Omwa wana okutwalwa keefifiya domeva omwenyo
‘Odjona otai va lifa ndee tai va twala keefifiya domeva omwenyo.’ — EH. 7:17, yelekanifa NW.
1. Eendjovo daKalunga oda ti shike shi na sha nOvakriste ovavaekwa, noshinakuwanifwa shilipi Jesus e va pa?
EENDJOVO DAKALUNGA otadi ti kutya Ovakriste ovavaekwa ovo tava file oshisho oinima yaKristus yokombada yedu ove li “omupiya omudiinini nomunaendunge.” Eshi Kristus a li a konakona “omupiya” mo 1918, okwa li a hanga ovavaekwa ovo va li kombada yedu ve li ovadiinini mokuyandja ‘oikulya yopamhepo pefimbo la wapala.’ Osho osha li sha hafifa Jesus, Omwene wavo, nokwa li e va nangeka po va pashukile ‘oinima yaye aishe.’ (Lesha Mateus 24:45-47, yelekanifa NW.) Kungaho, ovavaekwa otava yakula ovalongeli vaJehova vakwao kombada yedu ofimbo inava pewa efyuululo lavo lomeulu.
2. Oinima yaJesus yokombada yedu oya kwatela mo shike?
2 Omunhu ngeenge oye mwene woinima ile womamona onhumba oha kala e na eenghonopangelo okupangela oinima ya tya ngaho, nota dulu oku i longifa ngaashi a hala. Oinima yaJesus Kristus, Ohamba yaJehova ya nangekwa po, oya kwatela mo oinima aishe i na sha nOuhamba kombada yedu. Oinima yOuhamba oya kwatela mo “ongudu inene” oyo omuyapostoli Johannes a mona memoniko, nokwa popya shi na sha nayo a ti: “Tala, ongudu inene ya nyengana okuvalwa [yomoiwana aishe] nomomaludi aeshe [nomovanhu aveshe nomomalaka] aeshe; vo ova li ofika va taalela olukalwapangelo nOdjona, va djalekwa oikutu itoka to, ndee va li ve kwete oivale yomilunga momake avo.” — Eh. 7:9.
3, 4. Ovakriste vongudu inene ove na oufembanghenda munene ulipi?
3 Jesus okwa ti ongudu inene oi li ‘eedi daye dimwe.’ (Joh. 10:16, OB-1986) Eedi dimwe odi na eteelelo loku ka kala fiyo alushe moparadisa kombada yedu. Odi na elineekelo kutya Jesus ote ke ‘di twala keefifiya domeva omwenyo,’ nonokutya ‘Kalunga ota ka feta po omahodi aeshe momesho ado.’ Molwaashi odi na eteelelo olo, oda ‘kosha oikutu yado, ndele de i yelifa mohonde yOdjona.’ (Eh. 7:14, 17, yelekanifa NW.) Odi na eitavelo tali longo mekuliloyambo laJesus, nokungaho, ‘oikutu yado oi yela’ koshipala shaKalunga. Oda yukipalifwa di ninge ookaume kaKalunga ngaashi Abraham.
4 Kakele kaasho, molwaashi Kalunga okwa tala ko ongudu inene yeedi dimwe oyo tai ende tai hapupala iyuki, otai dulu okukala ya teelela oku ka xupa pehanauno longhalelo ei yoinima pefimbo loudjuu munene. (Jak. 2:23-26) Otai dulu okweehena popepi naJehova noi na etimaumbwile likumwifi loku ka xupa puHarmagedon. (Jak. 4:8; Eh. 7:15) Ihai longo omuxwanaxwanena, ndele ohai longo nehalo liwa koshi yewiliko lOhamba yomeulu nosho yo yovamwaxe ovavaekwa ovo ve li kombada yedu.
5. Ongudu inene ohai yambidida ngahelipi ovamwaxe vaKristus ovavaekwa?
5 Ovakriste ovavaekwa ohava shakeneke omapataneko a kwata moiti oo haa etifwa kounyuni waSatana. Ndele nande ongaho, otava dulu okukala nelineekelo kutya oovakwao vongudu inene otave va yambidida. Nonande omuvalu wOvakriste ovavaekwa otau ende tau ninipala, ongudu inene otai hapupala neenghono omudo keshe. Ovavaekwa itava dulu okupashukila pauhandimwe eongalo keshe lomomaongalo opaKriste 100 000 lwaapo mounyuni aushe. Onghee hano, ovalumenhu ovo va wana vomongudu inene ohava kwafele ovavaekwa mokulonga ve li ovakulunhuongalo momaongalo. Ohava kwafele mokufila oshisho Ovakriste omamiliyona ovo ve lineekelelwa ‘komupiya omudiinini nomunaendunge.’
6. Jesaja okwa li a ulika ngahelipi kutya eedi dimwe otadi ka kwafela Ovakriste ovavaekwa?
6 Omuprofeti Jesaja okwa li a xunganeka kutya eedi dimwe otadi ka yambidida Ovakriste ovavaekwa nehalo liwa, a ti: “Omwene ota ti: [Ovanailonga ovo ihava longele ondjabi vokuEgipti novashingifi vokuEtiopia, NW] nOvasaba ovalumenhu vale, otave uya kuove, ndee tava ningi voye, otave ku shikula.” (Jes. 45:14) Meityo lopafaneko, Ovakriste ovo ve na eteelelo loku ka kala kombada yedu otava shikula ongudu yomupiya nosho yo Olutuwiliki layo, tava shikula ewiliko olo tava pewa. Ngaashi “ovanailonga ovo ihava longele ondjabi,” eedi dimwe ohadi longifa nehalo liwa nonomutima aushe eenghono dado nosho yo oiniwe yado mokuyambidida oilonga yokuudifa mounyuni aushe oyo Kristus a pa ovashikuli vaye ovavaekwa ovo ve li kombada yedu. — Oil. 1:8; Eh. 12:17.
7. Ongudu inene otai deulilwa shike?
7 Eshi oilyo yongudu inene tai yambidida ovamwaxe ovavaekwa, otai deulwa opo i kale ekanghameno loulikumwe mupe wovanhu ovo tava ka kala po konima yaHarmagedon. Ekanghameno olo oli na okukala la kola, noilyo yalo oi na okukala tai dulu okushikula ewiliko lOmwene wavo nehalo liwa. Omukriste keshe okwa pewa omhito a ulike kutya ota dulu okulongifwa kOhamba, Kristus Jesus. Ngeenge Omukriste oku na eitavelo tali longo nota ulike oudiinini paife, ota ulike kutya ota ka tambula ko nehalo liwa omalombwelo oo ta ka pewa kOhamba oyo mounyuni mupe.
Ongudu inene ohai ulike kutya oi na eitavelo
8, 9. Ongudu inene ohai ulike ngahelipi kutya oi na eitavelo?
8 Eedi dimwe odo di li oovakwao veongalo lOvakriste ovavaekwa ohadi ulike eitavelo lado meenghedi di lili noku lili. Yotete, ohadi yambidida ovavaekwa mokuudifa onghundana iwa yOuhamba waKalunga. (Mat. 24:14; 28:19, 20) Onhivali, ohadi dulika nehalo liwa kewiliko olo hadi pewa kOlutuwiliki. — Heb. 13:17; Lesha Sakaria 8:23.
9 Onhinhatu, ongudu inene ohai yambidida ovamwaxe ovavaekwa mokutula moilonga omifikamhango daJehova douyuki. Ohai kendabala okukulika omaukwatya ngaashi “ohole, ehafo, ombili, onheni, oukaume, ouwa, oudiinini, engungumano, elididimiko.” (Gal. 5:22) Kunena, okuulika omaukwatya a tya ngaho nokuhenuka “oilonga yombelela” ohaku ningifa omunhu a kale ina hokiwa kuvahapu. Ndele nande ongaho, ongudu inene oya tokola okuhenuka “oluhaelo, oihole, onyata, okukalela olwisho loipala, oukalele woikalunga, oundudu, etondafano, eemhata, oukodi, ehandu, omashilafano, [omaliyalafano], oimhanga; efupa, omadipao, oukolwe, eenhingo naikwao ya fa ei.” — Gal. 5:19-21.
10. Ongudu inene oya tokola okuninga shike?
10 Molwaashi inatu wanenena, otashi dulu okukala shidjuu okuulika omaukwatya oshiimati shomhepo, okuhenuka oilonga yombelela nosho yo okukondjifa omafininiko oo haa etifwa kounyuni waSatana. Ndele nande ongaho, otwa tokola tuha efe etekomukumo olo hali etifwa kokudopa okulandula oshihopaenenwa shaJesus, komaunghundi etu pauhandimwe, ile komangabeko opalutu li nghundipaleke eitavelo letu ile li talaleke ohole yetu yokuhola Jehova. Otu shii kutya Jehova ota ka xupifa ongudu inene poudjuu munene ngaashi e shi udaneka.
11. Eenghedi dilipi Satana ha longifa opo a nghundipaleke eitavelo lOvakriste?
11 Ohatu kala alushe oupafi, molwaashi otu shii kutya Ondiaboli oyo omutondi wetu munene nohai kendabala alushe oku tu shololifa. (Lesha 1 Petrus 5:8.) Ondiaboli ohai kendabala okulongifa ovashunimonima nosho yo ovanhu vamwe opo ve tu itavelife kutya omahongo oo twa itavela okwa puka. Ndele eenghedi da tya ngaho ihadi pondola noupu. Nonande omapataneko omafimbo amwe ohaa i moshipala oilonga yokuudifa, luhapu ohaa pameke eitavelo letu. Ndele nande ongaho, Satana ota twikile okulongifa etekomukumo, molwaashi oku wete kutya onghedi oyo ohai pondola neenghono okunghundipaleka eitavelo letu. Ovakriste vomefelemudo lotete ova li va londwela shi na sha noshiponga osho eshi va li va lombwelwa taku ti: “Dimbulukweni [Kristus] ou e lididimikila ondubo i fike apa yovalunde.” Omolwashike va li ve na okuninga ngaho? Opo ‘vaha loloke neemwenyo davo diha fye ounye.’ — Heb. 12:3.
12. Omayele Ombibeli ohaa pameke ngahelipi ovo va teka omukumo?
12 Mbela ope na efimbo limwe wa li u udite wa hala okweefa po okulongela Jehova? Mbela ope na omafimbo amwe oo ho kala u udite kutya ino wana okulongela Jehova? Ngeenge osho shi li ngaho, ino efa Satana a longife omaliudo a tya ngaho e ku imbe u longele Jehova. Okukala ho konakona Ombibeli moule, okwiilikana wa mana mo, okukala pokwoongala nopehe na okufaula nosho yo okukala ho endafana nOvakriste vakweni otashi ke ku pameka notashi ke ku kwafela opo ‘omwenyo woye uha fye ounye.’ Jehova okwa udaneka kutya ota ka pa eenghono ovo have mu longele, nota ka wanifa po eudaneko olo. (Lesha Jesaja 40:30, 31.) Onghee hano, kala wa lenga oilonga yOuhamba. Kala we lipyakidila nokukwafela vamwe nokuhenuka okuyandja elitulemo koinima oyo tai mane po efimbo. Oinima aishe oyo otai ke ku kwafela u lididimike nonande ope na etekomukumo. — Gal. 6:1, 2.
Ongudu inene otai ka xupifwa moudjuu munene ndele tai ka ya mounyuni mupe
13. Oshilonga shilipi tashi ka pewa ovo tava ka xupa puHarmagedon?
13 Konima yaHarmagedon, ongudu inene yovanyumunwa ovo vehe fi ovayuki otai ka pumbwa okuhongwa eendjila daJehova. (Oil. 24:15) Otava ka pumbwa okulihonga shi na sha nekuliloyambo laJesus, nove na yo okuhongwa va kale ve na eitavelo tali longo mekuliloyambo olo opo va dule okumona omauwa alo. Otava ka pumbwa okweefa po omahongo oo va li va hongwa komalongelokalunga oipupulu nosho yo onghedi yavo yokukalamwenyo yonale. Otave ke lihonga nghee ve na okudjala omunhu mupe, oukwatya oo u na okukala u niwe kOvakriste vashili. (Ef. 4:22-24; Kol. 3:9, 10) Ovakriste vomeedi dimwe ovo tava ka xupa puHarmagedon otava ka kala ve na oilonga ihapu. Itashi ka kala tuu shihafifa oku ka longela Jehova oshilonga sha tya ngaho nopehe na omafininiko nosho yo omapiyaaneko okudja kounyuni ou woukolokoshi!
14, 15. Ovanyumunwa nosho yo ovo tava ka xupa poudjuu munene otava ka hokololelafana shike?
14 Ovapiya vaJehova ovadiinini ovo va fya fimbo Jesus a li ina hovela oukalele waye kombada yedu otave ke lihonga yo shihapu konima yaHarmagedon. Otave ke lihonga kutya Messias omuudanekwa oye lyelye, oo va li va teelela ndele inava dula oku mu mona. Eshi va li nale momwenyo, ova li va ulika kutya ove na ehalo okuhongwa kuJehova. Pashihopaenenwa, itashi ka kala tuu oufembanghenda noshihafifa okukwafela ovanyumunwa va yelifile Daniel shi na sha newanifo lomaxunganeko oo a shanga ndele ka li e a udite ko! — Dan. 12:8, 9.
15 Nonande ohatu ka honga ovo tava ka nyumunwa oinima ihapu, ohatu ke va pula yo omapulo mahapu. Otava ka dula oku tu lombwela ouyelele muhapu u na sha noiningwanima oyo ya tumbulwa mOmbibeli ndele inai hokololwa moule. Itashi ka kala tuu shitunhula okulihonga shihapu shi na sha naJesus okudja komupambele waye Johannes Omuninginifi! Nopehe na omalimbililo, oinima oyo hatu ke lihonga keendombwedi odo didiinini otai ke tu kwafela tu kale tu na eudeko lomoule lokuuda ko Eendjovo daKalunga li dulife olo tu na paife. Ovapiya vaJehova ovadiinini ovo va fya, mwa kwatelwa ovo vongudu inene ovo tava fi pefimbo lexulilo, otava ka nyumuka “enyumuko liwa unene.” Ova li va hovela okulongela Jehova mounyuni oo tau pangelwa kuSatana. Itava ka kala tuu va hafa eshi tava ka twikila okulongela Jehova mounyuni mupe omo eenghalo tadi ka kala dishambula! — Heb. 11:35; 1 Joh. 5:19.
16. Pakutala komaxunganeko, oinima ilipi tai ka ningwa momukokomoko wEfiku lEtokolo?
16 Momukokomoko wEfiku lEtokolo, omambo otaa ka nyanunwa. Omambo oo nosho yo Ombibeli, oo taa ka ufa kutya ovanhu ovo tava ka kala kombada yedu pefimbo opo ova wana okukala nomwenyo waalushe ile hasho. (Lesha Ehololo 20:12, 13.) Pexulilo lEfiku lEtokolo, keshe umwe pauhandimwe ota ka kala e na omhito ya wana yokuulika kutya okwaama peni momhata i na sha nounamapangelo weshito alishe. Mbela ovanhu pauhandimwe otava ka dulika ngoo kOuhamba waKalunga nokweefa Odjona i va twale ‘keefifiya domeva omwenyo’? Ile otava ka anya okudulika kOuhamba waKalunga? (Eh. 7:17; Jes. 65:20) Okudja opo, ovanhu aveshe kombada yedu otava ka kala ve na omhito yokuninga etokolo lopaumwene, nopehe na okunwefwa mo koufyuululwalunde ile kounyuni woukolokoshi. Kape na oo ta ka kala e li omhinge netokolo olo Jehova ta ka ninga lwaxuuninwa. Ovakolokoshi otava ka hanaunwa po filufilu. — Eh. 20:14, 15.
17, 18. Ovakriste ovavaekwa nosho yo eedi dimwe ova teelela nodjuulufi oku ka ninga shike pefimbo lEfiku lEtokolo?
17 Kunena, Ovakriste ovavaekwa ova wana okupewa Ouhamba, nova teelela nodjuulufi oku ka pangela pefimbo lEfiku lEtokolo. Itava ka kala tuu ve na oufembanghenda munene! Etimaumbwile olo ve na ohali ve linyengifa va shikule omayele oo Petrus a li apa ovamwaxe vomefelemudo lotete, eshi a ti: “Kendabaleni shili okupameka eifano leni nokuhoololwa kweni, osheshi ngenge tamu shi ningi, kamu na fiku limwe tamu punduka; osheshi osho ngaha tamu pewa omhito iwa ya wana yokuya mouhamba waalushe wOmwene Omukulili wetu Jesus Kristus.” — 2 Pet. 1:10, 11.
18 Eedi dimwe nado oda hafa eshi ovamwaxe ovavaekwa ve na etimaumbwile la tya ngaho. Oda tokola oku va yambidida. Di li ookaume kaKalunga, ohadi linyengifwa di longe ngaashi tadi dulu moilonga yaye. Pefimbo lEfiku lEtokolo, otadi ka kala da hafela okuyambidida nomutima aushe omalongekido aKalunga, eshi Jesus te ke di twala keefifiya domeva omwenyo. Opo nee, otadi ka kala da wana okukala ovapiya vaJehova vokombada yedu fiyo alushe. — Rom. 8:20, 21; Eh. 21:1-7.
Oto dimbuluka?
• Oinima yaJesus yokombada yedu oya kwatela moshike?
• Ongudu inene ohai yambidida ngahelipi ovamwaxe ovavaekwa?
• Ongudu inene oi na omaufembanghenda nosho yo etimaumbwile lilipi?
• Ou na etaleko la tya ngahelipi li na sha nEfiku lEtokolo?
[Efano pepandja 29]
Ongudu inene oya kosha oikutu yayo noye i yelifa mohonde yOdjona
[Efano pepandja 31]
Owa teelela oku ke lihonga shike okudja kovanyumunwa ovadiinini?