Nkene tu na okwiilongekidhila Okugongala kwoPailonga
1. Elalakano lyOkugongala kwoPailonga olyashike, nongiini tatu vulu okumona mo uuwanawa muko?
1 Okugongala kwoPailonga okwa tulwa po, ku tu kwathele opo tu shi endithe nawa muukalele. Okugongala hoka ohaku tsu omuthindo euvitho lyonkundana ombwanawa yUukwaniilwa, okuninga aantu aalongwa noku ya tseyithila kutya ehanagulo lyaakeenakonasha naKalunga oli li pokuya. (Mat. 28:19, 20; Mark. 13:10; 2 Pet. 3:7) Ohatu mono uuwanawa owundji mokugongala hoka kwa simana ngele otwi ilongekidha nawa nokukutha ombinga muko.
2. Ongiini tatu vulu okwiilongekidha tu ka pulakene nawa koshipopiwa?
2 Oshipopiwa: Olundji omalombwelo mpoka pwa za uuyelele woshipopiwa ohaga kala ga nuninwa omupopi. Ihe oto vulu okwiilongekidha uuyelele mboka, nokulesha omanyolo ngoka ge li mo inaaga tothwa mo nokudhiladhila nkene to vulu okulongitha uuyelele mboka muukalele woye.
3. Oshike tu na okuninga uuna tatu ilongekidhile oshitopolwa shoonkundathana dhomapulo nomayamukulo?
3 Oonkundathana dhomapulo nomayamukulo: Oshitopolwa shoka oshi na okuningwa momukalo gwa fa ngoka gwekonakono lyOshungonangelo, efalomo nehulitho oli na okukala paufupi. Uuna to ilongekidha tenda enenedhiladhilo mokatendo kehe, opo wu vule oku ka gandja eyamukulo li li paufupi.
4. Ongiini tatu vulu okwiilongekidhila oshitopolwa shoonkundathana naapulakeni?
4 Oonkundathana naapulakeni: Oshitopolwa shika oshi na okugandjwa sha fa oshipopiwa, ihe omupopi ota ka pula aapulakeni ya kuthe ombinga. Ngele owa tenda iitsa ya simana nokulesha omanyolo ngoka inaaga tothwa mo, oto ka vulu okuyamukula uuna omupopi ta pula omapulo. Omumwatate ngoka ta gandja oshitopolwa shika ota ka kambadhala a kwatele mo aapulakeni ya yelithe iitsa ya simana.
5. Oshike tashi ke tu kwathela tu mone uuwanawa miitopolwa mbyoka hayi kala yi na omauliko?
5 Omauliko: Iitopolwa yimwe ohayi kala ya kwatela mo euliko lyaashoka hashi ningwa shili moshitopolwa shetu, noku tu ulukila nkene tatu vulu okulongitha uuyelele mboka. Euliko ndyoka otali vulu okuningwa kaakuluntugongalo, kaauvithi ya pyokoka nenge kaakokolindjila. Sho to ilongekidhile oshitopolwa shoka, owu na okutala nkene uuyelele mboka tawu ka longithwa. Ngele mokafo kUukalele omu na euliko nkene tatu vulu okugandja iileshomwa yetu, li ngonga niitya yoye mwene noku li lundulula opo li opalele aapulakeni ya yoolokathana. Sa oshipwiyu wu kale noshileshomwa nenge oshifo shoka tashi ka longithwa meuliko. Ota mu vulu okwiidheula omauliko ngoka pethimbo lyekonakonombiimbeli lyuukwanegumbo lyokongulohi.
6. Omolwashike tu na okwiilongekidhila Okugongala kwoPailonga?
6 Okugongala kwoPailonga ohaku nyanyudha uuna twi ilongekidha, nokudhiladhila kombinga yako manga inaku tameka. Moku shi ninga otatu ka tsaathana omukumo nokuladhipikathana. (Rom. 1:11, 12) Ngele ohatu ilongekidhile Okugongala kwoPailonga komeho yethimbo, otatu ka gwanitha po oshilonga shetu nuupu. — 2 Tim. 3:17.