Oshili kombinga yaArmagedon

‘Oombepo dhoompwidhuli odha yi kaakwaniilwa yokombanda yevi alihe nodha gongele aakwaniilwa pehala ndyoka hali ithanwa mOshihebeli Armagedon.’—EHOLOLO 16:14, 16.

ARMAGEDON nenge Harmagedon, edhina lyehala. Ihe osha fa shi li ngeyi kutya kakwa li ehala lyolelalela hali ithanwa ngaaka.

Mbela oshitya “Armagedon” otashi thaneke naanaa shike? Omolwashike olundji hashi popiwa uuna tapu popiwa oshiningwanima shontumba, ngaashi iita?

Oya gongala pehala hali ithanwa Armagedon

Oshitya shOshihebeli Har–Magedon petameko osha li hashi ti lelalela “ondundu yaMegiddo.” Nonando kaku na ondundu ndjoka yolelalela, ehala hali ithanwa Megiddo oko li li. Oli li pehala lya simana mpoka pwa tsakanena oondjila, kuumbangalantuninginino woshitopolwa shoka sha li sha lalwa kAaisraeli yonale. Iita oyindji mbyoka ya mana oompata mondjokonona oya li ya luwa popepi nehala ndyoka. Onkee ano, Megiddo okwa li ha popiwa unene ngele tapu popiwa iita.a

Ihe ehala Megiddo inali simana molwiita mbyoka ya li ya kondjwa pehala mpoka, ihe olya simana omolwetompelo kutya omolwashike iita mbyoka ya li ya kondjwa. Megiddo osha li oshitopolwa shEvi lyEuvaneko ndyoka Jehova Kalunga a li a pe Aaisraeli. (Eksodus 33:1; Josua 12:7, 21) Okwa li u uvanekele oshigwana shoka kutya ote ke shi gamena ngele aatondi yasho ye shi ponokele, naashoka osho a li a ningi. (Deuteronomium 6:18, 19) Pashiholelwa, puMegiddo opo naanaa Jehova a li a gamene Aaisraeli pashikumithalonga komatangakwiitwa gomukwaniilwa Jabin gwaKaanan nokuSisera, omukuluntu gwetangakwiita lye.—Aatokolihapu 4:14-16.

Onkee ano, oshitya “Har–Magedon,” nenge “Armagedon,” oshi na eityo enene lyopathaneko. Otashi gandja eityo lyomatanga omanankondo taga kondjithathana.

Ehunganeko ndyoka li li mEhololo otali popi kombinga yethimbo ndyoka li li monakuyiwa yi li popepi uuna Satana noompwidhuli taya ka hwahwameka omapangelo gopantu ga gongele omatangakwiita gago, nopethimbo mpoka otaga ka kondjitha aapiya yaKalunga nosho wo iilonga yawo. Oshiponokela shoka otashi ke etitha eso lyaantu omamiliyona sho Kalunga ta ka sinda aahomoni yoshigwana she.—Ehololo 19:11-18.

Omolwashike Kalunga ngoka ta popiwa kOmbiimbeli e li ‘omunamutimahenda, omunahole, ihaa geye mbala, noku na esilohenda enene’ ta ka hanagula po aantu oyendjiyendji? (Nehemia 9:17) Opo tu uve ko kutya omolwashike Kalunga ta ka katuka momukalo ngoka, otwa pumbwa okuyamukula omapulo gatatu: (1) Olye ta ka tameka iita mbyoka? (2) Omolwashike Kalunga ta ka ya mo olunyala? (3) Iita mbyoka otayi ke eta omalunduluko geni taga kalelele kombanda yevi nokiishitwa ayihe yi li ko?

1. OLYE TA KA TAMEKA IITA MBYOKA?

Piita yaArmagedon Kalunga haye ta ka katuka onkatu yotango opo u ulike ongeyo ye. Pehala lyaashono, ota ka katuka onkatu a gamene aantu aawanawa kaantu mboka taya ka kala ya hala oku ya hanagula po. “Aakwaniilwa yokombanda yevi alihe,” ano tu tye aapangeli yuuyuni, oyo taya ka katuka onkatu yotango piita mbika. Omolwashike nduno tapu ka ningwa oshiponokela shoka? Omolwaashoka Satana oye ta ka ningitha omapangelo nomatangakwiita ga kondjithe ga mana mo ayehe mboka haya longele Jehova Kalunga.—Ehololo 16:13, 14; 19:17, 18.

Molwaashono miilongo yimwe kunena kehe gumwe oku na emanguluko lyokupopya nolyokuhogolola elongelokalunga ndyoka a hala, edhiladhilo kutya omapangelo otaga ka kambadhala okutulila po omalongelokalunga oondjindikila nenge oku ga hulitha po otali monika lya fa itaali wapa. Ihe iiponokela mbyoka oya li ya ningwa methelemumvo 20 notayi ningwa nokuli nokunena.b Nonando ongawo, pokati kiiponokela mbyoka ya li ya ningwa nale naashoka shaArmagedon opu na omayooloko omanene ga konda pulimwe. Lyotango, oshiponokela shika shaArmagedon otashi ka ningwa muuyuni auhe. Etiyali, onkatu ndjoka Jehova Kalunga ta ka katuka otayi ka kala yi vule kokule adhihe ndhoka a li a katuka monakuziwa. (Jeremia 25:32, 33) Ombiimbeli otayi popi iita mbyoka kutya “iita mesiku enene lyaKalunga Omunankondoadhihe.”

2. OMOLWASHIKE KALUNGA TA KA YA MO OLUNYALA?

Jehova oha lombwele aalongeli ye ya kale aanambili noya kale ye hole aatondi yawo. (Mika 4:1-3; Mateus 5:43, 44; 26:52) Onkee ano, itaya ka kutha iilwitho opo yi igamene sho oshiponokela shika oshinyanyalithi tashi ka ningwa. Ngele Jehova ina ya mo olunyala a hupithe oshigwana she, otashi ka hulithwa po ashihe thiluthilu. Naashika otashi ka shekitha edhina lyaJehova Kalunga. Ngele Jehova okwe etha aatondi yoshigwana she ye shi hanagule po, otashi ke mu monikitha a kale a fa kee shi omunahole, kee shi omuyuuki nenge nokuli kutya ke na oonkondo dha sha. Shoka ite ke etha shi ningwe.—Episalomi 37:28, 29.

Kalunga ina hala okuhanagula po nando omuntu gumwe, nomolwaashono te tu lombwele shoka ta ka ninga. (2 Petrus 3:9) Ohe tu dhimbulukitha okupitila momahokololo ngoka ge li mOmbiimbeli kutya okwa li a geyele mboka ya li ya ponokele oshigwana she. (2 Aakwaniilwa 19:35) Ombiimbeli otayi tu londodha wo kutya monakuyiwa sho Satana nosho wo aantu mboka ha longitha taya ka ponokela oshigwana shaKalunga, Jehova ota ka ya mo olunyala natango nota ka longitha oonkondo dhe a geyele mboka taya thindile kongudhi oshigwana she. Oohapu dhaJehova Kalunga odha hunganeka nale kutya ota ka hanagula po aakolokoshi. (Omayeletumbulo 2:21, 22; 2 Aatessalonika 1:6-9) Nopwaahe na omalimbililo, pethimbo mpoka aatondi yoshigwana she otaya ka mona kutya nani oya tukula iita nOmunangondoadhihe.—Hesekiel 38:21-23.

3. IITA MBYOKA OTAYI KE ETA OMALUNDULUKO GENI TAGA KALELELE?

Piita yaArmagedon aantu omamiliyona otaya ka hupithwa. Shoka otashi ka landulwa kethimbo mpoka taku ka kala ombili kombanda yevi.—Ehololo 21:3, 4.

Embo lyEhololo otali popi kombinga ‘yongundu onene’ ya nyengana okuyalulwa yaantu mboka taya ka hupa piita mbyoka. (Ehololo 7:9, 14) Mewiliko lyaKalunga, aantu mbaka otaya ka kwathela ya ninge evi Oparadisa ishewe ngaashi naanaa Jehova a li a lalakanena petameko.

Mbela otu shi kutya oshigwana shaKalunga otashi ka ponokelwa uunake?

[Omanyolo gopevi]

[Ethano pepandja 6]

Jehova Kalunga okwa li a gamene oshigwana she monakuziwa

[Ethano pepandja 7]

Natango Jehova ota ka gamena oshigwana she, piita yaArmagedon