Kala netaloko ewanawa uuna kaamu uvitathane mondjokana
“Mboka ye li mondjokana, otandi ya lombwele oshipango sha zi kOmuwa.”—1 KOR. 7:10.
OTO VULU OKUYELITHA?
Omeityo lini Kalunga a tula aaihokani kumwe?
Ongiini aakuluntugongalo taya vulu okukwathela Aakriste mboka ye na omaupyakadhi mondjokana?
Otu na okutala ko ngiini ondjokana?
1. Aakriste ohaya tala ko ngiini ondjokana, nomolwashike?
UUNA aantu taya hokana ohaya ganithwa. Aakriste oye na okutala ko oshinima shoka sha kwata miiti, molwaashoka otaya ningi euvaneko koshipala shaKalunga. (Omuuv. 5:4-6) Jehova oye ha “tula kumwe” aaihokani molwaashoka oye Omutoti gwondjokana. (Mark. 10:9) Ondjokana kehe ndjoka yi li paveta kayi na okukuthwa kumwe, molwaashoka oye e yi tula kumwe. Aapiya yaJehova oye na okutala ko ondjokana yi li elongekidho lye kutya nduno oya hokana sho ye li moshili nenge omanga inaaye ya mo.
2. Omapulo geni taga yamukulwa moshitopolwa shino?
2 Aaihokani ohaya kala yu uvite ombili noonkondo, uuna ondjokana yawo tayi ende nawa. Ihe ongiini ngele aaihokana kayu uvitathane? Mbela otaya vulu ngaa okukwathelwa? Oolye taya vulu oku ya kwathela?
OTAMU KA KALA NGAA MU NA OMBILI NENGE OMANYENYETO GOWALA?
3, 4. Oshike tashi vulu okuningwa po ngele omumwatate nenge omumwameme okwa yi mondjokana inaa tala nawa?
3 Uuna aaihokani Aakriste yu uvitathane, egumbo lyawo ohali kala ehala lyombili nohashi simanekitha Jehova. Ihe ngele hasho, nena omanyenyeto gowala. Omukriste kehe ngoka ta dhiladhila okuya mondjokana oku na okutula miilonga omayele gopakalunga komeho yethimbo, ngele okwa hala iinima yi ke mu endele nawa. Ihe ngele omumwatate nenge omumwameme okwa yi mondjokana inaa tala nawa otashi vulika shi ka kale eyeme noluhodhi kuye. Pashiholelwa, aagundjuka yamwe ohaya tameke okweendelathana, nonando inayi ilongekidha okuhumbata iinakugwanithwa yomondjokana. Yalwe ohaya kongo ookuume kopandjokana okupitila mointaneta. Ohaya tondokele mondjokana nokonima yethimbo ohaya kala ya lulilwa. Opu na yamwe mboka haya hokana owala, nonando oye shi kutya oya yona sha kwata miiti pethimbo taye endelathana. Mbela aantu ya tya ngaaka otaya ka kala ngaa ya simanekathana?
4 Aakriste yamwe inaya vulika kelombwelo ndyoka tali ti natu hokane “owala mOmuwa.” Olundji ohaya mono iilanduliko yinikitha oluhodhi sho ye li momagumbo ngoka ga topoka palongelokalunga. (1 Kor. 7:39, NW) Ngele osho wa ninga ngawo, galikana Kalunga e ku dhimine po noku ku kwathele. Iha kutha po iilanduliko yomayono ngoka wa ninga, ihe ohe ku kwathele wi idhidhimikile omukundu ngoka ngele owi iyela ombedhi. (Eps. 130:1-4) Kala nokunyanyudha Jehova ngashingeyi nosigo aluhe ‘nenyanyu ndyoka ha gandja otali ke ku kumika.’—Neh. 8:10.
UUNA KAASHI UVITATHANE
5. Uuna aaihokani kayu uvitathane, oye na okuyanda omadhiladhilo geni?
5 Aaihokani mboka kayu uvitathane ohashi vulika yi ipule taya ti: ‘Mbela osha pumbiwa ndi kwatele po ondjokana yandje? Nenge nandi ke ende mo ishewe ndi tale ngele tandi itsu mo gumwe?’ Otashi vulika a gumwe a kale a hala okuteya ondjokana, opo aniwa a kale a manguluka ishewe. Nonando oku shi kutya kashi li pamanyolo otashi vulika i ipule ta ti: ‘Omolwashike itaatu hengana? Omolwashike itaatu topoka, opo ndi tyapule onkalamwenyo ishewe?’ Aakriste oye na okukonga ewiliko lyaKalunga noku li landula, pehala lyokudhiladhila iinima ya tya ngaaka.
6. Yelitha oohapu dhaJesus ndhoka dhi li muMateus 19:9.
6 Jesus okwa ti kutya Omukriste ngoka a hengana ina manguluka okuya mondjokana ishewe. Kakele ngele kuume ke kopandjokana okwa hondela, ye kuume ngoka kee na ondjo ina hala okudhimina po mukwawo. (Mat. 19:9) Oshitya “oluhondelo” osha kwatela mo okuyona ondjokana nosho wo omapuko galwe omanene ga nika iihole. Ngele pokati kaaihokani kapu na gumwe a ya moluhondelo, nena oye na okupula Jehova megalikano e ya kwathele kaaya hengathane, uuna pu na gumwe a hala oku shi ninga.
7. Aantu otaya ka dhiladhila ngiini, uuna ondjokana yAakriste itaayi ende nawa?
7 Ngele ondjokana yOmukriste itayi ende nawa, otashi ka guma okupewa kwe iinakugwanithwa megongalo. Omuyapostoli Paulus okwa li a pula epulo lya simana a ti: “Omulumentu ngoka kee shi, nkene e na okukala naanegumbo lye, ota vulu ngiini okulela egongalo lyaKalunga?” (1 Tim. 3:5) Ngele ookuume kopandjokana ayehe Aakriste, ihe ondjokana yawo itayi ende nawa, aantu otaya ka dhiladhila kutya aaihokani mboka ihaya tula naanaa miilonga shoka hayu uvithile yalwe.—Rom. 2:21-24.
8. Oshike hashi kala sha puka naaihokani mboka taya dhiladhila ya topoke nenge ya hengane?
8 Uuna aaihokani ya ninginithwa taya dhiladhila ya topoke nenge ya hengathane opu na okukala epuko lyasha nuupambepo wawo. Otashi vulika gumwe gwomuyo nenge ayehe ihaaya tula miilonga omakotampango gOmbiimbeli. Ngele oyi ‘inekela OMUWA nomitima dhawo adhihe,’ omadhiladhilo ngoka itage ke ya mo muyo nuupu.—Lesha Omayeletumbulo 3:5, 6.
9. Aakriste yamwe oya mona omauwanawa geni sho ya kala yi idhidhimikila ondjokana yawo, nonando itayi ende nawa?
9 Aaihokani oyendji mboka haya kala ya hala okutopoka, ohaya kwathelwa nohaye ke shi enditha nawa lwanima. Aakriste mboka hayi idhidhimike uuna pu na omaupyakadhi mondjokana, olundji ohaya ka pondola. Omuyapostoli Petrus okwa nyola shoka tashi vulu okuningwa momagumbo ngoka ga topoka palongelokalunga a ti: “Osho ngeyi ne wo aakiintu, vulikeni kaalumentu yeni, opo aalumentu mboka inaa itaala oohapu dhaKalunga, ya falwe meitaalo komikalo dheni. Itamu pumbwa oku shi ninga noohapu, oshoka oyo otaa ka mona, nkene omikalo dheni dha yogoka nonkene hamu simaneke Kalunga.” (1 Pet. 3:1, 2) Kuume kopandjokana ngoka kee li moshili, otashi vulika e ye mo omolweihumbato lyamukwawo ewanawa. Ngele osha ningwa, ondjokana ya tya ngaaka otayi simanekitha Kalunga notashi ka etela omusamane, omukulukadhi nosho wo aanona omalaleko nuuyamba.
10, 11. Oshinima shini sha pumba hashi vulu okuningilwa aaihokani, ihe Omukriste oku na okukala e na einekelo lini?
10 Aakriste oyendji ohaya yi mondjokana nooitaali ooyakwawo mboka yi iyapulila Jehova, molwaashoka oya hala oku mu nyanyudha. Ohaye shi ningi nonando oonkalo ohashi vulika dhi ka lunduluke. Nonando osha pumba, ethimbo limwe kuume kopandjokana ohashi vulika a kale te ehama noonkondo pamadhiladhilo. Nenge a ninge omuuvithi ini ipyakidhila konima owala sho opo mwa hokana. Pashiholelwa, meme Lindaa ngoka e li Omukriste omulaadhi noku hole oyana okwa li e shi ningilwa. Omusamane gwe okwa li a landula ondjila ya puka noka li a hala okwiiyela ombedhi. Lwanima okwa li a kondwa mo megongalo. Omukriste oku na okuninga shike ngele ekwatathano lyawo mondjokana otali ende tali nkundipala?
11 Otashi vulika wu ipule to ti: ‘Ano onda pumbwa ngaa okukaleka po ondjokana yandje ngele kandi shi shoka tashi ka ningwa po?’ Kapu na ngoka ta vulu oku ku ningila etokolo. Ihe opu na omatompelo omawanawa ngoka taga vulu oku ku kwathela kuuteke omukumo uuna ondjokana yeni itaayi ende nawa. Kalunga okwa hokwa aalumentu naakiintu aatilikalunga mboka tayi idhidhimike, nonando oye na omaupyakadhi mondjokana. (Lesha 1 Petrus 2:19, 20.) Jehova ota ka kwathela Aakriste mboka haya ningi oonkambadhala ya mana mo ya koleke ondjokana yawo okupitila mOohapu dhe nomombepo ye.
AAKULUNTUGONGALO OHAYA KALA YI ILONGEKIDHA OKUKWATHELA
12. Aakuluntugongalo otaye ke tu tala ko ngiini ngele otwa ka konga ekwatho kuyo?
12 Ngele owu na uupyakadhi mondjokana ino kwatakwata oku ka konga ekwatho lyopambepo kAakriste ya pyokoka. Aakuluntugongalo oye li aasita yoshigunda notaya ka kala ya nyanyukwa okukonga ewiliko mOohapu dhaKalunga ye ku kwathele. (Iil. 20:28; Jak. 5:14, 15) Aaihokani kaye na okudhiladhila kutya aakuluntugongalo otaya ka kala ye ya dhina, ngele taya kongo ekwatho lyopambepo kuyo nokukundathana nayo uupyakadhi wawo wa kwata miiti mboka ye na mondjokana. Otaya ka kala ye mu hole ngele oye wete kutya omwa halelela okunyanyudha Kalunga.
13. Omayele geni taga adhika mAakorinto yotango 7:10-16?
13 Uuna aakuluntugongalo ya pulwa ya kwathele Aakriste mboka ondjokana yawo tayi tengauka, ohaya longitha omayele gaPaulus ngoka taga ti: “Mboka ye li moondjokana, otandi ya lombwele oshipango sha zi kOmuwa, kashi shi shandje mwene: Omukiintu ina henga po omulume. Ngele ote shi ningi, oku na okukala itaa yi we moondjokana nenge a hangane ishewe nomulume. Omulumentu ina henga po nando omukadhi. . . . Meme ngoye omukriste oto shi tseya ngiini kutya ito vulu okuhupitha omulumentu gwoye? Tate ngoye omukriste, oto shi tseya ngiini kutya ito vulu okuhupitha omukiintu gwoye?” (1 Kor. 7:10-16) Itashi ka kala tuu elaleko nuuyamba uuna kuume kopandjokana ngoka kee shi omwiitaali a taamba ko oshili!
14, 15. Uunake kuume Omukriste ta vulu okuhengana, ihe omolwashike sha simana a galikane noku dhiladhile oshinima shoka muule?
14 Oonkalo dhini tadhi vulu okuthiminika omukulukadhi Omukriste a ‘hengane’? Shimwe ohashi holoka po uuna omusamane inaa hala okusila oshimpwiyu aanegumbo lye, nonando ota vulu oku shi ninga. Yalwe ohaye shi ningi molwaashoka taya monithwa unene iihuna palutu nenge uupambepo wawo wu li moshiponga.
15 Ihe omumwameme oye e na okuninga etokolo paumwene ngele ota hengana nenge hasho mokupula Jehova megalikano nokudhiladhila oshinima shoka muule. Mbela omusamane ngoka kee shi omwiitaali oye ngaa shili e na okupewa uusama omolwuunkundi wopambepo womukadhi nenge pamwe omumwameme oye owala ihaa konakona we Ombiimbeli, ihaa yi we kokugongala nomuukalele pandjigilile?
16. Oshike hashi kwathele Aakriste kaaya tokole nziya okuteya ondjokana?
16 Otwa lenga shili ekwathathano lyetu naKalunga. Otwa pandula ondjokana molwaashoka oyi li omagano ga za kuye, onkee ano, katu na oku yi teya nziya. Tu li aapiya yaJehova, otu na okuyapulitha edhina lye eyapuki. Katu na okuteya ondjokana, molwaashoka twa pangela monanguwi tu ka mone po kuume gulwe ishewe.—Jer. 17:9; Mal. 2:13-16.
17. Omoonkalo dhini taku vulu okutiwa kutya Kalunga aanandjokana okwe ya ithanena okukalamwenyo ku na ombili?
17 Omukriste ngoka e li mondjokana nagumwe ngoka kee li moshili, ke na okuhenga po mukwawo miinima yaa na mutse nandungu. Pehala lyaashono, oku na okuninga ngaashi ta vulu a kaleke po ondjokana. Ihe ngele kuume ngoka kee li moshili ina hala we mukwawo, nena kuume ngoka Omukriste ke na okwiipa uusama. Paulus okwa nyola a ti: “Ihe ngoka kee shi omwiitaali, ngele okwa hala okuhenga po mukwawo ngoka omukriste, ne shi ninge. Miinima ya tya ngeyi omunandjokana omukriste, omulumentu nenge omukiintu, okwa manguluka okuhogolola; oshoka Kalunga okwe mú ithanene okukalamwenyo ku na ombili.”—1 Kor. 7:15.b
INEKELA JEHOVA
18. Nonando ondjokana oyi teke, uuwanawa washike hawu zi moonkambadhala dhoku yi kaleka po?
18 Uuna tu ungaunga nuupyakadhi kehe mondjokana pula uulaadhi kuJehova nokukala we mu inekela. (Lesha Episalomi 27:14.) Natu tale ishewe kuLinda ngoka a popiwa metetekelo. Ondjokana yawo oya ka teka, nonando okwa li a kambadhala oomvula odhindji oku yi kaleke po. Mbela oku wete a mana po owala ethimbo lye? “Hasho nando.” Okwa ti: “Oonkambadhala ndhoka nda ninga odha gandja uunzapo uuwanawa kaatali. Ondi na eiyuvo lya yela. Shoka oshiwanawa osho kutya oshinima shoka osha li sha kwathele omwanakadhona gwetu a kale omudhiginini moshili. Okwi iyapulile Jehova nokwa kala te mu longele nuulaadhi.”
19. Oshike tashi vulu okuningwa po ngele aaihokani oya ningi oonkambadhala ya kaleke po ondjokana yawo?
19 Omumwameme Marilyn okwa nyanyukwa sho a ningi oonkambadhala a kaleke po ondjokana nokukala i inekela Kalunga. Okwa ti: “Okonyala ndi ethe po omusamane gwandje, molwaashoka kali he tu sile oshimpwiyu palutu nuupambepo wetu owa li moshiponga. Nonando omusamane gwandje okwa li omukuluntugongalo, okwa li i itula moongeshefa dha puka. Okwa tameke ha faula okugongala, nokatwa li we hatu popi. Esiku limwe iikulo oya li ya ponokele moshilando nonda li nda tila noonkondo. Opo nduno onda dhimbulula kutya nangame ondi na ondjo. Otwa tameke ishewe okukala hatu popi, okuninga elongelokalunga lyuukwanegumbo notwa kala hatu yi kokugongala pandjigilile. Aakuluntugongalo oya li yu ungaunga natse nohenda noye tu kwathela lela. Ondjokana yetu oya li ya sheneka ishewe ya fa ongala. Konima yethimbo omusamane gwandje okwa kala ishewe a gwana okupewa iinakugwanithwa megongalo. Osha li lela oshidhigu, ihe otwa li twa mono iizemo yinyanyudha.”
20, 21. Ngele otwa simaneka ondjokana, otu na okukala twa tokola tu ninge shike?
20 Kutya nduno otu li mondjokana nenge hasho, natu kale aluhe aalaadhi notwi inekela muJehova. Uuna twa tsakaneke uupyakadhi mondjokana, otu na okukambadhala nziya tu wu pongolole po. Dhimbulukwa kutya aaihokani “kaye li we yaali, aawe, oyo omuntu gumwe.” (Mat. 19:6) Eeno, ohashi kala lela oshidhigu ngele aaihokani ayehe kaye li moshili. Ihe otashi vulika tu ka kale twa nyanyukwa uuna kuume kopandjokana te ya moshili omolweihumbato lyetu ewanawa.
21 Kutya nduno otu li moonkalo dha tya ngiini, natu kale twaa na oshipo, opo tu gandje uunzapo uuwanawa kwaamboka kaaye li moshili. Ngele katu uvitathane mondjokana, natu galikane nopwaa na ezimbuko, natu ikonakone nawa, natu konakone Omanyolo pamwe negalikano nokukonga ekwatho lyopambepo kaakuluntugongalo. Komeho gaayihe, natu kale twa tokola toko okunyanyudha Jehova Kalunga miinima ayihe nokuulika kutya otwa lenga shili ondjokana, molwaashoka oyi li omagano ga za kuye.
[Omanyolo gopevi]
a Omadhina ngoka hago gawo golela.
b Tala embo “Ikalekeni mohole yaKalunga” epandja 219-221.
[Oohapu dha simana pepandja 10]
Aakriste mboka hayi idhidhimike uuna pu na omaupyakadhi mondjokana, olundji ohaya ka pondola
[Oohapu dha simana pepandja 12]
Pula aluhe uulaadhi kuJehova nokukala we mu inekela
[Ethano pepandja 9]
Jehova ota ka kwathela Aakriste mboka haya ningi oonkambadhala ya mana mo ya koleke ondjokana yawo
[Ethano pepandja 11]
Egongalo lyopaKriste otali vulu okukala ehala lyetalaleko nokukwathela yalwe pambepo