Nangoye oto vulu oku ka kala muuyuni uupe

Oshitopolwa sha tetekele osha popi kutya, masiku Kalunga ota ka hulitha po uuyuni mbuka wa yonana nosho wo omaupyakadhi agehe ngoka ge li mo. Otu na einekelo lya kola kutya shono otashi ka gwanithwa. Oshike she tu tompa tu kale tu na einekelo ndyono? Oshoka euvaneko ndyoka oli li mOmbiimbeli:

“Uuyuni niinima ayihe yi li mo mbyoka aantu ye yi hokwa, otayi hulu po.” — 1 JOHANNES 2:17.

Otu na einekelo kutya opu na mboka taya ka hupa, oshoka ovelise oya tsikile ko tayi ti:

“Ihe ngoka ta longo shoka Kalunga a hala, ota kala e na omwenyo aluhe.”

Onkee ano, ngele otwa hala oku ka hupa otu na okulonga ehalo lyaKalunga. Opo tu kale tu shi kutya ehalo lyaKalunga olini, otu na tango oku mu tseya.

“TSEYA” KALUNGA WU KA HUPE SHO EHULILO TALI YA

Omathano: 1. Omupangi a kuutumba polupanda moshipangelo a vulwa nokwa gwililwa po. 2. E li pokamulongo a tala omuniilonga pamwe naye a nyanyukwa ta lesha oshifo. 3. Omuniilonga pamwe naye te mu leshele ovelise okuza mOmbiimbeli noku mu pa okakalata kokuya kepandja lyetu lyokointaneta, jw.org.

Jesus okwa ti: “Mboka ye ku tseya, Kalunga awike kashili, . . . oyo mboka ye na omwenyo gwaaluhe.” (Johannes 17:3) Opo tu ka hupe, tse tu kale nomwenyo sigo aluhe, otwa pumbwa ‘okutseya’ Kalunga kashili. Shono osha kwatela mo oshindji, kaashi shi owala okutseya kutya Kalunga oko e li nenge tu kale tu shi owala iinima yontumba kombinga ye. Otwa pumbwa okupanga uukuume naye. Uukuume pokati kaantu ohawu kolo, ngele ohaya kala pamwe ethimbo olindji. Osha faathana wo nuukuume mboka twa panga naKalunga. Opu na oshili ya simanenena ndjoka tatu adha mOmbiimbeli tayi tu kwathele tu kokeke uukuume wetu naKalunga notu wu kaleke po.

Oshili ndjoka yi li mOmbiimbeli

Kalunga okwa li a hala tu kale nomwenyo sigo aluhe mOparadisa.

Okwa shiti aavali yetu yotango, Adam naEva, e te ya tula moshikunino oshiwanawa shaEden. Kaya li ye na okapethili kasha, na Kalunga okwa li e ya pa kehe shimwe shoka ya pumbwa, opo ya kale nonkalamwenyo ombwanawa. Oya li taya vulu okukala nomwenyo sigo aluhe, ando oya li inaaya yona po uukuume wawo naKalunga. Ihe oya tokola kaaya vulike koshipango shoka Kalunga e ya pa.

Ombiimbeli otayi tu lombwele kutya omolwashike tatu mono iihuna kunena.

Sho Adam naEva inaaya vulika kuKalunga, oya kanitha uuthembahenda wokukala nomwenyo sigo aluhe, mwa kwatelwa oluvalo lwawo. Ombiimbeli otayi ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.” (Aaroma 5:12) Ngaashi owala okanona haka vulu okuthigulula uunkundi wontumba kaavali yako, aantu ayehe oya thigulula wo uulunde kuAdam. Onkee ano, ohatu kulupa nohatu si.

Kalunga okwa ninga po sha, opo tu mangululwe muulunde neso.

Ombiimbeli otayi ti: “Oshoka osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” (Johannes 3:16) Kalunga okwa tumu Jesus kombanda yevi a se pehala lyetu. Tatekulu Prabhakar, gwokoIndia, ngoka e na omimvo 86, okwa popi kombinga yohole ndjoka onene, a ti: “Jehovaa oku hole ndje noonkondo. Omolwohole ye, ondi na etegameno lyoku ka kala nomwenyo sigo aluhe.”

Ombiimbeli oye shi popya kutya otatu vulu okuulika olupandu lwaashoka Kalunga e tu ningila.

Ombiimbeli otayi ti kutya otatu vulu okuulika olupandu lwaashoka Kalunga e tu ningila ngele “otatu vulika kiipango” ye. (1 Johannes 2:3) Omolwohole ye okwe tu lombwela mOohapu dhe shoka tatu vulu okuninga, opo tu kale twa nyanyukwa monkalamwenyo ngashingeyi. (Jesaja 48:17, 18) Kalunga ina hala nando tu kale tatu mono iihuna. Oku uvaneka kutya ngele otatu pulakene kiipango ye, otatu ka kala twa nyanyukwa ngashingeyi, notatu ka kala nomwenyo sigo aluhe.

KALA HO LESHA OMBIIMBELI ESIKU KEHE

Omupangi ta dhiladhila po manga, konima sho a lesha Ombiimbeli pethimbo lyomuha kiilonga. — Ngele owa kala ho galikana Kalunga e ku kwathele noku ku pe oonkondo, oto ka hupa pehulilo lyuuyuni waSatana wa kolokosha

Otwa pumbwa okulya esiku kehe, opo tu kale tu na omwenyo. Jesus okwa ti: “Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.” — Mateus 4:4.

Kunena, Oohapu dhaKalunga otatu dhi adha mOmbiimbeli. Uuna to yi konakona, oto ki ilonga mo iinima ya simanenena mbyoka Kalunga a ninga monakuziwa, pethimbo lyetu nosho wo mbyoka ta ka ninga monakuyiwa.

GALIKANA KALUNGA E KU KWATHELE

Oshike to vulu okuninga, ngele owa hala okulandula ewiliko lyaKalunga, ihe oto nyengwa okweetha po omikalondjigilile dha puka? Ngele osho ngawo, ontseyo yokutseya Kalunga otayi ke ku kwathela lela.

Omukiintu gwedhina Sakura okwa li e hole iipala noonkondo. Ihe lwanima okwa tameke okukonakona Ombiimbeli. Okwi ilongo oshipango shaKalunga shoka tashi ti kutya “yandeni oluhondelo.” (1 Aakorinto 6:18) Sakura okwa galikana Kalunga e mu pe oonkondo. Ngashingeyi ke shi we omupika gwohole yiipala, ihe natango oha kala ta kondjo, oshoka omahalo ngoka omawinayi ohage ya muye ethimbo nethimbo. Okwa ti: “Ngele omadhiladhilo ga nika iihulo ge ya mungame, ohandi popi naJehova megalikano, oshoka ondi shi kutya itandi vulu oku ga kondjitha ongame awike. Egalikano olya hedhitha ndje popepi naJehova.” Aantu oyendji otayi ilongo kombinga yaKalunga ngaashi Sakura. Kalunga ohe ya pe oonkondo ya ninge omalunduluko monkalamwenyo yawo noya kale mondjila ndjoka a hokwa. — Aafilippi 4:13.

Ngele owa tseya Kalunga, nangoye oto ka “tseyika kuKalunga” wu li kuume ke kopothingo. (Aagalati 4:9; Episalomi 25:14) Kungawo, oto ka vula oku ka hupa wu ye muuyuni uupe waKalunga. Mbela uuyuni uupe otawu ka kala wa tya ngiini? Oshitopolwa tashi landula ko, otashi ke tu kuthila ko.

a Jehova olyo edhina lyaKalunga ngaashi sha popiwa mOmbiimbeli.