Nkene Jehova he tu kwathele twi idhidhimike

1. Omolwashike twa pumbwa eidhidhimiko, notu na ekwatho lini? (1 Petrus 5:10)

MOMASIKU ngaka gahugunina omadhigu okukaliwa mugo, oshigwana shaJehova osha pumbwa eidhidhimiko. Yamwe otaya kondjo nuuvu wa kwata miiti. Yalwe oya silwa mboka ye hole. Omanga yalwe ya taalela omapataneko okuza kaakwanezimo yawo, nenge kaakwanepangelo. (Mat. 10:18, 36, 37) Kala wa shilipalekwa kutya Jehova ota vulu oku ku kwathela wi idhidhimikile uupyakadhi mboka wu li muwo. — Lesha 1 Petrus 5:10.

2. Oshike hashi kwathele Aakriste yi idhidhimike?

² Okwiidhidhimika osha hala okutya okukala aadhiginini kuJehova nokukala tu na etegameno, nonando otwa taalela omaudhigu, omahepeko, omashongo nenge omamakelo. Tu li Aakriste, ihatu vulu okwiidhidhimika koonkondo dhetu yene, ihe pehala lyaashono, ohatu idhidhimike owala kekwatho lyaJehova, ngoka he tu pe “oonkondo ndhoka dhi vule dhopaunshitwe.” (2 Kor. 4:7) Moshitopolwa shika, otatu ka kundathana omasiloshimpwiyu gane ngoka Jehova e tu pa, ngoka hage tu kwathele twi idhidhimike. Otatu ka tala wo nkene tatu vulu okumona mo uuwanawa mesiloshimpwiyu kehe.

EGALIKANO

3. Omolwashike tatu vulu okutya egalikano oli li oshikumithalonga shokupopya naJehova?

³ Jehova okwe tu pa esiloshimpwiyu lyopashikumithalonga ndyoka tali vulu oku tu kwathela twi idhidhimike. Okwe shi ningitha tashi wapa tu popye naye, nonando inatu gwanenena. (Heb. 4:16) Dhiladhila kwaashika: Otatu vulu okugalikana kuJehova ethimbo kehe, nokombinga yoshinima kehe. Ohe tu uvu kehe mpoka tu li nomelaka kehe, nokuli nonando otwi ikalela, nenge tu li mondholongo. (Jona 2:1, 2; Iil. 16:25, 26) Uuna tu na iimpwiyu, noitatu vulu okuholola omadhiladhilo getu, natango Jehova ota vulu okuuva ko shoka twa hala okutya. (Rom. 8:26, 27) Egalikano oli li shili oshikumithalonga shokupopya naJehova!

4. Omolwashike tatu tile kutya omagalikano getu ge na ko nasha neidhidhimiko oge li metsokumwe nehalo lyaJehova?

⁴ MOohapu dhe, Jehova okwe tu shilipaleka kutya ngele “tatu mu indile shaa shoka she mu opalela, oye ote tu uvu.” (1 Joh. 5:14) Mbela otatu vulu okupula Jehova e tu kwathele twi idhidhimike? Eeno, shono oshi li metsokumwe nehalo lye. Omolwashike tatu tile ngawo? Uuna tatu idhidhimikile omamakelo, kungawo otatu pe Jehova ompito a yamukule omulundili gwe, Satana Ondiyapoli. (Omayel. 27:11) Kakele kaashono, Ombiimbeli oya ti kutya Jehova okwa halelela ‘okunkondopaleka mboka ye na omitima dhe mu inekela.’ (2 Ondjal. 16:9) Onkee ano otatu vulu okukala nuushili kutya Jehova oku na oonkondo nehalo lyoku tu kwathela tu idhidhimike. — Jes. 30:18; 41:10; Luk. 11:13.

5. Egalikano ohali tu pe ngiini ombili yopamadhiladhilo? (Jesaja 26:3)

⁵ Ombiimbeli oya ti kutya uuna tatu galikana twa mana mo kombinga yaashoka tatu ipula nasho, ‘ombili yaKalunga, ndjoka yi vule uunongo awuhe, otayi ka gamena omitima nomadhiladhilo getu.’ (Fil. 4:7) Natu ka taleni kutya shoka osha hala okutya shike. Aantu mboka ihaaya longele Jehova ohaya adhika komaupyakadhi, notashi vulika haya kambadhala omikalo dha yoolokathana, opo ya mone ombili yopamadhiladhilo. Pashiholelwa, yamwe ohaya longitha omukalo gokutedhatedha ngono hagu ya ningitha ya kale itaaya dhiladhila nando osha, opo ya kale ye uvite ya ngungumana. Uuna omuntu ta ningi ngawo, osha nika oshiponga kuupambepo we. (Yelekanitha Mateus 12:43-45.) Onkee ano omuntu ota vulu okumona ombili ndjoka Jehova he tu pe uuna twa galikana, ndjoka yi vule kokule ombili ndjoka omuntu tashi vulika a mone, uuna ta tedhatedha momukalo gwa tya ngaaka. Uuna tatu galikana kuJehova, ohatu ulike kutya otwe mu inekela thiluthilu, note ke tu pa “ombililela.” (Lesha Jesaja 26:3.) Omukalo gumwe moka Jehova he tu pe ombili, omoku tu kwathela tu dhimbulukwe omanyolo ngoka hage tu hekeleke. Omanyolo ngoka ohage tu dhimbulukitha kutya Jehova oku na ko nasha natse, nokwa hala tu pondole. — Eps. 62:1, 2.

6. Ongiini to vulu okulongitha esiloshimpwiyu lyegalikano pakuudha? (Tala wo ethano.)

⁶ Shoka to vulu okuninga. Uuna to idhidhimike sho eitaalo lyoye tali makelwa, “uudhigu woye u fala kOmuwa” nokugalikana kuye e ku pe ombili ye. (Eps. 55:22) Galikana wo e ku pe uunongo mboka wa pumbwa, opo wu ungaunge neshongo ndyoka wa taalela. (Omayel. 2:10, 11) Kakele owala kokwiindila Jehova e tu pe eidhidhimiko, inatu dhimbwa wo oku mu pandula momagalikano getu. (Fil. 4:6) Kala wo ho konenene iinima mbyoka tayi ulike kutya Jehova ote ku kwathele muudhigu woye, e to mu pandula omolwekwatho lye. Ino etha eshongo lyoye li ku imbe wu mone omayambeko ngoka Jehova e ku pa nale. — Eps. 16:5, 6.

OOHAPU DHAKALUNGA

7. Okukonakona Ombiimbeli ohaku tu kwathele ngiini tu idhidhimike?

⁷ Jehova okwe tu pa Oohapu dhe dhi tu kwathele twi idhidhimike. MOmbiimbeli omu na oovelise odhindji, ndhoka tadhi tu shilipaleke kutya Jehova ote ke tu kwathela. Natu taleni koshiholelwa shimwe. Mateus 6:8 otayi ti: “Ho yeni oku shi shoka mwa pumbwa, nokuli omanga inamu shi mu pula.” Jesus oye a popi oohapu ndhoka, ye oku shi nawa Jehova e vule kehe gumwe. Onkee ano katu na etompelo lyokukala twa limbililwa ngele Jehova ote ke tu kwathela naashoka twa pumbwa, opo tu idhidhimike uuna tu li muudhigu. MOmbiimbeli omu na oovelise odhindji, ndhoka tadhi vulu oku tu tsa omukumo tu kale twa tokola toko okwiidhidhimika. — Eps. 94:19.

8. (a) Gandja oshiholelwa shekotampango lyOmbiimbeli, ndyoka tali vulu oku tu kwathela twi idhidhimike. (b) Oshike tashi vulu oku tu kwathela tu dhimbulukwe omakotampango gOmbiimbeli, uuna twe ga pumbwa?

⁸ Omakotampango gOmbiimbeli otaga vulu oku tu kwathela twi idhidhimike. Shimwe ishewe, mugo omu na uunongo tawu longo mboka tawu vulu oku tu kwathela tu ninge omatokolo ge li pandunge. (Omayel. 2:6, 7) Pashiholelwa, Ombiimbeli otayi tu ladhipike tu kale twi inekela muJehova, pehala lyokukala tatu ipula unene naashoka tashi ka ningwa monakuyiwa. (Mat. 6:34) Ngele ohatu lesha pandjigilile Omanyolo nokutedhatedha kugo, otashi ka kala oshipu okudhimbulukwa omakotampango ngoka tage tu kwathele, uuna twe ga pumbwa.

9. Omahokololo gomOmbiimbeli ohaga koleke ngiini einekelo lyetu mekwatho lyaJehova?

⁹ MOmbiimbeli omu na wo omahokololo goshili, gaantu mboka ya li yi inekela muJehova, nokwa li e ya kwathele. (Heb. 11:32-34; Jak. 5:17) Uuna tatu dhiladhila komahokololo ngoka, ohashi koleke einekelo lyetu kutya Jehova oye ‘epopilongulu noonkondo dhetu, nokwi ilongekidha aluhe okukwatha momathimbo guudhigu.’ (Eps. 46:1) Uuna tatu dhiladhila kaapiya yaJehova aadhiginini yomonakuziwa, ohashi tu inyengitha tu holele eitaalo neidhidhimiko lyawo. — Jak. 5:10, 11.

10. Ongiini to vulu okulongitha pakuudha esiloshimpwiyu lyOohapu dhaKalunga?

¹⁰ Shoka to vulu okuninga. Lesha Ombiimbeli esiku kehe, nokukala wu na omusholondondo gwoovelise ndhoka ho mono hadhi ku kwathele lela. Yamwe oye hole okulesha enyolo lyesiku ongulonene, nokudhiladhila kwaashoka ya lesha momukokomoko gwesiku. Omumwameme gwedhina Mariea okwa mona uushili waashoka, sho aavali ye ayehe ya li ya monika uuvu wokankela. Oshike sha li she mu kwathele i idhidhimike, sho a li te ya sile oshimpwiyu poomwedhi dhawo dhahugunina? Okwa ti: “Esiku kehe ohandi lesha enyolo lyesiku mokambo Konakona Omanyolo esiku kehe, nokutedhatedha kwaashoka nda lesha. Shika osha kwathela ndje ndi dhiladhile kombinga yaJehova nokiinima iiwanawa mbyoka ha longo ndje mOohapu dhe, pehala lyokukala tandi dhiladhila kombinga yuupyakadhi mboka ndi na.” — Eps. 61:2.

OOITAALI OOYAKWETU

11. Omolwashike tashi tsu omukumo okukala tu shi kutya hatse atuke tatu idhidhimikile omashongo?

¹¹ Jehova okwe tu pa aamwatate naamwameme muuyuni awuhe, ye tu kwathele twi idhidhimike. Okukala tu shi kutya ‘ooitaali ooyakwetu muuyuni awuhe otaya piti momahepeko ga faathana nogetu,’ ohashi tu shilipaleke kutya katu li otse atuke. (1 Pet. 5:9) Eeno, otatu vulu okukala tu na uushili kutya onkalo kehe tatu iyadha muyo, opu na yalwe ya pita mo nale, noya vula okwiidhidhimika. Shoka osha hala kutya natse wo otatu vulu okwiidhidhimika. — Iil. 14:22.

12. Ongiini ooitaali ooyakwetu taya vulu oku tu kwathela, noshike tatu vulu oku ya ningila? (2 Aakorinto 1:3, 4)

¹² Ooitaali ooyakwetu otaya vulu oku tu kwathela twi idhidhimikile omashongo. Omuyapostoli Paulus okwa li a mono uushili waashoka. Olundji okwa li ha pandula mboka haye mu kwathele sho a li mondholongo yomegumbo, nokuli okwa li he ya tumbula komadhina. Oya li ya hekeleke Paulus, ye mu tsu omukumo noye mu pe ekwatho ndyoka a pumbwa. (Fil. 2:25, 29, 30; Kol. 4:10, 11) Kunena, natse otatu vulu okuningilwa oshinima sha faathana. Uuna twa pumbwa ekwatho twi idhidhimike, aamwatate naamwameme ohaye tu kwathele, nuuna ya pumbwa ekwatho, ohatu ya kwathele. — Lesha 2 Aakorinto 1:3, 4.

13. Oshike sha li sha kwathele omumwameme gwedhina Maya i idhidhimike?

¹³ Aamwatate naamwameme muuyuni awuhe oya li etsomukumo enene komumwameme gwokoRusia, gwedhina Maya. Egumbo lye olya li lya hadhagulwa kaapolisi mo 2020, nolwanima okwa falwa kompangu omolwokuuvithila yalwe kombinga yeitaalo lye. Maya okwa ti: “Pethimbo ndyoka, sho nda li nda gwililwa po pamaiyuvo, aamwatate naamwameme oya li ya dhengele ndje ongodhi nokunyolela ndje oontumwafo, taya shilipaleke ndje kutya oye hole ndje. Onda kala nale ndi shi kutya aamwatate naamwameme oye hole ndje, notu li uukwanegumbo wumwe. Ihe okuza mo 2020, onda kala lela nda tompwa thiluthilu koshinima shoka.”

14. Ongiini tatu vulu okumona mo uuwanawa mekwatho ndyoka hali zi kooitaali ooyakwetu sho tatu idhidhimike? (Tala wo ethano.)

¹⁴ Shoka to vulu okuninga. Sho to idhidhimike, kala wu na ekwatathano ewanawa naamwatate naamwameme. Ino kala wa tila okupula ekwatho kaakuluntugongalo. Otaya vulu okukala “eshigo lyokushiga ombepo negameno kiikungulu.” (Jes. 32:2) Dhimbulukwa kutya ooitaali ooyakweni nayo otaya idhidhimikile omaudhigu. Okuningila gumwe ngoka e li mompumbwe oshinima oshiwanawa, otashi ke ku kwathela wu kale wu na ondjele nokutala ko iinima momukalo omwaanawa sho to idhidhimikile eshongo lyontumba. — Iil. 20:35.

ETEGAMENO LYETU

15. Etegameno lyonakuyiwa olya li lya kwathele ngiini Jesus, nongiini hali tu kwathele? (Aahebeli 12:2)

¹⁵ Jehova okwe tu pa etegameno ndyoka tali ka gwanithwa shili li tu kwathele twi idhidhimike. (Rom. 15:13) Dhimbulukwa nkene etegameno lya li lya kwathele Jesus i idhidhimike mesiku edhigu lyokukalamwenyo kwe kokombanda yevi. (Lesha Aahebeli 12:2.) Jesus okwa li e shi kutya ngele okwa kala omudhiginini, otashi ka yukipalitha edhina lyaJehova. Jesus okwa li ishewe a hala oku ka hangana naHe, noku ka longa pamwe naamwahe mUukwaniilwa womegulu. Sha faathana, etegameno lyoku ka kala nomwenyo sigo aluhe muuyuni uupe waKalunga, ohali tu kwathele twi idhidhimikile uudhigu kehe muuyuni mbuka waSatana.

16. Etegameno olya li lya kwathele ngiini omumwameme gumwe i idhidhimike, noshike wi ilonga kwaashoka a popi?

¹⁶ Ndhindhilika nkene etegameno lyoku ka kala nomwenyo sigo aluhe muuyuni uupe lya li lya kwathele omumwameme gwokoRusia, gwedhina Alla. Omusamane gwe okwa li a mangwa po nokutulwa mondholongo manga a tegelela a ka pangulwe. Sho shoka sha ningwa, Alla okwa ti: “Okugalikana kombinga yetegameno lyetu lyonakuyiwa nokutedhatedha kulyo, ohashi kwathele ndje kaandi kale nda teka omukumo. Ondi shi kutya konima yomaupyakadhi ngaka, uuwanawa otawu ke ya. Jehova ota ka sinda aatondi ye, note ke tu pa ondjambi.”

17. Ongiini tatu vulu okuulika olupandu omolwetegameno lyetu lya kankamena kOmbiimbeli? (Tala wo ethano.)

¹⁷ Shoka to vulu okuninga. Dhiladhila kombinga yonakuyiwa ombwanawa ndjoka Jehova e ku uvanekela. Kala wi iwete wu li muuyuni uupe waKalunga nokudhiladhila komalaleko nuuyamba ngoka tatu ka mona. Ihe omaudhigu kehe tashi vulika tu taalele ngashingeyi “ogopakathimbo noinaga kwata miiti.” (2 Kor. 4:17) Shimwe ishewe, ninga ngaashi to vulu wu lombwele yalwe kombinga yeitaalo lyoye. Dhiladhila owala nkene onkalamwenyo ondhigu kuyo, sho taya ungaunga nomaupyakadhi muuyuni mbuka waSatana nokaapu na okutseya kombinga yelalakano lyaKalunga li nasha nonakuyiwa. Nokuli nonando owa kundathana owala nayo paufupi, oto vulu okupendutha ohokwe muyo mokupopya kombinga yetegameno lyUukwaniilwa.

18. Omolwashike tatu vulu okwiinekela momauvaneko gaJehova?

¹⁸ Konima sho i idhidhimikile omashongo ogendji nomupondo, Job okwa lombwele Jehova a ti: “Onda tseya kutya ayihe oto yi vulu; kaku na shoka tashi ku nyenge.” (Job 42:2) Ngaashi Job i ilongo, kapu na shoka tashi imbi Jehova a gwanithe po elalakano lye. Oshinima shoka otashi vulu oku tu koleka, sho tatu idhidhimike. Natu shi thaneke ngeyi, dhiladhila ando wu wete omukiintu ta ehama, nokwa teka omukumo molwaashoka oondohotola odhindji inadhi vula oku mu kwathela. Ihe sho ndohotola ngoka e na owino noku shi okwiinekelwa a popi kutya uupyakadhi owu li peni, nokuyelitha nkene ta vulu okukwathela omukiintu ngoka, omukiintu ngoka okwa kala a pepelelwa, nokuli nonando osha li tashi ka pula ethimbo opo a aluke. Ngashingeyi ota vulu okwiidhidhimika, molwaashoka oku na etegameno kutya ota ka aluka. Momukalo gwa faathana, einekelo lyetu metegameno lyoParadisa ndjoka tayi ya, ohali tu kwathele twi idhidhimike.

19. Oshike twa pumbwa, opo tu vule okwiidhidhimika?

¹⁹ Ngaashi twa zi noku shi kundathana, Jehova ohe tu kwathele twi idhidhimikile omashongo okupitila megalikano, mOohapu dhe, mooitaali ooyakwetu nosho wo metegameno lyetu. Ngele otwa longitha omasiloshimpwiyu ngaka pakuudha, Jehova ote ke tu kwathela twi idhidhimikile omaupyakadhi ngoka tashi vulika tu taalele, sigo oosho omaupyakadhi gomuuyuni waSatana taga ka kala kaage po we. — Fil. 4:13.