Mbela oho mono ngaa Kalunga ngoka ihaa monika?

“KALUNGA oye Ombepo,” iha monika nomeho gokomutse. (Johannes 4:24) Ihe kakele kaashono, Ombiimbeli otayi ulike kutya aantu yamwe oya mona Kalunga momukalo gwontumba. (Aahebeli 11:27) Ongiini shoka tashi wapa? Mbela oto vulu ngaa shili okumona ‘Kalunga ngoka ihaa monika’? — Aakolossa 1:15.

Yelekanitha onkalo yetu noyomuntu ngoka a valwa omuposi. Mbela uuposi we ohawu mu imbi thiluthilu okutseya shoka shi li momudhingoloko gwe? Hasho naanaa. Omuposi oha mono uuyelele momikalo dha yoolokathana ndhoka hadhi mu ningitha a mone aantu, iinima nosho wo shoka tashi ningwa momudhingoloko gwe. Omulumentu gumwe omuposi okwa ti: “Okumona ko kaku li momeho, ihe oku li momadhiladhilo.”

Momukalo gwa faathana, nonando iho vulu okumona Kalunga nomeho goye gokomutse, oto vulu oku mu mona ‘nomeho goye gokomwenyo.’ (Aaefeso 1:18, OB-1954) Tala komikalo ndatu moka to vulu oku mu mona.

‘OKWA HOLOLWA PUUYELELE MESHITO LYUUYUNI’

Olundji omuntu ngoka omuposi oha longitha unene oshiuvitithi shokuuva ko noshokuguma, iiyuvitithi mbyoka ha longitha opo a vule okumona iinima mbyoka itaa vulu okumona nomeho gokomutse. Sha faathana, oto vulu okulongitha omeho goye gokomutse wu konakone omudhingoloko moka wu li wu mone Kalunga ngoka ihaa monika ngoka a shita uuyuni. “Okuza Kalunga sho a shiti uuyuni, nando oye iha monika, okwa holola puuyelele oonkondo dhe dhaaluhe nuukalunga we.” — Aaroma 1:20.

Pashiholelwa, dhiladhila kombinga yegumbo lyetu. Evi olya shitwa momukalo gwi ikalekelwa tu nyanyukililwe ko onkalamwenyo kaashi shi owala okukala ko tatu hupu shokadhila. Uuna tu uvite okambepo okatalala, two ontela okaantenya, tatu li iiyimati iitoye, nenge twa pulakena komawi guudhila, ohatu kala twa nyanyukwa. Mbela omagano ngano itaga holola oondunge, olukeno nosho wo okugandja kwOmushiti gwetu?

Oshike to vulu okwiilonga kombinga yaKalunga kwaashoka wu wete meshito? Oshinima shimwe, ewangandjo otali holola oonkondo dhaKalunga. Uunzapo wopaunongononi mboka opo wa monika inawu ulika owala okutamunuka mo kwewangandjo, ihe owa ulika wo kutya otali tamunuka mo neendelelo inaashi monika nale. Sho to tala kewangandjo uusiku, ipula kombinga yaashi: Oonkondo ndhoka hadhi ningitha ewangandjo li tamunuke mo noku li endelelitha ohadhi zi peni? Ombiimbeli otayi tu lombwele kutya Omushiti oku na ‘oonkondo oonenenene’ (Jesaja 40:26) Eshito lyaKalunga otali tu ulukile kutya oye “Omunankondoawike,” ano “omunene gwoonkondo.” — Job 37:23, OB-1954.

‘NGOKA E MU HOLOLA’

Omukulukadhi gumwe e na aanona yaali aaposi ota ti: “Okupopya okwo omukalo gumwe gwa simanenena gwoku ya longa. Ya lombwela kehe shimwe wu wete naashoka wu uvite na kala wi ilongekidha oku ya yelithila shoka wu wete. Ongoye meho gawo.” Sha faathana, nonando “kaku na omuntu a mono Kalunga nando olumwe,” Omwana gwaKalunga, Jesus, “ngoka e li puHe, oye e mu holola.” (Johannes 1:18) E li omushitwa gwotango gwaKalunga nOmwana awike, Jesus okwa ningi “omeho” getu gokutala megulu. Oye onzo dhingi yuuyelele kombinga yaKalunga ngoka ihaa monika.

Tala kiinima yimwe kombinga yaKalunga mbyoka Jesus a kala ta ningi pamwe naHe ethimbo ele ndyoka a kala naYe:

• Kalunga oha longo kee na oluthuwo. “Tate ota longo aluhe.” — Johannes 5:17.

• Kalunga oku shi nawa oompumbwe dhetu. “Ho yeni oku shi shi nale shoka mwa pumbwa, manga inaamu mu indila.” — Mateus 6:8.

  Kalunga ohe tu pe pahenda. ‘Ho yeni yomegulu etango lye ohe li pitithile aawinayi naawanawa, nomvula ye ohe yi lokithile aayuuki naalunde.’ — Mateus 5:45.

• Kalunga okwe tu lenga pauhandimwe. “Omanza gaali itaga landithwa po nani nando okapeni kamwe akeke? Nokuli kapu na nando olimwe lyomugo tali gwile [pevi], Ho [kee shi shi, NW]. Nomafufu geni agehe gokomutse oga yalulwa. Ano inamu tila: one mu vule omanza ogendji.” — Mateus 10:29-31.

OMUNTU NGOKA A HOLOLA KALUNGA NGOKA IHAA MONIKA

Aluhe aantu mboka aaposi ohaya uvu ko iinima momukalo gwa yooloka ko kugwaamboka haya mono ko. Omuntu ngoka omuposi otashi vulika a kale e wete omuzizimbe gu li omuzile gwa talala nawa gwa siikilwa ketango ihe hangaashi ehala lya luudha kaali na uuyelele. Ngaashi owala omuntu ngoka omuposi thiluthilu itaa vulu okumona omuzizimbe nenge uuyelele wetango, itatu vulu okuuva ko Jehova kutse yene. Onkee ano, Jehova okwa shiti omuntu ngoka a holola uukwatya We nosho wo iikala Ye thiluthilu.

Omuntu ngoka oJesus. (Aafilippi 2:7) Jesus ina popya owala kombinga yaHe ihe okwe tu ulukile wo kutya Kalunga okwa tya ngiini. Omulongwa gwaJesus Filippus okwe mu pula a ti: “Omuwa, tu ulukila Ho.” Jesus okwe mu yamukula a ti: “Kehe ngoka a mono ndje, okwa mona wo Tate.” (Johannes 14:8, 9) Oshike to vulu ‘okumona’ kombinga yaTate okupitila miilonga yaJesus?

Jesus okwa li e na olukeno, omwiifupipiki, noha popiwa naye nuupu. (Mateus 11:28-30) Uukwatya we uuwanawa owa li wa hilile aantu kuye. Jesus okwa li ha kala u uvite uuwehame ngaashi yalwe haya kala yu uvite, nokwa li ha nyanyukwa pamwe nayo. (Lukas 10:17, 21; Johannes 11:32-35) Uuna to lesha nenge wa pulakena kehokololo lyOmbiimbeli kombinga yaJesus, kala wa fa wa tala shoka tashi ningwa po e to li mwenyopaleke momadhiladhilo goye. Ngele owa tedhatedha komukalo gwaJesus gwankene a li hu ungaunga naantu, oto ka vula okumona nawa omaukwatya omahokithi gaKalunga noto ka hedha popepi naYe.

OKUTULA IINIMA KUMWE

Shi na ko nasha nomukalo moka omuposi ha mono shoka tashi ningwa momudhingoloko, omunyolimambo gumwe okwa ti: “Omuposi oha mono uuyelele uushona wiinima yontumba miinima ya yoolokathana (mokuguma, mokunika, mokuuva, nosho tuu), nokonima uuyelele mboka ohe wu tula kumwe opo a mone kutya oshinima oshike.” Sha faathana, sho to tala eshito lyaKalunga, sho to lesha shoka Jesus a popi kombinga yaHe, sho to konakona omukalo gwaJesus gwokuulika uukwatya waKalunga, oto ka kala wa fa wu wete Jehova. Ota ka ninga gwoshili kungoye.

Job ngoka a li ko pethimbo lyonale, okwa li e na oshimoniwa sha faathana. Petameko okwa li ‘a popi iinima kee yi shi’ (Job 42:3) Ihe konima sho a konakona nuukeka kombinga yeshito lyaKalunga ekumithi, Job osha li she mu inyengitha a popye ta ti: “Nale onda li nde ku uvu omufofoto, ihe ngashingeyi ondi ku wete nomeho gandje mwene.” — Job 42:5.

Shika otashi vulu wo okukala sha faathana kungoye. “Nge to yi kuye [Jehova], ote ku taamba.” (1 Ondjalulo 28:9) Oonzapo dhaJehova otadhi ka kala dha nyanyukwa oku ku kwathela wu konakone nokumona Kalunga ngoka ihaa monika.