Natu kale hatu yakula vamwe tu li ngaashi ‘omalenga efilonghenda laKalunga’
‘Mokuhola ovamwaxo kaleni mu na ohole ya xwama, nomokufimanekafana pafaneni oshihopaenenwa.’ — ROM. 12:10, yelekanifa no-NW.
1. Eshilipaleko lilipi hatu hange mEendjovo daKalunga?
EENDJOVO daKalunga ode tu shilipaleka lwoikando kutya Jehova ote ke tu kwafela ngeenge twa teka omukumo ile omitima detu da teyauka. Pashihopaenenwa, tala keendjovo edi tadi hekeleke, tadi ti: “Omwene, omuyakeli waaveshe tava punduka, naava va nyongamekwa koufiye, ohe va nyongamununa.” “Oha twamifa ava ve nomutima wa tekauka, ndee ta mange oipute yavo tai yahama.” (Eps. 145:14; 147:3) Kakele kaasho, Tate yetu womeulu okwa li a popya ye mwene a ti: “Aame Omwene Kalunga koye handi kwata eke loye lokolulyo, Ame ou handi ku lombwele: Ino kala wa tila, Ame ohandi ku kwafa.” — Jes. 41:13.
2. Jehova oha yambidida ngahelipi ovapiya vaye?
2 Ndele ongahelipi Jehova oo ha kala meulu noiha monika ta dulu ‘oku tu kwata meke’? Ohe tu ‘nyongamununa ngahelipi ngeenge twa nyongamekwa’ koluhodi? Jehova ohe tu pe ekwafo la tya ngaho meenghedi di lili noku lili. Pashihopaenenwa, Jehova oha pe ovapiya vaye “eenghono di dule odo dopaushitwe” okupitila momhepo yaye iyapuki. (2 Kor. 4:7, NW; Joh. 14:16, 17) Oha nyongamununa yo ovapiya vaye okupitila mEendjovo daye da nwefwa mo, Ombibeli, odo di na eenghono. (Heb. 4:12) Mbela ope na vali onghedi imwe omo Jehova he tu pameke? Ohatu ka mona enyamukulo kepulo olo muPetrus wotete.
‘Efilonghenda laKalunga lopahapu’
3. (a) Omuyapostoli Petrus okwa ti shike kombinga yomayeleko? (b) Oshike sha kundafanwa lwopexulilo lonhumwafo yotete yaPetrus?
3 Omuyapostoli Petrus okwa li a shangela ovaitaveli vakwao ovavaekwa nomhepo a ti kutya ove na etomheno liwa lokukala va hafa, molwaashi ova tuvikililwa ondjabi iwa. Okwa weda ko a ti: “Nande paife, ngenge shi nokuningwa, tamu nyikifwa oluhodi okafimbo komayeleko mahapu.” (1 Pet. 1:1-6) Didilika outumbulilo “mahapu.” Outumbulilo oo otau ulike kutya Ovakriste ova li tava ka yelekwa meenghedi di lili noku lili. Ndele Petrus ka li a fiya ovamwaxe momalimbililo shi na sha nangeenge otava ka pondola ngoo ngeenge ova hangwa komayeleko e lili noku lili. Ponhele yaasho, okwa li a shilipaleka Ovakriste vakwao kutya Jehova ote ke va kwafela va ungaunge neyeleko keshe olo tava ka shakeneka, kashi na nee mbudi kutya eyeleko olo ola tya ngahelipi. Eshilipaleko olo otali hangwa metukulwa eti-4 lonhumwafo yaPetrus wotete, omo omuyapostoli oo a kundafana oinima i na sha ‘nexulilo loinima aishe.’ — 1 Pet. 4:7.
4. Omolwashike eendjovo da 1 Petrus 4:10 tadi tu hekeleke?
4 Petrus okwa ti: “Yakulafaneni keshe tuu noshalinghenda e i pewa ngaashi omalenga mawa efilonghenda [laKalunga lopahapu].” (1 Pet. 4:10) Pomhito oyo Petrus okwa li natango a longifa outumbulilo “lopahapu.” Kungaho, Petrus okwa li a hala kutya: ‘Omayeleko ohae uya meenghedi di lili noku lili, ndele Kalunga naye oha ulike efilonghenda laye meenghedi di lili noku lili.’ Mbela omolwashike eendjovo odo tadi hekeleke? Otadi hekeleke molwaashi otadi ulike kutya kashi na nee mbudi kutya ohatu shakeneke eyeleko loludi lilipi, Kalunga ote ke tu ulikila alushe efilonghenda laye opo tu dule okulididimikila eyeleko la tya ngaho. Mokutala keendjovo daPetrus, mbela owa didilika ngoo nghee Jehova he tu ulikile efilonghenda laye? Jehova ohe tu ulikile efilonghenda laye okupitila mOvakriste vakwetu.
Natu “yakulafaneni”
5. (a) Omukriste keshe oku na okuninga shike? (b) Omapulo elipi a holoka po?
5 Petrus okwa li a lombwela oilyo aishe yeongalo lopaKriste, a ti: “Komesho yaaishe ohole yeni yokuholafana nai kale ya xwama.” Opo nee okwa weda ko ta ti: “Yakulafaneni keshe tuu noshalinghenda e i pewa.” (1 Pet. 4:8, 10) Onghee hano, keshe umwe meongalo oku na oshinakuwanifwa shokutunga Ovakriste vakwao. Jehova okwe tu lineekelela oshinima shi na ondilo, notu na oku shi longifa mokuyakula vamwe. Mbela oshike osho twe lineekelelwa? Petrus okwa ti kutya otwe lineekelelwa ‘eeshali.’ Eeshali odo odilipi? Ongahelipi hatu dulu oku di longifa ‘mokuyakula’ vamwe?
6. Ovakriste ove lineekelelwa vali eeshali dimwe dilipi?
6 Eendjovo daKalunga otadi ti: “Keshe oshipewa shiwa, nokeshe oshali sha wanenena, ohashi di kombada.” (Jak. 1:17) Oshoshili kutya eeshali adishe odo Jehova e lineekelela ovapiya vaye odi li euliko lefilonghenda laye. Oshali imwe ya tongomana oyo Jehova he tu pe oyo omhepo iyapuki. Oshali oyo ohai tu kwafele tu kulike omaukwatya opakalunga ngaashi ohole, ouwa nengungumano. Omaukwatya oo ohae tu linyengifa tu ulikile ovaitaveli vakwetu ohole tai di komutima noku va kwafela nehalo liwa. Amwe omomaukwatya vali oo hatu mono kekwafo lomhepo iyapuki ongaashi ounongo washili neshiivo. (1 Kor. 2:10-16; Gal. 5:22, 23) Natango, oinima ngaashi eenghono detu, okudula kwetu nosho yo oitalenti yetu nayo otai dulu okutalika ko i li eeshali odo hatu dulu okufimanekifa nado Kalunga, Tate yetu womeulu. Kalunga okwa hala tu longife okudula kwetu nosho yo omaukwatya oo tu na opo tu ulikile ovaitaveli vakwetu efilonghenda laye.
Ongahelipi hatu dulu ‘okuyakulafana’ neeshali odo twa pewa?
7. (a) Outumbulilo “keshe tuu” otau ulike kushike? (b) Omapulo elipi tu na okulipula, nomolwashike?
7 Petrus okwa li yo a popya kombinga yeeshali odo twa pewa, a ti: ‘Yakulafaneni keshe tuu noshalinghenda e i pewa.’ Outumbulilo “keshe tuu” otau ulike kutya omaukwatya etu nokudula kwetu otashi dulika ku kale kwa yoolokafana. Ndele nande ongaho, atusheni otwa ladipikwa tu longife oshali keshe twa pewa opo tu “yakulafaneni.” Shikwao vali, otwa lombwelwa tu di longife “ngaashi omalenga mawa.” Onghee hano, oshiwa okulipula kutya: ‘Mbela ohandi longifa ngoo eeshali odo nda pewa opo ndi pameke ovaitaveli vakwetu?’ (Yelekanifa na 1 Timoteus 5:9, 10.) ‘Ile pamwe ohandi longifa unene okudula kwange oko nda pewa kuJehova mokukonga ouwa wange mwene, tashi dulika opo ndi likole oupuna ile ndi liningile edina mounyuni?’ (1 Kor. 4:7) Ohatu ka hafifa Jehova ngeenge otwa longifa eeshali detu ‘mokuyakula’ vamwe. — Omayel. 19:17; lesha Ovaheberi 13:16.
8, 9. (a) Eenghedi dimwe dilipi omo Ovakriste hava yakula ovaitaveli vakwao mounyuni aushe? (b) Ovamwatate novamwameme ohava kwafelafana ngahelipi meongalo leni?
8 Eendjovo daKalunga otadi hokolola kutya Ovakriste vomefelemudo lotete ova li hava yakulafana meenghedi di lili noku lili. (Lesha Ovaroma 15:25, 26; 2 Timoteus 1:16-18.) Kunena, Ovakriste vashili navo ohava longifa eeshali davo nehalo liwa opo va yakule ovaitaveli vakwao. Natu ka taleni keenghedi dimwe omo have shi ningi.
9 Ovamwatate vahapu ohava longifa eevili donhumba omwedi keshe tave lilongekidile oitukulwa yokwoongala. Ngeenge tava yelifa dimwe domeeshili di na ondilo pokwoongala odo va mona mokukonakona Ombibeli, ounongo wavo ohau linyengifa aveshe meongalo ve lididimikile omayeleko. (1 Tim. 5:17) Ovamwatate novamwameme vahapu ova shiivikila ohamu nohava kenukile ovaitaveli vakwao. (Rom. 12:15) Vamwe ohava talele po alushe ovo va polimana nohava ilikana pamwe navo. (1 Tes. 5:14) Vamwe ohava longifa efimbo lavo opo va shangele Ovakriste vakwao ovo tava ungaunga nomayeleko eenhumwafo detwomukumo. Vamwe natango ohava kwafele ovo ve na omaunghundi opalutu moku va twala kokwoongala kwopaKriste. Eendombwedi omayovi ohadi kufa ombinga moilonga yokuyandja omakwafo, tadi kwafele ovaitaveli vakwao va tungulule omaumbo avo oo a teywa po koiponga yopaushitwe. Ohole yokomutima nosho yo ekwafo olo hali yandjwa kovamwatate novamwameme va tya ngaho oi li euliko ‘lefilonghenda laKalunga lopahapu.’ — Lesha 1 Petrus 4:11.
Okukwafela ovamwatate nokuudifa shilipi sha fimanenena?
10. (a) Oinakuwanifwa yopavali ilipi Paulus a li a lenga? (b) Ongahelipi nafye kunena hatu dulu okuhopaenena Paulus?
10 Ovapiya vaKalunga inava pewa ashike eeshali va kale tava kwafele ovaitaveli vakwao, ndele ove lineekelelwa yo etumwalaka olo ve na okutwaalela ovanhu vakwao. Omuyapostoli Paulus okwa li a lenga oinakuwanifwa oyo yopavali, oyo a pewa kuJehova e i wanife po. Okwa li a shangela eongalo lokuEfeso kombinga ‘yepangelo leumbo longhenda yaKalunga’ olo a li a pewa omolwouwa wavo. (Ef. 3:2) Kakele kaasho, Paulus okwa ti yo kutya: “Kalunga e tu tala twa wana okulineekelwa evangeli.” (1 Tes. 2:4) Ngaashi Paulus, nafye otwa tambula ko oshinakuwanifwa osho twe lineekelelwa shokukala tu li ovaudifi vOuhamba waKalunga. Ngeenge hatu kufa ombinga nouladi moilonga yokuudifa, kungaho ohatu hopaenene Paulus oo a li omuudifi wonghundana iwa omuladi. (Oil. 20:20, 21; 1 Kor. 11:1) Otu shi shii kutya oilonga yokuudifa etumwalaka lOuhamba otai dulu okuxupifa eemwenyo. Ndele pefimbo opo tuu opo, ohatu kendabala ngaashi Paulus okukonga eemhito opo tu dule okupa ovaitaveli vakwetu “eeshalinghenda dimwe dopamhepo.” — Lesha Ovaroma 1:11, 12; 10:13-15.
11. Otu na okukala twa tala ko ngahelipi oshinakuwanifwa shetu shokuudifa noshokutunga ovamwatate?
11 Mbela shilipi shomoinakuwanifwa oyo yopavali Kalunga a pa Ovakriste sha fimana neenghono shi dule shikwao? Okupula epulo la tya ngaho otaku dulu okufaafanifwa nomunhu oo ta pula kombinga yokadila ta ti, evava lokadila lilipi la fimana neenghono li dule likwao? Enyamukulo kepulo olo ola yela. Okadila oka pumbwa okukala ke na omavava aeshe avali opo ka dule okutuka nawa. Sha faafana, nafye otwa pumbwa okukala hatu wanifa po oinakuwanifwa yetu aishe opo tu kale metwokumwe naasho Kalunga ta pula kufye tu li Ovakriste. Onghee hano, ngaashi omuyapostoli Petrus nomuyapostoli Paulus, nafye natu kaleni twa tala ko kutya oinakuwanifwa yetu yokuudifa onghundana iwa nokutunga ovaitaveli vakwetu oya pambafana. Oinakuwanifwa oyo yopavali oya pambafana ngahelipi?
12. Ohatu longo ngahelipi tu li ngaashi oilongifo meke laJehova?
12 Tu li ovaudifi vevangeli, ohatu longifa ounghulungu wokuhonga woludi keshe oo tu na nelalakano lokuhanga omitima dovanhu vakwetu netumwalaka lOuhamba waKalunga olo tali hekeleke. Kungaho, ohatu va kwafele tu na etimaumbwile kutya fiku limwe onava ka ninge ovahongwa vaKristus. Ndele pefimbo opo tuu opo, ohatu longifa yo okudula kwetu keshe neeshali vali dimwe odo tashi dulika tu na nelalakano opo tu twe ovaitaveli vakwetu omukumo neendjovo dehekeleko nosho yo noilonga tai ti sha, naasho oshi li yo euliko lefilonghenda laKalunga. (Omayel. 3:27; 12:25) Kungaho, ohatu va kwafele tu na etimaumbwile kutya otava ka twikila okukala ovahongwa vaKristus. Otu na oufembanghenda mukumwifi wokulonga tu li ngaashi oilongifo meke laJehova, mokukala hatu wanifa po oinakuwanifwa yetu, okuudifila ovanhu moipafi nosho yo ‘okuyakulafana’ novaitaveli vakwetu. — Gal. 6:10.
“Kaleni mu na ohole ya xwama”
13. Oshike tashi ka ningwa po ngeenge ihatu “yakulafaneni”?
13 Paulus okwa li a ladipika ovaitaveli vakwao a ti: ‘Mokuhola ovamwaxo kaleni mu na ohole ya xwama, nomokufimanekafana pafaneni oshihopaenenwa.’ (Rom. 12:10, yelekanifa no-NW.) Ohole yetu ya xwama ohai tu linyengifa tu yakule ovamwatate nehalo liwa ngaashi omalenga efilonghenda laKalunga. Otu shii kutya Satana ota ka teya po oukumwe wetu ngeenge itatu ‘yakulafana.’ (Kol. 3:14) Ngeenge katu na elongelokumwe mokati ketu, itatu ka kala ovaladi moilonga yokuudifa. Satana oku shi shii kutya ngeenge okwa lemaneke evava letu limwe, ohatu ka wila ashike poshi, oku shi popya pafaneko.
14. Oolyelye hava mono ouwa ‘mokuyakula’ vamwe? Yandja oshihopaenenwa.
14 ‘Okuyakula’ vamwe ihaku etele ashike omunhu oo ta yakulwa pafilonghenda laKalunga ouwa, ndele ohaku etele yo nakuyakula mukwao ouwa. (Omayel. 11:25) Tala koshihopaenenwa shovalihombili vamwe, Ryan naRoni, ovo hava kala muIllinois, shomuAmerika. Konima eshi ovalihomboli ovo va uda kutya oshikungulu Katrina osha li sha hanauna po omaumbo omafele Eendombwedi dikwao, ova li ve linyengifwa kohole youmwainafana va efe po oilonga yavo opo va ka kwafele koshitukulwa osho sha li sha dengwa koshikungulu. Ova li yo va landifa po eumbo lavo, tava lande okarafana ikulu, tave i pangele nawa, nokudja opo, ova li ve lidenga ondjila okuya kuLouisiana, osho sha li kokule oshinano sheekilometa 1 400. Ova kala koshilando oko oule wodula nasha tava kwafele ovamwatate, tava longifa efimbo lavo, eenghono davo noiniwe yavo. Ryan womido 29, okwa ti: “Okukufa ombinga moilonga yokuyandja omakwafo okwa kwafela nge ndi ehene popepi elela naKalunga. Onda li nda mona kutya Jehova oha file oshisho oshiwana shaye.” Ryan okwa twikila ko a ti: “Okulonga pamwe novamwatate ovanamido okwa honga nge shihapu kombinga yanghee ndi na okufila ovamwatate oshisho. Onda mona yo kutya ope na shihapu osho hatu dulu okuninga mehangano laJehova tu li ovanyasha.” Roni womido 25, okwa ti: “Onda pandula neenghono eshi nda li nda dula okukwafela vamwe. Inandi mona nande onale ehafo monghalamwenyo yange ngaashi eli ndi na. Onde lineekela kutya ohandi ka mona mo natango ouwa moshimoniwa eshi shihokwifa momido di li komesho.”
15. Otu na omatomheno mawa elipi okutwikila okulonga tu li ngaashi omalenga efilonghenda laKalunga?
15 Oshoshili kutya okudulika koshipango shaKalunga shokuudifa onghundana iwa nokutunga ovaitaveli vakwetu ohaku etele aveshe omanangeko noupuna. Ovanhu ovo hatu kwafele ohava pamekwa pamhepo, ofimbo fyeni hatu mono ehafo lokomutima olo hali di mokuyandja. (Oil. 20:35) Eongalo alishe ohali kala la xwama mohole ngeenge oilyo aishe tai filafana oshisho pahole. Kakele kaasho, ohole ohai tu didilikifa tu li Ovakriste vashili. Jesus okwa ti: “Opo tuu opo aveshe tave mu koneke kutya, nye ovalongwa vange, ngenge mu holafane.” (Joh. 13:35) Ndele komesho yaaishe, Tate yetu omunahole, Jehova, oye e na okupewa efimano molwaashi oye e tu honga tu kale hatu file oshisho ovanhu ovo ve na omumbwe. Katu na tuu omatomheno mawa okulongifa eeshali detu ‘mokuyakulafana ngaashi omalenga mawa efilonghenda laKalunga’! Mbela oto ka twikila okuninga ngaho? — Lesha Ovaheberi 6:10.
Oto dimbuluka?
• Jehova oha pameke ngahelipi ovapiya vaye?
• Otwe lineekelelwa shike?
• Eenghedi dimwe dilipi omo hatu dulu okuyakula ovaitaveli vakwetu?
• Oshike tashi ke tu linyengifa tu twikile okulongifa eeshali detu ‘mokuyakula’ vamwe?
[Omafano pepandja 17]
Mbela oho longifa ‘eeshali’ odo u na mokuyakula vamwe ile omokulalakanena ashike ouwa woye mwene?
[Omafano pepandja 19]
Ohatu udifile vamwe onghundana iwa nohatu yambidida Ovakriste vakwetu
[Efano pepandja 20]
Ovo hava longo oilonga yokuyandja omakwafo ova wana okupandulwa omolwomhepo yavo yeliyambo