Koophwanya Okhapeleleya Weeparipari Orweela wa Omuroromela Yehova

MUKHALELO KIMUSUWENLAAKA YEHOVA NI OMUROROMELA YOOWO

Kiyariwe mu 1948 muceche mukhaani wo Nixeriya. Mu elukuluku yeele, tiiyu aka Mustafa, munna amwaamukhaani a apapa aka, ni Wahapi, munnaka a mutokweene, yaapatisiwa ntoko Anamoona a Yehova. Vaavaa kaaryaakano iyaakha thanu naxexe, apapa aka yaahikhwa. Kaahitepa othanana. Wahapi aahikileela wi nnanwerya owoona wanaawiili apapa yaviihiwa mookhwani. Masu yaala oohakararya yaakiceenyerya omuhuserya Piipiliya. Kaahipatisiwa mu 1963. Asinnaka akina araru yaapatisiwa tho.

Mu 1965, kaahikhala vamoha ni munnaka a mutokweene Wilson o Lako nave kaahipuha okhala vamoha ni mapiyoneero makina ookilaatheya mmuloko wo Ikipopi. Ohakalala ni mvai aya waahikiceenyerya nave, mu Yaneru a 1968, miyaano tho kaahikhala piyoneero.

Munna mmoha aarumeela Opeteli, Albert Olugbebi, aahirehererya muthukumano wa vameekhaaya ni hiyaano amiravo vooloca sa othowa wa mapiyoneero avameekhaaya makupa oomoko o Nixeriya. Nlelo kinnuupuwela nceenyeryo noolipiha na munna Olugbebi: “Nyuwaano mwa amiravo nave munanwerya opharihela elukuluku ni ikuru sanyu ntakhara Yehova. Wookhalavo muteko mutokweene wi mphare weiwo!” Kaanachuna okhala ntoko Yesaya ni oya weiwo Yehova aachuneiye wi kiyewo, mwa yeeyo kaahiiveleela wi kirumeele ntoko piyoneero avameekhaaya.—Yes. 6:8.

Mu Maiyu a 1968, kaahiwompwa wi kirumeele ntoko piyoneero avameekhaaya mu epooma yo Kano, makupa oomoko o Nixeriya. Eyo yeeren’ye variyari va Ekhoco ya Piyafra (1967-1970). Ekhoco yeele yaahitannya makacamiho mancipale ni okhwa makupa oomoko o Nixeriya nave yaahilapuwela makupa onakhumawo nsuwa o Nixeriya. Munna mmoha aarino yoolakelela yaphaama aaheererya okilekecha wi kihiyewo. Nave miyaano kaahi: “Koothamalela ntakhara wuukhuwa wanyu. Nyenya waakhanle wi Yehova onnachuna wi miyaano kirumeele mu etesikinasawu yeela, nkaanono minikwa wi owo onahaala okhala ni miyaano.”

NIMUROROMELAKA YEHOVA MU EPOOMA YAANANARIHIWE NI EKHOCO

Yaari yoothananiha woona yeeyo yeeren’ye o Kano variyari va ekhoco. Ekhoco yaahinanariha epooma yeele etokotoko. Vaavaa naaryaahu mmuteko woolaleerya, ikwaha ikina naanoona miruchu sa achu yaawo yiiphiwe variyari va ekhoco. Naamwi saariwo miloko mincipale o Kano, anna ancipale yaahichawa. Alaleeryi yaahanle yaari awaacamela 15, nave yaari awoova ni ooceecheya. Anna ni arokora yaala yaatepa ohakalala vaavaa miyaano ni mapiyoneero makina 5 naaphin’yaahu. Hiyaano naahaalipiha yaawo nave awo yaahikhala phaama. Naahaakhaviherya otikitherya yookhovelela yaphaama yoomunepani ni okookela orumiha irelatooriyu sa muteko woolaleerya ni ovekaka soolaleeryiwa Opeteli.

Hiyaano, mapiyoneero avameekhaaya, naahipacerya ohuserya elocelo Hausa. Vaavaa yiiwaaya muchaka wa Omwene mu elocelo aya, achu ancipale yaakhala weiwo yaananiwiriyana. Nyenya, achu yaawo yaari mu ekerexa yawunlaana mmukuma yoole, hiyaasiveliwa ni muteko ahu woolaleerya, mwawiihiiha naaphwanela okhalano ekaasoope. Mu ekwaha ekina, miyaano ni nthamwene aka naahiikariwa ni mulopwana mmoha apharenle mwaalo. Naatepa ochimaka ompwaha yoowo nave owo haawenrye oniphwanya! Naamwi nihoolelaka mikhalelo sawoopiha, Yehova aahineeriha ‘okhala ookhapeleleya’ nave waaceereryeya wa alaleeryi waanaya vahoolo. (Sal. 4:8) Olelo, alaleeryi opwaha 500 annarumeela mmiloko 11 sa o Kano.

NAAHIIKARIWA O NIXER

Ohoolo waya mu Akostu a 1968, kimanle okhala mu miyeeri vakhaani o Kano, kaahirumihiwa o Niamei, epooma etokweene yo Nixer, vamoha ni mapiyoneero makina meeli avameekhaaya. Moohilekela naahoona akaneenaahu wi o Nixer, makupa onaneelawo nsuwa o Afrika, nipuro nimoha wa mapuro yaawo oovihaxa a elapo yoothene. Ohiya pahiru wiikhoveleliha ni oviha, naaphwanela tho ohuserya efaransa, yeeyo eri elocelo ya weiwo. Naamwi nihoolelaka makacamiho yaawo, naahimuroromela Yehova nave naahipacerya olaleerya vamoha nnikhuuru nikhaani na alaleeryi yaakhala weiwo. Elukuluku vakhaani ohoolo waya, mwawooneya achu oothene yaakhala o Niamei yaahimwaakhela liivuru A Verdade Que Conduz a Vida Eterna. Ophiyerya wi achu yaananeemexa mmuseweni wi eniveke liivuru!

Mu elukuluku vakhaani naahiiwexexa wi alamuleli hiyaasiveliwa ni Anamoona a Yehova. Mu Yulyu a 1969, naahikhalano muthukumano ahu woopacerya wa ekulucu nave achu yoonenle yaari 20. Naahihakalala vancipale ntakhara mwaha wa opatiso woona wi alaleeryi eeli a vanipuroni yaahaala opatisiwa. Nyenya mu nihiku noopacerya na muthukumano wa ekulucu, yaahiphiya mapilisa nave yaahimaaliha muthukumano. Mapilisa yaahikikuxa vamoha ni mapiyoneero makina avameekhaaya ni ooweherya a ekulucu enikeriha weiwo yaalapaayawo. Emanle onipakela makoho, awo yaahinlamulela wi nikookelewo mu nihiku noocharela. Woona wi nikacamiho naahaala otepa, naahilakelela opaka mwaha wa opatiso vaate va munna mmoha, nave ohoolo waya opaka opatiso mmuhice mmukhalelo woovitheya.

Isumana vakhaani ohoolo waya, alamuleli yaahikiikara mu elapo yeele vamoha ni mapiyoneero makina avameekhaaya awaakhwana 5. Awo yaanivanhe mahiku meeli wi nikhumewo, nave hiyaano naaphwanela waavya ikhorowa sahu wi nlivele ekaaro yeeyo naahaalaahu owela. Hiyaano naahipaka yeeyo nave naaya Opeteli yo Nixeriya, weiwo naakhenlaahuwo itesikinasawu ivyaani.

O Nixeriya, miyaano kaahithanleliwa muceche wo Orisumpare, weiwo kaaryaakano ohakalala wa olaleerya ni weeciha soohuserya sa Piipiliya vamoha nnikhuuru nikhaani na alaleeryi naakhala weiwo. Nyenya, imanle ovira miyeeri mithanu nammoha, Epeteli yaahikiwopa wi kikookele o Nixer meekhaaka. Voopacerya, kaahikhala ootikhiniheya ni awuukhuwa. Nyenya miyaano kaanachuna ni murima woothene owoona wanaawiili anna o Nixer!

Kaahikookela o Niamei. Nihiku noocharela kimanle ophiya, mulopwana mmoha aamweeca nakoso o Nixeriya aahisuwela wi kaari Namoona a Yehova nave aahipacerya okipakela makoho vooloca sa Piipiliya. Hiyaano naahihuserya vamoha nave amanle ohiya yookhovelela ya omulya soona ni ohapaliwa, aahipatisiwa. O Nixer kaahihakalala olaleerya vamoha ni anna makupa oohiyanahiyana a elapo ni woona mukhalelo achu yeemereryaaya eparipari moovira wa iyaakha. Vaavaa kaaphin’yaaka weiwo, pahiru yaariwo Anamoona 31 nave vaavaa kaakhummaaka weiwo, yaariwo 69.

“HANNASUWELA PHAAMA MUKHALELO MUTEKO WOOLALEERYA ONEECAAYA O KINE”

Mu Tesempuru a 1977, kaahikookela o Nixeriya wi kaakhele ovyakiha. Nimanle waakhela ovyakiha wa isumana raru, muhooleli a Nikhuuru na Efiliyale, Malcolm Vigo, aahikivahererya ekaarata emoha ya Opeteli yo Sera Leyowa. Anna yaanamwaavya munna yoowo aari piyoneero, aarino ekumi yaphaama, aari muciye ni aaloca Enklesi ni Efransa wi arumeeleke ntoko ooweherya a ekulucu o Kine. Munna Vigo aahikileela wi ovyakiha yoowo kaakhenlaaka waari ntakhara murici yoowo. Nave owo aahiloca: “Wuupuwelele phaama ohaakumve weemererya.” Mu elukuluku ene yeeyo, kaahaakhula: “Woona wi ti Yehova onakirumiha, kinahaala oyawo.”

Kaahiya o Sera Leyowa nave kaahaaphwanya anna a nikhuuru na efiliyale. Nave mmoha a yaawo aahiloca: “Hannasuwela phaama mukhalelo muteko woolaleerya oneecaaya o Kine.” Naamwi waari murici wa efiliyale okhapelela muteko woolaleerya o Kine, hiwaari wooweryeya wa yaawo oloca ni anna a weiwo nthowa nawi mukhalelo wa epoliitika waahitepa onanara. Ophiyerya tho wi efiliyale ikwaha sincipale yaaheererya omurumihela o Kine aweemelela a efiliyale, nyenya hiyaawenrye. Wa nthowa na yeeyo, yaahikiveka wi kiye epooma etokweene yo Kine, Konakri, ni weererya oveka weemereryiwa wa alamuleli wi kikhale weiwo.

Vaavaa kaaphin’yaaka o Konakri, kaahiya o ekupweete enaweemelela achu o Nixeriya wi kiloce ni murummwa. Kaahimuleela owo wi kinachuna olaleerya o Kine. Owo aahikileela wi nkaaphwanela oyawo ntakhara wi yaari yawoopiha. Kaanwerya owaleliwa naari ophiyerya okeerela echu yawoopiha. Owo aahiloca: “Okookele o Nixeriya wi walaleeryeke weiwo,” nyenya miyaano kaahaakhula: “Kiri oolakelela okhala wenno.” Mwawiihiiha, owo aahirepa ekaarata wa Ministru mmoha o Kine wi akikhaviherye. Voocharela, ministru aahikaakhela phaama.

Elukuluku vakhaani ohoolo waya, kaahikookela Opeteli yo Sera Leyowa nave kaahaaleela anna wi alamuleli aakeemererya wi kikhaleke o Kine. Anna yaatepa ohakalala vaavaa yoonnaaya mukhalelo Yehova aakireeliheiye!

Variyari va eyaakha ya 1978 ni 1989, kaarumeela ntoko ooweherya a ekulucu o Kine, o Sera Leyowa nave tho ntoko mukhaviheryi a ooweherya a ekulucu o Liperiya. Omapacereryo kaaniiceliwa mwawuuluulela. Ikwaha ikina eyo yaaneereya mmapuro oorakamela. Nyenya ikwaha soothene anna yaanapaka owetha waya wi ekikerihe oxipitali.

Ekwaha emoha, kaatepa wiiceliwa malaariya nave kinakhuma miyuuku. Vaavaa kaapenunwaaka kaahisuwela wi anna yaahipacerya ovaanela vooloca sa nipuro yaachunaaya okivithawo! Naamwi ekumi aka yaakhala va yawoopiha, ikwaha sincipale miyaano nkintonko wuupuwela ohiya mirici saka. Nave ophiyerya olelo koolekecheya wi pahiru ti Yehova onawerya ovaha okhapeleleya waphaamaxa okhanle, woona wi naamwi nikhwile owo onahaala oniviiha mookhwani.

KIMURUMEELAKA YEHOVA VAMOHA NI MWAARAKA

Mu 1988, kaahimusuwela Torika, piyoneera mmoha awiiyeviha ni oolipa mmakupa oomunepani. Naahithelana nave owo aahipacerya orumeela vamoha ni miyaano mmuteko wa weeceeca. Torika oolapa mwakuru mmuteko ahu wa weeceeca nave aari oorehereya opaka owetha wawe ntakhara Yehova. Mmikwaha sahu nixekuryaka miloko, naaneeca ni meco ophiyerya ikilomeeturu 25 ntenxe maphuta ahu. Vaavaa naavyekuryaahu miloko seiyo saari ocai, naanaapharihela atransporti vyakala yaaphwanyeya, eyo yaanavolowela opaka mikwaha mitokweene mmisewe sa matope nave sisaren’ye malici.

Torika toolipaxa murima. Ntoko yootakiherya, ikwaha ikina naanapaka mikwaha niviraka mmakupa yaawo waasaren’yemo ikonya. Variyari va mukwaha wa mahiku mathanu, hiyaano naahisuwela wi eponti ya miri yaahinanara nave naaphwanela olapuwa muhice yoole niwenle nikula. Nave vaavaa Torika eemenleiye wi akhume mu nikulani, aahimorela mmuhiceni, yoowo waari wawiixa. Hiyaano hinaasulano weekha, nave mmuhice yoowo saakhalamo ikonya. Moohakalaliha, amiravo akina yaahipwinela mmuhice yoole nave yaahiwerya omoopola. Nyenya emanle weereya yeela, variyari va elukuluku yincipale naakhalano muupuwelo wawuukhula, naamwiihiiha, hiyaano naatitelela mmurici ahu.

Omapacereryo wa eyaakha ya 1992, hiyaano naahikhala ootikhiniheya vaavaa naasuwenlaahu wi Torika aahirupala. Naaniikoha waakhanle wi naaphwanela ohiya orumeela ntoko mapiyoneero avameekhaaya. Nave voocharela naahuupuwela: “Yehova oonivaha yamahala!” Mwa yeeyo hiyaano naahilakelela omuchuwa mwanihu ni nsina nawi Jahgift (enataphulela yamahala ya Yehova). Ovinrevo iyaakha xexe nimanle omuyara Jahgift, naahimuyara munnawe Eric, mweeparipari aniihu eeli yamahala ya Yehova. Mu elukuluku aya Jahgift oorumeela mu ekupweete yootaphulela yo Konakri, nave Eric murummwa oorumeela.

Voocharela Torika aahihiya orumeela ntoko piyoneera avameekheiye, nyenya aahititelela orumeela ntoko piyoneera ookilaatheya, naamwi aaphuwaka aniihu. Nnikhaviheryo na Yehova, miyaano kaahititelela orumeela ntoko piyoneero avameekheiye. Aniihu emanle wunnuwa, Torika aahikookela orumeela ntoko piyoneera avameekheiye. Vano hiyaano nnarumeela ntoko mamisiyonaariyo o Konakri.

EHIME YA OKHAPELELA WEEPARIPARI

Ilukuluku soothene kaaya weiwo Yehova aakirumiheleiyewo. Ikwaha sincipale miyaano ni mwaaraka naahoona okhapelela ni mareeliho awe. Omuroromela Yehova woonoopola wa sawuukhula seiho sinaavolowela yaawo anaroromela ichu soomwiilini. Miyaano ni Torika noohuserya mukhatiihu wi Yehova “Muluku a nivuluxo nahu” ehime ya okhapelela weeparipari. (1 Math. 16:35) Miyaano koolekecheya moomalela wi oothene yoole onamuroromela yoowo onahaala ‘okhapeleliwa mmurupani mwa ekumi ya Apwiya’ Yehova.—1 Sam. 25:29, BNM.