Longa yalwe elaka lya yogoka
1 Nonando dha za ‘maapagani oyendji, miilongo oyindji, miigwana oyindji nomomalaka ogendji,’ Oonzapo dhaJehova odho oshigwana sha hangana, uumwayinathana washili wopaigwana. (Eh. 7:9) Shika oshi li oshindhindhilikwedhi muuyuni wonena wa topauka. Ongiini tashi wapa? Otashi wapa molwashoka otwa pewa “elaka lya yogoka.” — Sef. 3:9, NW.
2 Iilanduliko iikumithi: Elaka lya yogoka ndika olyo shike? Olyo euvoko lyu uka okuuva ko oshili tayi adhika mOohapu dhaKalunga yi na ko nasha naJehova nosho wo omalalakano ge, unene tuu oshili kombinga yUukwaniilwa waKalunga. Ngaashi sha hunganekwa kuJesus, oshili ndjika tayi taandelekwa okupitila muupitilo hau monika wokevi, “omupiya omudhiginini nomunandunge,” noshilanduliko osho kutya aantu “yomomalaka agehe giigwana” oya taamba ko elongelokalunga lyashili. — Mat. 24:45, KB; Sak. 8:23, NW.
3 Sho aantu tayi ilongo elaka lya yogoka, otayi inyengithwa okutsitha kumwe onkalamwenyo yawo nomithikampango dhaJehova. Otayi ilongo okukala ya “tsu oondunge dhimwe nokudhiladhila kumwe.” (1 Kor. 1:10) Elongo lyopakalunga otali ya pe wo eihumbato li li pauyuuki nosho wo okupopya okuwanawa noku na oshili, unene tuu shi na ko nasha nokulombwela yalwe onkundana ombwanawa. (Tit. 2:7, 8; Heb. 13:15) Omalunduluko ngaka omakumithi otaga simanekitha Jehova.
4 Pashiholelwa, omulumentu ngoka a li a tseyithilwa onkundana ombwanawa okwa li e na omapulo ogendji, naagehe oga li ga yamukulwa okuza mOmbimbeli. Mokwiinyengithwa kwaashoka u uvu, okwa tameke okukonakona iikando iyali moshiwike nokukala pokugongala. Okwa li a kumwa sho a popithwa tashi zi komutima pOshinyanga shUukwaniilwa, oshoka oyendji mboka ya li po oya li yomomuhoko gwaa shi gwe. Meni lyethimbo efupi, ye nomukulukadhi gwe oya ningi omalunduluko monkalamwenyo yawo noya ninginithwa. Okuza ethimbo ndyono okwa kwathele yalwe ye li 40 lwaampono ya longele Jehova, mwa kwatelwa iilyo yaakwanezimo oyindji. Nonando okwa lemana, okwa tameke omasiku ngano okulonga e li omukokolindjila.
5 Okulonga yalwe: Iiningwanima yuuyuni otayi ningitha aantu oyendji mboka ye hole oshili ya konakonunune okudhiladhila kwawo nonkalamwenyo yawo. Ngaashi Jesus, otu na okukala tu na ehalo oku ya kwatha. Omaishunoko ge na omupondo nomakonakono gOmbimbeli oyo oshinima sha simana mokukwathela mboka ye na ehalo tali zi komutima okwiilonga elaka lya yogoka.
6 Okupopya ku na omupondo naantu mboka yi ipyakidhila oko okuninga ekonakono lyOmbimbeli paufupi posheelo shomagumbo gawo. (km 5/02 p. 1) Owe shi yelekela nale mbela? Uuna to ilongekidhile eishunoko, hogolola shoka to ka popya shoka tashi opalele omunegumbo mokagwedhwa kUukalele wetu wUukwaniilwa kaJanuali 2002. Ogendji gomomaetopo mokagwedhwa haka oga nuninwa okufala shu ukilila moonkundathana mokabroshure Ota pula nenge embo Ontseyo. Idheula shoka to ka tya opo u vule okutsikila nuupu okuza kefalomo to kundathana kamwe komuutendo. Hogolola mokatendo enyolo limwe nenge gaali okulesha noku li kundathana e to longekidha po epulo ndyoka to ka hulitha nalyo. Shika otashi ka kwathela oku ku fala kokatendo hono wa dhiladhila okumanitha petalelopo tali landula ko.
7 Oshigwana shaJehova osha mona omayambeko ogendji ge li oshilanduliko shokwiilonga elaka lya yogoka. Natu kwathele yalwe nuudhiginini ya ‘galikane edhina lyaJehova’ pamwe natse nomoku ‘mu longela twa tegamathana.’ — Sef. 3:9.