MWAHA 56
Mwene Oopacerya A Isarayeli
NKAMOONEENI Samuwele amiinelaka makhurwa vamuruni wa mulopwana mmohoowo. Seeriwano hiihaa othoonyerya wii muchuuwo oothanliwa wii akhale mwene. Yehova aahilamula wii Samuwele amiinele makhurwa vamuruni wa Saawulu. Ti makhurwa avameekhaaya, awunkhela.
Saawulu hoona wii aanaphwanela okhala mwene. ‘Ka a nihimo na Penyamini, nikhaani na Isarayeli,’ aahi owo wa Samuwele. ‘Mano ntakhara heeni oniiryawe kinahaala okhala mwene?’ Yehova aahimusivela Saawulu nthowa nawii owo haisoona okhala mutokotoko ni oochuneya, Va nthowa nla aahimuthanla wii akhale mwene.
Nyenya, Saawulu haari ohaawa, naari mwaamukhaani. Aarwela mu echoko yooreela, nave aari mulopwana oorekama ni ooreera. Aari oorekama vakhiviru-khiviru ntata nimoha ni emeya waapwaha akina oothene mu Isarayeli! Aaritho mulipa oochimaka aphaama ni oochichimana vancipale. Achu yaahihakalala wii Yehova aahimuthanla Saawulu okhala mwene. Yaahikhuwela: ‘Akhale ni okumi mwenoowo!’
Amwiicani a Isarayeli yaanapwahiheryaru okhala akuru. Nlelo yaaneeriharu sookachamiha sincipale wa aIsarayeli. Mwawaakuveya vachuli va Saawulu akuhiweene okhala mwene, asinaAmooni yaahirwa owanano. Nyenya Saawulu aahithukumanya muloko wakhoco mutokotoko nave aahaapwaha asinaAmooni awo. Achu yaahihakalala okhala ni Saawulu ntoko mwenaaya.
Mu ovira wa iyaakha, Saawulu aahaakuxerya aIsarayeli waapwaha vancipale amwiicani aya. Owo aarino mwaana mmoha akuru, awiichaniwa Yonatani. Nave Yonatani aahimukhaviherya Isarayeli opwaha ikhoco sincipale. Amwiicani oopwahaxa yaari asinaFilisti. Nihiku nikina, masana ancipale a asinaFilisti yaahirwa owana ni aIsarayeli.
Samuwele aahilamula wii Saawulu awehererye ophiyerya ophiya wawe, wii aveleele ephepa naari yooveleela wa Yehova. Nyenya Samuwele aahilekela. Saawulu aahoova wii asinaFilisti anahaala opacerya ekhoco, nave aahiveleela ephepa mwaneenaawe. Vanonto voophiya Samuwele, aahimuleela Saawulu wii owo haaiwelenle. ‘Yehova onahaala omuthanla mukina wii akhale mwene a Isarayeli,’ aahi Samueli.
Vachuli vaya, Saawulu aahikookelatho ohiiwelela. Samuwele aahi wa yoowo: ‘Ti waphaama omwiiwelela Yehova opwaha omvaha epucepuche yaphaamaxa. Okhala wii hoommwiiwelenle Yehova, owo hookhapelelaaniru okhala mwene a Isarayeli.’
Va yeeyo ninnahuseryavo nihuseryo naphaama. Enathoonyerya sa mummo oryaaya woochuneya omwiiwelelaru Yehova. Enathoonyeryatho wii muchu aphaama ntoko Saawulu, onnawerya orukunuwa okhala oonanara. Hinnachuna orukunuwa okhala oonanara, ninnachuna?
1 Samuwele ikapitulu 9 ophiyerya 11; 13:5-14; 14:47-52; 15:1-35; 2 Samuwele 1:23.