4 Okombinga yashike tu na okukala hatu galikana?

OHAKU tiwa kutya egalikano ndyoka Jesus a li a longo aalanduli ye, ohali endululwa noonkondo li vule omagalikano agehe gAakriste. Kutya shoka oshoshili nenge hasho, oshiholelwagalikano shaJesus omathimbo gamwe ohashi ithanwa egalikano lyOmuwa gwetu nenge egalikano lyaTate yetu ngu u li megulu, negalikano ndika ihali uviwa ko naanaa kaantu oyendji. Aantu omamiliyona ohaya popi oohapu dhalyo momutse esiku kehe, tashi vulika lwiikando mesiku. Ihe Jesus ka li nando a lalakanena egalikano ndika li longithwe momukalo gwa tya ngawo. Mbela otu shi shi ngiini?

Jesus manga inaa longa aalanduli ye egalikano ndyoka, okwa ti: “Ngele tamu galikana, inamu popyagana.” (Mateus 6:7) Mbela Jesus okwa li a popi iinima tayi kondjithathana sho a longo aalanduli ye oohapu ndhoka ando ye na oku dhi kwata momutse nokukala haye dhi endulula? Hasho nando. Ihe okwa li e tu longo kutya otu na okugalikana kombinga yashike nokwa li e tu pe oshiholelwa shiinima oyindji mbyoka tu na okupititha komeho momadhiladhilo getu uuna tatu galikana. Natu ka konakoneni nawa shoka a li a popi. Egalikano ndyoka otali adhika muMateus 6:9-13.

“Tate yetu, ngu u li megulu: Edhina lyoye nali yapulwe.”

Ano Jesus okwa li a dhimbulukitha aalanduli ye kutya omagalikano agehe oge na okuukithwa kuHe, Jehova. Ihe mbela owu shi ngaa kutya omolwashike edhina lyaJehova lya simana noonkondo nomolwashike li na okuyapulwa nenge okukalekwa eyapuki?

Okuza petameko lyondjokonona yaantu, edhina lyaKalunga eyapuki olya kala nokushekithwa. Omutondi gwaKalunga, Satana, okwa li a ti kutya Jehova Omupangeli ha fundju nokwi ihole noke na uuthemba wokupangela eshito Lye. (Genesis 3:1-6) Aantu oyendji oya gama kombinga yaSatana, taya longo aantu kutya Kalunga ke na ohole, oku na onyanya noha kwatele onkone nenge taya tindi kutya haye Omushiti. Yalwe oye li thiluthilu ompinge nedhina lye, edhina ndyoka Jehova oye li kutha mo momatoloko gOombiimbeli dhawo nohayi indike aantu kaaye li longithe.

Ombiimbeli otayi ulike kutya Kalunga ota ka kutha po okwaahenuuyuuki akuhe hoka. (Hesekiel 39:7) Mokuninga ngawo, ota ka gwanitha po oompumbwe dhoye adhihe nota ka hulitha po uupyakadhi woye auhe. Mbela ote ke shi ninga ngiini? Oohapu dhomegalikano lyaJesus tadhi landula otadhi tu pe eyamukulo.

“Uukwaniilwa woye nawu ye.” (KB)

Kunena mokati kaalongi yomalongelokalunga omu na egwangwano olindji kombinga yUukwaniilwa waKalunga. Ihe ngaashi aapulakeni yaJesus ya li ye shi shi, aapolofeti yaKalunga oya kala ya hunganeka okuza nale kutya Mesiasa, Omuhupithi a hogololwa kuKalunga, okwa li ta ka kala omupangeli gwUukwaniilwa mboka wa li tawu ka lundulula uuyuni. (Jesaja 9:6, 7; Daniel 2:44) Otawu ka yapulitha edhina lyaKalunga mokutula pomutenya iifundja yaSatana nokuhanagula po Satana niilonga ye ayihe. Uukwaniilwa waKalunga otawu ka hulitha po iita, omikithi ondjala nokuli neso. (Episalomi 46:9; 72:12-16; Jesaja 25:8; 33:24) Ngele to galikana Uukwaniilwa waKalunga wu ye, nena oto galikana opo iinima ayihe mbyoka yu uvanekwa yi gwanithwe.

“Ehalo lyoye nali gwanithwe kombanda yevi wo ngaashi megulu.”

Oohapu dhaJesus otadhi ti kutya ehalo lyaKalunga otali ka gwanithwa shili kombanda yevi ngaashi megulu, moka Kalunga a kala. Kapwa li pu na ngoka a vulu okukeelela ehalo lyaKalunga kaali gwanithwe megulu, moka Omwana a li a kondjitha Satana naalanduli ye nokwe yu umbile kombanda yevi. (Ehololo 12:9-12) Ngaashi omaindilo gaali gotango, eindilo ndika etitatu lyomoshiholelwagalikano, otali tu kwathele tu ukithe eitulomo lyetu kiinima mbyoka ya simanenena, sha hala okutya, kaatu li ukithe kehalo lyetu yene, ihe okehalo lyaKalunga. Oshi li ehalo lyaKalunga okweetela iishitwa ye ayihe uuwanawa owundjiwundji. Ano nokuli nomulumentu a gwanenena, Jesus, okwa lombwele He a ti: “Hamolwehalo lyandje, ihe olyoye li gwanithwe.”—Lukas 22:42.

“Tu pa wo nena oshithima shetu shesiku kehe.”

Jesus okwa li u ulike natango kutya otatu vulu wo okugalikana shi na ko nasha noompumbwe dhetu. Inashi puka okugalikana Kalunga shi na ko nasha noompumbwe dhetu dhesiku kehe. Dhoshili, okuninga ngawo otaku tu dhimbulukitha kutya Jehova oye “ha pe aantu ayehe omwenyo nomufudho niinima ayihe.” (Iilonga 17:25) Ombiimbeli otayi holola kutya Jehova oku li omuvali omanahole ngoka ha nyanyukilwa okupa oyana shoka ya pumbwa. Ihe ngaashi omuvali omwaanawa, ita ka yamukula omagalikano ngoka itaage ye etele uuwanawa washa.

“Dhima po oondjo dhetu.”

Mbela owu na shili oondjo kuKalunga? Mbela owa pumbwa e dhi ku dhimine po? Aantu oyendji kunena kayu uvite ko kutya uulunde oshike nonokutya owu li oshinima sha kwata miiti. Ihe Ombiimbeli otayi longo kutya uulunde owo we etitha omaupyakadhi ga kwata miiti ngoka hage tu adha, molwaashoka owo hawu etitha eso. Molwaashoka otwa valwa nuulunde, atuhe ohatu yono omathimbo nomathimbo, netegameno lyetu lyonakuyiwa tayi kalelele olyi ikolelela owala kokudhiminwa po kuKalunga. (Aaroma 3:23; 5:12; 6:23) Lago enene, Ombiimbeli otayi ti: “OMUWA, ongoye omunalukeno noho tu dhimine po.”—Episalomi 86:5.

“Tu hupitha muuwinayi.”

Mbela owa tseya ngaa kutya owa pumbililwa egameno lyaKalunga meendelelo? Aantu oyendji oya tinda okwiitaala kutya ‘omwiinayi,’ Satana, oko e li shili. Ihe Jesus okwa longa aantu kutya Satana oko e li shili, nokwe mu ithana nokuli “omupangeli guuyuni mbuka.” (Johannes 12:31; 16:11) Satana okwa yona uuyuni mbuka wu li mepangelo lye nokwa hala noonkondo oku ku yona po, opo e ku imbe kuu kale nekwatathano lyopothingo naHo, Jehova. (1 Petrus 5:8) Ihe nonando ongaaka, Jehova oku na oonkondo e vule Satana nokwa halelela okugamena mboka ye mu hole.

Engongo li li paufupi lyomanenedhiladhilo gomoshiholelwagalikano shaJesus inali kwatela mo iinima ayihe mbyoka tatu vulu okupopya. Dhimbulukwa kutya Johannes gwotango 5:14 ote tu lombwele kombinga yaKalunga ta ti: ‘Ngele tatu mu indile shaa shoka she mu opalela, oye ote tu uvu.’ Onkee ano, ino kala to ipula kutya omaupyakadhi goye oga kwata miiti noitaga vulu okupulakenwa kuKalunga.—1 Petrus 5:7.

Ihe ongiini shi na ko nasha nethimbo nosho wo nehala mpoka tu na okugalikanena? Mbela otu na okukala tu na ethimbo lyokondandalunde ndyoka tu na okugalikana nosho wo ehala mpoka tu na oku shi ningila?