Aantu oye na okuninginithwa medhina lyalye nolyashike?

‘Indeni ano, ka ningeni aantu aalongwa, mu ya ninginithile, medhina lyaHe nolyOmwana nolyombepo ondjapuki.’—MAT. 28:19, yelekanitha NW.

1, 2. (a) Oshike sha li sha ningwa po muJerusalem pOpentekoste 33 E.N.? (b) Omolwashike oyendji yomongundu ya li yi inyengithwa ya ninginithwe?

MUJERUSALEM omwa li mu na oongundu dhaantu dha za kiilongo oyindji. Mesiku lyaPentekoste 33 E.N., omwa li tamu dhanwa oshituthi sha simana naatalelipo oyendji oya li ya kutha ombinga musho. Ihe opwa li pwa ningwa oshinima inaashi monika nale, nokonima yaashoka omuyapostoli Petrus okwa li a gandja oshipopiwa shituntula shoka sha li she eta oshizemo tashi kumitha. Aajuda naamboka kaaye shi Aajuda ye thike 3 000 oya li ya gumwa koohapu dhe, oyi itedhulula noya ninginithwa momeya. Kungawo oya li ya gwedhwa kegongalo lyopaKriste ndyoka opo lya li lya totwa po. (Iil. 2:41) Osha yela kutya osha li sha kumitha aantu sho ya li ya mono oyendji ya ninginithwa moondama ndhoka dha li momudhingoloko gwaJerusalem.

² Oshike sha li shi inyengitha aantu oyendji ye thike mpoka ya ninginithwe? Kuyele esiku ndyoka, “oyu uvu oshihomo oshinene tashi zi kegulu.” Aalongwa yaJesus 120 mboka ya li ye li mondjugo yopombanda oya li yu udhithwa nombepo ondjapuki. Konima yaashono, aalumentu naakiintu aatilikalunga oya li ya gongala noya li ya kumwa okuuva aalongwa mbaka ‘taya popi omalaka omakwiilongo.’ Sho yu uvu shoka Petrus a li a popi, mwa kwatelwa oohapu dhe kombinga yeso lyaJesus, oyendji odha li ‘dhe ya dhenge pomutima.’ Oya li ye na okuninga shike? Petrus okwa li a yamukula a ti: “Itedhululeni, mu ethe uulunde, kehe gumwe gwomune polwe, mu [ninginithilwe, NW] medhina lyaJesus Kristus. Nena Kalunga [ote] mú pe omagano gOmbepo Ondjapuki.”—Iil. 2:1-4, 36-38.

3. Aajuda naamboka kaaye shi Aajuda yi itedhulula oya li ya pumbwa okuninga shike mesiku lyaPentekoste?

³ Dhiladhila konkalo yelongelokalunga lyAajuda mboka nosho wo mboka kaaye shi Aajuda mboka ya li ya uvu Petrus. Oya li ya taamba ko nale Jehova e li Kalunga kawo. Oya li yi ilongo mOmanyolo gOshihebeli kombinga yombepo ondjapuki, ndjoka yi li oonkondo dhaKalunga tadhi longo ndhoka a li a longitha pethimbo lyeshito nosho wo konima yaashoka. (Gen. 1:2; Aatok. 14:5, 6; 1 Sam. 10:6; Eps. 33:6) Ihe oya li ya pumbwa oshinima shi vulithe shoka. Osha li sha simana yu uve ko nokutaamba ko Mesiasa e li Jesus ngoka ta longithwa kuKalunga okuhupitha aantu. Onkee ano, Petrus okwa tsu omuthindo ompumbwe yawo yokukala ya ‘ninginithwa medhina lyaJesus Kristus.’ Omuyumudhwa Jesus okwa li a lombwele Petrus nayalwe ya ninginithe aantu “medhina lyaHe nolyOmwana nolyOmbepo Ondjapuki.” (Mat. 28:19, 20) Shoka osha li shi na eityo lya simanenena methelemumvo lyotango nokunena wo. Ihe mbela okuninginithwa medhina lyaHe nolyOmwana nolyOmbepo ondjapuki osha hala okutya shike?

Okuninginithwa medhina lyaHe

4. Elunduluko lini lya li lya holoka po shi na ko nasha nokukala kwaantu nekwatathano naJehova?

⁴ Ngaashi twe shi mona nale, mboka ya li yi inyengithwa koshipopiwa shaPetrus oya li haya longele Jehova noya li ye na nale ekwatathano naye. Oya li haya kambadhala okulandula Ompango ye, shoka sha li etompelo kwaamboka ya zi kiilongo yilwe ye ya kuJerusalem. (Iil. 2:5-11) Ihe Kalunga opo a li a ningi elunduluko endhindhilikwedhi momukalo ngoka ta kwatathana naantu. Okwa li e ekelehi Aajuda ye li oshigwana she shi ikalekelwa. Kaya li we taya vulu okukala ya hokiwa kuye mokudhiginina Ompango. (Mat. 21:43; Kol. 2:14) Ngele aapulakeni mboka oya li ya hala okukala nekwatathano tali tsikile naJehova, oya li ya pumbwa oshinima shilwe.

5, 6. Aajuda naamboka kaaye shi Aajuda oyendji yomethelemumvo lyotango oya li ya ningi shike opo ya kale ye na ekwatathano naKalunga?

⁵ Dhoshili, oshinima shoka ya li ya pumbwa kasha li okupilamena Jehova, omugandji gwomwenyo gwawo. (Iil. 4:24) Ano mboka ya li ya taamba ko efatululo lyaPetrus oya li taya vulu okumona shi vulithe nale kutya Jehova oye He omunahole. Okwa li a tumu Mesiasa e ya hupithe nokwa li e na ehalo okudhimina po nokuli naamboka Petrus a popi kombinga yawo a ti: “Aaisraeli ayehe oye na okutseya kutya Jesus ngoka mwe mu alele [komuti, NW], Kalunga okwe mu ningi Omuwa naKristus.” Paulelalela, mboka ya li ya tula miilonga oohapu dhaPetrus oya li taya ka kala ye na etompelo enenenene okupandula shoka He a li a ningile ayehe mboka ya hala okukala ye na ekwatathano naKalunga!—Lesha Iilonga 2:30-36.

⁶ Dhoshili, Aajuda mboka nosho wo mboka kaaye shi Aajuda oya li taya vulu okumona kutya ekwatathano naJehova olya kwatela mo oku mu taamba ko e li Omugandji gwehupitho okupitila muJesus. Ngashingeyi oto vulu okuuva ko kutya omolwashike yi iyela ombedhi omolwoondjo dhawo, mwa kwatelwa okukutha kwawo ombinga mokudhipaga Jesus, kutya nduno oye shi shi nenge kaye shi shi. Oshu uvitiwe ko wo kutya omasiku ga ka landula ko “oya kala taa longwa kaayapostoli.” (Iil. 2:42) Oya li taya vulu ‘okuya nomukumo koshipangelapundi shaKalunga hoka taya ka silwa ohenda.’—Heb. 4:16.

7. Ongiini kunena oyendji ya lundulula etaloko lyawo li na ko nasha naKalunga e taya ninginithwa medhina lyaHe?

⁷ Kunena aantu omamiliyona ya za momaputuko ga yooloka oyi ilonga mOmbiimbeli oshili kombinga yaKalunga. (Jes. 2:2, 3) Yamwe oya li yi itaala kutya kaku na Kalunga nayamwe oya li yi itaala kutya oko e li ihe ke na ko nasha naantu, ihe yo ayehe oya li ya tompwa yi itaale kutya Omushiti oko e li notaya vulu okukala ye na ekwatathano tali ti sha naye. Yalwe oya kala nokulongela kalunga katatugumwe nenge iikalunga ya yooloka. Oyi ilongo kutya Jehova oye awike Kalunga omunankondoadhihe nongashingeyi ohaye mu ithana kedhina lye. Shoka otashi tsu kumwe nuushili mboka Jesus a li a lombwele aalongwa ye kutya oye na okuninginithwa medhina lyaHe.

8. Mbela mboka kaaye shi sha kombinga yuulunde waAdam oya pumbwa okudhimbulula shike kombinga yaHe?

⁸ Oya li wo yi ilongo kutya oya thigulula uulunde kuAdam. (Rom. 5:12) Shika osha li oshinima oshipe shoka ya li ye na okutaamba ko shi li shoshili. Aantu ya tya ngawo otaya vulu okufaathanithwa nomulumentu ngoka e na uuvu ihe ke shi kutya oku wu na. Otashi vulika ha kala nomandhindhiliko gamwe, ngaashi uuwehame hawu ya omalupita. Molwaashoka ina konakonwa natango nokumonika omukithi gwontumba, otashi vulika ha kala ta dhiladhila kutya oku na uukolele wu li nawa. Ihe omakonakono otaga ulike kutya hasho shi li ngaaka. (Yelekanitha 1 Aakorinto 4:4.) Ongiini ngele okwa lombwelwa kutya oku na uuvu washike? Mbela itashi ka kala shi li pandunge kuye okukonga nokutaamba ko epango ewanawa ndyoka hali pondola? Sha faathana, mokwiilonga oshili kombinga yuuthigululwalunde, oyendji oya taamba ko “okukonakonwa” kOmbiimbeli noyu uva ko kutya Kalunga ota gandja “epango.” Eeno, ayehe mboka yi iteka ko kuHe oya pumbwa okugalukila kwaaNgoka ta vulu oku ya “panga.”—Ef. 4:17-19.

9. Jehova okwa li a ningi po shike opo tu vule okukala tu na ekwatathano naye?

⁹ Ngele owi iyapulila nale Jehova Kalunga nowa ninga Omukriste a ninginithwa, owu shi shi kutya okukala wu na ekwatathano naKalunga osho oshinima oshiwanawa noonkondo. Ngashingeyi oto vulu okukala nolupandu okupandula Jehova e li Ho omunahole. (Lesha Aaroma 5:8.) Nonando Adam naEva oya li ya yono kuye, Kalunga okwa katuka onkatu opo oluvalo lwawo, natse twa kwatelwa mo, tu vule okukala tu na ekwatathano ewanawa naye. Mokuninga ngawo, Kalunga okwa li e na okumona uuwehame wOmwana omuholike sho ta hepekwa naasho ta si. Mbela mokukala tu shi shika itashi tu kwathele tu taambe ko oonkondopangelo dhaKalunga nokuvulika kiipango ye omolwohole yoku mu hola? Ngele ino shi ninga natango, owu na omatompelo gokwiiyapulila Kalunga nokuninginithwa.

Okuninginithwa medhina lyOmwana

10, 11. (a) Mbela owa pandula Jesus shi thike peni? (b) Owu uvite ngiini Jesus sho a si e li iikulila?

¹⁰ Dhiladhila ishewe kombinga yaashoka Petrus a li a lombwele ongundu yaantu. Okwa li a tsu omuthindo kutya oye na okutaamba ko Jesus, naashoka osha pambathana thiluthilu nokuninginithwa “medhina . . lyOmwana.” Omolwashike shoka sha li sha simana noonkondo pethimbo ndyoka nosho wo kunena? Okutaamba ko Jesus nosho wo okuninginithwa medhina lye otashi ti kutya owa taamba ko onkandangala ye ndjoka e na mekwatathano lyetu nOmushiti. Jesus okwa li e na okwaalelwa komuti gwomahepeko opo a kuthe po ethingo lyOmpango mAajuda. Nonando ongawo, eso lye olye eta uuwanawa owundji. (Gal. 3:13) Okwa li a gandja ekuliloyambo ndyoka aantu ayehe ya li ya pumbwa. (Ef. 2:15, 16; Kol. 1:20; 1 Joh. 2:1, 2) Opo a tsakanithe shoka, Jesus okwa li i idhidhimikile okwaahenuuyuuki, omatukano, omahepeko nahugunina eso. Owa pandula shi thike peni eyambo lye? Dhiladhila ando ongoye omumati gwoomvula 12 ngoka a li molweendo mo-Titanic, osikepa ndjoka ya li yi ipumu moshikangwa shomeya mo 1912 e tayi ningine. Owa li to kambadhala okunukila mokambautu hoka kokuhupitha aantu, ihe oku udha. Opo nduno omulumentu gumwe ngoka a li mokambautu hoka okwa thipi omukulukadhi gwe komulungu, e ta nukile mosikepa ndjoka ya li tayi ningine, noku ku kutha mo e te ku tula mokambautu. Ando oto kala wu uvite ngiini? Dhoshili, ito ke mu pandula tuu! Oto vulu okuuva ko nkene okamati hoka ka li ke na oshimoniwa shoka ka li ku uvite.a Ihe Jesus okwe ku ningila oshindji shi vulithe mpoka. Okwa si opo wu kale nomwenyo sigo aluhe.

¹¹ Owu uvite ngiini sho wi ilonga shoka Omwana gwaKalunga e ku ningila? (Lesha 2 Aakorinto 5:14, 15.) Osha yela kutya owe shi pandula noonkondo. Olupandu ndoka olwe ku inyengitha wi iyapulile Kalunga onkalamwenyo yoye noito ‘ikalele we ngoye mwene, ihe owu kalele ngoka a si omolwoye.’ Okuninginithwa medhina lyOmwana otashi ti kutya owa zimina shoka Jesus e ku ningila nokutaamba ko oonkondopangelo dhe e li “Omuwiliki nOmuhupithi.” (Iil. 3:15; 5:31) Nale kawa li wu na ekwatathano nOmushiti nokawa li wu na etegameno li na ongushu. Ihe sho wu ulika eitaalo tali longo mombinzi yaJesus Kristus ndjoka ya tika nokuninginithwa, ngashingeyi owu na ekwatathano naHe. (Ef. 2:12, 13) Omuyapostoli Paulus okwa nyola ta ti: “One omwa kala nale kokule naKalunga nomwi iningi aatondi ye miilonga nomomadhiladhilo geni omawinayi. Ihe ngashingeyi Kalunga okwe mú hanganitha naye mwene molweso lyOmwana, opo e mú ninge aayapuki [naayelele].”—Kol. 1:21, 22.

12, 13. (a) Ongiini okukala wa ninginithwa medhina lyOmwana ku na okuguma einyengo lyoye ngele gumwe okwe ku yemateke? (b) Oshinakugwanithwa shini wu na wu li Omukriste a ninginithwa medhina lyaJesus?

¹² Ihe nonando owa li wa ninginithwa medhina lyOmwana, natango owu shi kutya owu na egamo lyokuyona. Oku shi tseya otashi ku kwathele esiku kehe. Pashiholelwa, ngele gumwe okwe ku yemateke, mbela oho dhimbulukwa ngaa kutya amuhe omu li aalunde? Amuhe omwa pumbwa okudhiminwa po kuKalunga, nane amuhe omu na okudhiminathana po. (Mark. 11:25) Opo a tse omuthindo ompumbwe ndjika, Jesus okwa li a gandja ethaneko: Omukwaniilwa okwa li a dhimine po omupiya gwe oongunga dhootalenti omayuvi omulongo (oondenari omamiliyona 60). Konima yethimbo omupiya ngoka ka li a hala okudhimina po omupiya omukwawo ngoka a li e mu lile oongunga dhoondenari 100. Opo nduno Jesus okwa li a yelitha oshitsa shoka a ti: Jehova ita ka dhimina po ngoka itaa dhimine po omumwayina. (Mat. 18:23-35) Eeno, okuninginithwa medhina lyOmwana otashi ti okutaamba ko oonkondopangelo dhaJesus nosho wo okudhiginina okulandula oshiholelwa she nomalongo ge, mwa kwatelwa okukala nehalo lyokudhimina po yalwe.—1 Pet. 2:21; 1 Joh. 2:6.

¹³ Molwaashoka ino gwanenena, ito vulu okuholela Jesus thiluthilu. Ihe nando ongaaka, okwiiyapulila Kalunga nomutima gwoye aguhe, otashi ulike kutya owa hala okuholela Jesus shi thike mpoka to vulu. Shika osha kwatela mo okutsikila okwiihula omuntu omukulu nokuzala omupe. (Lesha Aaefeso 4:20-24.) Ngele owa simaneka kuume koye, oho kambadhala okwiilonga koshiholelwa she nosho wo komaukwatya ge omawanawa. Sha faathana, owa hala okwiilonga kuKristus noku mu holela.

14. Ongiini to vulu okuulika kutya owa zimina oonkondopangelo dhaJesus e li Omukwaniilwa gwomegulu?

¹⁴ Opu na omukalo gulwe ngoka to vulu okuulika kutya owu uvite ko shoka sha kwatelwa mo mokuninginithwa medhina lyOmwana. Kalunga “okwa tula iinima ayihe mepangelo lyaKristus nokwe mu ningi omutse [gwaayihe yomegongalo, OB-1954].” (Ef. 1:22) Onkee ano, owa pumbwa okusimaneka omukalo ngoka Jesus ha longitha okuwilika mboka yi iyapulila Jehova. Kristus ota longitha aantu inaaya gwanenena momagongalo, unene tuu aalumentu mboka ya pyokoka pambepo, ya langekwa po ye li aakuluntugongalo. Oya langekwa po opo “ya pukulule aayapuki . . . mokutunga olutu lwaKristus.” (Ef. 4:11, 12, NW) Nokuli nonando omuntu inaa gwanenena okwa ningi epuko, Jesus e li Omukwaniilwa gwUukwaniilwa womegulu ota vulu okuungaunga noshinima shoka nethimbo lye nosho wo nomukalo gwe. Mbela owe shi itaala?

15. Ngele ino ninginithwa natango, omalaleko nuuyamba geni to ka mona konima yokuninginithwa?

¹⁵ Aantu yamwe inayi iyapulila Jehova natango nokuninginithwa. Ngele ino shi ninga natango, mbela ku shi wete mwaashoka sha tetekele kutya okuzimina Omwana oshinima oshiwanawa notashi ulike kutya owu na olupandu? Okuninginithwa medhina lyOmwana otaku shi ningi tashi wapa wu mone omalaleko nuuyamba omawanawaelela.—Lesha Johannes 10:9-11.

Okuninginithwa medhina lyombepo ondjapuki

16, 17. Okuninginithwa medhina lyombepo ondjapuki otashi ti shike kungoye?

¹⁶ Otashi ti shike okuninginithwa medhina lyombepo ondjapuki? Ngaashi twe shi mona metetekelo, mboka ya li ya pulakene Petrus mesiku lyaPentekoste oya li ye shi shi kutya ombepo ondjapuki oko yi li. Dhoshili, oya li taya vulu okumona uunzapo nomeho gawo kutya Kalunga natango ota tsikile okulongitha ombepo ondjapuki. Petrus okwa li gumwe gwomwaamboka ya li ‘yu udhithwa nombepo ondjapuki e taa tameke okupopya omalaka omakwiilongo.’ (Iil. 2:4, 8) Uutumbulilo “medhina” itawu ti aluhe edhina lyomuntu. Kunena iinima oyindji ohayi ningwa “medhina lyepangelo,” ndyoka kaali shi omuntu. Ohayi longwa koonkondopangelo dhepangelo. Sha faathana, omuntu ngoka a ninginithwa medhina lyombepo ondjapuki okwa zimina kutya ombepo ondjapuki kayi shi omuntu, ihe oonkondo dhaJehova tadhi longo. Eninginitho ndyoka otali ti kutya omuntu ngoka okwa zimina onkandangala ndjoka ombepo tayi dhana mokugwanitha po elalakano lyaKalunga.

¹⁷ Mbela ino ilonga kombinga yombepo ondjapuki mokukonakona kwoye Ombiimbeli? Pashiholelwa, owi ilonga kutya Omanyolo oga nyolithwa kombepo ondjapuki. (2 Tim. 3:16) Sho wa ningi ehumokomeho lyopambepo, owa li wu uvu ko kutya ‘Tate gwomegulu ota gandja ombepo ondjapuki kumboka taye mu indile,’ nangoye wa kwatelwa mo. (Luk. 11:13) Otashi vulika wa li wa mono nkene ombepo ondjapuki tayi longo monkalamwenyo yoye. Mepingathano naashoka, ngele ino ninginithwa natango medhina lyombepo ondjapuki, eshilipaleko lyaJesus kutya He oha gandja ombepo ondjapuki otali ti kutya oto ka lalekwa nuuyamba ngele to mono ombepo ndjoka.

18. Mboka ya ninginithwa medhina lyombepo ondjapuki ohaya mono omalaleko nuuyamba geni?

¹⁸ Osha yela kutya kunena wo Jehova oha wilike nokukwatela komeho egongalo lyopaKriste okupitila mombepo ye. Ombepo ndjoka ohayi tu kwathele wo pauhandimwe momaipyakidhilo getu gakehe siku. Okuninginithwa medhina lyombepo ondjapuki otashi ti kutya otu uvite ko onkandangala ndjoka tayi dhana monkalamwenyo yetu notwa nyanyukwa okulongela kumwe nombepo ndjoka. Yamwe otashi vulika yi ipule kutya ongiini taya vulu okukala metsokumwe nokwiiyapulila kwawo Jehova nongiini ombepo ondjapuki ya kwatelwa mo. Shika otatu ke shi konakona oshikando tashi landula.

[Enyolo lyopevi]

Oto dhimbulukwa?

• Okuninginithwa medhina lyaHe otashi ti shike kungoye?

• Otashi ti shike okuninginithwa medhina lyOmwana?

• Ongiini to vulu okuulika kutya owu uvite ko shoka tashi ti okuninginithwa medhina lyaHe nolyOmwana?

• Okuninginithwa medhina lyombepo ondjapuki otashi ti shike?

[Omathano pepandja 12]

Konima yaPentekoste 33 E.N., aalongwa aape oya li ya tameke okukala ye na ekwatathano lini naHe?

[Edhina lyomuthaneki]

By permission of the Israel Museum, Jerusalem