Olye Omukwaniilwa gwUukwaniilwa waKalunga?

• Okwa li ta ka hogololwa kuKalunga. “Ongame nde mu gwayeke, a ninge omukwaniilwa gwandje . . . ngame notandi ku pe iigwana uuthiga, evi alihe notali ningi eliko lyoye.” — Episalomi 2:6, 8.

• Okwa li ta ka kala omuthigululi gwoshipundi shuukwaniilwa waDavid. “Otwa valelwa omunona! Otwa pewa omumati! . . . Uukwaniilwa we kau na mpoka tau hulu po, noshilongo she otashi kala aluhe shi na ombili. Ota ka kuutumba koshipangelapundi shaDavid ta lele oshilongo she.” — Jesaja 9:6, 7.

• Okwa li ta ka valelwa muBetlehem. “Betlehem . . . , omungoye tamu ka za omuleli . . . aantu ayehe yokombanda yevi otaa ka zimina uunene we.” — Mika 5:2, 4.

• Okwa li ta ka ekelwahi kaantu nota dhipagwa. “Okwa li a dhinwa, natse inatu mu simaneka nando. . . . Okwa tsuwa omolwomayono getu nokwa nyanyagulilwa oondjo dhetu.” — Jesaja 53:3, 5.

• Okwa li ta ka yumudhwa kuusi e ta simanekithwa. “Oto gamene ndje, ndaa tonwe koonkondo dheso, nomuntu gwoye omuholike ito mu ethele moshaasi. . . . Pungoye opu na enyanyu lyandje nuunelago wandje sigo aluhe.” — Episalomi 16:10, 11.

Jesus Kristus, oye lela a gwana okupangela uuyuni

Mondjokonona ayihe yaantu, omuntu owala gumwe ta opalele oohapu ndhika dhOmupangeli ngoka a gwana lela okupangela aantu, nomuntu ngoka oJesus Kristus. Omuyengeli gumwe okwa li nokuli a lombwele yina yaJesus, Maria a ti: ‘Omuwa Kalunga ote mu pe oshipundi shuukwaniilwa wahe David, nUukwaniilwa we kau na mpoka tau hulu po.’ — Lukas 1:31-33.

Jesus kali a pangele kombanda yevi. Ihe pehala lyaashono, ota ka pangela aantu okuza megulu e li Omukwaniilwa gwUukwaniilwa waKalunga. Oshike she mu ningitha a kale a gwana okupangela uuyuni? Tala kwaashoka Jesus a ningi sho a li kombanda yevi.

• Jesus okwa li e na ko nasha naantu. Okwa li a kwathele aalumentu naakiintu, aagundjuka naakokele, kashi na nduno mbudhi kutya oyomuhoko guni nenge oye li pondondo yini. (Mateus 9:36; Markus 10:16) Omunashilundu gumwe sho a li e mu hehela a ti: “Ngele owa hala okwaaludha ndje, oto shi vulu,” Jesus okwe mu uvile olukeno e te mu aludha. — Markus 1:40-42.

• Jesus okwe tu longa nkene tu na okunyanyudha Kalunga. Okwa ti: “Kamu vulu okulongela Kalunga pamwe nemona.” Okwe tu lombwela wo kutya natu ungaunge nayalwe momukalo moka twa hala nayo yu ungaunge natse. Shimwe ishewe, oku ulike kutya Kalunga iha kala owala e wete shoka tatu ningi, ihe oha kala wo e wete kutya ohatu dhiladhila ngiini notu uvite ngiini. Onkee, opo tu nyanyudhe Kalunga, otu na okupangela omaiyuvo getu. (Mateus 5:28; 6:24; 7:12) Jesus okwa tsu wo omuthindo kutya opo tu kale shili twa nyanyukwa, otu na okwiilonga kutya Kalunga okwa hala tu ninge shike e tatu shi tula miilonga. — Lukas 11:28.

• Jesus okwa li a longo aantu kutya okuulika ohole oshike. Shoka Jesus a popi nokwa ningi, oshi inyengitha nosha gumu lela omitima dhaantu. “Oya kuminwa elongo lye. Oshoka okwe ya longo ngaangoka e na oonkondo.” (Mateus 7:28, 29) Okwe ya longo a ti: “Holeni aatondi yeni.” Sho a li komuti gwomahepeko okwa li nokuli a galikanene mboka ye mu dhipaga a ti: “Tate, ya dhimina po oondjo dhawo, oshoka inaa tseya shoka taa ningi.” — Mateus 5:44; Lukas 23:34.

Jesus oye lela a gwana okupangela uuyuni, oshoka oha kwathele aantu noku na olukeno. Uunake a li a tameke okupangela?