Omatungo ngoka ga pu okutungwa manga o-corona inaayi tukuluka

Molwaashoka omumvo kehe aantu oyendji ohaya ninginithwa, shono oshe eta po ompumbwe onene yomatungo gokugongalela. Iikondo yokuthaneka omatungo nokutunga miitopolwa muuyuni awuhe, oya ninga omalongekidho yi tunge nenge yi opalekulule omahala getu gokugongalela ga konda po 2 700, momumvo gwiilonga 2020.a

Ihe omalongekidho ngoka oga li ga yiwa moshipala ko-corona. Opo tu gamene aamwatate naamwameme nokuvulika komalombwelo ngoka ga tulwa po komapangelo, Okomitiye yOkunyanyangidha yOlutuwiliki, oya li ya kaleke ooproyeka dhokutunga odhindji muuyuni awuhe. Ashike momukokomoko gwomumvo gwiilonga 2020, omahala getu gokugongalela ga konda 1 700 oga li ga tungwa nokwoopalekululwa manga o-corona inaayi tukuka. Shimwe ishewe, iitayimbelewa ya konda 100 oya pu okutungwa nenge okwoopalekululwa. Natu tale nkene aamwatate miilongo iyali ya mona uuwanawa mokutungilwa omatungo moka ye li taya longele.

Oshitayimbelewa shaKamerun. Oshitayimbelewa shoka sha li moshilando Douala, osha li oshishona notashi pula iilonga oyindji okugwedhelwa. Okomitiye yOkunyanyangidha oya li ya hala oku shi opalekulula, ihe oku shi ninga osha li tashi pula oshimaliwa oshindji nayi unene. Oya li wo ya tala kutya pokati kokutunga oshitayimbelewa oshipe nenge okulanda nosho wo okwoopalekulula etungo li li po nale oshini shi na ombiliha. Ihe omolwoonkalo pomaetopo ngoka kapwa li nando olimwe tali opalele.

Pokati mpono, aamwatate oya mono kutya epangelo otali longo ondjila ndjoka ye enda popepi nOshinyanga shIigongi shetu shimwe, shoka shi li kuumbangalantu woshilando Douala. Omolwondjila ndjono otashi ka kala oshipu okuya pehala mpoka nokweeta po omayakulo ngoka ga pumbiwa. Omolwehumokomeho ndjoka, pehala mpoka opwa li tapu opalele okutunga oshitayimbelewa. Onkee Olutuwiliki olwa li lwa gandja epitikilo, opo oshitayimbelewa oshipe shi tungwe kombinga yimwe mehala moka mu na Oshinyanga shetu shiigongi.

Mboka ya kutha ombinga miilonga mbyoka Oonzapo dhaJehova nosho wo omahangano galwe ngoka ga hehelwa, oshinima shoka sha hupitha ethimbo noshimaliwa. Sho oshitayimbelewa sha pu, ehangano olya mono kutya olya hupitha oshimaliwa shi vulithe poodola dhaNamibia dha konda poomiliyona omilongo ndatu nambali nomayovi ethele nomilongo mbali (N$ 32 120 000.00). Sho iilonga ya pu Aabetel oya tameke okulongela moshitayimbelewa shawo oshipe, nokonima owala yokathimbo okafupi o-corona oya tukuka muuyuni.

Aabetel moKamerun oye li ngashingeyi mehala ewanawa nokukalwa nosho wo nokulongela. Eeno, aamwatate oshe ya yelela kutya oshitayimbelewa shoka oshipe oshi li omagano ngoka ya pewa kuJehova. Omusamane gumwe nomukulukadhi gwe oya ti kutya: “Otatu ka longo nuudhiginini, opo tu ulike kutya otwa pandula omagano ngoka twa pewa.”

Ombelewa yokutoloka yelaka lyOshitojolabal moMeksiko. Omimvo odhindji dha ka pita, aatoloki yOshitojolabal oya kala taya longele moCentral Amerika, popepi noshilando Meksiko. Ihe aapopi yelaka ndyoka oyendji oye li moAltamirano nosho wo moLas Margaritas, oshinano shookilometa 1 000 okuza mpoka pu na ombelewa. Oshinima shono osha li she shi ningitha oshidhigu kaatoloki ya kale taya popi elaka ndyoka li li pethimbo. Osha li wo oshidhigu kuyo okumona aamwatate naamwameme mboka taya vulu oku ya kwathela miilonga yokutoloka nokukwata omawi.

Omolwomatompelo ngono, Okomitiye yOkunyola yOlutuwiliki oya li ya tokola yi tembudhile osipana yOshitojolabal koshitopolwa hoka haku popiwa elaka ndyoka. Opo shi vule okuningwa, oshitayimbelewa osha li sha landa etungo limwe noku li opalekulula nawa. Shono oshi na ombiliha, shi vulithe okutunga etungo epe nenge okulongela metungo ndyoka hali futilwa omwedhi kehe.

Omutoloki gumwe okwa hokolola uuwanawa mboka a mona, a ti: “Omimvo omulongo ndhoka nda kala te longele moshitayimbelewa moMeksiko, inandi tsakanena mo nando onale naantu mboka haya popi elaka lyandje. Ngashingeyi ombelewa yetu oyi li lela mondingandinga yaapopi yOshitojolabal. Ihaku shi inaandi popya nayo. Osha kwathela ndje ndi kale ndi na uuyamba wiitya nosha hwepopaleka iilonga yandje yokutoloka.”

Okutunga momumvo gwiilonga 2021

Ngele onkalo otayi shi pitike, otatu ka tunga oombelewa dhokutoloka dhi li 75 momumvo gwiilonga 2021 nosho wo Oongulu dhoosikola dhOmbiimbeli. Otatu ka tsikila natango nokutunga iitayimbelewa yi li ihetatu, moka mwa kwatelwa okutunga moRamapo, moAmerika nosho wo okutembudhila oshitayimbelewa shaArgentina naItalia kehala lilwe. Iilonga ayihe mbyono otayi ka wilikwa koombelewa dhetu oonene muuyuni. Kakele kaashono, Iinyanga yUukwaniilwa iipe ya konda pe 1 000 oya pumbiwa. Shimwe ishewe, omahala gokugongalela ge li 6 000 oge li monkalo kaayi li nawa noga pumbwa okupingenwa po. Opu na wo natango Iinyanga yUukwaniilwa yi li 4 000 mbyoka ya pumbwa okwoopalekululwa.

Mbela iimaliwa yokutunga nokwoopalekulula omatungo ngoka ohayi zi peni? Omumwatate Lázaro González, oshilyo shokomitiye yoshitayimbelewa shomoCentral Amerika, okwa yamukula epulo ndyoka moonkundathana ndhoka dha kwatela mo iilonga yokutunga ombelewa yokutoloka yelaka lyOshitojolabal. Okwa ti: “Moshitopolwa shoka tashi wilikwa koshitayimbelewa shetu, ihamu tu zile naanaa omayambidhidho ga gwana. Andola katwa li hatu kwathelwa kaamwatate muuyuni awuhe, ando inatu vula okutunga oombelewa dhokutoloka dhomalaka goshivalelwamo. Iimaliwa mbyoka hatu pewa kaamwatate muuyuni awuhe oye shi ningitha tashi wapa, opo aatoloki ya vule okuya komahala hoka haku popiwa omalaka ngoka ya yama. Otatu pandula aamwatate muuyuni awuhe sho haya gandja omayambidhidho gopashimaliwa nomutima aguhe.” Otwa vula okutunga omatungo omawanawa, omolwiimaliwa mbyoka hamu tula muuketha wOmayambidhidho giilonga yomuuyuni awuhe nosho wo mbyoka hamu gandja okupitila kepandja lyokointaneta, ko-donate.jw.org.