Tokola okulongela Jehova fimbo u li omunyasha

“Kala muei we i longwa [nomwaayo ye ku tomha u itavele].” — 2 TIM. 3:14, yelekanifa NW.

1. Jehova oha tale ko ngahelipi oilonga oyo ovanyasha Ovakriste have mu longele?

JEHOVA okwa lenga neenghono oilonga iyapuki oyo ta longelwa kovanyasha. Nomolwaasho okwa nwefa mo exunganeko li na sha novanyasha olo la imbwa komupsalme umwe a ti: “Oshiwana shoye oshe lilongekidila nehalo liwa unene mefiku lehomono loye: momidjalowapeko diyapuki ovanyasha voye [tava] iluka ngaashi omume mekolo leluwa.” (Eps. 110:3) Jehova oha tale ko ovanyasha ovo va hala oku mu longela ve na ondilo shili.

2. Ovanyasha ova taalelwa komanwefemo ounyuni elipi kunena e na sha nonakwiiwa yavo?

² Ovanyasha ovo mu li momaongalo opaKriste, mbela omwe liyapulila ngoo Jehova? Ovanyasha vahapu otashi dulika hava mono shidjuu okutokola ngeenge otava ka longela Jehova ile hasho. Ovawiliki veengeshefa, ovayandjimayele e na sha nehongo, nokuli noilyo youkwaneumbo nosho yo ookaume omafimbo amwe ohava ladipike ovanyasha va lalakanene omaliko. Ovanhu mounyuni luhapu ohava sheke ovanyasha ngeenge tava lalakanene oinima yopamhepo. Ndelenee oushili oyoo kutya, okulongela Kalunga kashili oyo onghedi ya denga mbada yokukalamwenyo oyo to dulu okulalakanena. (Eps. 27:4) Shi na sha naasho, tala komapulo atatu taa landula: Omolwashike u na okulongela Kalunga? Ongahelipi to dulu okupondola okulongela Jehova, u li omunyasha e mu liyapulila, kashi na nee mbudi kutya ovanhu vamwe otava ti shike ile otava ningi shike? Eemhito delikalekelwa dokulongela Kalunga oilonga iyapuki dilipi to dulu okumona?

Okulongela Jehova oshinima sha yuka

3. Eshito laJehova oli na oku tu linyengifa tu ninge shike?

³ Omolwashike u na okulongela Kalunga kashili nomunamwenyo? Ehololo 4:11 otali tu pe etomheno la fimana tali ti: “Ove wa wana okutambula efimano nefimaneko nepangelo, osheshi Ove wa shita oinima aishe, ndele kehalo loye i li po noya shitwa.” Jehova Omushiti mukumwifi oo a shita oinima aishe oyo i li ko. Jehova oye a shita oinima aishe ngaashi, edu liwa, omiti, eengala, oinamwenyo, omafuta, eendudu nosho yo omawo omeva. Epsalme 104:24 otali ti: “Edu oli yadi oishitwa [yaKalunga].” Inatu pandula tuu eshi Jehova e tu shita nolutu notu na eendunge, oinima oyo hai tu ningifa tu hafele okukala kombada yedu nosho yo oinima oyo i li ko! Okukala nolupandu linene omolweshito likumwifi laJehova kashi na mbela oku tu linyengifa tu kale twa hala oku mu longela?

4, 5. Oilonga yaJehova ilipi ya li ya ehenifa Josua popepi naye?

⁴ Etomheno limwe kutya omolwashike tu na okulongela Jehova oli li meendjovo odo da li da popiwa komuwiliki waIsrael Josua. Josua okwa li a lombwela oshiwana shaKalunga lwopexulilo lokukalamwenyo kwaye a ti: “Nye mu nokushiiva nomutima weni aushe nomwenyo weni aushe nokutya, kape na nande ondjovo imwe yomeendjovo adishe diwa Omwene Kalunga keni e mu tonga ya kala inai wanifwa. Adishe de mu wanifilwa.” Omolwashike Josua a li a dula okupopya eendjovo odo? — Jos. 23:14.

⁵ Eshi Josua a kulila muEgipti, okwa li e lihonga kutya Jehova okwa udaneka okupa Ovaisrael edu lavo vene. (Gen. 12:7; 50:24, 25; Ex. 3:8) Josua okwa li a mona nghee Jehova a hovela okuwanifa po eudaneko olo mokweetela Ovaegipti Omahandukilo Omulongo noku ningifa omukwandudi Farao a mangulule Ovaisrael. Josua okwa li mokati kOvaisrael ovo va li va xupifwa mEfuta Litilyana nokwa li a mona nghee Farao nosho yo etangakwaita laye va fila mefuta. Josua okwa li yo a mona nghee Jehova a li a fila oshisho eemhumbwe dOvaisrael adishe, nokape na nande oumwe womOvaisrael a li a fya kenota ile kondjala ofimbo va li tava ende olweendo lile okupitila “mombuwa inene noya tilika” yaSinai. (Deut. 8:3-5, 14-16; Jos. 24:5-7) Eshi efimbo la li la fika opo Ovaisrael va finde oiwana inaenghono yOvakanaan nokukwata ko Edu lEudaneko, Josua okwa li a mona nghee Kalunga oo hava longele a li e va yambidida moshinima osho. — Jos. 10:14, 42.

6. Oshike tashi ke ku kwafela u kale u na ehalo lokulongela Kalunga?

⁶ Josua okwa li e shii kutya Jehova okwa wanifa po omaudaneko aYe. Onghee hano, Josua okwa li a popya a ti: “Ame neumbo lange [ohatu] ka longela Omwene.” (Jos. 24:15) Ongahelipi shi na sha naave? Ngeenge to diladila shi na sha nomaudaneko oo Kalunga kashili a wanifa po nale nosho yo oo ta ka wanifa po natango, mbela ihashi ku linyengifa u kale wa hala oku mu longela ngaashi Josua a li a ninga?

7. Omolwashike sha fimanenena okuninginifwa momeva?

⁷ Okudilonga shi na sha noilonga yeshito yaJehova nokudiladila shi na sha nomaudaneko aye makumwifi noku shii okulineekelwa, oshi na oku ku linyengifa u mu liyapulile noku shi ulika okupitila mokuninginifwa momeva. Eninginifo oli li onghatu ya fimanenena oyo i na okukatukwa kwaavo va hala okulongela Kalunga. Omuhopaenenwa wetu Jesus osho naanaa a li a ninga ngaho. Fimbo a li ina hovela oshilonga shaye e li Messias, okwa li a ya kuJohannes Omuninginifi opo a ka ninginifwe. Omolwashike mbela? Jesus okwa ti: “Ame nda dja keulu hakuwanifa ehalo lange mwene, ndelenee ehalo laau a tuma nge.” (Joh. 6:38) Jesus okwa li a ninginifwa opo a ulike kutya okwe liyandja opo a longe ehalo laXe. — Mat. 3:13-17.

8. Omolwashike Timoteus a li a tokola okulongela Kalunga, notashi dulika wa pumbwa okuninga shike?

⁸ Diladila yo kombinga yaTimoteus, omunyasha Omukriste, oo a li a pewa oilonga ihapu nosho yo omaufembanghenda mahapu kuJehova. Omolwashike mbela Timoteus a li a tokola okulongela Kalunga kashili? Ombibeli otai ti kutya ‘okwa li e lihonga oinima nokwa li a tomhwa a itavele.’ (2 Tim. 3:14, yelekanifa NW.) Ngeenge owa konakona Eendjovo daKalunga nowa tomhwa u itavele kutya omahongo ado ooshili, ou li monghalo ya fa yaTimoteus. Paife owa pumbwa nee okuninga etokolo. Omolwashike mbela ito lombwele ovadali voye osho wa hala okuninga? Ovadali voye nosho yo ovakulunhuongalo, otava dulu oku ku kwafela u ude ko oiteelelwa yopamishangwa i na sha neninginifo. — Lesha Oilonga 8:12.

9. Ovanhu vamwe otashi dulika va kale ve udite ngahelipi ngeenge owa ninginifwa?

⁹ Eninginifo ohali ku pe omhito iwa yokuhovela okulongela Kalunga kashili. Ngeenge owa katuka onghatu oyo, owa hovela olweendo lile olo tali ke ku etela ondjabi yomwenyo waalushe nosho yo ehafo olo hali di mokulonga ehalo laKalunga. (Heb. 12:2, 3) Oto ka hafifa yo oilyo youkwaneumbo weni oyo i li nale molweendo olo nosho yo ookaume koye meongalo lopaKriste. Ndele osho sha fimanenena, oto ka hafifa omutima waJehova. (Lesha Omayeletumbulo 23:15.) Ovanhu vamwe otashi dulika va kale vehe udite ko kutya omolwashike wa tokola okulongela Jehova notashi dulika va kale tava diladila kutya owa ninga etokolo la puka. Otashi dulika nokuli ve ku pataneke. Ndele oto dulu okufinda omashongo oo nomupondo.

Ou na okulinyenga ngahelipi ngeenge vamwe tave ku pula omapulo ile tave ku pataneke

10, 11. (a) Ovanhu otashi dulika ve ku pule omapulo elipi shi na sha netokolo loye lokulongela Kalunga? (b) Oshike to dulu okulihonga monghedi omo Jesus a li ha nyamukula omapulo e na sha nelongelokalunga lashili?

¹⁰ Etokolo loye lokulongela Jehova otashi dulika li kale tali limbililike ovanafikola vakweni, ovashiinda sheni nosho yo ovapambele voye. Otashi dulika ve ku pule kutya omolwashike wa tokola okulongela Jehova noku ku pula shi na sha neitavelo loye. Oto ke va nyamukula ngahelipi? Ou na okuunganeka omadiladilo oye nosho yo omaliudo oye opo u dule okuyelifa kutya omolwashike wa tokola okulongela Jehova. Oto dulu okuhopaenena oshihopaenenwa shaJesus sha denga mbada mokunyamukula omapulo e na sha neitavelo loye oo to pulwa kuvamwe.

¹¹ Eshi ovawiliki vomalongelokalunga Oshijuda va li tava pula Jesus omapulo okanaku e na sha nenyumuko, okwa li e va pa omushangwa oo va li inava diladila kuo. (Ex. 3:6; Mat. 22:23, 31-33) Eshi omunongo womishangwa umwe a li a pula Jesus kutya oshipango shinenenene oshilipi, Jesus okwa li e mu pa eevelishe dOmbibeli tadi wapalele. Omulumenhu oo okwa li a pandula enyamukulo olo a li a pewa kuJesus. (Lev. 19:18; Deut. 6:5; Mark. 12:28-34) Onghedi omo Jesus a li a longifa Omishangwa nosho yo omo a li ha popi oya li ya ‘tukula olutandu mokati kovanhu,’ ndele ovapataneki vaye kava li va dula oku mu ningila owii washa. (Joh. 7:32-46) Ngeenge to nyamukula omapulo e na sha neitavelo loye, longifa Ombibeli ndele ‘shi ninga nengungumano nonetilo.’ (1 Pet. 3:15) Ngeenge ku shii enyamukulo kepulo lonhumba, lombwela omunhu kutya ku shii enyamukulo noto ka konga ouyelele opo u mu etele enyamukulo. Opo nee konga oshikundafanwa osho, to longifa o-Watch Tower Publications Index ile o-Watchtower Library moungalo vokombiuta hava ifanwa CD-ROM ngeenge oi li melaka olo ho udu, ile u tale oshuuliki shoipalanyole yOshungonangelo osho hashi kala alushe mOshungonangelo yaDesemba. Ngeenge owe li longekida nawa oto ka kala u ‘shii nhumbi u na okunyamukula.’ — Kol. 4:6.

12. Omolwashike uhe na okweefa omahepeko e ku teye omukumo?

¹² Kakele kokupulwa omapulo e na sha neitavelo loye, otashi dulika yo u hangike keenghalo dimwe di lili, molwaashi Satana Ondiaboli, omutondi waKalunga oye ta pangele ounyuni ou. (Lesha 1 Johannes 5:19.) Kashi li pandunge okudiladila kutya ovanhu aveshe otava ka kala ve ku hokwa, notashi dulika nokuli u patanekwe. Ovanhu vamwe otashi dulika ve ku “sheke,” notashi dulika va twikile oku shi ninga. (1 Pet. 4:4) Ndele dimbuluka kutya haave auke, Jesus Kristus naye okwa li a hepekwa. Omuyapostoli Petrus naye okwa li yo a hepekwa nokwa shanga a ti: “Ovaholike, inamu kuminwa oupyu [okumona oixuna] ou mu li mo woku mu yeleka, wa foshinima inashi monika nale, ndelenee nyakukweni nehafo li fike poshipewa sheni shomahepeko aKristus.” — 1 Pet. 4:12, 13.

13. Omolwashike Ovakriste tava dulu okukala va hafa ngeenge tava hepekwa?

¹³ Ovakriste otava dulu okulididimikila nehafo omahepeko ile omapataneko. Omolwashike mbela taku dulu okutiwa ngaho? Omolwaashi ngeenge otwa kala tu holike kounyuni otashi ulike kutya ohatu kala pamifikamhango daSatana, ndele hadaKalunga. Jesus okwa londwela a ti: “Woo nye, ava ovanhu aveshe tave mu popile mouwa, osheshi osho tuu ngaha ooxe yavo va ningila ovaprofeti ovanaipupulu.” (Luk. 6:26) Ohatu hepekwa molwaashi Satana nounyuni waye ove tu handukila molwaashi hatu longele Jehova. (Lesha Mateus 5:11, 12.) Oshi li ehafo ‘okushekelwa edina laKristus.’ — 1 Pet. 4:14.

14. Ohashi eta oidjemo iwa ilipi ngeenge omunhu ota twikile okukala omudiinini kuJehova nonande ota hepekwa?

¹⁴ Ohashi eta oidjemo iwa ngeenge otwa kala ovadiinini kuJehova nonande ohatu patanekwa. Shotete, ohatu yandje oundombwedi u na sha naJehova nosho yo Omona waye. Oshitivali, eshi hatu lididimike noudiinini ohatu tu omukumo ovamwatate novamwameme vopaKriste. Oshititatu, ovamoninomesho ovo inava shiiva Jehova otashi dulika shi ve linyengife va kale va hala okulongela Jehova. (Lesha Ovafilippi 1:12-14.) Oshitine, ohole yoye yokuhola Jehova otai ka kala ya xwama, eshi to mono nghee te ku pameke opo u dule okulididimikila omayeleko.

Owa yeululilwa ‘oshivelo shinene’

15. ‘Oshivelo shinene’ shilipi sha li sha yeulukila omuyapostoli Paulus?

¹⁵ Omuyapostoli Paulus okwa shanga shi na sha noukalele waye muEfeso a ti: “Ame onda yeululilwa oshivelo shoshilonga shinene.” (1 Kor. 16:8, 9) Oshivelo osho osha li tashi twala koilonga inene yokuudifa onghundana iwa nosho yo yokuninga ovanhu ovahongwa moshilando osho. Mokutambula ko omhito ya tya ngaho, Paulus okwa li a kwafela ovanhu vahapu ve lihonge kombinga yaJehova nova ninge ovalongeli vaYe.

16. Osha enda ngahelipi opo oshixupe shovavaekwa shi pite ‘moshivelo sha yeuluka’ mo 1919?

¹⁶ Mo 1919, Jesus Kristus, omutumbalekwa, okwa li a ‘yeululila oshivelo’ oshixupe shovavaekwa. (Eh. 3:8) Oshixupe shovavaekwa osha li sha pita moshivelo osho nosha li sha hovela okuudifa onghundana iwa nokuhonga ovanhu oshili yOmbibeli, shi na ouladi wa xwama. Oshidjemo osha li shike? Onghundana iwa paife otai udifwa fiyo okominghulo dedu, novanhu omamiliyona aheyali lwaapo ove na eteelelo loku ka mona omwenyo waalushe mounyuni mupe waKalunga.

17. Ongahelipi ovanyasha tava dulu okupita ‘moshivelo shoshilonga shinene’?

¹⁷ “Oshivelo shoshilonga shinene” osha yeulukila natango ovapiya vaJehova aveshe. Ovo tava piti musho ohava mono ehafo nembilipalelo eshi tava kufa ombinga pauyadi mokuudifa onghundana iwa. Ovanyasha, mu li ovapiya vaJehova, omwa lenga shi fike peni oufembanghenda munene wokukwafela vamwe va “itavele evangeli”? (Mark. 1:14, 15) Mbela omwa diladila ngoo nale okulonga mu li ovakokolindjila vondjikilile ile ovakwafelikokolindjila? Vahapu vomunye otamu dulu okulonga moilonga yokutunga Omalupale Ouhamba, okulonga koBetel nosho yo moilonga youtumwa. Molwaashi ounyuni ou woukolokoshi waSatana ou li pokuxula po, opa pumbiwa neenghono ovanhu vahapu va longe moilonga ya tya ngaho. Mbela otamu ka pita ‘moshivelo shinene’ omanga pe na natango efimbo?

“Makeleni, nye mu tale ouwa wOmwene apa u fike”

18, 19. (a) Oshike sha li sha kwafela David a kale a halelela okulongela Jehova? (b) Oshike tashi ulike kutya David ka li e lipa oushima omolwokulongela Jehova?

¹⁸ Omupsalme umwe a nwefwa mo okwa shiva vakwao a ti: “Makeleni, nye mu tale ouwa wOmwene apa u fike.” (Eps. 34:9) Eshi ohamba David yaIsrael shonale ya li omumati omufita, Jehova okwa li e mu amena koifitukuti. Kalunga okwa li yo e mu kwafela molwoodi laye naGoljat nokwe mu amena komaudjuu mahapu. (1 Sam. 17:32-51; Eps. 18:1) Ouwanghenda munene waJehova owa li we linyengifa David a shange ta ti: “Oilonga inene Ove wa longa, Omwene, Kalunga kange, noikumifi yoye neemhangela kufye; kape na eshi tashi yelekwa naave.” — Eps. 40:6.

¹⁹ David okwa li e hole Jehova neenghono nokwa li a hala oku mu tanga nomutima waye aushe nomadiladilo aye aeshe. (Lesha Epsalme 40:9-11.) Eshi David a kala ta longele Jehova oule womido, ka li e lipa oushima eshi a longifa okukalamwenyo kwaye mokulongela Kalunga kashili. Okwa li e na etilokalunga, olo la li hali mu etele ehafo linene. Eshi David a li omunamido, okwa li a popya a ti: “Oove elineekelo lange, Omwene, Kalunga kange, Oove omulineekelwa wange, nghee nda dja mounona wange. Nomokufika moukulupe wange, ngenge nda ninga eenghwakutoka, Kalunga, Ove ino efa nge!” (Eps. 71:5, 18) Nonande eenghono daye dopalutu oda enda tadi ninipala, David okwa li e lineekela filufilu muJehova nokwa li e na oukaume wa kola naye.

20. Omolwashike okulongela Kalunga ku li onghedi ya denga mbada omo to dulu okulongifa okukalamwenyo kwoye?

²⁰ Oshihopaenenwa shaJosua, shaDavid nosho yo shaTimoteus otai yandje oumbangi kutya okulongela Jehova oyo onghedi ya denga mbada omo to dulu okulongifa okukalamwenyo kwoye. Omauwa opamaliko opakafimbo oo haa etwa komaifano omounyuni ou itaa dulu okuyelekwa nomauwa taa kalelele oo omunhu ta dulu okumona ‘mokulongela Omwene nomutima waye aushe nomwenyo waye aushe.’ (Jos. 22:5) Ngeenge ino liyapulila natango Jehova okupitila meilikano, lipula kutya: ‘Mbela oshike tashi imbi nge ndi ninge Ondombwedi yaJehova?’ Ngeenge ou li nale Ondombwedi yaJehova ya ninginifwa, mbela ino hala okukala wa hafa shi dulife nale monghalamwenyo yoye? Ngeenge osho, tamununa mo oukalele woye nokuninga exumokomesho lopamhepo. Oshitukulwa tashi landula otashi ke ku kwafela u lihonge shi na sha nanghee to dulu okuninga exumokomesho lopamhepo mokushikula oshihopaenenwa shomuyapostoli Paulus.

Oto nyamukula ngahelipi?

• Yandja omatomheno avali kutya omolwashike tu na okulongela Kalunga.

• Oshike sha li sha kwafela Timoteus a tokole okulongela Kalunga?

• Omolwashike u na okukala omudiinini kuJehova ngeenge to hepekwa?

• Oto dulu okulongela Jehova moilonga ilipi?

[Efano pepandja 22]

Okulongela Jehova oko onghedi ya denga mbada yokukalamwenyo

[Efano pepandja 23]

Mbela oto dulu okunyamukula omapulo oo to pulwa shi na sha neitavelo loye?