Longa aanona yoye

Jeremia ka li e etha po okulongela Jehova

MBELA opu na ethimbo ho kala wu uvite wa teka omukumo nowu uvite wa fa wa hala okweetha po okulongela Jehova?— a Oyendji osho haya kala yu uvite ngaaka. Omugundjuka Jeremia osho a li u uvite ngaaka. Ihe ka li e etha shoka yalwe ya li haya popi nenge haya ningi shi mu ethithe po okulongela Jehova. Natu popye kombinga yankene Jeremia a li a talika ko kuKalunga e li omuntu i ikalekelwa nokuli nonando okwa li a hala okweetha po oku mu longelela.

Manga Jeremia inaa valwa, Kalunga kashili, Jehova, okwa li e mu hogolola a ninge omupolofeti opo a londodhe aantu kutya shoka haya longo inashi hokiwa kuKalunga. Mbela owu shi kutya Jeremia okwa li a lombwele Jehova shike konima yoomvula?— Okwa li e mu lombwele a ti: “Kandi shi kupopya, oshoka ngame omunona.”

Mbela sho to dhiladhila Jehova okwa li a yamukula Jeremia ngiini?— Okwa li e mu yamukula momukalo gwohenda, ihe ogwa kwata miiti a ti: ‘Ino tya, ngoye omunona; inda kaantu mboka tandi ku tumu kuyo, ngoye u ya lombwele ashihe tandi shi ku lombwele, u shi popye. Ino ya tila.’ Omolwashike kee na oku ya tila? Jehova okwa ti: “Ondi li pungoye notandi ku gamene.”—Jeremia 1:4-8.

Nonando ongaaka, ngaashi sha popiwa metetekelo, konima yethimbo Jeremia okwa li a si uunye. Okwa li a si uunye molwaashoka okwa li ha shekwa omolwokulongela Kalunga. Okwa ti: ‘Shaa ngoka oha kala ta yolo ndje omutenya aguhe.’ Onkee ano, okwa li a tokola e ethe po okulongela Jehova. Okwa ti: “Otandi dhimbwa, ite popi we medhina [lyaJehova].” Ihe mbela okwa li e etha po shili okulongela Jehova?

Jeremia okwa ti: ‘Etumwalaka lyaJehova olya li lya fa omulilo gwa hwama meni lyandje. Onde gu idhidhimikile, ihe ine vula okumwena.’ (Jeremia 20:7-9) Nokuli nonando omathimbo gamwe Jeremia okwa li a tila, ka li e etha po okulongela Jehova molwaashoka okwa li e mu hole. Natu tale kutya ongiini Jeremia a li a gamenwa molwaashoka a li inee etha po okulongela Jehova.

Jehova okwa li a lombwele Jeremia a londodhe aantu kutya Jerusalem otashi ka hanagulwa po ngele inaya lundulula omikalo dhawo omiwinayi. Sho Jeremia a li e ya londodha, aantu oya li ya geye e taya ti: “Omulumentu nguka okwi ilongele egeelo lyokusa.” Ihe Jeremia okwa li e yi indile ya “vulike kOMUWA.” Opo nduno okwe ya lombwele a ti: ‘Shi tseyeni ashike, ngele otamu dhipaga ndje, otamu kala mu na ondjo yedhipago lyomukeenandjo, oshoka OMUWA oye a tumu ndje, ndi mú pe elondodho ndika.’ Mbela owu shi kutya oshike sha li sha ningwa po konima yaashoka?—

Ombiimbeli oya ti: “Aawiliki naantu ayehe oya lombwele aayambi naahunganeki taa ti: ‘Omulumentu nguka okwe tu uvithile medhina lyOMUWA Kalunga ketu; ke na okudhipagwa andola.’” Onkee ano, Jehova okwa li a gamene Jeremia molwaashoka uumbanda kawa li we mu ningitha e ethe po oku mu longela. Ngashingeyi natu tale kutya oshike sha li sha ningilwa Urija, omupolofeti gwaJehova ngoka a li i inyenge lela shi ili.

Ombiimbeli oya ti: ‘Urija okwa kala nokuhunganeka kombinga yokuhanagulwa po kwaJerusalem, ngaashi naanaa Jeremia a li a ningi.’ Ihe mbela owu shi kutya Urija okwa li a ningi po shike sho omukwaniilwa Jojakim a li e mu geele?— Okwa li a tila, okwe etha po okulongela Jehova e ta yi ontuku kuEgipiti. Onkee ano, omukwaniilwa okwa li a tumu aalumentu ye ke mu tale ko. Mbela owu shi kutya omukwaniilwa omwiinayi okwa li a ningi po shike sho ye mu e ta?— Okwa dhipaga Urija negonga.—Jeremia 26:8-24.

Mbela sho to dhiladhila omolwashike Jeremia a li a gamenwa kuJehova omanga Urija inaa gamenwa?— Jeremia okwa li a tila ngaashi naanaa Urija, ihe ka li a sholola mokulongela Jehova e ta fadhuka po. Ka li e etha po okulongela Jehova. Mbela oshiilongomwa shini tatu vulu okwiilonga moshiholelwa shaJeremia?— Osho kutya omathimbo gamwe otashi vulika tu mone sha fa oshidhigu okulonga shoka Kalunga e tu lombwela, ihe otu na aluhe oku mu inekela nokuvulika kuye.

[Enyolo lyopevi]

Omapulo:

○ Kalunga okwa li a hogolola Jeremia a longe oshilonga shashike?

○ Omolwashike Jeremia a li u uvite a fa a hala okweetha po okulongela Jehova?

○ Omolwashike Jeremia a li a gamenwa kuJehova omanga Urija inaa gamenwa?

○ Oshike wi ilonga moshiholelwa shaJeremia?