Oto yamukula ngiini?
1. Omolwashike tu na okuholela Jesus ngele twa pulwa epulo?
1 Sigo okunena aantu ohaya kala ya kumwa komayamukulo ngoka Jesus a li a gandja uuna a pulwa. Otu na oku mu holela ngele tatu pulwa omapulo gi ili nogi ili uuna tu li muukalele. — 1 Pet. 2:21.
2. Oshike tashi ke tu kwathela tu gandje eyamukulo tali opalele epulo lyanakupula?
2 Tango, pulakena nawa: Jesus okwa li ha tala kutya omolwashike omuntu ta pulile epulo. Omathimbo gamwe oshi li nawa wu uve etaloko lyanakupula. Uuna gumwe e ku pula: “Mbela owi itaala muJesus?” otashi vulika ti ipula kutya omolwashike ihatu dhana Okrismesa ngele otwe mu itaala. Ngele owu shi kutya omolwashike omuntu ta pulile, nena oto ka tompathana naye momukalo gwo opala. — Luk. 10:25-37.
3. Oshike tashi vulu oku tu kwathela tu mone omayamukulo taga mbilipaleke gopamanyolo?
3 Longitha Oohapu dhaKalunga mokuyamukula: Ohashi kala oshiwanawa okulongitha Ombiimbeli okuyamukula epulo. (2 Tim. 3:16, 17; Heb. 4:12) Embo Reasoning nokambo Oipalanyole yeenghundafana dopaMbibeli ohayi tu kwathele mokugandja omayamukulo ngoka ge li mondjila. Nonando omupuli ini itaala Ombiimbeli, oto vulu oku mu ulukila moondunge oombwanawa shoka Omanyolo taga longo. Ukitha eitulomo lyomuntu ngoka kuunongo mboka wu li mOmbiimbeli. Ngele oto holele Jesus, omayamukulo goye otaga ka kala tago opalele, omawanawa noge na ongushu noga fa “iiyapula yoshingoli moshiyaha shoshisiliveli.” — Omayel. 25:11.
4. Oompito dhini itaatu vulu okuyamukula epulo kehe?
4 Mbela otu na okuyamukula epulo kehe? Ngele ku shi eyamukulo, ino sa ohoni wu tye: “Kandi shi wo, ihe otandi vulu oku ka konga eyamukulo, e tandi galuka naashoka nda mono po.” Ohokwe yoye neifupipiko lya tya ngaaka otayi vulu okwiinyengitha omunegumbo e ku hiye wu galuke. Ngele owu wete kutya nakupula omupataneki ngoka tashi vulika a hala okutsa oompata nangoye, mu yamukula owala paufupi ngaashi Jesus a li a ningi. (Luk. 20:1-8) Otu na wo okuhulitha po oonkundathana naantu mboka haya kala ya hala owala okuludhika natse, ihe kaaye na ohokwe shili opo tu longithe ethimbo lyetu okukonga mboka ye na ohokwe. — Mat. 7:6.
5. Jesus okwa tula po oshiholelwa shini shokuyamukula omapulo?
5 Jesus okwa li e shi kutya okwiinekela muJehova osha simanenena opo a gwanithe po oshilonga she ‘shokupopya oshili,’ shoka sha kwatela mo okuyamukula omapulo gaantu mboka ya li ya hala lela omayamukulo. (Joh. 18:37) Kashi li tuu uuthembahenda okuholela Jesus mokugandja omayamukulo kaantu mboka ya ‘hogololwa ya ka mone omwenyo gwaaluhe’! — Iil. 13:48.