Nkene to vulu okuhupa nokashona hoka ho mono
OBED, omusamane ngoka e na aanona yaali, okwa kala ha longo mohotela yondilo moshilando shimwe oshinene shi li muAfrika uule woomvula omulongo, noka li e na uupyakadhi wokugwanithila po aanegumbo lye oompumbwe dhawo. Okwa li ha vulu oku ya fala ya ka fudhe po komahala gomapashiyoneno moshilongo shawo. Ayihe mbika ina ka vula we okukala he yi ningi sho a kanitha iilonga ye molwaashoka ohotela kaya li we hayi mono ookastoma odhindji.
Stephen okwa kala ha longele ombaanga onene uule woomvula dhi vulithe po 22 moka a kala ta yelwayelwa sigo a ningi omukuluntu miilonga. Uuwanawa mboka a li ha mono miilonga ye ongaashi egumbo enene, ohauto, aaniilonga yopegumbo, naanona ye oya li haya yi kosikola ombwanawa lela. Sho ombaanga ya ka ninga omalunduluko ga guma aakwanambelewa, okwi iyadha kee na we iilonga. Stephen ota ti: “Atuhe megumbo otwa li shili twa dhengwa koomwenyo. Onda li nda teka omukumo, nda yemata nonda li ndi na oshimpwiyu sha pitilila.”
Mbaka hayo owala ye enda moonkalo dha tya ngaaka. Omolwuuhupilo mboka tawu ende tawu shongola muuyuni auhe, aantu omamiliyona mboka ya li ye na iilonga hayi futu nawa oya kanitha iilonga yawo. Oyendji mboka ya vula okumona ishewe iilonga ohaya futwa oshimaliwa oshishona nonando oondando dhiinima onkee ngaa tadhi londo. Kombanda yevi alihe kaku na oshilongo inaashi gumwa koshinima shika, kutya nduno opo tashi putuka nenge osha putuka nale.
Owa pumbwa owino
Ngele otwa tameke okukala hatu kwata oshimaliwa oshishona nenge twa kanitha iilonga otatu vulu okugwililwa po nuupu komadhiladhilo omawinayi. Odhoshili kutya omuntu i to vulu naanaa okuhenuka iimpwiyu ayihe monkalamwenyo. Ihe nonando oongawo, omulumentu gumwe omunandunge okwa tile: “Ngele to tenguka pethimbo lyuudhigu, nena oonkondo dhoye oonshona ngiini!” (Omayeletumbulo 24:10) Pehala lyokutila uuna uuhupilo tawu shongola, otu na okutala kuKalunga oye a ninge “ekwatho” lyetu.—Omayeletumbulo 2:7.
Nonando Ombiimbeli kayi shi embo li na ko nasha niinima yopashimaliwa, oli na omayele ngoka ga vula okukwatha omamiliyona gaantu muuyuni auhe. Natu tale kugamwe gomomakotampango ngoka ge li mOmbiimbeli.
Yalula kutya oompumbwe dhoye otadhi ke ku pula ingapi. Tala koohapu dhaJesus ndhoka dhi li muLukas 14:28, tadhi ti: “Ngele ku na gumwe e na edhiladhilo okutunga oshungo, oku na okukuutumba tango, a yalule kutya otayi pula shi thike peni, ye a tale, ngele oku na iimaliwa ya gwana oku yi tunga sigo ya pu.” Opo wu landule omayele ngoka, owa pumbwa okuninga omutengenekwathaneko nokukala to gu landula. Ihe shika otashi vulu shi kale oshidhigu, ngaashi Obed te shi koleke. Ota ti: “Manga inaandi kanitha iilonga, ngele twa yi mositola otwa li twi igilila okuundula uutemba wu udha iinima naambyoka inaatu pumbwa. Katwa li tu na omutengenekwathaneko molwaashoka otwa li tu na oshimaliwa shokulanda kehe shoka twa hala.” Ngele omuntu okwa ningi omutengenekwathaneko ota ka shilipaleka kutya okamaliwa okashona hoka ke li po otaka vulu okulanda iipumbiwa yomegumbo.
Ninga omalunduluko mokukalamwenyo kwoye. Okutaamba ko ondondo yonkalamwenyo yi vulike kwaandjoka wa li wu na nale otashi vulika shi kale oshidhigu, ihe osha pumbiwa. Eyele lyOmbiimbeli ota li ti: “Omuntu onkotoki ota tala oshiponga e ta ka holama.” (Omayeletumbulo 22:3) Stephen ota ti: “Opo tu vule okugwanitha po oompumbwe dhetu otwa li tu na okumona po egumbo lilwe eshona nonando oli na iinima ya kambela mo. Aanona oya li ye na okukongelwa osikola ihaayi futwa ondilo, ihe oyi na ngaa natango elongo ewanawa.”
Opo mu pondole mokuninga omalunduluko monkalamwenyo yeni omu na okukala hamu kundathana mwa manguluka maandjeni. Austin ngoka a kanitha iilonga ye konima yokulonga oomvula omugoyi mehangano lyi na ko nasha niinima yopaimaliwa, ota ti: “Onda kuutumba nomukulukadhi gwandje e tatu nyola kutya iinima yini twa pumbwa shili. Otwa li tu na okweetha po okulanda iikulya yondilo, oku ka fudha komahala ge na ondilo, nosho wo okulanda oonguwo oompe inaashi pumbiwa. Onda nyanyukwa shaashi aanegumbo lyandje oya kala aluhe ye na elongelokumwe sho tatu ningi omalunduluko ngaka.” Odhoshili kutya aanona otashi vulika kaaya kale yu uvite ko nawa kutya omolwashike pu na okuningwa omalunduluko ngaka, ihe ne aavali otamu vulu oku ya kwathela ye shi uve ko.
Kala wi ilongekidha okutaamba ko eithano epe. Ngele owi igilila okulonga iilonga yomombelewa otashi vulika iilonga yokomake yi kale tayi monika ya fa iidhigu. Austin ota ti: “Osha li shili oshidhigu kungame pamadhiladhilo okutaamba ko iilonga yokomake shaashi oomvula adhihe onda kala tandi longo iilonga yuumenindjela mehangano enene.” Shika itashi kumitha molwaashoka Omayeletumbulo 29:25 otaga ti: “Okutila omuntu okulukila omwigo.” Nonando owu kale to dhiladhila unene kombinga yaashoka aantu taye ke ku tila hasho tashi ke ku pa oshimaliwa wu gwanithile po aanegumbo lyoye oompumbwe dhawo. Oshike tashi vulu oku ku kwathela wu ekelehi omadhiladhilo omawinayi ga tya ngaaka?
Owa pumbwa okukala wu na eifupipiko. Obed sho a kanitha iilonga ye yomohotela, okwa li a pewa iilonga yokulonga mongalashe kugumwe ngoka ya li haya longo naye nale. Iilonga ye mbika oya li hayi mu pula e ende iinano iile kolupadhi te ende montsi a ka lande opainda niinima yilwe yomoohauto. Obed ota ti: “Nonando iilonga mbika kanda li ndi yi hole, kanda li ndi na nkene. Eifupipiko olya li lya kwathele ndje ndi taambe ko iilonga mbyoka hayi futu oshimaliwa oshishona lela oku shi yeleka naashoka nda li handi kwata nale, ihe osha gwana okugwanitha po oompumbwe dhaanegumbo lyandje.” Mbela nangoye ito vulu okukala wu na etaloko lya fa lyaObed ndyoka tali ke ku etela uuwanawa?
Kala wa gwanenwa. Embwiitya limwe otali ti kutya omuntu ngoka a gwanenwa omuntu ngoka “a nyanyukwa nokwa mbilipalelwa konkalo ndjoka yi li po.” Shoka embwiitya tali ti otashi vulika shi kale sha fa sha nika uugoya komuntu ngoka e li monkalo yuuhupilo tawu shongola. Ihe tala kwaashoka omuyapostoli Paulus, omutumwa ngoka a li e shi kutya oluhepo oshike, a ti: “Ondi igilila okukala naashoka ndi shi na, nashi kale oshishona nenge nashi kale oshindji.”—Aafilippi 4:11, 12
Onkalo yetu otashi vulika yi hwepopale, ihe muuyuni mbuka tawu lunduluka otashi vulika wo yi nayipale. Otatu vulu shili okumona uuwanawa ngele otwa landula omayele gaPaulus ga nwethwa mo, ngoka taga ti: “Eeno, uukriste owo shili eliko enene, ihe ongele wa gwana naashoka wu shi na. Onkee ano natu kale twa gwana, ngele otu na iikulya nomizalo.” Paulus ka li ta ti aantu naya kale aananyalo, ihe okwa li ta longo aantu nkene ye na okukala ye na ondjele ngele tashi ya koompumbwe dhopalutu.—1 Timoteus 6:6, 8.
Shoka tashi vulu okweetela omuntu enyanyu lyashili
Enyanyu lyashili ihali tu zile mokwiigongelela iinima yopamaliko mbyoka tashi vulika tu kale twa hala nenge pamwe mokukala nonkalamwenyo kaayi na uupyakadhi nenge yuuzeko. Ongaashi owala Jesus a ti: “Okugandja oku na elago ku vule okuutamba.” Ano, enyanyu negwaneno otatu li mono ngele ohatu longitha shoka tu na opo tu kwathele yalwe noku ya tsa omukumo.—Iilonga 20:35.
Jehova Kalunga, omushiti gwetu, oku shi ashihe shoka twa pumbwa. Okupitila mOohapu dhe Ombiimbeli okwa gandja omayele ngoka taga vulu okukwathela oyendji ya hwepopaleke onkalamwenyo yawo nokukutha po iimpwiyu inaayi pumbiwa. Ihe nonando oongawo, itashi ti kutya omuntu ote ki iyadha e na omaliko ogendji ombaadhilila. Ihe Jesus okwa li a gandja eshilipaleko ta ti kutya mboka taya tsikile ‘okukonga tango uukwaniilwa waKalunga nuuyuuki we’ otaya ka gwanithilwa po oompumbwe dhawo dhesiku kehe.—Mateus 6:33.