Taamba nolupandu nokugandja nomutima aguhe

JEHOVA, Tate yetu omunahole gwomegulu, oku na ko nasha nakehe gumwe gwomutse. Oohapu dhe otadhi tu shilipaleke kutya ye oku na ko nasha unene naapiya ye ayehe. (1 Pet. 5:7) Omukalo gumwe ngoka tagu ulike kutya Jehova oku na ko nasha natse, ohe tu kwathele momikalo dha yoolokathana opo tu mu longele nuudhiginini. (Jes. 48:17) Uuna tu li moothina ndhoka hadhi tu ehameke koomwenyo, Jehova oha kala a hala tu longithe omakwatho ngoka he tu pe. Uushili waashika otawu adhika mOmpango yaMoses.

Pethimbo lyOmpango, Jehova okwa li a ninga elongekidho lyopahole okukwathela “oohepele,” ngaashi oothigwa, aaselekadhi naakwiilongo. (Lev. 19:9, 10; Deut. 14:29) Oku shi kutya aapiya ye yamwe otaya ka kala ya pumbwa okwaambidhidhwa kooitaali ooyakwawo. (Jak. 1:27) Onkee ano, kapu na omupiya gwe ta ka kwatakwata okutaamba ekwatho okuza kwaamboka Jehova ti inyengitha ye li gandje. Nonanando ongaaka, uuna tatu pewa ekwatho otwa hala okukala niikala iiwanawa.

Oohapu dhaKalunga otadhi ulike wo kutya aapiya ye oye na ompito yokugandja. Dhimbulukwa ehokololo ‘lyomuselekadhi ohepele’ ngoka Jesus a mono motempeli muJerusalem. (Luk. 21:1-4) Osha yela kutya omuselekadhi ngoka okwa li ha mono omasiloshimpwiyu gopahole gaJehova ngoka ga tumbulwa mOmpango. Ihe nonando okwa li ohepele, omuselekadhi ngoka ita dhimbulukiwa owala molwaashoka a li ha pewa, ihe okwa tseyikila wo okugandja kwe. Iikala ye mbyoka yokugandja oya li ye mu etele enyanyu, molwaashoka Jesus okwa ti kutya “okugandja oku na elago ku vule okutaamba.” (Iil. 20:35) Oshiholelwa shoka otashi tu kwathele ngiini kombinga ‘yokugandja’ nokumona elago ndyoka hali zi muko?—Luk. 6:38.

“OMUWA otandi mu futu shike?”

Omupisalomi okwa li ipula a ti: “OMUWA otandi mu futu shike moluuwanawa we auhe e u ningile ndje?” (Eps. 116:12) Omupisalomi okwa li a mono uuwanawa washike? Jehova okwa li e mu kwathele sho a gwililwa po “kuudhigu nokoluhodhi.” Natango, Jehova okwe mu ‘hupitha meso.’ Konima yaashono okwa li a hala ‘okufuta’ Jehova momukalo gwontumba. Oshike omupisalomi a li ta vulu okuninga? Okwa ti: “Omauvaneko gandje otandi ga gwanithile OMUWA.” (Eps. 116:3, 4, 8, 10-14) Okwa li a tokola toko a gwanithe po omauvaneko ge ngoka u uvanekela Jehova nokugwanitha po iinakugwanithwa ayihe mbyoka e yi mu pa.

Nangoye oto vulu okuninga sha faathana. Ngiini mbela? Omokukala to vulika kiipango nokomakotampango gaKalunga monkalamwenyo yoye ayihe. Onkee ano, okulongela Jehova naku kale oshinima sha simanenena monkalamwenyo yoye ayihe nokweetha ombepo ye yi ku wilike mwaashihe shoka to ningi. (Omuuv. 12:13; Gal. 5:16-18) Oshoshili kutya ito vulu nando okufuta Jehova omolwiilonga ayihe mbyoka e ku ningila. Ihe ohashi ‘nyanyudha omwenyo gwe’ oku ku mona to mu longele nomutima aguhe. (Omayel 27:11) Kashi shi li tuu uuthembahenda wa dhenga mbanda okunyanyudha Jehova momukalo ngoka!

Humitha komeho ombili megongalo

Nopwaahe na omalimbililo, oto shi zimine kutya owa mona uuwanawa momikalo odhindji megongalo lyopaKriste. Jehova oha gandja eloolo lyiikulya yopambepo okupitila megongalo. Owa mona oshili ndjoka ye ku mangulula komapuko gomalongelokalunga nomomilema dhopambepo. (Joh. 8:32) Pokugongala kwegongalo nopiigongi yoshikandjo noyoshitopolwa mbyoka hayi longekidhwa ‘komupiya omudhiginini nomunandunge,’ owa likola po ontseyo ndjoka tayi fala komwenyo gwaaluhe moparadisa kombanda yevi moka kaamu na uuwehame nokumona iihuna. (Mat. 24:45-47, yelekanitha NW.) Mbela oho ipula ngaa kombinga yomauwanawa ogendji ngoka wa mona okupitila megongalo naangoka to ka mona monakuyiwa? Oshike to vulu okupa egongalo?

Omuyapostoli Paulus okwa nyola a ti: “Iilyo ayihe yolutu yi ili noyi ili otayi kwatathana kumwe nolutu aluhe lwa kwatelwa kumwe koluthipa kehe ndyoka lu li molutu. Onkee oshilyo kehe pehala lyasho ngele tashi longo, ngashika shi na okulonga, nena olutu aluhe otalu koko notalu itungu lwo lwene e talu kala talu pangelwa kohole.” (Ef. 4:15, 16) Nonando menyolo ndika Paulus okwa li ta popi Aakriste aagwayekwa, ekotampango ndyoka otali longo nokAakriste ayehe kunena. Eeno, kehe gumwe megongalo ota vulu okuhumitha komeho ombili noku yi kokeka. Ngiini mbela?

Otatu vulu oku shi ninga mokukala aluhe hatu ladhipike yalwe noku ya talaleka pambepo. (Rom. 14:19) Natse otatu vulu wo okwiimika iiyimati yombepo yaKalunga mokukala kwe nooitaali ooyakwawo shoka tashi kwathele ‘olutu lu koke.’ (Gal. 5:22, 23) Natango, natu konge ompito opo tu “ningileni kehe gumwe uuwanawa, ihe unene tuu mboka tu li nayo meitaalo limwe.” (Gal. 6:10; Heb. 13:16) Aamwatate naamwameme ayehe, aakulupe naagundjuka megongalo otaya vulu ‘okutunga olutu pahole.’

Otatu vulu natango okulongitha iipewa yetu, oonkondo dhetu niiniwe yetu opo tu kuthe ombinga miilonga yokuuvitha mbyoka hayi longwa kegongalo. Jesus Kristus okwa ti: “Omwa pewa oshindji omagano.” Shoka otashi tu inyengitha tu ninge shike? Jesus okwa ti: “Gandjeni wo omagano.” (Mat. 10:8) Onkene kutha ombinga pakuudha miilonga ya simanenena yokuuvitha kombinga yUukwaniilwa noyokuninga aantu aalongwa. (Mat 24:14; 28:19, 20) Opu na sha shoka tashi ku imbi wu shi ninge? Dhimbulukwa omuselekadhi ohepele ngoka a hokololwa kuJesus. Okwa li a gandja okashona hoka e na. Ihe Jesus okwa ti kutya okwa gandja oshindji e vulithe ayehe yalwe. Okwa li a gandja ashihe shoka ta vulu okugandja.—2 Kor. 8:1-5, 12.

Taamba ko ekwatho niikala yu uka

Otashi vulika ethimbo limwe wu kale wa pumbwa ekwatho okuza kegongalo. Ino tinda nando ekwatho ndyoka to pewa okuza kegongalo ngele oto kondjo nomaupyakadhi guuyuni mbuka. Jehova okwa gandja aalumentu mboka ya pyokoka noye na ko nasha ya ‘lithe egongalo,’ opo ye ku kwathele uuna wu li momayeleko nomuudhigu. (Iil. 20:28) Aakuluntugongalo niilyo yilwe yegongalo oya hala oku ku hekeleka, oku ku ambidhidha noku ku gamena uuna wu li muudhigu.—Gal. 6:2; 1 Tes. 5:14.

Onkee ano, shilipaleka kutya uuna to pewa ekwatho, li taamba ko niikala yu uka. Kala aluhe ho pandula ekwatho ndyoka to pewa. Ekwatho ndyoka to pewa kooitaali ooyakweni li tala ko li li esilohenda lyaKalunga inaali longelwa. (1 Pet. 4:10) Omolwashike shoka sha simana? Omolwaashoka inaatu hala tu kale twa fa aantu oyendji muuyuni mboka haya pewa, ihe ihaya pandula.

Kala nondjele

Montumwafo ye ndjoka Paulus a nyolele egongalo lyAafilippi okwa ti: “Timoteus oye awike he mú dhiladhila ngaashi ngame noku na oshimpwiyu nane.” Ihe Paulus okwa gwedha ko a ti: “Ayehe oyi ipyakidhila ashike niinima yawo yene, haambyoka yaJesus Kristus.” (Fil. 2:20, 21) Oohapu ndhoka dhaPaulus otadhi tu kwathele ngiini opo twaaha kale twi ipyakidhila ‘niinima yetu yene’?

Katu na okukala hatu thiminike yalwe megongalo ya longithe ethimbo lyawo nomadhiladhilo gawo ye tu kwathele tu kandule po omaupyakadhi getu. Omolwashike mbela? Dhiladhila kwaashika: Otatu kala shili nolupandu unene ngele omumatate okwe tu pe ekwatho tu kandule po ompumbwe yetu ndjoka ye endelela. Nopwaahe na omalimbililo ota tu ke mu pandula noonkondo. Mbela otatu ke mu thiminika e tu pe ekwatho ndyoka? Aawe, hasho nando. Sha faathana, aamwatate aaholike ohaya kala ya nyanyukwa aluhe ngele taye tu kwathele, ihe otwa pumbwa okukala nondjele nokutegelela ye tu pe nethimbo lyawo. Kehe shimwe shoka ooitaali ooyakwetu taya ningi oku tu kwathela tu pite momathimbo omadhigu, otwa hala shili ye shi ninge nehalo ewanawa.

Osha yela kutya aamwatate naamwameme otaya ka kala yi ilongekidha noye na ehalo ye ku kwathele. Ihe nonando ongaaka, omathimbo gamwe otashi vulika itaya vulu okugwanitha po oompumbwe dhoye adhihe. Ngele osha ningwa, kala wu shi shi nokutya Jehova ote ke ku kwathela muudhigu woye, ngaashi owala a li a kwathele omupisalomi.—Eps. 116:1, 2; Fil. 4:10-13.

Onkee ano, taamba ko nolupandu ekwatho kehe ndyoka Jehova te ku pe, unene tuu uuna wu li moothina nomomaupyakadhi. (Eps. 55:22) Okwa hala wu ninge ngaaka, nokwa hala wo wu kale to “gandja nenyanyu.” Onkee ano, kala wa tokola wu ‘gandje ngaashi omwenyo gwoye tagu ku lombwele’ wu ambidhidhe elongelokalunga lyashili naashoka to vulu okugandja. (2 Kor. 9:6, 7) Momukalo nguka, oto ka vula okutaamba nolupandu nokugandja nomutima aguhe.

[Oshimpungu/Omathano pepandja 32]

“OMUWA otandi mu futu shike moluuwanawa we auhe e u ningile ndje?”—Eps. 116:12

▪ Konga ompito wu “ningileni kehe gumwe uuwanawa”

▪ Kala ho ladhipike yalwe noku ya talaleka pambepo

▪ Kutha ombinga pakuudha miilonga yokuninga aantu aalongwa ngaashi to vulu