opo wu vule okunyanyukilwa omwenyo sigo aluhe kohi yepangelo lyawo li li pauyuuki.—1 Johannes 2:17.
[Enyolo lyopevi]
a Oohapu dhaJesus otadhi tu kwathele okuuva ko nawa uutumbulilo “okukala po” mboka wa tolokwa papuko momalundululo gamwe gOmbiimbeli. Omalundululo gamwe ngaashi Ombiimbeli yOshindonga otayi wu toloka tayi ti ‘okuya’ nagamwe otaga ti ‘okugaluka,’ nomautumbulilo agehe ngoka otagu ulike koshinima shoka hashi ningwa meni lyethimbo efupi lumwe aluke. Ihe ndhindhilika kutya Jesus ina yelekanitha okukala po kwe nEyelu lyopethimbo lyaNoowa ndyoka lya li oshiningwanima sha ningwa mondjokonona, ihe ‘onethimbo lyaNoowa’ ndyoka lya li ethimbo lyontumba lya simana. Ngaashi ethimbo ndyoka lyonale, okukala po kwaKristus okwa li taku ka kala ethimbo ndyoka aantu taya ka kala yi ipyakidhila unene niinima yonkalamwenyo yesiku kehe nomolwaashoka itaya ka pulakena kelondodho ndyoka tali gandjwa.