Mbela Ombiimbeli otayi vulu ngaa okuuviwa ko?
“Uukwanegumbo wetu owa li hawu lesha Ombiimbeli Osoondaha kehe. Ihe ngame kanda li handi nyanyukilwa naanaa oku yi lesha. Onda li ndi shi kutya Ombiimbeli oyo Oohapu dhaKalunga, ihe iinima oyindji mbyoka nda li handi lesha mo oya li iidhigu kungame oku yi uva ko.”—Steven, Britania.
“Sho nda li ndi na oomvula 17, onda li handi kambadhala okulesha Ombiimbeli. Onda li handi mono oshidhigu oku yi uva ko, onkee ano, onda li nde etha po oku yi lesha.”—Valvanera, Spania.
“Onda li nda lesha Ombiimbeli ayihe lumwe molwaashoka ndi li Omukatoolika nonda li ndi wete kutya ondi na oku yi lesha. Osha li sha pula ndje oomvula ndatu opo ndi yi mane ko. Ihe kanda li ndi yi uvite ko.”—Jo-Anne, Australia.
OMBIIMBELI oyi li embo lya simanenena muuyuni. Otayi tsikile okulandithwa yi vule omambo omakwawo, oyi niwe kaantu oyendji, otayi monika momalaka ogendji notayi monika pamikalo odhindji shi vulithe nale. Ihe aantu oyendji mboka ye na Ombiimbeli ohaye shi mono oshidhigu oku yi uva ko. Mbela nangoye osho wu uvite ngawo?
Mbela Omunyoli gwayo okwa hala ngaa tu uve ko Oohapu dhe?
Ombiimbeli otayi ti: “Enyolo kehe olya nyolithwa kOmbepo yaKalunga.” (2 Timoteus 3:16) Eeno, Jehova oye Omunyoli gwOmbiimbeli. Mbela okwa hala ngaa tu uve ko Oohapu dhe? Nenge Ombiimbeli okwe yi ningila owina yi kale ondhigu okuuviwa ko koyendji nokuuviwa ko owala kuyamwe ngaashi kaawiliki yopambepo nokaalongwantu yOmbiimbeli?
Tala koovelise ndhika tadhi landula dha kuthwa mOmbiimbeli mo mwene:
“Oshipango shika tandi shi ku pe nena ndjika, kashi shi oshidhigu unene nenge shi li kokule nangoye.”—Deuteronomium 30:11.
“Efatululo lyoohapu dhoye otali gandja uuyelele, otali longo ngoka kee shi sha oondunge.”—Episalomi 119:130.
“Pethimbo tuu ndyoka Jesus oku udhithwa enyanyu kOmbepo Ondjapuki e ta ti: ‘Otandi ku hambelele, Tate, Omuwa gwegulu nogwevi, oshoka iinima mbika ongoye we yi holeke aanongo naanamayele nowe yi hololele mboka ya fa uunona.’”—Lukas 10:21.
Dhoshili, Omunyoli gwOmbiimbeli okwa hala wu uve ko Oohapu dhe. Nonando ongawo, aantu oyendji mboka ye na omitima dhu uka ohaya mono embo ndika edhigu okuuviwa ko. Oshike tashi vulu oku ya kwathela? Iitopolwa tayi landula otayi gandja omaetopo gatatu ngoka taga vulu oku ku kwathela wu uve ko Ombiimbeli.