Omapulo ga za kaaleshi

Omolwashike sho Jesus a li pokusa a totha oohapu dhaDavid ndhoka tadhi adhika mEpisalomi 22:1?

Dhimwe dhomoohapu ndhoka Jesus a popi manga inaa sa, otadhi adhika muMateus 27:46: “Kalunga kandje, Kalunga kandje, omolwashike we ekelehi ndje?” Sho Jesus a popi ngawo, okwa gwanitha oohapu ndhoka omupisalomi David a nyola mEpisalomi 22:1. (Mark. 15:34) Osha puka okuthika pehulithodhiladhilo kutya Jesus okwa popi oohapu ndhoka, molwaashoka a li a yemata nenge a li kee na we eitaalo muKalunga. Jesus okwa li e uvite ko lela kutya omolwashike e na okusa, nokwa li e shi ningi. (Mat. 16:21; 20:28) Okwa li wo e shi kutya sho e li pokudhipagwa, Jehova ite ke mu ‘gamena.’ (Job 1:10) Onkee ano, Jehova okwe etha Jesus u ulike kutya omudhiginini kutya nduno okuyelekwe shi thike peni. — Mark. 14:35, 36.

Omolwashike nduno Jesus a popi oohapu ndhoka dhomepisalomi? Nonando katu shi shi naanaa, natu taleni komatompelo gontumba ngoka tashi vulika ge tu kwathele tu mone kutya omolwashike e shi ningi.a

Mbela sho Jesus a popi oohapu ndhoka okwa li a hala oku ulika kutya Jehova ita ka kelela a dhipagwe? Jesus okwa li e na okwiigandja a se, kaapu na ekwatho lyaJehova. Okwa li omuntu gwopanyama nokwa li e na a okusa, opo a “lole eso peha lyetu.” — Heb. 2:9, NW.

Sho Jesus a totha oohapu dhontumba dhepisalomi ndyoka, mbela okwa li a hala aantu ya gandje eitulomo kepisalomi alihe? Pethimbo ndyoka Aajuda oya li hayi ilongo omapisalomi ogendji momutse. Uuna yu uvu ovelise yimwe yepisalomi, ohaya dhimbulukwa nziya episalomi ndyoka alihe. Ngele Jesus shoka osho a li e na momadhiladhilo, kungawo okwa kwathele aalanduli ye Aajuda ya dhimbulukwe omahunganeko ogendji ngoka ge li mepisalomi ndyoka, ngoka taga popi kombinga yokudhipagwa kwe. (Eps. 22:7, 8, 15, 16, 18, 24) Shimwe ishewe, oovelise dhokehulilo lyepisalomi ndyoka otadhi tanga Jehova notadhi mu popi e li Omukwaniilwa gwevi alihe. — Eps. 22:27-31.

Sho Jesus a totha oohapu ndhoka dhaDavid, mbela okwa li a hala okuyelitha kutya ye ke na ondjo? Manga inaa sa, Jesus okwa li e na okwiidhidhimikila okupangulwa kaashi li pauyuuki nokwa li a monika ondjo moshinima inee shi ninga. (Mat. 26:65, 66) Okupangulwa kwe okwa li kwa ningwa ongulohi osheendelela, nokakwa li kwa ningwa pamithikampango dhopaveta. (Mat. 26:59; Mark. 14:56-59) Sho Jesus a pula epulo ndyoka li li mepisalomi, otashi vulika a li a hala aantu ya tseye kutya ina ninga sha sha puka shoka sha gwana oku mu dhipagitha.

Mbela Jesus okwa li wo ta dhimbulukitha aantu kutya sho Jehova e etha David, ano omunyoli gwepisalomi ndyoka, a mone iihuna, itashi ti kutya ka li a hokiwa kuJehova? Sho David a pula epulo ndyoka itashi ti kutya ka li e na eitaalo muKalunga. Konima sho David a pula epulo ndyoka, okwa popi wo kutya oku na einekelo kutya Jehova ota vulu okuhupitha aantu ye, na Jehova okwa li a tsikile oku mu yambeka. (Eps. 22:23, 24, 27) Sha faathana, nonando Jesus, “Omuna gwaDavid,” okwa li a hepekwa komuti gwomahepeko, shoka itashi ti kutya Jehova ka li we e mu hokwa. — Mat. 21:9.

Mbela Jesus okwa li tu ulike kutya okwa geya sho Jehova inee mu gamena, opo a vule okuulika lela uudhiginini we? Kasha li elalakano lyaJehova Omwa a monithwe iihuna noku dhipagwe. Shoka osha ka pumbiwa owala konima sho Adam naEva ya kala inaaya vulika kuJehova. Jesus ka li a ninga sha sha puka, ihe okwa li a pumbwa okumonithwa iihuna nokusa, opo a kandule po ompata yaSatana noku gandje omwenyo gwe gu ninge iikulila, opo a futile po shoka sha kanithwa kuAdam. (Mark. 8:31; 1 Pet. 2:21-24) Shoka osha li owala sha vulu okuningwa, sho Jehova e etha po okugamena Jesus uule wethimbo.

Mbela Jesus okwa li ta kambadhala okukwathela aalanduli ye ya gandje eitulomo kutya omolwashike Jehova e mu etha a dhipagwe momukalo gwa tya ngaaka?b Jesus okwa li e shi kutya oyendji oya li taya ka pundukithwa kokudhipagwa kwe eso enyanyalithi a fa omukolokoshi. (1 Kor. 1:23) Andola aalanduli ye oya gandjele eitulomo kutya omolwashike a li e na okusa, andola oya tseya eityo lyeso lye. (Gal. 3:13, 14) Kungawo andola oya kala ye mu tala ko e li Omuhupithi gwawo, ihe hangaashi omukolokoshi.

Kutya nduno Jesus okwa li a totha oohapu ndhoka nelalakano lyashike, okwa li e shi ndhindhilike kutya shoka a li ta ningilwa oshi li ehalo lyaJehova. Konima sho a totha oohapu ndhoka, okwa ti: “Ayihe ya gwanithwa!” (Joh. 19:30; Luk. 22:37) Odhoshili kutya sho Jehova e etha po okugamena Jesus uule wokathimbo, osha pe Jesus ompito a gwanithe po ashihe shoka a li a tumwa a longe kombanda yevi. Oshe mu pe wo ompito a gwanithe po iinima ayihe mbyoka ya nyolwa kombinga ye ‘mompango yaMoses nomomanyolo gaahunganeki nosho wo momapisalomi.’ — Luk. 24:44.