Mbela oto ka tameka ekonakonombiimbeli muKotoba?
1. Iileshomwa yini tatu gandja muKotoba?
1 MuKotoba otatu ka gandja Oshungolangelo no-Awake! Ngele tatu shuna kwaamboka yu ulika ohokwe natu ya pe okafo Mbela owa hala okutseya oshili? nokuninga oonkambadhala tu tameke ekonakonombiimbeli. Ongiini tatu vulu oku shi ninga peishunoko?
2. Ongiini to vulu okutameka ekonakonombiimbeli nagumwe ngoka wa pele iifo, to longitha okafo Mbela owa hala okutseya oshili?
2 Nkene tu na oku ka longitha: Otatu vulu tu tye: “Iifo mbyoka nde ku pele otayi ladhipike aantu yomomaputuko agehe noyomomalongelokalunga ya konakone Ombiimbeli. [Pa omunegumbo okafo Mbela owa hala okutseya oshili? e to mu ulukile omapulo ngoka ge li pepandja lyo-1.] Mu lombwela to ti: Ombiimbeli otayi gandja omayamukulo taga mbilipaleke komapulo ngaka. Mbela owi ipula nale limwe lyomugo?” Konima ngele omunegumbo a yamukula, kundathana naye okuza mokafo eyamukulo lyepulo ndyoka a hokwa e to lesha enyolo limwe mwaangoka ge etwa po. Mu yelithila kutya shika oshiholelwa owala shimwe shominima mbyoka Ombiimbeli tayi longo noku mu pa embo Omalongo gOmbiimbeli. Oto vulu oku kundathana naye uutendo wopetameko lyontopolwa ndjoka tayi kundathana epulo lye. Oto vulu wo okuyanuna pepandja mpoka tapu kundathanwa uuyelele owundji wepulo ndyoka li li mokafo. Natu tale pomapandja mpoka tapu adhika uuyelele.
● Mbela Kalunga oku na ko ngaa nasha natse shili? (epandja 9-11, okatendo 6-10)
● Mbela iita nokumona iihuna onayi ka hule po ngaa? (epandja 12-13, okatendo 12-13)
● Oshike hashi tu ningilwa ngele twa si? (epandja 59-61, okatendo 7-8)
● Mbela oonakusa oye na etegameno lyasha? (epandja 71, okatendo 13-15)
● Ongiini tandi vulu okugalikana opo ndi uvike kuKalunga? (epandja 166-167, okatendo 5-8)
● Ongiini tandi vulu okumona enyanyu monkalamwenyo? (epandja 9, okatendo 4-5)
3. Ongiini tatu vulu okulundulula okupopya kwetu shi ikolelela konkalo?
3 Ngele onkalo itayi shi pitike tu tameke ekonakonombiimbeli membo Omalongo gOmbiimbeli petalelopo lyotango, otatu vulu okuninga elongekidho tu galuke esiku limwe tu tsikile noonkundathana. Uuna omuntu tu ulike ohokwe otatu vulu tu kundathane naye omapulo ge vulithe pu limwe mokafo iikando yontumba omanga inaa tu mu ulukila embo. Natu longitheni okatrakatate haka okawanawa muKotoba tu tamekeni omakonakonombiimbeli notu kwathele aanamitima omiwanawa ya ‘tseye oshili.’ — Joh. 8:31, 32.