MWAHA 23
Sooloha Sa Farawo
WOOVIRAVO iyaakha piili, seiyo Yoosefe aapwahiheryiiye mu kariposo. Mulipa muhooleli wa soowurya owo haamuupuwelenle owo. Ovinyerya, vaavaa, mu ohiyu okina, Farawo aahikhala ni sooloha piili sa vameekhaaya, nave ahichuna osuwela seiyo saataphulelaaya. Mano munnamoona owo va mummo onakoneliiye? Woxixelwaaya, Farawo aahiwiichana alipa a miruku awe nave aahaaleela sa seiyo aalonhiiye. Nyenya awo hiyawenrye omuthoriherya sootaphulela sa sooloha iho.
Vanonto vookuchula vaya, mulipa muhooleli wa soowurya owo ahuupuwelela sa Yoosefe. Aahi wa Farawo: ‘Vaavaa kaaryaka mukariposo, aahikhalamo mulopwana yoowo aawerya ootaphulela sooloha.’ Farawo mwawaakuveya aahilamula wii Yoosefe aruuhiwe okhumela o kariposo.
Farawo aahimuthoriherya Yoosefe sooloha sawe: ‘Kaahoona imope seethiyana thanu napiili sooneneva ni sooreera. Vachuli vaya kaahoona imope seethiyana thanu napiili sawooca vancipale nave iri makhuveene. Nave sawooca iho saahimirya sooneneva iho.
‘Mu yooloha yanaawiili, kaahoona makala mathanu nameeli ameele oosareya ni ookhomaala va mutathi mmoha. Vachuli vaya, kaahoona makala mathanu nameeli ameele ooyeveela ni oonyaalela. Nave makala ooyeveela awo yaahipacerya omirya makala mathanu nameeli awo aphaama.’
Yoosefe aahi wa Farawo: ‘Sooloha soopiili iho inataphulela echu emoha-moha. Imope seethiyana thanu napiili sooneneva va ni makala mathanu nameeli ameele oosareya sintaphulela iyaakha thanu napiili, nave imope seethiyana thanu napiili sawooca ni makala ooyeveela sintaphulela iyaakha ikina thanu napiili. Onahaala okhalavo iyaakha thanu napiili sa soolya sincipale mu Yiikuputu. Vachuli vaya onahaala okhalavo iyaakha thanu napiili mu seiyo sini sinnuweke soolya sa vakhaani.’
Ovinyerya vaavaa Yoosefe aahi wa Farawo: ‘M’muthanle muchu amiruku nave mmwiiyaatherye othukumanyerya soolya mpuwa mwa iyaakha thanu napiili iha saphaama. Hiihaa, achu hekhala ni etala mu iyaakha thanu napiili iho soonanara sini sitcharelevo, vaavaa soohaca iniryaaya ikhale soothowa.’
Farawo aahisiveliwa ni eyuupuwelo eyo. Nave aahimuthanla Yoosefe wii athukumanyerye soolya mukhupini. Vachuli va Farawo, Yoosefe aahikhala muchu oocuneyaxa mu Yiikuputu.
Iyaakha thanu nararu vachuli vaya, mpuwa mwa etala, Yoosefe aahiwoona alopwana amoori ephiyaka. Mano munnasuwela wii yaari taani? Yaari asuulupalaawe 10. Tiithaaya Yaakopo aahaaruma o Yiikuputu, nthowa nawii o Kaanani hiwaariwo yoolya. Yoosefe aahaasuwela asinneeni, nyenya awo hiyaamusuwenle. Mano moosuwela nthowa nene? Nthowa nawii Yoosefe aari vano ainunweene nave aari awanreene mohiyana.
Yoosefe aahuupuwela wii aryeene mwammiravo, aahiloha wii asinneeni yaahaala okokhora vamiithoni vawe. Mano munnupuwela eyo? Va nthowa nenla, Yoosefe aahoona wii Muluku aahimurumiha o Yiikuputu, mu nthowa naphaama. Mano munnupuwela wii Yoosefe eenre eheni? Hinkoni noone.
Mapacereryo 41:1-57; 42:1-8; 50:20.