Tse otatu ende muudhiginini wetu
“Ngame kombinga yandje [otandi ende muudhiginini wandje, NW].”—EPS. 26:11.
1, 2. Job okwa li a popi shike kombinga yuudhiginini we, nontopolwa 31 yembo lyaJob otayi popi shike kombinga ye?
METHIMBO lyonale, olundji iinima oya li hayi yelekwa noshiyelekitho shoshiti. Olundji oshiyelikitho shoka ohashi kala shi na oshiti sha shigakana, nopokati kasho ohapu kala pu na ombululu mu na omboha. Koondungu dhasho adhihe okwa li haku kala kwe endjelelekwa oshikwatelwa. Oshinima shoka tashi yelekwa osha li hashi tulwa moshikwatelwa shokombinga yimwe omanga kombinga onkwawo haku tulwa oshinima shondjundo yi shiwike. Oshigwana shaKalunga osha li shi na okulongitha iiviha noondjundo dhi li paushili.—Omayel. 11:1.
2 Sho omulumentu omutilikalunga, Job a li a hepekwa kuSatana, okwa li a ti: “[Jehova] na yeleke ndje noshiyelekitho shu uka, Kalunga opo a tseye uuyuuki wandje.” (Job 31:6, KB) Shi na ko nasha noshinima shoka, Job okwa li a popi lwiikando shoka tashi vulu okumakela omukakateli gwuudhiginini. Ihe Job okwa li e shi pondola okusinda emakelo ndika, ngaashi sha tumbulwa moohapu dhe ndhoka dha nyolwa muJob ontopolwa 31. Oshiholelwa she oshiwanawa otashi vulu oku tu inyengitha tu katuke momikalo dha faathana notu kale hatu popi tu na uushili ngaashi omupisalomi David ngoka a ti: “Ngame kombinga yandje [otandi ende muudhiginini wandje, NW].”—Eps. 26:11.
3. Omolwashike sha simana okukala omudhiginini kuKalunga miinima iinene niishona?
3 Nonando Job okwa li a makelwa noonkondo, okwa li a kala omudhiginini kuKalunga. Yamwe otashi vulika nokuli ya tye kutya Job okwe tu tulila po oshiholelwa sha dhenga mbanda sho a li ta makelwa noonkondo, molwaashoka okwa li a kakatela uudhiginini. Ihatu mono iihuna naanaa ngaashi Job a li e yi mono. Ihe opo tu ulike kutya otwa kakatela shili uudhiginini wetu nohatu ambidhidha uunamapangelo waJehova, otu na okukala aadhiginini kuKalunga miinima iinene niishona.—Lesha Lukas 16:10.
Osha simanenena tu kale tu na uudhiginini wopamikalo
4, 5. E li omukakateli gwuudhiginini, eihumbato lini Job a li a henuka?
4 Opo tu kakatele uudhiginini wetu kuJehova, otu na okuvulika komithikampango dhe dhopamikalo, ngaashi owala Job a li e shi ningi. Okwa li a popi a ti: “Onda ningi etokolo lya kola, ndaa tale omukadhona nde mu haluka. . . . Ngele onda fuulwa komukiintu gulwe nenge nda li te petapeta poontu dhaashiinda, nena mukadhandje na ninge gwomulumentu gulwe.”—Job 31:1, 9, 10.
5 Job okwa li a tokola toko okukakatela uudhiginini we kuKalunga sho a li a henuka okutala omukiintu e mu haluka. E li omulumentu a hokana, ka li nando a dhana nomaiyuvo gomukiintu inaa hokanwa nenge a kale niihole nomukulukadhi gwomulumentu gulwe. MEuvitho lyokOndundu, Jesus okwa li a popi nomuthindo shi na ko nasha nuuyogoki wopamilalo, oshinima shoka aakakateli yuudhiginini ya pumbwa lela okutula momadhiladhilo.—Lesha Mateus 5:27, 28.
Inatu kala tu na iineya
6, 7. (a) Ngaashi moshinima shaJob, Kalunga oha longitha shike opo a yeleke uudhiginini wetu? (b) Omolwashike kaatu na okukala tu na iineya nenge hatu kengelele?
6 Katu na okukala niineya ngele otwa hala okuyalulilwa mokati kaamboka aadhiginini. (Lesha Omayeletumbulo 3:31-33.) Job okwa ti: ‘Inandi hala okuya miifundja nenge ndi ye mokukotokela. [Jehova] na yeleke ndje noshiyelekitho shu uka, opo a tseye uuyuuki wandje.’ (Job 31:5, 6, yelekanitha KB.) Jehova oha yeleke aantu ayehe “noshiyelekitho shu uka.” Ngaashi moshinima shaJob, Kalunga oha longitha omithikampango dhe dhuuyuuki dha gwanenena okuyeleka uudhiginini wetu tu li aapiya ye twe mu iyapulila.
7 Ngele otwa kala tu na iineya nenge hatu kengelele, itatu ka vula okukakatela uudhiginini wetu kuKalunga. Aakakateli yuudhiginini oya ‘laleka iilonga ayihe yomeholamo noyohoni’ noihaya “longo nuufudhime.” (2 Kor. 4:1, 2) Ihe ongiini ngele otwa li twa popi nomwiitaali omukwetu niineya nenge twa katuka niineya e tashi mu ningitha a ka pule ekwatho kuKalunga? Ano oshilanduliko otashi ka kala oshiwinayi noonkondo kutse. Omupisalomi okwi imbi a ti: “Sho ndi li muudhigu, otandi galikana OMUWA, oye notu uvu ndje. Gamena ndje, ndaa kale mongundu yaakotokeli noyaafundja.” (Eps. 120:1, 2) Oshi li nawa okudhimbulukwa kutya Kalunga ota vulu “okupangula omadhiladhilo getu nomahalo getu” a tale ngele otu li aakakateli yuudhiginini yashili.—Eps. 7:8, 9.
Natu kale oshiholelwa oshiwanawa mokuungaunga nayalwe
8. Ongiini Job a li u ungaunga nayalwe?
8 Opo tu vule okukakatela uudhiginini wetu, otwa pumbwa okukala ngaashi Job, ngoka a li omuyuuki, omwiifupipiki noku na ko nasha nayalwe. Job okwa ti: “Inandi ekelahi omatamaneko gaapiya yandje aamati naakadhona, uuna taa pe ndje uusama. Ngele onde shi ninga, otandi ka ninga ngiini, uuna Kalunga ta adha ndje? Otandi ka tya ngiini, Kalunga ngele ta pangula ndje? Kalunga ngoka a shiti ndje, oye wo e ya shita. Oye awike e tu shitila momala goomeme.”—Job 31:13-15.
9. Omaukwatya geni Job a li u ulike mokuungaunga naapiya ye, nongiini tu na okwiinyenga moshinima shika?
9 Osha yela kutya kapwa li omilandu dha kitakana dhokuungaunga niinima yopampangu pethimbo lyaJob. Iipotha oya li hayi ungaungwa nayo melandulathano, nokuli naapika oya li haya vulu okufala iipotha yawo koompangu. Job okwa li omuyuuki nomunahenda mokuungaunga naapiya ye. Ngele ohatu ende muudhiginini, otu na okuulika omaukwatya ga tya ngaaka, unene tuu ngele otu li aakuluntugongalo megongalo lyopaKriste.
Natu kale hatu gandja, ihe inatu kala tu na okahalu
10, 11. (a) Otu shi shi ngiini kutya Job okwa li ha gandja nehalo ewanawa noha kwathele aantu? (b) Job ontopolwa 31:16-25 ote tu dhimbulukitha omayele gopamanyolo geni ngoka ga ka nyolwa lwanima?
10 Job okwa li ha gandja noha kwathele, ka li i ihole noka li e na okahalu. Okwa ti: ‘Omuselekadhi inandi mu thiga po owala. Inandi etha oothigwa dhi ye nondjala, ngame ndi na iikulya. Uuna nda mono omuntu e na onkayi nenge omukwanaluhepo kee na ekumbyatha. Ngele ando ondi na oohapu nothigwa e tandi popi iifundja mompangu, nena iikaha yandje nayi teke, niipepeti yandje yi dhomoke.’ Ando Job ina kaleka po uudhiginini we, ando okwa lombwelele oshingoli kutya ongoye “egameno lyandje.”—Job 31:16-25.
11 Oohapu ndhoka dhopakatewo otadhi tu dhimbulukitha oohapu ndhika dhomulongwa Jakob tadhi ti: “Elongelokalunga lya yela nolya yogoka koshipala shaKalunga Tate olyo okusila oshimpwiyu oothigwa naaselekadhi muudhigu wawo nokwiikotokela waa nyatekwe kuuyuni.” (Jak. 1:27) Otashi vulika wo tu dhimbulukwe elondodho lyaJesus ndyoka tali ti: “Angaleni ne mu ikotokele kombinga yuuhalu weliko, oshoka okukalamwenyo kwomuntu kombanda yevi itaku lelepekwa kowindji weliko lye.” Opo ihe Jesus okwa li a gandja ethaneko kombinga yokahalu komulumentu omuyamba ngoka a si “kee shi omuyamba koshipala shaKalunga.” (Luk. 12:15-21) Opo tu kale aakakateli yuudhiginini, katu na okwiigandja kuuhalu wuulunde. Okukala nokahalu oku li okulongela iikalunga, molwaashoka omuntu ngoka e ka na ohake mu ningitha a kale a hala okupewa eitulomo ndyoka li na okupewa Jehova, nokungawo, oka ninga oshikalunga she. (Kol. 3:5) Uudhiginini nokahalu ihawu longele kumwe.
Natu kale aadhiginini kelongelokalunga lyashili
12, 13. Oshiholelwa shini Job a tula po mokuhenuka okulongela iikalunga?
12 Aakakateli yuudhiginini ihaye etha po elongelokalunga lya yogoka. Job naye ka li e shi ningi, molwaashoka okwa popi a ti: “Inandi galikana etango, sho tali eta oonte dhuuyelele, nenge omwedhi mokutoka kwago. [Omutima gwandje ando gwa hongololwa meholamo neke lyandje lye li thipitha omilungu, KB]. Oshoka okulonga ngeyi okwo oondjo tadhi pangulitha omuntu. Shika ando otashi holola kutya inandi inekela Kalunga.”—Job 31:26-28.
13 Job ka li a galikana iinima kaayi na omwenyo. Ando omutima gwe ogwa li gwa hongololwa meholamo komaminikilo gokegulu, ngaashi omwedhi e ta ‘thipitha eke lye omilungu’ nokumolola omaminikilo gokegulu momukalo gwoku ga simaneka, ando otashi vulika kungawo a longela iikalunga nokwi idhimbika Kalunga. (Deut. 4:15, 19) Opo tu vule okukakatela uudhiginini wetu kuKalunga, otu na okuhenuka omukalo kehe gwelongelo lyiikalunga.—Lesha 1 Johannes 5:21.
Inatu kala aaniihelele
14. Omolwashike tatu vulu okupopya kutya Job ka li e na onyanya?
14 Job ka li omuhahu nenge e na onyanya. Okwa li e shi shi kutya uukwatya mboka otashi vulika wu ulike kutya ka li omukakateli gwuudhiginini, omolwaashoka a ti: “Inandi nyanyukilwa oshiponga shaatondi yandje, noinandi shambukilwa uudhigu we ya adha. Inandi popya oohapu tadhi ya halele ethingo nenge eso.”—Job 31:29, 30.
15. Omolwashike sha puka okunyanyukwa ngele ngoka e tu tonde a adhika kuupyakadhi?
15 Omuyuuki Job ka li ha kala a nyanyukwa ngele omutondi gwe a adhika kuupyakadhi. Eyeletumbulo ndyoka lya ka nyolwa konima yethimbo olya londodha lya ti: “Ino nyanyukwa, omutondi gwoye ngele ta gwile po; nongele ta tenguka, inashi ligolitha omutima gwoye, opo OMUWA kee shi mone, nopamwe otashi kala shi ipa momeho ge, nondjahi ye yi ze ko kuye.” (Omayel. 24:17, 18) Molwaashoka Jehova oha konakona omitima, oha kala e shi wete uuna tatu nyanyukilwa meholamo uupyakadhi wayalwe noiha nyanyukilwa iikala mbyoka. (Omayel. 17:5) Kalunga ote ku ungaunga natse shi ikolelela kwaashoka a mona mutse, molwaashoka ota ti: “Egeelo olyandje; otandi ka futa.”—Deut. 32:35.
16. Nokuli nando katu shi aayamba, ongiini tatu vulu okuyakula aayenda?
16 Job okwa li ha yakula aayenda. (Job 31:31, 32) Nonando katu shi aayamba, otatu vulu ‘okuyakula oondjendi momagumbo getu.’ (Rom. 12:13) Otatu vulu okutopola nayalwe okashona hoka tu na mokudhimbulukwa kutya “okulya ekaka lyomboga ko ku na ohole oku vule okulya ontselela yondumetana yo ondoka ko ku na uutondwe.” (Omayel. 15:17) Okulya pamwe naakakateli yuudhiginini ooyakwetu tu na ohole otaku ka ninga nokuli okulya okashona hoka tu na ku kale taku nyanyudha notaku tungu.
17. Omolwashike kaatu na okuholeka omayono ga kwata miiti?
17 Osha yela kutya osha li tashi tungu pambepo okukala omuyenda gwaJob, molwaashoka ka li omufudhime. Ka li a fa aalumentu kaaye shi aatilikalunga mboka ya li yi iyakele megongalo methelemumvo lyotango noya li “haa popi oohapu dhuuntsa nohaa fundjaleke aantu, opo ye ya likole.” (Jud. 3, 4, 16) Ka li wo a ‘holeke oondjo dhe,’ ando a tila okudhinwa ngele yalwe oye shi mono. Okwa li e na ehalo lyokukonakonwa kuKalunga ngoka a li e na okuhempulula omayono ge kuye. (Job 31:33-37) Ngele otwa yono sha kwata miiti, inatu kambadhala tu holeke omayono ga tya ngawo opo tu igamene. Ongiini tatu vulu okuulika kutya otatu kambambadhala okukakatela uudhiginini wetu? Omokuzimina omayono getu, mokwiiyela ombedhi, mokukonga ekwatho lyopambepo nomokuninga ashihe shoka tatu vulu, tu ninge omalunduluko.—Omayel. 28:13; Jak. 5:13-15.
Job okwa li a kakatele uudhiginini we sho a li ta makelwa
18, 19. (a) Omolwashike taku vulu okutiwa kutya Job ka li nando a longitha nayi aantu? (b) Job okwa li e na ehalo lyokuninga shike ando okwa monikile ondjo?
18 Job okwa li omunashili noku hole uuyuuki. Osho molwaashono a li a vulu okupopya ta ti: “Ngele ando onda longele owala epya lyandje inaandi li futila, ando onda lile iipalutha mbyo ya zi mo, ngame tandi etha aalongi yalyo ya se ondjala, nena ando peha lyokumena iilya niishokelya, nali mene oondjoho nomano.” (Job 31:38-40) Job ka li nando a kutha po omapya gayalwe, noka li ha longitha nayi aaniilonga ye. Ngaashi ye, natse otwa pumbwa okukakatela uudhiginini kuJehova miinima iinene niishona.
19 Job okwa li a lombwele ookuume ke yatatu nosho wo omugundjuka Elihu shi na ko nasha nokukalamwenyo kwe. Job ngoka a li e na einekelo kutya ke na ondjo okwa li ta hiya kehe gumwe ngoka ta vulu oku mu pa uusama shi na ko nasha nonkalamwenyo ye opo e mu pangule, konima sho a gandja ‘eipopilo lye.’ Ando Job okwa monikile ondjo, ando okwa kala e na ehalo lyokugeelwa. Onkee ano, okwa gandja oshipotha she kuKalunga e ta tegelele e mu pangule. Ano “oohapu dhaJob odha hulile mpaka.”—Job 31:35, 40.
Oto vulu okukakatela uudhiginini woye
20, 21. (a) Omolwashike Job a li a vulu okukakatela uudhiginini we? (b) Ongiini tatu vulu okukokeka ohole yetu yokuhola Kalunga?
20 Job okwa li a kakatele uudhiginini we molwaashoka okwa li e hole Jehova, Jehova naye okwa li e mu hole nokwa li he mu kwathele. Job okwa ti: “[Jehova] owa pe ndje omwenyo nowa li u hole ndje [“nohole yuudhiginini,” NW] e to sile ndje oshimpwiyu.” (Job 10:12, yelekanitha nenyolo lyopevi mo NW.) Kakele kaashono, Job okwa li u ulukile yalwe ohole, e shi kutya ngoka ituu ulukile aantu ooyakwawo ohole yuudhiginini, ke na etilosimaneko lyokutila Omunankondoadhihe. (Job 6:14) Aakakateli yuudhiginini oye hole Kalunga nosho wo aantu ooyakwawo.—Mat. 22:37-40.
21 Otatu vulu okukokeka ohole yokuhola Kalunga mokulesha Oohapu dhe esiku kehe nokutedhatedha kwaashoka tadhi holola kombinga ye. Otatu vulu okutanga Jehova noku mu pandula megalikano tali zi komutima omolwuuwanawa mboka e tu ningila. (Fil. 4:6, 7) Otatu vulu okwiimbila Jehova nokumona uuwanawa mokweendathana noshigwana she pandjigilile. (Heb. 10:23-25) Opo nduno ohole yetu yokuhola Kalunga otayi ka koka sho tatu kutha ombinga muukalele naasho tatu ‘hokolola esiku kehe kutya ohe tu hupitha.’ (Eps. 96:1-3) Momikalo dha tya ngawo, otatu vulu okukakatela uudhiginini ngaashi omupisalomi a li e shi ningi ngoka i imbi a ti: “Osho opalela ndje okukala popepi naKalunga. OMUWA Omupangeliawike onde mu ningi egameno lyandje.”—Eps. 73:28.
22, 23. Tu li aadhiginini yuunamapangelo waJehova, ongiini omaipyakidhilo getu taga yelekwa naangoka gaakakateli yuudhiginini yonale?
22 Omathelemimvo ga piti, Jehova okwa li a pe aakakateli yuudhiginini iinakugwanithwa oyindji ya yoolokathana. Noowa okwa li a tungu onguluwato nokwa li “omuuvithi guuyuuki.” (2 Pet. 2:5) Josua okwa li a wilike Aaisraeli okuya mEvi lyEuveneko, ihe okwa li owala e shi pondola molwaashoka a li a lesha ‘embo ndika lyompango omutenya nuusiku’ nokwa li a katuka metsokumwe nayo. (Jos. 1:7, 8) Aakriste yomethelemumvo lyotango oya li ya ningi aantu aalongwa noya li haya gongala pandjigilile okukonakona omanyolo.—Mat. 28:19, 20.
23 Ohatu kala aadhiginini kuunamapangelo waJehova nokukakatela uudhiginini wetu mokuuvitha uuyuuki, mokuninga aantu aalongwa, mokutula miilonga omayele gopamanyolo nomokugongala pamwe nooitaali ooyakwetu piigongi iishona niinene. Omaipyakidhilo ngoka otage tu kwathele tu kale aalaadhi, twa kola pambepo nokupondola mokulonga ehalo lyaKalunga. Shika kashi shi unene oshidhigu kutse molwaashoka otatu kwathelwa kuTate yetu gwomegulu nOmwana. (Deut. 30:11-14; 1 Aak. 8:57) Kakele kaashono, otu na ekwatho ‘lyooitaali ooyakwetu’ mboka taye ende wo muudhiginini notaya simaneke Jehova e li Omuwa Omunamapangeloagehe gwawo.—1 Pet. 2:17.
Oto yamukula ngiini?
• Otu na okutala ko ngiini omithikampango dhaJehova dhuuyogoki?
• Uukwatya wuni waJob wuhokitha unene kungoye?
• Ngaashi shu ulikwa muJob 31:29-37, Job okwa li i ihumbata ngiini?
• Omolwashike tatu vulu okukakatela uudhiginini wetu kuKalunga?