Omapulo ga za kaaleshi

Mbela otatu vulu ngaa okupopya kondandalunde kutya mOmanyolo gOshihebeli omu na omahunganeko gopaMesiasa gangapi?

Okukonakona nuukeka Omanyolo gOshihebeli otaku vulu oku tu kwathela tu tseye omahunganeko ngoka ga li ga gwanithilwa Jesus Kristus. Omahunganeko ngaka oga gandja uuyelele kombinga yonkalamwenyo yaMesiasa, ethimbo ndyoka a li ta ka holoka, iilonga ye, shoka a li ta ka ningilwa nosho wo onkandangala ndjoka a li ta ka dhana melongekidho lyaJehova Kalunga. Agehe kumwe otage tu pe ethano lya yela ndyoka tali tu kwathele tu dhimbulule kutya Jesus oye Mesiasa. Ihe otwa pumbwa okukala twa kotoka ngele otatu kambadhala tu kale tu shi kutya mOmanyolo gOshihebeli omu na omahunganeko gopaMesiasa gangapi kondandalunde.

Aantu yamwe oyi itaala omahunganeko kombinga yaMesiasa, ihe yamwe inaye gi itaala. Alfred Edersheim okwa nyola membo lye The Life and Times of Jesus the Messiah a ti kutya omanyolo gOrabbi gonale omwa li mu na iinyolwa 456 mbyoka ya za mOmanyolo gOshihebeli yopaMesiasa, nonando oyindji yomuyo itayi popi Mesiasa kondandalunde. Okukonakona nawa iinyolwa mbika 456 okwe etitha po omapulo ogendji ngele yimwe yomuyo otayi popi ngaa omahunganeko kombinga yaJesus Kristus. Pashiholelwa, Edersheim okwa ti kutya Aajuda oya li ya tala ko Genesis 8:11 e li ehunganeko lyopaMesiasa. Aajuda oya ti kutya “efo lyomuolivi ndyoka lya li lye etwa konguti, olya li lya kuthwa kOndundu yaMesiasa.” Omunyoli ngoka okwa popi wo kombinga yaEksodus 12:42. Mokuyelitha nkene Aajuda ya li yu uva ko papuko oohapu dhovelise ndjoka, okwa nyola a ti: “Ngaashi Moses a li a galuka mombuga, osho wo Mesiasa a li ta ka za muRoma.” Aalongwantu oyendji nayalwe oya li ye shi mono oshidhigu okuyelitha omanyolo ngoka gaali naashoka oshe ya ningitha ya kale ya limbililwa ngele omanyolo ngoka otaga popi ngaa shili kombinga yaJesus Kristus.

Nokuli nando otu gandje owala eitulomo komahunganeko ngoka ga li ga gwanithilwa Jesus Kristus otashi ka kala oshidhigu kutse okumona kutya oge li gangapi kondandalunde. Dhiladhila koshiholelwa shi li muJesaja 53, moka mu na uuyelele wopahunganeko kombinga yaMesiasa. Jesaja 53:2-7 okwa hunganeka ta ti: “Ka li e na olupe nenge ondjelo . . . Okwa li a dhinwa nokwe ekelwahi kaantu . . . Okwi itsike uuvu wetu . . . Okwa tsuwa omolwomayono getu . . . Ongaashi onzigona tayi falwa koshidhipagelo.” Mbela oohapu ndhika montopolwa 53 yaJesaja odhi na okutalika ko dhi li ehunganeko limwe lyopaMesiasa, nenge kehe shoka sha popiwa mo shi na ko nasha naMesiasa oshi na okukala sha talika ko shi li ehunganeko li ilile?

Oshiholelwa shimwe otashi adhika muJesaja 11:1, ngoka ta ti: “Oshitutuma otashi tsapuka moshithindi shaIsai; noshitayi omomidhi dhasho e tashi imi iiyimati.” Ehunganeko ndika otali holoka ishewe movelise 10, li na iitya ya faathana. Mbela otu na okutala ko oovelise ndhika mbali dhi li omahunganeko gaali ga yoolokothana nenge odhi li ehunganeko limwe ndyoka lye endululwa owala? Ngele okwa thikwa pehulithodhiladhilo shi na ko nasha nontopolwa 53 yaJesaja nosho wo 11 otashi ka guma omwaalu aguhe gwomahunganeko gopaMesiasa.

Onkee ano, oshi li nawa kaatu kale tu na omwaalu gwokondandalunde kombinga yomahunganeko gopaMesiasa ngoka ge li mOmanyolo gOshihebeli. Miileshomwa yehangano lyaJehova omwa nyanyangidhwa omahunganeko ogendji kombinga yaJesus nosho wo okugwanithwa kwago.a Iinima mbyoka otayi ke tu kwathela noku tu ladhipika pekonakono lyopaumwene nosho wo lyuukwanegumbo nomuukalele wetu. Kashi na nduno mbudhi kutya omahunganeko gopaMesiasa oge li gangapi otage tu pe einekelo lya kola kutya Jesus oye Kristus nenge Mesiasa.

[Enyolo lyopevi]