“Sigo uunake ndi na oku ku kugila ekwatho?”
Jayne okwa li a lili ta ti: “Onda hala owala uuwehame wu pole.” Okwa li e na uuvu wokankela ndjoka ya li tayi ihanene nolutu aluhe. Yaandjawo nookuume ke kaya li tuu ya hala okukutha po omukithi ngoka nokuhulitha po uuwehame mboka! Oya li ya galikana Kalunga e mu kwathele. Mbela Kalunga okwa li ngaa a pulakene kuyo? Mbela okwa li ngaa e na ko nasha nayo?
KALUNGA onkalo yaantu oku yi wete. Oohapu dhe, Ombiimbeli, otadhi ti: “Kehe shimwe shomeshito otashi fudhagana kuuwehame.” (Aaroma 8:22) Kalunga okwa tseya kutya opu na aantu omamiliyona omathele mboka taye ehama esiku kehe tashi vulika palutu, pamaiyuvo nenge pamadhiladhilo, ngaashi Jayne. Kalunga oku wete aantu omamiliyona 800 mboka haya lala nondjala esiku kehe, yalwe omamiliyona otaya monithwa iihuna momagumbo naavali oyendji otayi ipula nonakuyiwa yoyana nosho wo onkalonawa yawo. Mbela owi ipula nale ngele Kalunga ota ka ninga po sha opo a kandule po omaupyakadhi ngaka? Dhoshili, molwaashoka otwa hala okukwathela mboka tu hole, mbela Kalunga oye ando a kale inaa hala okukwathela aantu mboka ye li eshito lye?
Ngele owi ipula nale omapulo ga tya ngawo, hangoye awike. Oomvula dhi vulithe 2 600 dha piti, omulumentu omudhiginini Habakuk okwa li ta dhiladhila ngaashi oyendji kunena haya dhiladhila, nokwa li a pula Kalunga a ti: “OMUWA, sigo uunake ndi na oku ku kugila ekwatho ngoye itoo pulakene, ngoye itoo tu hupitha mo momathiminiko? Omolwashike to talitha ndje omalwa? Sigo uunake to idhidhimikile iilonga yuukolokoshi? Eyonuko nomathiminiko oya kunduka ndje, naapehe ope na omalugodhi noontamanana.” (Habakuk 1:2, 3) Omupolofeti Omuhebeli Habakuk okwa li a mono iilonga iinyanyalithi yelongitho lyoonkondo noyonyanya pethimbo lye. Kunena iilonga ya tya ngaaka oyi li oonkundana dhaapuhe ndhoka hadhi uvitha nayi aantu mboka ye na ohenda.
Mbela Kalunga okwa li a dhini omaipulo gaHabakuk? Aawe. Okwa li a pulakene komapulo gaHabakuk ge shi okuuviwa ko nopo nduno okwa li a hekeleke omulumentu nguka Habakuk a nika oluhodhi nokwe mu ladhipike. Jehova Kalunga okwa li a koleke eitaalo lyaHabakuk moku mu uvanekela kutya ota ka hulitha po okumona iihuna. Etumwalaka lyaKalunga li na ko nasha netegameno otali vulu oku ku shilipalekulula wo, ngaashi Jayne noyaandjawo. Iitopolwa tayi landula otayi ka yamukula omapulo ngaka: Ongiini tatu vulu okukala nuushili kutya Kalunga oku na ko nasha natse shili? Kalunga ota ka ninga shike opo a hulithe po okumona iihuna, nuunake te ke shi ninga?