Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
© 2023 Watch Tower Bible and Tract Society of Pennsylvania
4-10 MAALITSA
OMALIKO OKUZA MOOHAPU DHAKALUNGA | EPISALOMI 16–17
“Omuwa gwandje; iinima ayihe iiwanawa mbyoka ndi na, ohandi yi pewa kungoye”
Aagundjuka, otamu vulu okukala mwa nyanyukwa monkalamwenyo
MONA OOKUUME KASHILI
11 Lesha Episalomi 16:3. David okwa li e shi okukonga ookuume kashili. Okwa li a “hokwa unene” okukala naamboka ye hole Jehova. Ookuume mboka oya popiwa kutya aantu “mboka haa inekele Omuwa,” sha yela kutya oya li ya yogoka pamikalo nohaya vulika kuJehova. Omupisalomi gumwe naye osho a li e uvite ngaaka kombinga yokuhogolola ookuume. Okwa nyola a ti: “Ngame onda ningi kuume kaamboka haye ku simaneke, nokaayehe mboka haa vulika kiipango yoye.” (Eps. 119:63) Ngaashi twe shi kundathana moshitopolwa sha tetekele, nangoye oto vulu okumona ookuume oyendji ye li nawa, mboka haya tila Jehova nohaya vulika kuye. Ookuume mboka inaya pumbwa okukala yepipi limwe.
‘Tala keopalo lyOmuwa’
David okwi imbi a ti: ‘OMUWA, ongoye awike eliko lyandje noho pe ndje ashihe shoka nde shi pumbwa. Omagano goye oga kumitha ndje ngiini.’ (Eps. 16:5, 6) David okwa li e na olupandu ‘omolweliko’ lye, ano e na ekwatathano naJehova nosho wo uuthembahenda woku mu longela. Ngaashi David, natse otashi vulika tu mone omaupyakadhi, ihe otu na omayambeko ogendjigendji gopambepo. Onkee ano, natu tsikileni okukala hatu nyanyukilwa elongelokalunga lyashili nokukala aluhe hatu ‘tedhatedha’ kotempeli yaJehova yopambepo.
Kaleka aluhe Jehova momadhiladhilo
2 Atuheni otatu vulu okwiilonga oshindji kiimoniwa yaantu mboka ya tseyika nawa ya popiwa mOmbiimbeli, ngaashi Abraham, Sara, Moses, Rut, David, Ester, omuyapostoli Paulus nosho wo yalwe. Nonando ongawo, otatu vulu wo okumona uuwanawa momahokololo goohandimwe mboka inaaya tseyika nawa. Okukala hatu tedhatedha kombinga yomahokololo ngoka ge li mOmbiimbeli, otashi vulu oku tu kwathela tu ninge ngaashi omupisalomi gumwe, ngoka a ti: “Aluhe ondu uvite, Omuwa e li ndje popepi; oku li popepi, nokaku na shoka tashi hindi ndje.” (Eps. 16:8) Mbela Oohapu ndhoka odha hala okutya ngiini?
3 Pethimbo lyonale, omukwiita okwa li ha longitha egongamwele noshikaha she shokolulyo, nombinga ye yokolulyo kaya li hayi kala ya gamenwa koshikandekitho shoka ha kala e na moshikaha she shokolumoho. Okwa li ha kala a gamenwa, uuna pu na omukwiita omukwawo a gama kolulyo lwe. Sha faathana, ngele otwa kaleke Jehova momadhiladhilo nokulonga ehalo lye, ote ke tu gamena. Ngashingeyi natu ka tale nkene okukonakona omahokololo gOmbiimbeli taku vulu okukoleka eitaalo lyetu, opo aluhe tu kaleke ‘Omuwa e li popepi natse.’
Omaliko gomOmbiimbeli
it-2-E ep. 714
Omuni
Oshitya shOshihebeli ʼi·shohnʹ (Deut 32:10; Omayel 7:2) uuna tashi longithwa noshitya ʽaʹyin (eho), shoka tashi ti lelalela “omuntu omushona gweho”; sha faathana, oshitya bath (omukadhona) shoka sha longithwa mOontakumandjimbo 2:18, otashi gandja edhiladhilo kutya “omukadhona gweho,” nomautumbulilo agehe ngaka oga ukithwa komuni. Omautumbulilo agehe gaali oga longithwa pamwe noga tsuwa omuthindo mEpisalomi 17:8 (ʼi·shohnʹ bath-ʽaʹyin), ngoka taga ti lelalela “omuntu omushona, omukadhona gweho” (‘omuni yeho’). Uuyelele mbuka owa ukitha kuuthano uushona mboka hawu kala wu iwetikile momeho getu nenge gayalwe.
Eho oshinima oshipu noshimbanda. Nokuli ngele mulyo omwa yi nando okafufu nenge ontsi, oho shi uvu nuupu. Oshitopolwa sheho ihaashi monika nuupu (cornea) shoka sha siikila omuni nenge tu tye ondanda yeho, nashi kale hashi gamenwa nokusilwa oshimpwiyu, oshoka ngele osha ehamekwa nenge sha kala shi na iikogo omolwomukithi gwontumba, ohashi ningitha eho li kale kaa li wete ko nawa nenge nokuli li tsike. Ombiimbeli oya longitha uutumbulilo ‘ondanda yeho,’ oshinima shono shi na lela okusilwa oshimpwiyu nokukwatwa nawa. Ompango yaKalunga oyi na okudhigininwa. (Omayel 7:2) Shi na ko nasha nankene Kalunga a li a sile oshimpwiyu oshigwana shaIsraeli, Deuteronomium 32:10 omwa popiwa kutya okwa li e shi tonatele “ongota gamene ondanda yeho lye mwene.” David okwa li a galikana a gamenwe nokusilwa oshimpwiyu kuKalunga “ongomuni yeho.” (Eps 17:8) Okwa li a hala Jehova a katuke meendelelo e mu gamene, uuna a ponokelwa kaatondi ye. (Yelekanitha Sak 2:8; moka oshitya shOshihebeli ba·vathʹ ʽaʹyin, ‘eho,” sha longithwa.)—Tala EHO.
11-17 MAALITSA
OMALIKO OKUZA MOOHAPU DHAKALUNGA | EPISALOMI 18
“Omuwa oye omugameni gwandje”
w09-E 5/1 ep. 14, okat. 4-5
Enyanyu ndyoka Omuwa te li gandja, nali mu kumike
Ombiimbeli oya faathanitha wo Jehova niinima mbyoka kaayi na omwenyo. Okwa popiwa kutya oku li “emanya lyaIsrael” nosho wo “epopilongulu.” (2 Samuel 23:3, OB-1954; Episalomi 18:2; Deuteronomium 32:4) Mbela oshitsa oshini mefaathanitho ndyoka? Ngaashi owala emanya enene hali kala lya kolelela mpoka li li noihali vulu okwiinyengithwa, Jehova Kalunga naye ota vulu okukala Onzo yegameno lyoye.
Membo lyOmapisalomi omwa popiwa omautumbulilo ngoka taga ulike komaukwatya gaJehova gi li nogi ili. Pashiholelwa, Episalomi 84:11 olya popya Jehova e li “uuyelele negameno,” oshoka oye Onzo yuuyelele, yomwenyo, yoonkondo nosho wo yegameno. Shimwe ishewe, Episalomi 121:5 oya ti kutya Jehova “oye eshigo negameno lyoye.” Onkee ano, ngaashi owala omuzile hagu ku gamene komutenya, mboka haya longele Jehova naye ota vulu oku ya gamena komaudhigu ngoka ga fa omutenya gwopathaneko, note ya pe omuzile gu ya gamene kohi ‘yoshikaha’ she nenge kohi ‘yomawawa ge.’—Jesaja 51:16; Episalomi 17:8; 36:7.
it-2-E ep. 1161, okat. 7
Ewi
Kalunga oha uvu ewi lyaapiya ye. Mboka haya longele Kalunga mombepo nomoshili, otaya vulu oku mu ithana ye na einekelo kutya ote ya uvu, kashi na nduno mbudhi kutya otaye shi ningi melaka lini. Shimwe ishewe, nonando itaya longitha ewi lyo lyene, otaya vulu okugalikana Kalunga momutima, na Kalunga ngoka e shi shoka shi li momitima dhaantu, ote ke ya “uva” nenge ota ka gandja eitulomo komagalikano gawo. (Eps 66:19; 86:6; 116:1; 1Sam 1:13; Neh 2:4) Kalunga oha uvu mboka ye li muudhigu, uuna taye mu lilile ekwatho. Oha uvu wo omawi noku shi omainyengotompelo gaamboka haye mu kondjitha naamboka haya ningile aapiya ye iinima iiwinayi.—Gen 21:17; Eps 55:18, 19; 69:33; 94:9-11; Jer 23:25.
Ungaunga niimpwiyu nomupondo
2. Dhiladhila konakuziwa. Ngele owa tala kwaashono sha ningwa monkalamwenyo yoye monakuziwa, mbela uudhigu wuni wa li wu na, ihe owa li wa vulu oku wu idhidhimikila molwashoka Jehova e ku kwathele? Uuna twa dhiladhila kunkene Jehova e tu kwathela nankene a kwathela aapiya ye monakuziwa, ohatu kala tu na ombili nohatu kala lela twe mu inekela. (Eps. 18:17-19) Omukuluntugongalo gwedhina Josua okwa ti: “Ondi na omusholondondo gwomagalikano gandje ngoka ga yamukulwa. Shino ohashi kwathele ndje ndi dhimbulukwe iikando mbyoka nda pula Jehova a ningile ndje oshinima shokondandalunde, e ta pe ndje naanaa shoka nda li nda pumbwa.” Uuna twa dhiladhila kwaashoka Jehova e tu ningila, ohashi tu ningitha lela tu kale tu na oonkondo dhokukondjitha omadhiladhilo ngoka hatu kala tu na, uuna tu na iimpwiyu.
Omaliko gomOmbiimbeli
it-1-E ep. 432, okat. 2
Omukerubi
Aakerubi mbaka kaya li iinima ya fa omavukule mbyoka ya li hayi galikanwa kiigwana iipagani mbyoka ya li ko pethimbo mpoka, ngaashi yamwe haya ti. Shi ikolelela kuumbangi wi ili nowi ili wopamuthigululwakalo gwonale gwOshijuda (Ombiimbeli inayi popya sha kombinga yoshinima shika), aakerubi mbaka oya li ye li molupe lwopantu. Aakerubi mbaka oya li ya hongwa nawa, taya thaneke keadhimo lyuuwanawa waayengeli noya li ya ningwa pandunge ndjoka Moses a li pewa kuJehova. (Eks 25:9) Omuyapostoli Paulus okwe ya popya ye li aakerubi ye na eadhimo, taa holola okukala po kwaKalunga. (Heb 9:5) Aakerubi oya popiwa ye li koshipala shaJehova taku ti: “Oko tuu nkoka tandi ku tsakaneke, poshisiikilo pokati kaakerubi tandi ku pe oompango dhandje adhihe.” (Eks 25:22; Num 7:89) Jehova okwa popiwa a “kuutumba mokati kaakerubi.” (1Sam 4:4; 2Sam 6:2; 2Aak 19:15; 1Ondjal 13:6; Eps 80:1; 99:1; Jes 37:16) Pathaneko, aakerubi oya li haya longo ye li “oshiyelekela shetemba lyomagulu” lyaJehova ndyoka a londa (1Ondjal 28:18, OB-1954), nomawawa gaakerubi oshilonga shago osha li oku li gamena noku li endeleleka. Onkee ano, meimbilotewo lye, David okwa popi kombinga yondapo ndjoka Jehova a li e ya nayo kuye oku mu kwathela, a fa ngoka a “tuka nondapo onene a kayila omukerubi,” nokuli nando “okwe ende komawawa gombepo.”—2Sam 22:11; Eps 18:10.
18-24 MAALITSA
OMALIKO OKUZA MOOHAPU DHAKALUNGA | EPISALOMI 19–21
“Eyalelo otali holola esimano lyaKalunga”
Ayehe naya hempulule esimano lyaJehova
DAVID omwana gwaIsai, okwa koko e li omusita omugundjuka moshitopolwa shaBetlehem. Olundji uusiku okwa li ha tala kegulu lya udha oonyothi pethimbo ta tonatele oonzi dhahe. Osha yela okutya okwa li a dhimbulukwa omauliko ngoka ga tsa, sho a nwethwa mo kombepo ondjapuki yaKalunga a tote noku imbe eimbilo li na oohapu oombwanawa dhEpisalomi 19, ndhoka tadhi ti: “Eyalelo otali holola esimano lyaKalunga; Ewangandjo otali eta puuyelele iilonga ye! Onkene tuu omahambelelo taga lundu kombanda yevi alihe, nomasimaneko taga uvika sigo okooha dhuuyuni.”—Episalomi 19:1, 4.
2 Nopwaa na okupopya, nopwaa na oohapu nosho wo nopwaa na ewi, egulu ekumithi ndyoka lya shitwa kuJehova, ohali holola eadhimo lye omutenya nuusiku. Eshito ihali mana okuhempulula eadhimo lyaKalunga, notashi ningitha omuntu i ifupipike, uuna ta tedhatedha kuumbangi mboka tawu gandjwa nopwaa na okupopya, mboka wu li “kombanda yevi alihe,” opo aakalimo yako ayehe ye wu mone. Nonando ongawo, uumbangi mboka weshito hawu gandjwa nopwaa na okupopya, inawu gwana. Aantu mboka aadhiginini otaya ladhipikwa yi imbwange mumwe neshito, mokupopya nomawi taga uvika ye li oonzapo. Omupisalomi gumwe inaa tumbulwa kedhina, okwa popi ta lombwele aalongelikalunga aadhiginini noohapu ndhika dha nwethwa mo, tadhi ti: “Tangeni eadhimo noonkondo dhe. Peni edhina lyOmuwa esimano.” (Episalomi 96:7, 8) Mboka ye na ekwatathano lyopothingo naJehova, oya nyanyukwa okuvulika kekumagidho ndyoka. Mbela oshike sha kwatelwa mokugandja esimano kuKalunga?
Eshito otali hempulula eadhimo lyaKalunga
8 David okwa tsikila ko nokuhokolola oshikumithalonga ishewe shimwe sheshito lyaJehova, a ti: “Etango Kalunga okwe li dhikile egumbo mewangandjo; ongula kehe otali piti ko lya fa ombushiki a nyanyukwa, ngaashi enyakwa tali ihilile kuudhano. Otali zi koluha lumwe lweyalelo e tali taakanene kolukwawo. Kaku na sha tashi vulu okuholama uupyu walyo.”—Episalomi 19:4-6.
9 Etango oli li onyothi yuunene wopokati okuyelekanitha noonyothi oonkwawo. Nonando ongawo, oli li onyothi onkumithi nohali monikitha oopulanete ndhoka tadhi li dhingoloka dha fa oonshona noonkondo. Embo limwe lyuuyelele olya ti kutya etango oli na ondjundo yi thike pondjundo “yevi ya indjipalekwa lwiikando 330 000”—ondjundo yi thike lwopwaandjoka yoopulanete adhihe kumwe, ndhoka dhi li momudhingoloko gwalyo. Oonkondo dhetango dhokunana, ohadhi pitike evi li kale mondjila yalyo yokudhingoloka etango, kokule noshinano shookilometa omamiliyona 150 nopwaa na okuza mo li hedhe kokule nenge li hililwe popepi. Oonkondo owala oonshona lela dhetango hadhi thiki kopulanete yetu, nohadhi kala dha gwana oku tu kaleka tu na omwenyo.
10 Omupisalomi okwa popi shi na ko nasha netango noohapu dhopathaneko, te li popi li li ngaashi “enyakwa” ndyoka hali matuka omutenya aguhe okuza kombinga yimwe yooha dhegulu sigo okonkwawo, ihe kongulohi ohali fudha po ‘megumbo.’ Sho etango tali ningine kooha dhegulu, paku li talela kevi, olya fa lya ya ‘megumbo’ lya ka kotha. Ongula, ohali piti mo, tali adhima “lya fa ombushiki a nyanyukwa.” David ngoka a li omusita, okwa li e shi nkene kongulohi haku kala kwa talala unene. (Genesis 31:40) Okwa li a dhimbulukwa nkene oonte dhetango hadhi mu pupyaleke nziya nosho wo evi momudhingoloko gwe. Osha yela kutya kalya li lya vulwa, sho lya enda “molweendo” lwalyo okuza kuuzilo lya uka kuuninginino, ihe olya li ngaashi “enyakwa” li ilongekidhila olweendo ndwoka.
Eshito otali holola oshinge shaKalunga
“Taleni” nawa keshito lyaJehova: Jesus okwe tu ladhipika tu ‘tale koondhila dhokegulu’ “nokundhindhilika oongala dhokelundu.” (Mat. 6:26, 28) Okuninga ngaaka otaku vulu okukoleka eitaalo lyetu, oku tu ningitha tu kale tu na einekelo mOmushiti gwetu Jehova noku tu kwathela wo tu kale tu na olupandu omoluunongo we, omolwoonkondo dhe dhokuhupitha aantu ye nomolwohole ye. Pehala lyokupiyaganekwa unene kiinima yomuuyuni mbuka, kutha ethimbo nokuninga oonkambadhala opo wu tale keshito lyaJehova nokukonakona shoka tali tu hololele kombinga yaKalunga ketu.—Eps. 19:1.
Omaliko gomOmbiimbeli
Elalakano lyaJehova otali ka gwanithwa!
5 Omolwohole ye, Jehova okwa tulila po ongamba kehe shimwe meshito lye. Jehova okwa tula po oompango dhopaunshitwe nodhopamikalo, opo a shilipaleke kutya iinima ayihe meshito otayi longele kumwe. (Eps. 19:7-9) Onkee ano, iinima ayihe mewangandjo oyi li pomahala gayo nohayi longo melandulathano ndyoka Jehova e yi tula. Jehova okwa tula po elandulathano nkene eshito lye li na okulongela kumwe. Ompango yoonkondo dhevi ohayi kaleke onkalombepo popepi nevi nosho wo nefuta. Ohayi kwathele wo iinima mbyoka yi li kombanda yevi yi kale yi na omwenyo. Iishitwa ayihe, mwa kwatelwa aantu ohayi inyenge nokulonga meni lyoongamba ndhika. Osha yela kutya elandulathano ndyoka li li meshito otali holola kutya Kalunga oku nine evi naantu elalakano lyasha. Mbela otatu vulu ngaa okupopya naantu muukalele kombinga yelandulathano lyomeshito ndyoka ekumithi?—Eh. 4:11.
25-31 MAALITSA
OMALIKO OKUZA MOOHAPU DHAKALUNGA | EPISALOMI 22
Ombiimbeli oya hunganeka iinima yontumba kombinga yeso lyaJesus
Oya li ya mono Mesiasa
16 Mesiasa okwa li ta ka kala a fa e ekelwahi kuKalunga. (Lesha Episalomi 22:1.) Markus okwa nyola a ti: “Potundi oyo tuu ndjoka ontitatu Jesus okwi igidha mokule a ti: ‘Eli, Eli, lama sabaktani?’ Otashi ti: Kalunga kandje, Kalunga kandje, omolwashike we ekelehi ndje?” (Mark. 15:34) Jesus okwa kala omudhiginini kuHe gwomegulu. Kalunga okwa li e ethele Jesus miikaha yaatondi ye, sho e etha ye mu dhipage opo Jesus u ulike kutya ye omudhiginini kuKalunga. Sho i igidha mokule, okwa gwanitha po shoka sha hunganekwa mEpisalomi 22:1.
Oya li ya mono Mesiasa
13 David okwa li a hunganeke kutya Mesiasa okwa li ta ka shekwa. (Lesha Episalomi 22:7, 8.) Jesus okwa li a shekwa omanga a li ta hepekwa komuti gwomahepeko. Mateus okwa nyola a ti: “Mboka ya piti po, oya sheke Jesus nokupukapuka komitse ya ti: ‘Ongoye tuu nguka to kumuna po otempeli e to yi tungulula omasiku gatatu? Ihupitha ano, ngele ongoye Omuna gwaKalunga, u ze ko [komuti gwomahepeko, NW]!’ ” Aayambi aakuluntu, aalongimpango naakuluntu oye mu sheke wo ya ti: “Okwa li ha hupitha aantu yalwe, ihe ngashingeyi okwa nyengwa okwiihupitha. Ano ngele oye omukwaniilwa gwAaisraeli, na ze ngashingeyi [komuti gwomahepeko, NW], otse notatu mu itaale. Oye i inekela Kalunga, Kalunga ne mu hupithe ano ngashingeyi, ngele okwe mu hokwa. Oshoka okwa tile, kutya oye Omuna gwaKalunga.” (Mat. 27:39-43) Ihe Jesus okwa li i idhidhimikile iinima ayihe mbyoka. Ine tu tulila po tuu oshiholelwa oshiwanawa!
Oya li ya mono Mesiasa
14 Oonguwo dhaMesiasa odha li dhi na okuumbilwa oshihogololitho. Omupisalomi okwa nyola a ti: “Omuzalo gwandje otaye gu umbile oshihogololitho noonguwo dhandje otaye dhi itopolele.” (Eps. 22:18) Shoka osha li sha ningwa “sho [aakwiita Aaroma] ye mu alele [komuti gwomahepeko, NW], noya topolelathana oonguwo dhe pamukalo gwokuumba oshihogololitho.”—Mat. 27:35; lesha Johannes 19:23, 24.
Omaliko gomOmbiimbeli
Owu li ngaa oshiholelwa oshiwanawa kuyalwe ngele tashi ya pokupopya?
12 Atuheni otatu vulu okuningitha okugongala kwetu ku ende nawa, ngele ohatu imbeni atuheni nokugandja omatyokosha twe ga longekidha nawa. (Eps. 22:22) Yamwe ohaye shi mono oshidhigu okwiimba nenge okugandja omatyokosha montaneho. Mbela nangoye osho wu li? Ngele osho, opu na sha shilwe tashi vulu oku ku kwathela wu sinde uumbanda mboka. Ilonga kombinga yaashoka sha kwathela yalwe kaaya kale we ya tila okwiimba nenge okugandja omatyokosha pokugongala.
1-7 APILILI
OMALIKO OKUZA MOOHAPU DHAKALUNGA | EPISALOMI 23–25
“Omuwa oye omusita gwandje”
“Omuwa oye omusita gwandje”
10 Jehova ohe tu wilike ngiini kunena? Omukalo gumwe moka he shi ningi, okupitila moshiholelwa. Oohapu dhe otadhi tu ladhipike tu ‘holele Kalunga.’ (Aaefeso 5:1) Montumwafo moka mwa za oohapu ndhoka, omwa tumbulwa ohenda, edhiminathanopo nosho wo ohole. (Aaefeso 4:32; 5:2) Kungawo, Jehova okwa tula po oshiholelwa sha dhenga mbanda mokuulika omaukwatya ngoka omahokithi. Mbela ote tu pula oshindji unene, sho ta ti kutya natu mu holele? Hasho nando. Omayele ngoka ga nwethwa mo, oge li shili euliko ekumithi kutya okwe tu inekela. Ngiini mbela? Otwa shitwa oshifetha she, shoka tashi ti kutya otu na uukwatya wopamikalo nosho wo ompumbwe yopambepo. (Genesis 1:26) Onkee ano, Jehova oku shi shi kutya nonando inatu gwanenena, ohatu vulu okukokeka omaukwatya ngoka ha ulike. Dhiladhila owala—Kalunga ketu omunahole oku na einekelo kutya otatu vulu okukala twe mu fa. Ngele otwa landula oshiholelwa she, ote ke tu fala ‘mehala lyevululuko’ ewanawa lyopathaneko. Nonando otu li muuyuni mbuka welongithonkondo, otatu ka kala twaa na “nando ombudhi yasha,” sha hala okutya tu na ombili ndjoka hayi etithwa kokutseya kutya otwa hokiwa kuKalunga.—Episalomi 4:8; 29:11.
w05 11/1 ep. 24-25, okat. 13-15
“Omuwa oye omusita gwandje”
13 David okwa gandja etompelo etiyali kutya omolwashike a li e na omukumo: Jehova oha gamene oonzi dhe. Otatu lesha taku ti: “Nonando ndi na okweenda mesilu lyomilema thokothoko, itandi tila sha, oshoka Omuwa, ou li pungame. Ondhimbo yoye nolwoondje lwoye ohayi gamene ndje.” (Episalomi 23:4) David okwa popi naJehova sha ukilila a longitha oshitya “Omuwa.” Shoka itashi kumitha, oshoka David ota popi nkene Kalunga e mu kwathele idhidhimikile omaudhigu. David okwa li momasilu gomilema thokothoko—ethimbo ndyoka omwenyo gwe gwa li moshiponga. Nonando ongawo, ka li a etha uumbanda wu mu pangele, oshoka okwa li e shi kutya Kalunga okwi ilongekidha okulongitha “ondhimbo” ye “nolwoondje” lwe e mu gamene. Okukala e shi kutya Jehova okwa li i ilongekidha oku mu gamena, osha li sha hekeleke David noshe mu hedhitha popepi naye.
14 Jehova oha gamene ngiini oonzi dhe kunena? Ombiimbeli otayi tu shilipaleke kutya aapataneki ayehe kutya nduno oompwidhuli nenge aantu, kaye na siku ya ka pondole okuhanagula po oonzi dhe kombanda yevi. Jehova ke na siku e ke shi pitike. (Jesaja 54:17; 2 Petrus 2:9) Shoka itashi ti kutya Omusita gwetu ote ke tu gamena kiiponga ayihe. Ohatu adhika komayeleko ngoka haga adha aantu ayehe nohatu tsakaneke omapataneko ngoka haga adha Aakriste yashili ayehe. (2 Timoteus 3:12; Jakob 1:2) Opu na omathimbo gamwe ngoka tashi vulika tu ende “mesilu lyomilema thokothoko,” oku shi popya pathaneko. Pashiholelwa, otashi vulika tu iyadhe monkalo tayi pula omwenyo nenge eso, omolwomahepeko nenge uuwehame wontumba wa kwata miiti. Shimwe ishewe, otashi vulika omuholike gwetu a ye monkalo ya tya ngaaka nenge a se nokuli. Momathimbo ngoka taga monika ga fa omadhigu, Omusita gwetu ota ka kala pamwe natse note ke tu gamena. Ngiini mbela?
15 Jehova ine tu uvanekela kutya ote ke tu gamena pashikumithalonga. Nonando ongawo, otatu vulu okukala nuushili kutya Jehova ote ke tu kwathela tu taaguluke endangalati kehe tatu tsakaneke. Ota vulu oku tu pa uunongo, opo tu ungaunge ‘nomamakelo gi ili nogi ili.’ (Jakob 1:2-5) Omusita iha longitha owala ondhimbo ye nenge olwoondje lwe a tidhe iilikama, ihe ohe yi longitha wo a ukithe oonzi dhe mondjila yu uka. Jehova ota vulu oku tu “ukitha,” tashi vulika okupitila momwiitaali omukwetu, opo tu tule miilonga omayele ngoka gi ikolelela kOmbiimbeli, ngoka taga vulu okweetitha elunduluko enene monkalamwenyo yetu. Kakele kaashono, Jehova ota vulu oku tu pa oonkondo tu idhidhimike. (Aafilippi 4:13) Okupitila mombepo ye ondjapuki, ota vulu oku tu pa “oonkondo dhi vule ndhoka dhopaunshitwe.” (2 Aakorinto 4:7, NW) Ombepo yaKalunga otayi vulu oku tu kwathela tu idhidhimikile eyeleko kehe ndyoka Satana te tu yeleke nalyo. (1 Aakorinto 10:13) Mbela itashi hekeleke tuu okutseya kutya Jehova okwi ilongekidha aluhe oku tu kwathela?
“Omuwa oye omusita gwandje”
17 Etompelo etitatu kutya omolwashike David a li i inekela Omusita gwe, olyo kutya: Jehova oha palutha oonzi dhe nohe dhi pe iikulya oyindji. David okwa nyola a ti: “Ongoye to yalele ndje oshililo montaneho yaatondi yandje; oto taamba ndje ngaashi omuyenda a simana, e to pindi oshitenga shandje shu udhilila.” (Episalomi 23:5) Movelise ndjoka, David ota hokolola Omusita gwe e li omutaambi gwaayenda, ngoka ha gandja nehalo ewanawa iikulya oyindji nokunwa kwa gwana. Omathaneko ngoka gaali, ndyoka lyomusita ha sile oshimpwiyu oonzi dhe naandyoka lyomutaambi gwaayenda ha gandja nehalo ewanawa, otaga tsu kumwe. Odhoshili kutya omusita omwaanawa oku na okukala e shi mpoka pu na uulithilo uuwanawa nomeya gokunwa ga gwana, opo oonzi dhe dhi kale inaadhi “pumbwa sha.”—Episalomi 23:1, 2.
18 Mbela Omusita gwetu naye oku li omutaambi gwaayenda ha gandja nehalo ewanawa? Eeno! Dhiladhila owala kuuwindji, kuuwanawa nosho wo komaludhi gi ili nogi ili giikulya yopambepo, mbyoka hatu tyapula kunena. Okupitila mokangundu komupiya omudhiginini nomunandunge, Jehova ohe tu pe iileshomwa tayi kwatha nosho wo iikundathanwa tayi longo pokugongala nopiigongi iishona niinene—naayihe mbyoka ohayi tu palutha pambepo. (Mateus 24:45-47) Kapu na nando ompumbwe yiikulya yopambepo. “Omumati omwiinekelwa nomunandunge” okwa nyanyangidha Oombiimbeli omamiliyona nosho wo iikwathitho yokukonakona Ombiimbeli, niileshomwa mbyoka ngashingeyi oyi li momalaka 413. Jehova okwa gandja iikulya oyindji mbyoka yopambepo yomaludhi gi ili nogi ili—okuza ‘komahini,’ sha hala okutya omalongo gopetameko gOmbiimbeli, sigo ‘okiikulya ya kola,’ sha hala okutya omalongo gOmbiimbeli gomuule. (Aahebeli 5:11-14) Oshizemo, uuna tatu adhika komaupyakadhi nenge tu na okuninga omatokolo, olundji ohatu mono lela shoka twa pumbwa. Andola katwa li tu na iikulya mbyoka yopambepo, ando otu li peni? Omusita gwetu oku li shili omutaambi gwaayenda ha gandja nehalo ewanawa!—Jesaja 25:6; 65:13.
Omaliko gomOmbiimbeli
Kala wu hole shoka shu uka nomutima gwoye aguhe
JEHOVA ota wilike oshigwana she shi ‘ende nondjila yu uka’ okupitila mOohapu dhe nomombepo ye ondjapuki. (Eps. 23:3) Ihe molwaashoka inatu gwanenena, otu na egamo lyokupuguma mo mondjila ndjoka. Opo tu galukile kokulonga shoka shu uka, otashi pula oonkambadhala. Oshike tashi ke tu kwathela tu pondole? Ngaashi Jesus, otu na okukala tu hole okulonga shoka shu uka.—Lesha Episalomi 45:7.
2 ‘Ondjila yu uka’ oshike? Ondjila oyo oshinima shoka hashi endwa kaaendi yokolupadhi. “Ondjila” yu uka otayi wilikwa komithikampango dhaJehova dhuuyuuki. MOshihebeli nomOshigreka oshitya “uuyuuki” otashi popi kombinga yoshinima shoka “shu uka,” shoka tashi ti okudhiginina omithikampango dhopamikalo. Molwaashoka Jehova oye “ehala lyuuyuuki,” aalongeli ye oya nyanyukwa okukonga ekwatho kuye ya mone ondjila yu uka yopamikalo ndjoka ye na okweenda nayo.—Jer. 50:7, KB.
3 Otatu ka kala owala twa hokiwa kuKalunga ngele otwa ningi oonkambadhala nomutima gwetu aguhe tu tse kumwe nomithikampango dhe dhuuyuuki. (Deut. 32:4) Shoka ohashi tameke nokwiilonga ashihe shoka tatu vulu kombinga ye mOohapu dhe, Ombiimbeli. Shi thike ngaa mpoka tatu ilongo kombinga ye, opo ngaa pu thike tatu hedha popielela naye, nopo wo tapu ka kala pu thike okukala tu hole uuyuuki we. (Jak. 4:8) Otu na wo okutaamba ko ewiliko lyOohapu dhe dha nwethwa mo, uuna tatu ningi omatokolo ga simana monkalamwenyo yetu.
8-14 APILILI
OMALIKO OKUZA MOOHAPU DHAKALUNGA | EPISALOMI 26–28
Nkene David a li a kaleke po uudhiginini we
Enda mondjila yuudhiginini
8 David okwa galikana a ti: ‘Konakona ndje, Omuwa, ngu u makele ndje; yelekela ndje iitiyanathigo nomutima gwandje.’ (Episalomi 26:2, OB-1954) Iitiyanathigo oyi li molutu muule. Pathaneko, iitiyanathigo oyi lile po omadhiladhilo nomaiyuvo gomuule gomuntu. Omutima gwopathaneko ogwo uuntu womeni awuhe—omainyengotompelo ge, omaiyuvo nosho wo oondunge dhe. Sho David a pula Jehova e mu konakone, okwa galikana opo omadhiladhilo nomaiyuvo ge gomuule ga konakonwe nokukonakonununwa.
9 David okwa li a galikana opo iitiyanathigo nomutima gwe yi yelithwe. Jehova ohe tu yelitha ngiini meni? David okwa imba a ti: “Ngame ote hambelele Omuwa, oshoka oye ha wilike ndje, nomuusiku eiyuvo lyandje ohali londodha ndje.” (Episalomi 16:7) Shoka osha hala okutya ngiini? Otashi ti kutya omayele gaKalunga oga guma lela David muule nokwe ga dhiginina, ga pukulula omadhiladhilo nomaiyuvo ge gomuule. Onkee ano, omayele gaKalunga otaga vulu wo oku tu pukulula, ngele ohatu tedhatedha nolupandu kugo okupitila mOohapu dhe, maakalelipo ye nosho wo mehangano lye, noku ga dhiginina muule mutse. Okugalikana aluhe kuJehova e tu yelithe momukalo ngoka, otaku ke tu kwathela tu ende mondjila yuudhiginini.
Enda mondjila yuudhiginini
12 David okwa popi natango oshinima shono she mu nkondopaleke a kale omudhiginini, a ti: “Kandi na uukuume naantu yaa fele; kandi na ko nasha naayiningithi. Ondi tonde uukuume naakolokoshi nohandi gamuka kaadhudhu.” (Episalomi 26:4, 5) David ka li nando ha kuutumba pamwe naakolokoshi. Okwa li e tonde eendathano ewinayi.
13 Ongiini shi na ko nasha natse? Mbela ohatu tindi ngaa okukuutumba pamwe noombudhi okupitila moopolohalama dhoko-TV, muuvidio, mookino, kointaneta nenge momikalo dhilwe dhi ili? Mbela ohatu ikaleke kokule naamboka ye tu li kohi? Yamwe kosikola nenge kiilonga, otashi vulika yi iningithe ya kale ya fa ookuume ketu nelalakano lyoku tu kengelela. Mbela otwa hala ngaa shili okupanga uukuume wopothingo naamboka kaaye li moshili yaKalunga? Nando aashunimonima ohaya popi kutya ohaya longo uuyuuki, otashi vulika haye shi ningi nelalakano lyoku tu ethitha po tu longele Jehova, nonando ihaye shi ulike. Ongiini ngele opu na yamwe megongalo lyopaKriste mboka ye na onkalamwenyo ndjoka yopaali? Nayo ohaya holeke nkene ya tya lela. Jayson, ngoka ngashingeyi e li omuyakuligongalo, okwa li e na ookuume ya tya ngaaka, sho a li omugundjuka. Okwa popi kombinga yawo a ti: “Esiku limwe gumwe gwomuyo okwa lombwele ndje a ti: ‘Kashi na mbudhi kutya otatu ningi shike ngashingeyi, oshoka sho uuyuni uupe tawu ya, otatu ka kala owala twa sa. Itatu ka tseya ngele otwa pitililwa po kusha.’ Okupopya kwa tya ngaaka okwa londodha ndje. Inandi hala oku ka kala nda sa, sho uuyuni uupe tawu ke ya.” Jayson okwa hulitha po pandunge eendathano naantu ya tya ngaaka. Omuyapostoli Paulus okwa londodha a ti: “Inamu pukithwa. ‘We ende nombudhi, nangoye oto ningi ombudhi.’ ” (1 Aakorinto 15:33) Inashi simanenena tuu kutse tu yande ookuume aawinayi!
Enda mondjila yuudhiginini
17 Etsalihangano nosho wo oshiyambelo shalyo, oya li ondingandinga yokulongela Jehova muIsraeli. David okwa li a ulike kutya okwa hokwa ehala ndyoka, sho a galikana a ti: “Omuwa, ondi hole egumbo lyoye, ehala mpo pu na esimano lyoye.”—Episalomi 26:8.
18 Mbela otu hole ngaa okugongala pomahala mpoka hatu ilongo kombinga yaJehova? Oshinyanga kehe shUukwaniilwa pamwe nomalongo gopakalunga ngoka hatu ilongo po pandjigilile, oyi li ondingandinga yelongelokalunga lyashili moshitopolwa. Natango, otu na iigongi yokomumvo yoshitopolwa, yoshikandjo noyesiku li ikalekelwa. ‘Omalongo’ gaJehova ohaga kundathanwa pomakugongala ngoka. Ngele otu ilongo okukala twe “ga hokwa unene,” otatu ka kala twa hala okukala pokugongala notatu ka pulakena neitulomo, uuna tu li po. (Episalomi 119:167) Itashi talaleke tuu okukala nooitaali ooyakwetu, mboka ye na ko nasha nuuwanawa wetu nohaye tu kwathele tu kale nokweenda mondjila yuudhiginini!—Aahebeli 10:24, 25.
Omaliko gomOmbiimbeli
Jehova oha hupitha mboka taya mono iihuna
15 Omupisalomi David okwa imba a ti: “Tate nameme otaa vulu okweetha ndje, ihe Omuwa ota sile ndje oshimpwiyu.” (Episalomi 27:10) Itashi hekeleke tuu okutseya kutya Jehova oku tu hole shi vulithe paavali yetu yopantu! Nonando ohashi ehameke noonkondo ngele omuntu a ekelwahi kaavali ye nenge ta monithwa iihuna, shoka itashi mu imbi a kale e holike kuJehova. (Aaroma 8:38, 39) Dhimbulukwa kutya Kalunga oha hilile kuye aantu mboka e hole. (Johannes 3:16; 6:44) Kutya nduno aantu oya kale taya ungaunga nangoye ngiini, Tate gwoye gwomegulu oku ku hole!
15-21 APILILI
OMALIKO OKUZA MOOHAPU DHAKALUNGA | EPISALOMI 29–31
Egeeloputudho oli li euliko kutya Kalunga oku ku hole
it-1-E ep. 802, okat. 3
oshipala
Uutumbulilo ‘okuholeka oshipala’ owu na omaityo ogendji shi ikolelela konkalo. Uuna Jehova Kalunga ta holeke oshipala she, olundji ohashi ulike kokukala inaa hokwa we omuntu nenge ite mu pe we oonkondo dhe. Shino ohashi kala oshilanduliko shomuntu, ngele ina vulika nenge shongundu yaantu, ngaashi oshigwana shaIsraeli. (Job 34:29; Eps 30:5-8; Jes 54:8; 59:2) Poompito dhimwe, ohashi vulika Jehova a kale ini iholola miilonga, molwaashono a tegelela ethimbo lye lyo opala. (Eps 13:1-3) Sho David a pula a ti kutya “Isiikila, waa tale oondjo dhandje,” okwa li ta indile Kalunga e mu dhimine po nenge e mu kuthile po omayono ge.—Eps 51:9; yelekanitha Eps 10:11.
Etha Jehova e ku nyanyudhe
18 Taamba ko egeeloputudho. Sho Jehova a tumu omuhunganeki Natan a ka yambulule eyono lyaDavid, David ka li i ipopile nenge a tye kutya hoka okapuko owala okashona. Pehala lyaashono, okwa li e shi zimine nziya kutya ina yona owala komusamane gwaBatseba, ihe komeho gaayihe, okwa yona kuJehova. David okwa li a taamba ko egeeloputudho ndyoka a li a pewa kuJehova, na Jehova okwe mu dhimine po. (2 Sam. 12:10-14) Ngele otwa yona eyono lya kwata miiti, otwa pumbwa okupopya naamboka Jehova a langeka po ye tu tonatele. (Jak. 5:14, 15) Otu na wo okuyanda okwiipopila. Ngele owa taamba ko nokutula miilonga nziya epukululo ndyoka wa pewa, itashi ke ku pula ethimbo wu kale ishewe wu na ombili nenyanyu.
Okwiiyela ombedhi shili otaku ti shike?
18 Ngele omuntu okwi iyela shili ombedhi, oku na okukala he ya kokugongala pandjigilile nokutula miilonga omayele gaakuluntugongalo ge na ko nasha nokukala e na ondjigilile yokugalikana nokukonakona Ombiimbeli paumwene. Oku na wo okuyanda oonkalo ndhoka tadhi vulu oku mu ningitha a yone ishewe. Ngele okwa kala ta longo nuudhiginini a kale ishewe e na ekwatathano ewanawa naJehova, ota vulu okukala nuushili kutya Jehova ote ke mu dhimina po nosho wo kutya aakuluntugongalo otaye ke mu galulila megongalo. Odhoshili kutya uuna aakuluntugongalo ya hala okutseya ngele omuntu okwi iyela ombedhi shili, ohaya kala ye shi kutya kehe oshipotha osha yooloka ko koshikwawo, onkene ohaye shi konakona nuukeka nohaya yanda okupangula nonyanya ngoka a yona.
Omaliko gomOmbiimbeli
Omanenedhiladhilo okuza membo lyotango lyOmapisalomi
31:23—Ongiini omuntu ngoka omwiinenepeki ha geelwa kuJehova ngaashi e shi ilongela? Omuntu ngoka hi inenepeke oha pewa ondjambi yegeelo, omanga omuyuuki ha pewa ondjambi ya eleka omapuko ge ngoka kaage shi goshiningilawina, mokupewa egeeloputudho kuJehova. Molwaashono omuntu ngoka hi inenepeke iha etha po oondjila dhe oombwiinayi, oha pewa egeelo lya kwata miiti li li ondjambi yiilonga ye.—Omayeletumbulo 11:31; 1 Petrus 4:18.
22-28 APILILI
OMALIKO OKUZA MOOHAPU DHAKALUNGA | EPISALOMI 32–33
Omolwashike a hempulula eyono lya kwata miiti?
w93 3/1 ep. 18, okat. 7
Ohenda yaJehova otayi tu hupitha kokwaanetegameno
7 Ngele otu na ondjo yomayono ga kwata miiti ge na ko nasha nompango yaKalunga, otashi vulika oshidhigu kutse oku ga hempulula, nokuli nokuJehova. Oshike tashi vulu okuningwa po monkalo ndjoka? David okwa zimina mEpisalomi 32 a ti: “Sho nda li inee hempulula oondjo dhandje, onda li nda pwa po kokulila esiku kehe. Uusiku nomutenya wa li wa geela ndje, Omuwa; omatha gandje oga li ga kana, ngaashi oshitosi tashi thekuka po kuupyu wopothinge.” (Ovelise 3, 4) David okwa li a pwa po, sho a li ta kambadhala okuholeka omayono ge nokwiipwililikila eiyuvo lye ndyoka tali mu nyenyetele. Okulila okwe mu ningitha a kanithe oonkondo unene, e ta kala ngaashi omuti gwa kukuta gwaa na omeya, ngoka ga pumbiwa opo gu kale nomwenyo. Odhoshili kutya otashi vulika a li a ehamekwa pamadhiladhilo nopalutu. Okwa li a kanitha enyanyu lye. Uuna gumwe gwomutse e li monkalo ya tya ngaaka, otu na okuninga shike?
Kalunga oha “dhimine po”
8 David ngoka a li iyele ombedhi okwa ti: ‘Onde ku hempululile oondjo dhandje; inandi holeka omayono gandje nowa dhimi po oondjo dhandje adhihe.’ (Episalomi 32:5) Uutumbulilo wOshihebeli wa tolokwa ‘okudhimina po’ otawu ti lelalela “okukutha po” nenge “okuhumbata po.” Movelise ndjika otawu ulike ‘kokukutha po oondjo nenge eyono.’ Onkee ano, Jehova okwa li a humbata po omayono nenge oondjo dhaDavid noku dhi ekelahi. Naashika osha li sha ningitha David a kale a pepelelwa. (Episalomi 32:3) Otatu vulu okukala neinekelo lya kola kutya Kalunga oha kutha po oondjo dhaamboka taya kongo edhiminopo omolweitaalo lyawo mekuliloyambo lyaJesus.—Mateus 20:28.
Okwiipa uusama—‘Theta po oondjo dhandje’
David okwa li a mono uuwanawa kamana kandongo. Owashike mbela? Okwa li e na omutima tagu hunga enyanyu. Okwa nyola a ti: “Aanelago oomboka oondjo dhawo dha dhimwa po, mboka ya kuthilwa po omayono gawo.” (Episalomi 32:1) Okwa galikana wo a ti: “Omuwa, makula okana kandje, e tandi ku hambelele.” (Episalomi 51:15) David okwa li i inyengithwa, opo a lombwele yalwe kombinga yaJehova a manguluka. Oshike sha li she mu inyengitha? Olupandu lwokupandula Kalunga sho a dhimi po oondjo dhe.
Jehova okwa halelela wu kale wa pepelelwa nowu na eiyuvo lya yela. Okwa hala wo u lombwele yalwe kombinga ye nosho wo yomalalakano ge. To shi ningi nomwenyo aguhe nowu na enyanyu, ihe ina hala wu shi ninge nomitima mbali. (Episalomi 65:1-4) Dhimbulukwa kutya ote tu pula ta ti: “Itedhululeni, ne mu galukile kuKalunga, opo a dhime po oondjo dheni.”—Iilonga 3:19.
Omaliko gomOmbiimbeli
Omanenedhiladhilo okuza membo lyotango lyOmapisalomi
33:6, OB-1954—‘Ombepo’ yomokana kaJehova oshike? Ombepo ndjoka oyo oonkondo dhaKalunga tadhi longo nenge tu tye ombepo ye ondjapuki, ndjoka a li a longitha a shite iinima mbyoka yi li mewangandjo. (Genesis 1:1, 2) Ohayi ithanwa ombepo yomokana ke, oshoka oha vulu oku yi tuma yi gwanithe po ehalo lye, ngaashi owala omuntu ha fudha mo ombepo yi na oonkondo.
29 APILILI–5 MEI
OMALIKO OKUZA MOOHAPU DHAKALUNGA | EPISALOMI 34–35
‘Aluhe hambelela Omuwa’
Natu tumbalekitheni edhina lyaJehova
11 “Onda hala aluhe okupandula Omuwa; itandi hulitha oku mu hambelela.” (Episalomi 34:1) Osha yela kutya sho David a li ontauki, olundji okwa li hi ipula kombinga yuuhupilo, ihe ngaashi sha ulikwa movelise ndjoka, ka li a etha omaipulo ngoka ga nkundipaleke etokolotoko lye lyokutanga Jehova. Ke li tuu oshiholelwa oshiwanawa kutse, uuna tatu tsakaneke omashongo! Kashi na nduno mbudhi kutya otu li kosikola, kiilonga, muukalele nenge otu li naaKriste ooyakwetu, natu kale tu na ehalo lyokuhambelela Jehova. Otu na omatompelo ogendji gokusimanekitha Jehova. Pashiholelwa, iilonga yaJehova yeshito lye ekumithi, ohayi tu nyanyudha noonkondo. Natu dhiladhile wo kwaashoka Jehova a pondola, okupitila moshitopolwa shehangano lye shokombanda yevi. Nonando aapiya ye aadhiginini inaya gwanenena, ohe ya longitha momikalo omikumithi. Mbela iilonga yaJehova yomeshito nosho wo mbyoka tayi longwa mehangano lye, otayi vulu ngaa okuyelekanithwa naambyoka hayi longwa kaantu mboka ya simanekwa muuyuni? Mbela ito tsu kumwe noohapu dhaDavid ndhoka tadhi ti: “Kaku na Kalunga gulwe e ku fa, Omuwa; kaku na ngo ta longo ngaashi ho longo.”?—Episalomi 86:8.
Natu tumbalekitheni edhina lyaJehova
13 “Otandi mu hambelelele iilonga ye; aathiminikwa ayehe naa pulakene e taa nyanyukwa.” (Episalomi 34:2) David ka li i itadhele shoka a pondola po paumwene. Pashiholelwa, ka li i itadha shi na ko nasha nokukotokela kwe omukwaniilwa gwaGat. Okwa li e shi kutya Jehova oye e mu gamena noku mu hupitha, sho a li muGat. (Omayeletumbulo 21:1) Onkee ano, pehala lyokwiitadha, David okwa li a tanga Jehova, naashoka osha li sha ningitha aaifupipiki ya hililwe kuJehova. Jesus naye okwa li ha tumbalekitha edhina lyaJehova, naashoka osha li wo sha ningitha aaifupipiki yopethimbo lye, ano aantu mboka ye na ehalo lyokwiilonga, ya hililwe kuJehova. Kunena, aaifupipiki yomiigwana ayihe otaya mbombolokele kegongalo lyopaigwana lyAakriste aagwayekwa, ndyoka tali wilikwa kuJesus e li Omutse gwalyo. (Aakolossa 1:18) Omitima dhaaifupipiki mboka ohadhi gumwa, uuna taya uvu sho aapiya yaJehova aaishonopeki taya tumbalekitha edhina lye nosho wo uuna taya kwathelwa kombepo ondjapuki yaJehova, ya uve ko etumwalaka lyOmbiimbeli.—Johannes 6:44; Iilonga 16:14.
Natu tumbalekitheni edhina lyaJehova
15 “Onda galikana Omuwa, oye nokwa yamukula ndje; okwa kutha ndje uumbanda auhe.” (Episalomi 34:4) Sho David a li a kwathelwa kuJehova momaudhigu ge, osha li she mu nkondopaleke. Shoka oshe mu inyengitha a popye ta ti: “Omapongo otage mu ithana, oye note ga yamukula; ote ya hupitha moothina dhawo adhihe.” (Episalomi 34:6) Ngele tatu endathana nooitaali ooyakwetu, ohashi tu pe ompito yokulombwelathana iimoniwa tayi tungu kombinga yankene Jehova he tu kwathele tu idhidhimikile oonkalo oondhigu. Kungawo, ohatu nkondopalekathana meitaalo, ngaashi owala David a li a koleke eitaalo lyaayambidhidhi ye, sho e ya lombwele iimoniwa ye. Aayambidhidhi ye oya li yi “itula puye [Jehova] e taa nyanyukwa; itaa thigilwa nando ofogo.” (Episalomi 34:5) Nonando oya li ya yi ontuku omukwaniilwa Saul, kaya li ya sa ohoni, ihe oya li ye na einekelo kutya Kalunga ota yambidhidha David, nomolwaashono iipala yawo ya li tayi adhima kenyanyu. Sha faathana, mboka opo ye ya moshili nosho wo mboka ya menekela mo, ohaya kongo ekwatho kuJehova. Jehova ohe ya kwathele pauhandimwe, naashoka ohashi koleke etokolotoko lyawo lyokukala aadhiginini kuye, niipala yawo ohayi kala tayi adhima kenyanyu.
Omaliko gomOmbiimbeli
Omanenedhiladhilo okuza membo lyotango lyOmapisalomi
35:19—Mbela David okwa li a hala okutya ngiini, sho a indile opo aatondi ye kaayi imemehele iimpwiyu ye? Okwiimemehelwa kaatondi ye okwa li taku ka ulika kutya oya nyanyukwa, sho taya pondola moonkambadhala dhawo dhokutsa ondumbo naye. David okwa li a indile shoka shaa ningwe.