Konga omaliko gopambepo ngoka to vulu okutula miilonga

Uuna tatu lesha Ombiimbeli, otatu vulu okukonga omaliko gopambepo mokuninga omapekapeko. Ihe ongiini tatu vulu okumona mo uuwanawa pakuudha?

Ilonga oshindji kombinga yomahokololo gOmbiimbeli. Pashiholelwa, tala kutya olye a nyola ehokololo, okwa nyolele lye nuunake. Onkalo oya li ya tya ngiini sho ta nyola, oshike sha ningwa po manga inaa nyola nokonima sho a mana okunyola?

Tala kutya oto ilongo mo shike mokukonga omayamukulo gomapulo ngaashi: ‘Aantu mboka ya kwatelwa mo oya li ye uvite ngiini? Oya li ye na omaukwatya geni? Omolwashike ndi na okuholela omaukwatya ngoka, nenge ndi na oku ga yanda?’

Tula miilonga shoka wa ilonga, uuna wu li miilonga yokuuvitha, nenge uuna to ungaunga naantu ooyakweni. Ngele owa ningi ngawo, oto ka ulika kutya owu na uunongo wopakalunga, oshoka Ombiimbeli oya ti: “Mboka ye na oondunge, naa dhiladhile nawa iinima mbika.” — Eps. 107:43.

• Shoka to vulu okuninga: Tala nkene to vulu okutula miilonga shoka tatu ilongo muuyelele mboka wu li moshitopolwa shokugongala kwomokati kwoshiwike, Omaliko Okuza mOohapu dhaKalunga. Olundji oshitopolwa shono ohashi kala shi na omapulo ngoka tatu vulu okwiipula, iitsa mbyoka tatu vulu okutula miilonga nosho wo omathano ngoka tatu vulu okukonakona.