Ombiimbeli otayi ti ngiini kombinga yoluteni ndoka inaalu monika nale muuyuni?

•  Oshifo The Guardian, shomo 7 Septemba 2022, osha ti kutya China okwa lopota uupyu wa londa pombanda unene moshilongo she nomwa li oshikukuta inaashi monika nale, shi vulithe iyali mbyoka ya tetekele.

• Oonkundana dhIigwana ya Hangana, dha pitile mo 26 Auguste 2022, odha ti kutya ‘nguka ogo omumvo omutitano iitopolwa yimwe yomoAfrika tayi tsikile okudhengwa komaluteni inaaga monika nale.’

• Oonkundana dho-BBC, dha pitile mo 23 Auguste 2022, odha ti kutya ‘etata lyenenevi lyaEuropa oli li moluteni inaalu monika nale okuyelekanitha nomaluteni galwe ngoka ga kala nokuholoka muule womimvo 500 dha ka pita.’

Aatseyinawa yonkalo yombepo oyendji otaya tengeneke kutya oluteni otalu ka tsikila notalu ka nayipala noonkondo. Mbela opu na ngaa etegameno kutya onkalo otayi ka hwepopala monakuyiwa? Ombiimbeli otayi ti ngiini?

Oluteni nosho wo omahunganeko gOmbiimbeli

Tala shoka Ombiimbeli ya hunganeka tashi ka ningwa pethimbo lyetu:

• ‘Otaku ke ya oondjala koombinga noombinga.’ — Lukas 21:11.

Olundji oluteni ohalu eta ondjala. Iinima mbyoka hayi etithwa koluteni ngaashi ondjala, okumona iihuna nosho wo eso, otayi gwanitha po ehunganeko lyOmbiimbeli. — Ehololo 6:6, 8.

Omolwashike onkalo yoluteni tayi ende tayi nayipala muuyuni?

Ombiimbeli oya gandja etompelo kutya omolwashike oluteni talu ende talu nayipala muuyuni. Otayi ti:

• “Kaku na omuntu hu utha okukalamwenyo kwe.” — Jeremia 10:23.

Shika osha hala okutya aantu itaya vulu okupondola ‘mokuutha okukalamwenyo kwawo’ nenge okwiipangela yoyene. Olundji omatokolo gawo omawinayi, ogo haga etitha iikukuta nosho wo enota.

• Aanongononi oyendji otaya tsu kumwe kutya shoka aantu haya ningi osha etitha onkalo yombepo yi lunduluke noonkondo, nosha ningitha wo muuyuni mu kale mu na iikukuta oyindji.

• Olwiho lwaantu nosho wo omatokolo ngoka haya ningi nopwaa na okudhiladhila kombinga yonakuyiwa, okwa etitha eyonogulopo lyomakuti, enyateko lyewangandjo nelongitho nayi lyoonzo dhomeshito. Omolwiinima mbyoka, otashi vulika tu kale kaatu na omeya ga gwana miitopolwa yetu.

Nonando ongawo, Ombiimbeli oye tu pa etegameno.

Mbela opu na ngaa etegameno kutya onkalo otayi ka hwepopala monakuyiwa?

Ombiimbeli oya hunganeka kutya Kalunga ota ka kandula po uupyakadhi wu na ko nasha nomeya. Ngiini mbela?

1. 1. Kalunga ota ka ‘hanagula po mboka taya yonagula po evi!’ (Ehololo 11:18) Ota ka hanagula po aakolokoshi naanalwiho ayehe mboka haya ningitha omeya ga kale ga pumba, nohaya ningi iinima mbyoka tayi nyateke eshito. — 2 Timoteus 3:1, 2.

2. 2. “Ehekevi lya pupyala otali ka pola.” (Jesaja 35:1, 6, 7) Kalunga ota ka kutha po omaupyakadhi ngoka haga etithwa komaluteni nota ka ninga evi li kale oparadisa yi na omeya ga gwana.

3. 3. “Evi oho li sile oshimpwiyu, sho ho li tekele; oho li yambapaleke.” (Episalomi 65:9) Kalunga ota ka yambeka evi niikulya oyindji, naantu ayehe otaya ka kala ye na omeya ga yela.