“Gandja uunzapo nawanawa”
1. Oshiholelwa oshiwanawa shini omuyapostoli Paulus a tula po muukalele?
1 “Gwanitha ayihe mokulongela Kalunga.” (2 Tim. 4:5) Omuyapostoli Paulus okwa li a popi lela nemanguluko sho a gandja ekumagidho ndika kuTimoteus. Paulus okwa li a mana omalweendo gatatu guutumwa pokati komimvo 47 no 56 E.N. Embo lyIilonga otali popi noku shi endulula kutya Paulus okwa li a gandja “uunzapo nawanawa.” (Iil. 23:11, NW; 28:23) Mbela ongiini tse tatu vulu oku shi ninga?
2. Ongiini tatu vulu okugandja uunzapo nawanawa uuna tatu uvitha egumbo negumbo?
2 Okuuvitha egumbo negumbo: Uuna tatu ningi oonkambadhala dhokuya kaantu mboka inaayu uva nando onale onkundana ombwanawa, otatu vulu oku ya talela po pomathimbo ga yoolokathana. Ohashi vulika omusamane mwene gwegumbo ha kala megumbo kongulohi nenge momahuliloshiwike. Otu na okukambadhala okupopya nagumwe megumbo kehe nokukala hatu shuna aluhe komagumbo ngoka inaatu adha mo omuntu. Ongiini ngele oonkambadhala dhoye inadhi pondola? Otashi vulika ontumwafo nenge okudhenga ongodhi taku ke ku etela iizemo iiwanawa.
3. Oompito dhini wu na dhokugandja uunzapo montaneho nenge ontukuluka?
3 Okuuvitha montaneho nenge ontukuluka: Aapiya yaJehova yokunena ohaya gandja “owino” yashili kaantu ayehe mboka haye ya pulakene. Omathimbo gamwe shika ohashi ningilwa “momapandaanda” nenge momahalandjandja goshilando. (Omayel. 1:20, 21) Esiku kehe tatu yi miilonga yomomapya, mbela ohatu kala ngaa tu shi kutya elalakano lyetu olyo okugandja uunzapo? Mbela otaku vulu okutiwa kutya otwi “i ipyakidhila ethimbo alihe nokuuvithila aantu oohapu dhaKalunga”? (Iil. 18:5) Ngele osho, nena otatu gwanitha po oshinakugwanithwa shetu ‘shoku ya pa uunzapo nawanawa’ (NW). — Iil. 10:42; 17:17; 20:20, 21, 24.
4. Ongiini egalikano nokutedhatedha tayi tu kwathele tu gandje uunzapo nawanawa?
4 Ihe omathimbo gamwe omolwuunkundi wopantu nenge molwohoni, ohashi vulika tu kale twa sa uunye okugandja uunzapo. Ihe nonando ongaaka, Jehova oku shi omangambeko getu. (Eps. 103:14) Kakele kaashono, uuna tashi tu ningilwa, otatu vulu oku mu galikana e tu pe uulaadhi wokupopya. (Iil. 4:29, 31) Uuna tatu ningi ekonakono lyopaumwene notatu tedhatedha kOohapu dhaKalunga, otatu vulu okuukitha eitulomo lyetu kokukala tu na olupandu olunene okupandula onkundana ombwanawa ndjoka yi li oshinima shondilo shi vule ayihe. (Fil. 3:8) Shika otashi vulu oku tu inyengitha tu yi uvithe nuulaadhi.
5. Ongiini mbela tatu vulu okukutha ombinga megwanitho lyehunganeko lyaJoel?
5 Ehunganeko lyaJoel otali ti kutya manga esiku enene netilithi lyaJehova inaali ya, oshigwana shaKalunga otashi ke “enda mepola lyasho,” (NW) noitashi ke etha nando osha shi shi imbe okuuvitha. (Joel 2:2, 7-9) Natu ninge ano kehe shoka tatu vulu mokulonga iilonga yokugandja uunzapo mbyoka itaayi ke endululwa we nando.