Omuleli guni to ka hogolola? — Ombiimbeli otayi ti ngiini?

Miilongo oyindji muuyuni otamu ka kala omahogololo miiwike tu uka. Aantu otaya ningi omatokolo ga simana kutya omuleli guni taya ka hogolola.

Ombiimbeli otayi ti ngiini?

Aaleli yopantu oya ngambekwa

Ombiimbeli oya popya omangambeko ngoka aaleli yopantu ayehe ye na, tayi ti:

• “Inamu inekela aanankondo yokombanda yevi; itaa vulu oku mu hupitha. Uuna taa mana oondjenda, otaa shuna montsi moka ya zile. Esiku ndyoka oompangela dhawo otadhi hulu po.” — Episalomi 146:3, 4.

Omuleli ngoka nokuli a talika ko e li omwaanawa naye oha si. Shimwe ishewe, ngele a si ita vulu okushilipaleka kutya omuleli ngoka te ke mu landula naye ota ka lela oshigwana nawa. — Omuuvithi 2:18, 19.

Ombiimbeli otayi popi sha yela kutya aantu inaa shitwa nando nuukwatya wokupangela ooyakwawo, tayi ti:

• “Kaku na omuntu hu utha okukalamwenyo kwe.” — Jeremia 10:23.

Mbela kunena opu na ngaa omuleli ta vulu okupangela pauyuuki?

Omuleli ngoka a hogololwa kuKalunga

Ombiimbeli otayi ti kutya Kalunga okwa gwayeka omuleli omwaanawa noku shi okwiinekelwa, ano Jesus Kristus. (Episalomi 2:6) Jesus oye Omukwaniilwa gUukwaniilwa waKalunga, epangelo ndyoka tali pangele nale okuza megulu. — Mateus 6:10.

Mbela oto ka hogolola ngaa Jesus a ninge omuleli gwoye? Ombiimbeli otayi tu kwathele tu mone kutya omolwashike twa pumbwa okwiipula epulo ndyoka lya simana, tayi ti:

• ‘Simanekeni Omwana [Jesus Kristus] nenge Kalunga, opo ondjahi ye kaayi mu hwamene, nane e tamu si po ombaadhilila. Aanelago oomboka haa kongo egameno puye.’ — Episalomi 2:12 yelekanitha NW.

Ngashingeyi olyo ethimbo lyokuninga etokolo. Omahunganeko gOmbiimbeli otaga holola kutya Jesus okwa tameke okupangela mo 1914 nUukwaniilwa waKalunga masiku otawu ka pingena po omapangelo agehe gopantu. — Daniel 2:44.

Opo wi ilonge oshindji kombinga ya nkene to vulu okwaambidhidha epangelo lyaJesus, lesha oshitopolwa: “Hogolola okwaambidhidha Uukwaniilwa waKalunga ngashingeyi!”