Kala omudiinini kuKristus e li Ohamba

“Okwa pewa [epangelo, efimano neenghono douhamba]. Noiwana aishe omaludi nomalaka tae mu longele.” — DANIEL 7:14, yelekanifa OB-1986.

1, 2. Otu shi shii ngahelipi kutya Kristus ka li a pewa pauyadi eenghono dopauhamba mo 33 O.P.?

OMUPANGELI elipi a li kombada yedu ndele te linyengifa ovapangelwa vaye va kale ve mu lineekela, noku va yandjela omwenyo waye ndele ta nyumuka nokuninga ohamba tai pangele meulu? Jesus Kristus oye aeke a li a dula okuninga osho sha pulwa mepulo olo nosho yo oinima ikwao ihapu. (Lukas 1:32, 33) Konima yokufya kwaKristus nosho yo okunyumuka nokulonda kwaye keulu, Kalunga “okwe mu pa a kale omutwe waaishe keongalo,” pOpentekoste mo 33 O.P. (Ovaefeso 1:20-22; Oilonga 2:32-36) Okudja pefimbo olo, eenghonopangelo daye okwa li da ngabekwa, meityo olo kutya, ovapangelwa vaye votete ova li ashike Ovakriste ovavaekwa, ovo ve li Israel shopamhepo ile ‘Israel yaKalunga.’ — Ovagalati 6:16; Ovakolossi 1:13.

² Omido 30 lwaapo konima yOpentekoste 33 O.P., omuyapostoli Paulus okwa li a koleka oushili oo kutya Kristus ka li a pewa natango pauyadi eenghono dopauhamba, ndele pefimbo olo, okwa li e li “omutumba kolulyo laKalunga, [a teelela] ashike ovatondadi vaye va ningwe oshilyato sheemhadi daye.” (Ovaheberi 10:12, 13) Lwopexulilo lefelemudo lotete O.P., omuyapostoli omunamido Johannes okwa li a pewa emoniko lopaxunganeko omo a li a mona Omunamapangelo aeshe, Jehova, ta nangeke po Kristus Jesus e li Ohamba yOuhamba mupe womeulu. (Ehololo 11:15; 12:1-5) Kunena, otu na oumbangi muhapu oo tau ulike kutya Kristus okwa hovela okupangela meulu e li Ohamba yopaMessias mo 1914.a

3. (a) Okudja mo 1914 onghundana iwa yOuhamba oya kala tai udifwa neityo le likalekelwa lilipi? (b) Omapulo elipi hatu dulu okulipula?

³ Okudja mo 1914, onghundana iwa yOuhamba oya kala tai udifwa neityo le likalekelwa, olo kutya, Kristus ota pangele e li Ohamba yOuhamba waKalunga womeulu. Momudo oo, Kristus okwa hovela okupangela ‘mokati kovatondi vaye.’ (Epsalme 110:1, 2; Mateus 24:14; Ehololo 12:7-12) Kakele kaasho, ovapangelwa vaye ovadiinini ovo ve li kombada yedu otava dulika nehalo liwa keenghonopangelo daye mokukufa ombinga moilonga yokuhonga Ombibeli yomounyuni aushe, oyo inai kala ko nande onale mondjokonona yovanhu. (Daniel 7:13, 14; Mateus 28:18) Ovakriste ovavaekwa, ovo ve li “ovanhu vouhamba,” otava longo ve li ‘ovatumwa ponhele yaKristus.’ Otava yambididwa ‘keedi dimwe’ didiinini, odo omuvalu wado tau ende tau hapupala. (Mateus 13:38; 2 Ovakorinto 5:20; Johannes 10:16, OB-1986) Ndele nande ongaho, otwa pumbwa okulikonakona pauhandimwe shi na sha nongeenge otwa tambula ko ngoo shili eenghonopangelo daKristus. Mbela otu li ngoo ovadiinini filufilu kuye? Ongahelipi hatu dulu okuulika kutya otu li ovadiinini kuKristus oo ta pangele e li Ohamba meulu? Tete natu kundafaneni omatomheno okukala tu li ovadiinini kuKristus.

Ohamba oyo hai linyengifa ovapangelwa vayo va kale ovadiinini kuyo

4. Jesus okwa li a longa oikumwifilonga ilipi ofimbo a li moukalele waye wokombada yedu?

⁴ Oudiinini wetu kuKristus owa kanghamena kolupandu letu li na sha naasho e tu ningila nomolwomaukwatya aye a tongomana. (1 Petrus 1:8) Ofimbo Jesus a li kombada yedu, okwa li a ulika monghedi inini osho ta ka ninga monakwiiwa eshi ta ka pangela e li Ohamba kombada yedu alishe pefimbo laKalunga la wapala. Okwa li a kutifa ovafindjala. Okwa li a velula ovanaudu noilema, okwa li a twikulula omesho ovapofi, nokwa li a fitulula ovafitamatwi novafitandaka. Okwa li yo a nyumunina ovanhu vonhumba momwenyo. (Mateus 15:30, 31; Lukas 7:11-16; Johannes 6:5-13) Natango, okulihonga kombinga yokukalamwenyo kwaJesus kwokombada yedu otashi tu kwafele tu shiive oukwatya oo ta ka holola e li Omupangeli wetu womonakwiiwa — unene tuu oukwatya waye udidilikwedi, ohole yokuliyamba mwene. (Markus 1:40-45) Shi na sha noukwatya oo, Napoléon Bonaparte okwa ti: “Alexander, Caesar, Charlemagne naame mwene otwa dika po omauhamba, ndele oilonga yetu inene otwe i pondola ngahelipi? Omokulongifa eenghono. Jesus Kristus oye aeke a li a kanghamekela ouhamba waye kohole, nofiyo okunena ovanhu omamiliyona ove lilongekida okufya omolwaye.”

5. Omolwashike oukwatya waJesus wa li wa nana ovanhu vahapu?

⁵ Molwaashi Jesus okwa li omunambili nomulininipiki momutima, ovo kwa li va wililwa po komafininiko nokomitengi didjuu ova li va tulumukifwa kehongo laye tali pameke nokoukwatya waye muwa. (Mateus 11:28-30) Ounona navo okwa li hava kala va mbilipalelwa ngeenge ve li puye. Ovalumenhu ovalininipiki nove na eendunge dokuyoolola ova li va ninga ovahongwa vaye nopehe na okwoongaonga. (Mateus 4:18-22; Markus 10:13-16) Opa li yo ovakainhu vahapu ovatilikalunga ovo va li ve linyengifwa va kale ovadiinini kuye omolwoikala yaye yokuyavelela noyefimaneko. Ovakainhu vahapu va tya ngaho ova li ve mu yakula ofimbo a li ta wanifa po oukalele waye, tava longifa efimbo lavo, eenghono davo noiniwe yavo. — Lukas 8:1-3.

6. Jesus okwa li a holola ngahelipi omaliudo omoule eshi Lasarus a li a fya?

⁶ Kristus okwa li a holola omaliudo aye omoule eshi kaume kaye Lasarus a li a fya. Okwa li e uditile Maria naMarta olukeno omolwokunyika oluhodi kwavo nomolwaasho naye okwa li a nyika oluhodi ndele ta ‘lili.’ Okwa li a “kwatwa kolukaka” omolwoluhodi linene, nonande okwa li e shi shii kutya konima yokafimbo kanini okwa li ta ka nyumuna Lasarus. Opo nee, okwe linyengifwa kohole nokolukeno a longife eenghono odo a pewa kuKalunga ndele ta nyumuna Lasarus. — Johannes 11:11-15, 33-35, 38-44.

7. Omolwashike tu na okukala ovadiinini kuJesus? (Tala yo oshimhungu pepandja 31.)

⁷ Oukwatya vali umwe waJesus ukumwifi neenghono oo ohole yaye inene yokuhola ouyuki nosho yo outondwe waye wokutonda oihelele noukolokoshi. Oikando i li ivali, Jesus okwa li a katuka eenghatu nokuhenoumbada ndele ta te mo ovashingifi ovanalwisho motembeli. (Mateus 21:12, 13; Johannes 2:14-17) Natango, ofimbo a li omunhu wokombada yedu, okwa li a shakeneka omaudjuu e lili noku lili, naasho osha li she mu pa omhito a shiive nawa omafininiko nomaupyakadi oo hatu shakeneke monghalamwenyo. (Ovaheberi 5:7-9) Jesus okwa li yo e shii kutya ovanhu ohava kala ve udite ngahelipi ngeenge ve tondike nongeenge tava longelwa okuhenouyuki. (Johannes 5:15-18; 11:53, 54; 18:38–19:16) Hauxuninwa, okwe liyandja neyombamo a fye efyo linyanyalifi, opo a wanife po ehalo laXe noku yandjele ovapangelwa vaye omwenyo waye opo va ka mone omwenyo waalushe. (Johannes 3:16) Mbela omaukwatya oo itae ku linyengifa u twikile okukala omudiinini kuKristus? (Ovaheberi 13:8; Ehololo 5:6-10) Ndele mbela ovo va hala okukala ovapangelwa vaKristus e li Ohamba ove na okuwanifa po oiteelelwa ilipi?

Oiteelelwa i na sha nokukala omupangelwa waKristus e li Ohamba

8. Ovapangelwa vaKristus ove na okuwanifa po oiteelelwa ilipi?

⁸ Diladila kefaafanifo eli: Opo omunhu a ninge omukwashiwana moshilongo shimwe, oku na okuwanifa po oiteelelwa yonhumba. Pashihopaenenwa, otashi dulika a teelelwe a kale e na ondjokonona iwa noku kale e na oukolele muwa. Sha faafana, ovapangelwa vaKristus ova pumbwa okudiinina omifikamhango dopombada dopaenghedi nokukala ve na oupamhepo muwa. — 1 Ovakorinto 6:9-11; Ovagalati 5:19-23.

9. Ongahelipi hatu dulu okuulika kutya otu li ovadiinini kuKristus?

⁹ Osha yuka yo eshi Jesus Kristus ta pula ovapangelwa vaye va kale ovadiinini kuye nokOuhamba waye. Ohava ulike oudiinini wavo mokukala metwokumwe naasho Jesus a li a honga ofimbo a li kombada yedu. Pashihopaenenwa, ohava pitifa komesho monghalamwenyo yavo oinima yOuhamba nokulonga ehalo laKalunga, ponhele yokulalakanena omaliko. (Mateus 6:31-34) Ohava kendabala yo okuninga ngaashi tava dulu okuhopaenena omaukwatya aKristus, nokuli nonande ove li meenghalo didjuu. (1 Petrus 2:21-23) Kakele kaasho, ohava shikula yo oshihopaenenwa shaKristus mokuningila vamwe ouwa. — Mateus 7:12; Johannes 13:3-17.

10. Ongahelipi hatu dulu okuulika kutya otu li ovadiinini kuKristus (a) moukwaneumbo (b) meongalo?

¹⁰ Ovashikuli vaJesus ohava ulike yo oudiinini wavo kuye mokuulika omaukwatya opaKriste momaukwaneumbo avo. Pashihopaenenwa, ovalumenhu ohava ulike oudiinini wavo mokuungaunga nawa novakainhu vavo nosho yo mokutekula ovana vavo monghedi yopaKriste. (Ovaefeso 5:25, 28-30; 6:4; 1 Petrus 3:7) Ovakainhu ohava ulike oudiinini wavo kuKristus mokukala neenghedi diwa nokukala ‘nomhepo yombili noyelimweneneno.’ (1 Petrus 3:1-4; Ovaefeso 5:22-24) Ounona ohava ulike oudiinini wavo kuKristus mokuhopaenena oshihopaenenwa shaye sheduliko. Ofimbo a li omunyasha, Jesus okwa li ha dulika kovadali vaye, nonande kava li va wanenena. (Lukas 2:51, 52; Ovaefeso 6:1) Ovapangelwa vaKristus ohava kendabala oku mu hopaenena ‘mokufilafana onghenda, nomokukala ve hole ovamwaxe’ nosho yo mokukala ‘ovanalukeno.’ Ohava hopaenene yo Kristus mokukala ‘ovalininipiki, nokukala ihava alulilafana owii netukano.’ — 1 Petrus 3:8, 9; 1 Ovakorinto 11:1.

Ovapangelwa vaKristus ohava dulika komhango yaye

11. Ovapangelwa vaKristus ohava dulika keemhango dilipi?

¹¹ Ngaashi ashike omunhu oo a hala okuninga omukwashiwana moshilongo shonhumba e na okudulika keemhango doshilongo osho, ovapangelwa vaKristus ove na okudulika ‘komhango yaye,’ sha hala kutya, ove na okukala metwokumwe naasho Kristus a honga nokwa lombwela ovahongwa vaye. (Ovagalati 6:2) Ove na unene tuu okudulika ‘komhango onghwahamba’ yohole. (Jakob 2:8) Oshike mbela sha kwatelwa meemhango odo?

12, 13. Ongahelipi hatu dulika noudiinini ‘komhango yaKristus’?

¹² Ovapangelwa vaKristus inava wanenena nomolwaasho ohava ningi omapuko. (Ovaroma 3:23) Onghee hano, ova pumbwa okukulika ‘ohole yokuhola ovamwaxe ihe na oihelele,’ opo va kale ve ‘holafane nohole yokomutima ya xwama.’ (1 Petrus 1:22) Ovakriste ohava dulika yo komhango yaKristus mokukala ‘hava diminafana po omanyono, ngeenge va ningafana nai navakwao.’ Okudulika komhango oyo ohaku va kwafele vaha kale tava konenene okuhawanenena kwavakwao nohaku va kwafele va kale ve holafane. Mbela kashihafifa okukala mokati kaavo hava dulika noudiinini kOhamba yetu inahole mokudjala ohole, oyo i li ‘oshimangifo sha wana oku tu mangela kumwe’? — Ovakolossi 3:13, 14.

¹³ Jesus okwa li a yelifa kutya ohole oyo a li a ulika kaya li ashike ohole yakwalukeshe oyo ovanhu hava ulikilafana. (Johannes 13:34, 35) Ngeenge otwa kala tu hole ashike ovo ve tu hole, itatu ningi ‘oshinima shinene,’ molwaashi kungaha, ohole yetu inai mbwalangadja. Jesus okwe tu ladipika tu hopaenene ohole yaXe mokukala tu hole nokuli novatondi vetu nohole ya kanghamena komafinamhango, nonande ohave tu hepeke. (Mateus 5:46-48) Ohole ya tya ngaho ohai tu linyengifa yo tu wanife po noudiinini oilonga yetu ya fimanenena. Oilonga oyo oilipi mbela?

Oudiinini wovapangelwa vaKristus otau yelekwa

14. Omolwashike oilonga yetu yokuudifa ya fimanenena?

¹⁴ Kunena, ovapangelwa vaKristus ove na oshilonga sha fimanenena ‘shokuhepaulula ouhamba waKalunga.’ (Oilonga 28:23) Oshilonga osho osha fimanenena molwaashi Ouhamba wopaMessias oo tau ka yukipalifa ounamapangelo waJehova Kalunga. (1 Ovakorinto 15:24-28) Eshi hatu udifa onghundana iwa, ohatu yandje yo omhito kovapwilikini vetu opo navo va dule okuninga ovapangelwa vOuhamba waKalunga. Kakele kaasho, onghedi omo ovanhu tave linyenge ketumwalaka letu otai ka ufa kutya oidjemo yokutokolwa kwavo kuKristus e li Ohamba otai ka kala ya tya ngahelipi, eshi te ke uya okutokola ovanhu aveshe. (Mateus 24:14; 2 Ovatessaloniki 1:6-10) Onghee hano, onghedi ya tongomana omo hatu dulu okuulika oudiinini wetu kuKristus omokudulika kelombwelo laye loku ka lombwela vamwe shi na sha nOuhamba. — Mateus 28:18-20.

15. Omolwashike oudiinini wOvakriste tau yelekwa?

¹⁵ Doshili, Satana ota kendabala meenghedi di lili noku lili okuya moshipala oilonga yetu yokuudifa, novapangeli vopanhu inava dimina eenghonopangelo daKristus odo a pewa kuKalunga. (Epsalme 2:1-3, 6-8) Onghee hano, Jesus okwa londwela ovalongwa vaye a ti: “Omupiya ke dule Omwene waye. Ngenge va taata nge, otave mu taata yo.” (Johannes 15:20) Nomolwaasho ovashikuli vaJesus ove li molwoodi lopamhepo olo tali yeleke oudiinini wavo. — 2 Ovakorinto 10:3-5; Ovaefeso 6:10-12.

16. Ongahelipi ovapangelwa vOuhamba waKalunga hava ‘pe Kalunga osho shaKalunga’?

¹⁶ Ndele nande ongaho, ovapangelwa vOuhamba waKalunga ove li ovadiinini kOhamba yavo ihe wetike, ashike ohava fimaneke yo ovapangeli vopanhu. (Titus 3:1, 2) Jesus okwa ti: “Eshi shomukesari, shi peni omukesari, naasho shaKalunga, shi peni Kalunga.” (Markus 12:13-17) Onghee hano, ovapangelwa vaKristus ohava dulika keemhango domapangelo odo itadi kondjifafana neemhango daKalunga. (Ovaroma 13:1-7) Ndele eshi omhangu yopombada yOshijuda ya li ya yandja elombwelo olo la li li li omhinge neemhango daKalunga, eshi va lombwela ovahongwa vaJesus vaha udife vali, ovahongwa vaJesus ova anya filufilu okudulika kelombwelo olo, va popya nefimaneko va ti kutya: “Okudulika kuKalunga ku dule okudulika kovanhu.” — Oilonga 1:8; 5:27-32.

17. Omolwashike hatu dulu okukala nouladi nonande oudiinini wetu otau yelekwa?

¹⁷ Odoshili kutya otashi pula ouladi muhapu kovapangelwa vaKristus okukala ovadiinini kuKristus e li Ohamba yavo eshi tava shakeneke omahepeko. Ndele nande ongaho, Jesus okwa ti: “Ovanelao onye, ovanhu ngenge tave mu sheke ndee tave mu taata ndee tave mu popile mowii aushe nokufufya molwange. Hafeni nye mu nyakukwe pombada, osheshi ondjabi yeni oinene meulu.” (Mateus 5:11, 12) Ovashikuli vaJesus vonale ova li va mona oushili weendjovo odo. Eshi va li va dengwa neeshokoto omolwokuudifa onghundana iwa yOuhamba, ova li va “hafa eshi va talwa va wana okushekelwa edina laJesus. Ndele vo inava efa okulonga omafiku [aeshe motembeli, NW] nomomaumbo nova udifa evangeli laKristus Jesus.” (Oilonga 5:41, 42) Oto pandulwa yo eshi naave to ulike oudiinini woye kuKristus nande to shakeneke eenghalo didjuu ngaashi omikifi, okufilwa nosho yo omapataneko. — Ovaroma 5:3-5; Ovaheberi 13:6.

18. Eendjovo daJesus odo a li a lombwela Pontius Pilatus otadi ti shike kovapangelwa vOuhamba womeulu?

¹⁸ Ofimbo Jesus a li natango kombada yedu, okwa li a yelifila omupangeli Omuroma, Pontius Pilatus, a ti: “Ouhamba wange kau fi womounyuni ou; ouhamba wange ngeno womounyuni ou, ovapiya vange ngeno va lwa, ndi ha yandjwe kOvajuda. Ndelenee pamha ouhamba wange kau fi wamu.” (Johannes 18:36) Onghee hano, ovapangelwa vOuhamba womeulu ihava i moukwaita va ka lwife ovanhu vakwao, noihava ame ombinga momalipumomumwe opanhu. Omolwoudiinini wavo ‘kOhamba yombili,’ ihava kufa nandenande ombinga moinima younyuni ou oyo hai tukaula ovanhu. — Jesaja 2:2-4; 9:5, 6.

Ovapangelwa vaKristus ovadiinini otava ka pewa ondjabi yaalushe

19. Omolwashike ovapangelwa vaKristus ve na eteelelo li na sha nonakwiiwa?

¹⁹ Ovapangelwa ovadiinini vaKristus, “Ohamba yeehamba,” ove na eteelelo li na sha nonakwiiwa. Ova teelela efimbo olo eshi mafiku Kristus ta ka ulika eenghono daye dinenenene dopauhamba. (Ehololo 19:11–20:3; Mateus 24:30) Oshixupe oshidiinini ‘shovanhu vouhamba’ ovo va vaekwa nomhepo osha teelela oku ka pewa efyuululo li na ondilo — oufembanghenda wokupangela pamwe naKristus meulu. (Mateus 13:38; Lukas 12:32) ‘Eedi dimwe’ daKristus didiinini oda teelela okulombwelwa taku ti: “Ileni, mu ka fyuulule ouhamba ou mwe u longekidilwa opeshito lounyuni.” (Johannes 10:16; Mateus 25:34) Eedi dimwe otadi ka fyuulula ouhamba meityo olo kutya otadi ka kala mEduparadisa koshi yOuhamba. Onghee hano, atusheni ovo tu li ovapangelwa vOuhamba natu kaleni twa tokola toko okutwikila okukala ovadiinini kuKristus e li Ohamba.

[Omashangelo opedu]

Oto dulu okuyelifa?

• Omolwashike tu na okukala ovadiinini kuKristus?

• Ongahelipi ovapangelwa vaKristus tava dulu okuulika kutya ove li ovadiinini kuye?

• Omolwashike twa hala okukala ovadiinini kuKristus e li Ohamba?

[Oshimhungu pepandja 31]

OMAUKWATYA AMWE VALI AKRISTUS A TONGOMANA

Okuhenonhondo — Johannes 4:7-30.

Olukeno — Mateus 9:35-38; 12:18-21; Markus 6:30-34.

Ohole yokuhelihola mwene — Johannes 13:1; 15:12-15.

Oudiinini — Mateus 4:1-11; 28:20; Markus 11:15-18.

Oukwao wananghali — Markus 7:32-35; Lukas 7:11-15; Ovaheberi 4:15, 16.

Ondjele — Mateus 15:21-28.

[Efano pepandja 29]

Mokukala tu holafane, ohatu dulika ‘komhango yaKristus’

[Efano pepandja 31]

Mbela oukwatya waKristus ohau ku linyengifa u kale omudiinini kuye?