Aanapolotika otaya ti kutya Armagedon oku li pokuya — Ombiimbeli otayi ti ngiini?

Ongula yOmaandaha, yo 10 Kotoba 2022, aakwiita yaRusia oya li ya umbu oomisile miilando yomoUkraine omolwiikonene, konima sho ontopa yawo ya simana ndjoka ya kwatakanitha Rusia naKrimea ya hanagulwa po. Iiningwanima mbyoka oya ningwa owala nziya konima sho aanapolotika yamwe ya londodha kutya Armagedon oku li pokuya.

•  Omupresidende gwaAmerika, Joe Biden, okwa popi mo 6 Kotoba 2022, a ti: ‘Armagedon ina kala nando onale popepi unene okuza pethimbo lyomupresidende gwaAmerika, John F. Kennedy nosho wo pethimbo sho Rusia a li a tula oomisile dhe moKuba nelalakano lyokuponokela Amerika. Kandi shi wo ngele otatu vulu okulongitha iikondjitho yopalute, ndele Armagedon ta kala inee ya.’

•  Omupresidende gwaUkraine, Volodymyr Zelensky, sho a pulwa kombinga yiilanduliko yokulongitha iikondjitho yopalute, okwa popi kositaasi yotiivii yedhina BBC News, mo 8 Kotoba 2022, a ti: “Ondi inekela kutya Armagedon ote ya masiku, shono sha nika oshiponga kuuyuni awuhe.”

Mbela ngele iikondjitho yopalute oya longithwa, shino otashi fala sigo omiita yArmagedon? Ombiimbeli otayi ti ngiini?

Mbela okulongitha iikondjitho yopalute oko taku eta Armagedon?

Aawe. Oshitya “Armagedon” otashi adhika owala lumwe mOmbiimbeli mEhololo 16:16. Itashi ulike kiita pokati kiigwana, ihe opokati “kaakwaniilwa yokombanda yevi alihe” naKalunga. (Ehololo 16:14) Kalunga ota ka longitha iita yaArmagedon a hulithe po omapangelo gopantu.—Daniel 2:44.

Opo wu tseye kutya onkalo otayi kala ya tya ngiini kombanda yevi konima yaArmagedon, lesha oshitopolwa What Is the Battle of Armageddon?

Mbela evi nosho wo aantu mboka ye li ko otaya ka hulithwa po kiikondjitho yopalute?

Aawe. Nonando aapangeli yopantu otashi vulika ya ka longithe iikondjitho yopalute monakuyiwa, Kalunga ita ka etha nando evi li hanagulwe po. Ombiimbeli otayi ti:

•  “Evi otali kala sigo aluhe.” — Omuuvithi 1:4.

•  “Aayuuki otaa ka thigulula evi e taa kala mo sigo aluhe.” — Episalomi 37:29.

Omahunganeko gomOmbiimbeli nosho wo iiningwanima mbyoka tu wete kunena otayi ulike kutya masiku kombanda yevi otaku ka ningwa omalunduluko omanene. (Mateus 24:3-7; 2 Timoteus 3:1-5) Opo wu mone shoka Ombiimbeli tayi ti kombinga yonakuyiwa kwatathana natse tu kundathane pamwe nangoye Ombiimbeli oshali.