O-wifi yoJW ndjoka hayi kwathele aantu ya tape iileshomwa nuuvidio nuupu

Iileshomwa nuuvidio mboka Oonzapo dhaJehova hadhi mono okupitila kepandja lyokointaneta ngashingeyi, evi to yele. Ihe momahala ogendji muuyuni, oshi na ondilo okulongitha ointaneta. Onkee ohashi kala oshidhigu kaamwatate miitopolwa mbyoka oku yi longitha. Yamwe ohaya zi momahala moka ointaneta hayi kala tayi gu mo mombepo ethimbo nethimbo, tayi ende kashona nenge kaayi mo nandonando.

Ihe aamwatate naamwameme oyendji ngashingeyi, otaya vulu okutapa iileshomwa yetu nuuvidio, nonando mpoka ye li kapu na omakwatathano gopaintaneta. Ohashi ende ngiini mbela?

Opu na o-wifi yoJW ndjoka hayi pewa omagongalo ngoka ge li miitopolwa moka ointaneta tayi kanda omapunya. Ehangano lyOonzapo dhaJehova ohali landa oo-wifi ndhoka komahangano galwe. Oshikondo shOokompiuta moBetel ohashi tula moo-wifi ndhoka oopolohalama, iileshomwa yetu nosho wo uuvidio mboka wu li kepandja, jw.org. O-wifi yimwe oyi na N$1 248.00 lwaampo.

Aamwatate naamwameme shampa ye li pOshinyanga shUukwaniilwa, ohaya tula miikwaelektronika yawo onomola yo-wifi yoJW, opo ya tape iileshomwa nuuvidio. Oshikwaelektronika kehe shoka hashi yi kointaneta kutya nduno oshikulu nenge opo sha kondo ohashi vulu okutapa iileshomwa nuuvidio. Ngele egongalo kali na omakwatathano gopaintaneta, iinima iipe mo-wifi yoJW ohayi ya mo ngiini? Omwedhi kehe Oshitayimbelewa ohashi tapele iileshomwa nuuvidio uupe muu-USB. Opo nduno uuvidio niileshomwa mbyoka ohayi ka tapelwa mo-wifi yoJW. Oka-usb kamwe oke na N$ 66.00 lwaampo.

O-wifi yoJW oya kwathela ngiini aamwatate? Omumwatate Nathan Adruandra, ngoka e li omuvali, noha zi kOrepablika yoPaudemokoli yaKongo, okwa ti: “Onda kala tandi kondjo ethimbo nuule ndi tape oshinyandwa: ‘Jehova ongoye ndi inekela’ nosho wo Dhimbulukweni omukiintu gwaLot. Ashike onda hulile muunyengwi, naashono osha teya ndje omukumo. Ngashingeyi otandi vulu okutapela uuvidio mongodhi yandje, shoka she tu kwathela tse aavali tu longe oyana yetu nuupu.”

Omumwatate ngoka ha kwathele omagongalo moNigeria nkene ge na okulongitha o-wifi yoJW, okwa ti: “Aamwatate ohaya ti kutya o-wifi ndjoka oyi li omagano gi ikalekelwa ga za kuJehova. Oya nyanyukwa nayi sho haya vulu okutapa nuupu iileshomwa nuuvidio, iinima mbyoka hatu longitha sho tatu longo aantu.”

Sho tatu popi ngeyi oo-wifi dhi li 1 700 odha tuminwa nale aamwatate momagongalo ngoka ge li moAfrika, Oceania nosho wo koAmerika lyokUumbugantu. Natango omalongekidho oge li metifa opo oo-wifi dhi tuminwe komagongalo ogendji muuyuni. Mbela oshimaliwa shoku dhi landa ohashi zi peni? Omomayambidhidho giilonga yomuuyuni awuhe, ngoka haga gandjwa okupitila kepandja lyetu lyokointaneta ko-donate.jw.org. Otwa pandula unene kombepo yoye yokugandja nehala ewanawa.