Oshimpungu shepulo

◼Oshike tashi vulu oku tu kwathela tu mane okugongala pethimbo?

Ethimbo ohali endelele noonkondo uuna tatu popi oshinima oshiwanawa nookuume ketu. Shika otashi vulu okukala eshongo opo tu mane iitopolwa yetu meni lyethimbo lyu uthwa pokugongala. Oshike tashi ke tu kwathela?

Okugongala naku tameke pethimbo. Uuna tu li pokugongala kwaayehe, oshi li nawa okupula aakalipo ya konge omitumba dhawo omanga ku na omunute gumwe nenge mbali opo okugongala ku tameke pethimbo ndyoka lyu uthwa nopalandulathano. (Omuuv. 3:1) Elongekidho lyiilonga yomomapya mpoka hapu kala owala aantu aashona nalyo oli na okutameka pethimbo, ihe itapu ka tegelelwa nando yamwe mboka ya shelelelwa.

Ilongekidhila oshitopolwa shoye nawa. Opo tu longithe ethimbo nawa otu na okwiilongekidha komeho yethimbo. Kala wu shi nawa shoka wa hala aapulakeni yoye yi ilonge moshipopiwa shoye. Tsa omuthindo omanenedhiladhilo. Ino gandja eitulomo kuunima wa nathangwa. Shoka to popi nashi kale sha yela. Ngele oshipopiwa shoye osha kwatela mo omaulikilo nenge omapulapulo, kaleni mwi iyenditha po nale komeho yethimbo. Sho to ilongekidha oshipopiwa shoye, longitha owili wu tale ngele oto pitililitha ethimbo.

Topola nawa uuyelele woshipopiwa shoye. Kutya nduno oshitopolwa shoye oshipopiwa nenge oonkundathana naapulakeni, otashi ku kwathele ngele to topola uuyelele woye nawa. Nyola kongenge yombapila yoshipopiwa shoye kutya oto ka longitha ethimbo li thike peni poshitopolwa kehe. Sho to shi gandja, kala to tala ngele owu li meni lyethimbo. Uuna to kwatele komeho oshitopolwa shoonkundathana, henuka okugandja ompito kaantu oyendji petameko shoka tashi ke ku thiminika wu matuke muuyelele mboka wa simana pehulilo. Aakwatelikomeho yOshungolangelo oye na okulongitha ethimbo nawa opo ya vule okuninga omapulo geendululo pehulilo. Oye na wo okukala ya kotoka opo kaaya longithe ethimbo ndyoka lya nuninwa eimbilo negalikano lyahugunina.

Okugongala naku pwe pethimbo. Mokugongala hoka haku kala ku na iipopiwa ya yoolokathana, ngaashi Okugongala kwoPailonga, omupopi kehe na kale e shi kutya oshipopiwa she otashi tameke pongapi notashi hulu pongapi. Oshike shi na okuningwa po ngele ethimbo olya ya? Omumwatate gumwe nenge yaali naya tete mo uuyelele wumwe miipopiwa yawo e taya gandja eitulomo kiitsa ya simana. Okuninga ngawo otashi ulike kutya oye li aapopi ya pyokoka.

Aapulakeni ayehe otaya vulu okukwathela omumwatate ngoka ta kwatele komeho mokugandja omilombo omifupi. Onkee ano, atuheni otatu vulu okwaambidhidha okugongala opo ku ningwe “palandulathano nopamukalo omwaanawa.” — 1 Kor. 14:40.